ꓡꓴ-ꓘ ꓕꓳ ꓶ 24ꓽ35-48

Wednesday, April 15, 2020
  ꓖꓳ ꓡꓱ ꓢꓲ ꓬꓲ ꓪ ꓠꓬꓲꓽ ꓣꓳ ꓠꓬ ꓙ ꓖꓴ ꓗꓪ ꓔꓳꓹ ꓜꓳ_ ꓟ_ ꓐꓰ꓾ ꓫꓪ ꓒꓵꓼ ꓦꓶꓹ_ ꓕꓯ ꓬꓲ ꓪ ꓬꓲ ꓔꓯ ꓮ ꓡꓲ ꓡꓳꓸ ꓢꓷ ꓡꓰ_ ꓟ ꓮ ꓙꓵꓽ ꓬꓲ ꓪ ꓔꓯ ꓚ ꓟꓸ ꓖꓶ_ ꓡꓳ꓿
 ꓬꓲ ꓪ ꓖꓳ ꓡꓱ ꓫ ꓕꓱ ꓔꓬ_ ꓕꓯ꓾ ꓬꓰ-ꓢꓴ ꓬꓲ ꓚꓲ ꓛꓬ ꓠꓬ ꓬꓲ ꓪ ꓗꓳ ꓡꓳ ꓗꓪ ꓦꓰꓼ ꓡ ꓢꓲ ꓬꓲ ꓪ ꓔꓯ꓾ ꓠꓴ ꓪ ꓢꓲ ꓡꓲ_ ꓐꓰ ꓔꓬ꓾ ꓐꓯ_ ꓡꓳ꓿
 ꓖꓳ ꓡꓱ ꓥ_ ꓟꓲ ꓬꓲ ꓪ ꓦꓲꓸ ꓡꓰ ꓢꓲ꓾ ꓫꓵꓻ ꓗꓴꓸ ꓫꓵꓻ ꓦꓻ ꓥ ꓝꓲ ꓞꓹ ꓠꓬꓲ ꓮ ꓘꓶ ꓙꓳꓺ_ ꓡꓳ꓿
 
 ꓬꓰ-ꓢꓴ ꓡꓰ ꓬꓲ ꓪ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓠꓴ ꓪ ꓮ ꓫꓵ ꓪꓴ ꓠꓬꓲ ꓓꓵ ꓙ ꓫ_ ꓡꓳꓺꓽ꓾ ꓠꓴ ꓪ ꓠꓲꓹ ꓟ ꓗꓪ ꓮ ꓡꓲ ꓗꓷ ꓡꓰ ꓠꓬꓲ ꓕꓱ ꓡꓱ ꓓꓵ ꓙ ꓟꓬꓽ_ ꓡꓳꓺꓽ꓿
 ꓥꓪ ꓡꓯ ꓒꓯꓹ_ ꓐꓰ ꓥꓪ ꓛꓲ ꓒꓯꓹ ꓗꓪ ꓡꓳꓸ ꓠꓬꓲ꓿ ꓥꓪ ꓚꓲ ꓛꓬ ꓥ ꓡꓳ꓿ ꓥꓪ ꓔꓯ ꓫꓱꓹ ꓠꓬꓲ ꓡꓯ꓿ ꓫꓵꓻ ꓗꓴꓸ ꓫꓵꓻ ꓦ ꓠꓽ꓾ ꓧꓪꓽ_ ꓐꓰ ꓪꓳꓽ ꓔꓳ ꓟꓽ ꓙꓳ꓿ ꓥꓪ ꓙꓳ_ ꓟ ꓠꓽ ꓠꓴ ꓪ ꓟꓳ_ ꓡꓳ꓾ ꓐꓯ_ ꓡꓳ꓿
 ꓕꓱ ꓟ ꓐꓯ ꓓꓳ ꓡꓰ ꓠꓬ꓾ ꓬꓲ ꓡꓯ ꓒꓯꓹ_ ꓐꓰ ꓛꓲ ꓒꓯꓹ ꓬꓲ ꓪ ꓔꓯ ꓟꓳꓸ ꓖꓶ_ ꓡꓳ꓿
 
 ꓬꓲ ꓪ ꓠꓬ ꓗꓹ ꓛꓲ ꓠꓬꓲ ꓟꓽ ꓙꓵꓻ ꓐꓰ ꓗꓷ ꓡꓰ ꓢꓲ ꓓꓵ ꓙ ꓟꓶ ꓔꓬ_ ꓕꓯ꓾ ꓬꓰ-ꓢꓴ ꓬꓲ ꓪ ꓔꓯ꓾ ꓠꓴ ꓪ ꓕꓱ ꓗꓪ ꓮ ꓫꓵ ꓜꓽ ꓓꓴ ꓟꓽ ꓙꓳ ꓡꓺꓽ꓾ ꓐꓯ_ ꓡꓳ꓿
 ꓖꓳ ꓡꓱ ꓢꓲ ꓬꓲ ꓪ ꓠꓬ ꓬꓲ ꓔꓯ ꓥꓪꓸ ꓛꓴꓻ ꓕꓲ ꓒꓬꓸ_ ꓐꓰ ꓹꓐꓬꓽ ꓕꓲ ꓛꓱ] ꓖꓶ_ ꓡꓳ꓿
 ꓖꓳ ꓡꓱ ꓠꓬ ꓬꓲ ꓣꓴ ꓢꓲ ꓬꓲ ꓪ ꓟꓲ ꓙꓬ ꓗꓪ ꓜꓽ_ ꓡꓳ꓿
 
 ꓬꓰ-ꓢꓴ ꓠꓬ ꓬꓲ ꓪ ꓔꓯ꓾ ꓧꓶ ꓕꓯ ꓥꓪ ꓠꓴ ꓪ_ ꓐꓰ ꓔꓬ ꓢꓰꓽ ꓕꓯ꓾ ꓠꓴ ꓪ ꓔꓯ ꓐꓯ ꓖꓶ_ ꓟ꓾ ꓟꓳ-ꓫꓲ ꓙꓵꓽ ꓗ_ ꓐꓰ ꓟꓷ ꓠꓷꓹ ꓝ ꓢꓴ ꓕꓳ ꓶ_ ꓐꓰ ꓟꓴꓽ ꓖꓪꓽ ꓕꓳ ꓶ ꓗꓪ꓾ ꓥꓪ ꓔꓯ ꓐꓯ ꓬꓯꓼ_ ꓟ ꓐꓯ ꓘꓶ ꓠꓬ ꓮ ꓙꓵ ꓐꓲꓺ ꓡ ꓠ ꓗ_ ꓡꓳ꓾ ꓐꓰ ꓥꓪ ꓐꓯ_ ꓟ ꓐꓯ ꓘꓶ ꓠꓬ ꓕꓱ ꓟ ꓥ ꓡꓳ꓾ ꓐꓯ_ ꓡꓳ꓿
 ꓖꓳ ꓡꓱ ꓢꓲ ꓢꓲ ꓫꓬ ꓕꓳ ꓶ ꓔꓯ ꓙꓽ ꓜꓲꓼ ꓡꓰ ꓠꓹ ꓟ꓾ ꓬꓲ ꓡꓰ ꓬꓲ ꓪ ꓙꓽ ꓠꓲꓹ ꓔꓯ ꓒꓴꓺ ꓖꓶ_ ꓡꓳ꓿
 
 ꓝꓮꓲ ꓬꓲ ꓡꓰ ꓬꓲ ꓪ ꓔꓯ꓾ ꓙꓲ-ꓢꓴ ꓠꓽ ꓫ ꓙꓵ ꓠ ꓗꓹ ꓟ_ ꓐꓰ꓾ ꓢꓽ ꓠꓬꓲ ꓕꓲ ꓠꓬꓲ ꓠꓬ ꓫꓵꓻ_ ꓗꓪ ꓐꓰ ꓢꓯꓸ ꓬꓲꓼ ꓡ ꓠ ꓗꓹ ꓟ_ ꓐꓰ꓾
 ꓝꓮꓲ ꓬꓲ ꓟꓬꓱꓺ ꓗꓪ ꓐꓰ ꓓꓵ ꓙ ꓒꓳꓹ ꓡꓰꓼ ꓡ ꓢꓲ ꓝꓴꓲ ꓖꓽ ꓖꓶ ꓟꓶ_ ꓟ ꓟꓸ ꓟꓲ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓞꓳ ꓫꓵꓽ ꓞꓳ ꓙꓰ ꓮ ꓙꓵ ꓔꓯ ꓚꓺ ꓖꓶ ꓠ ꓗ_ ꓡꓳ꓾ ꓐꓰ ꓕꓳ ꓶ ꓗꓪ ꓐꓳ ꓔ_ ꓡꓳ꓿
 ꓠꓴ ꓪ ꓠꓬ ꓕꓱ ꓟꓬ ꓙꓰꓽ ꓟ ꓔꓯ ꓢꓷ ꓙ ꓟꓳ ꓙ ꓢꓴ ꓥ ꓡꓳ꓿
 
 
 
  •  

Add new comment

11 + 1 =

Quick Links