ꓡ ꓞꓳ ꓡꓲ ꓣꓳ ꓔꓯ ꓘꓴˍ ꓟ (Sunday reflection)

#creditphoto #Jesus call first disciples

Sunday, January 21, 2024

ꓡ ꓞꓳ ꓡꓲ ꓣꓳ ꓔꓯ ꓘꓴˍ ꓟ (Sunay reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ ꓢꓽ ꓫꓵꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ ꓶ (1ꓽ 14‐21) ꓝꓲ ꓗꓪ ꓛꓲ ꓥ ꓢꓲ ꓠꓬꓲ ꓢꓲꓺ ꓒ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓝꓲ ꓓꓴ ꓐꓴ ꓡꓲ ꓣꓳ ꓔꓯ ꓬꓲ ꓗ. ꓠꓯ ꓛꓳ ꓠ, ꓟ ꓘꓴ ꓔ ꓟ ꓢꓲꓽ ꓫꓬ ꓕꓳ ꓶ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓦꓬꓼ ꓠꓬꓲ ꓐꓲ ꓡꓺꓳ꓾ ꓪꓴ‐ꓢ ꓗꓴꓷꓼ ꓠꓶꓽ ꓡꓻꓳ꓾ ꓠꓴ ꓪ ꓠꓲ, ꓡꓶ. ꓢꓲ ꓶꓼ ꓓꓳ ꓫꓱ, ꓓꓳ ꓔꓯ ꓙꓵꓻ꓾ ꓐꓯˍ ꓡꓳ ꓐꓰ ꓓ. ꓪꓴ. ꓟ. ꓟꓲ ꓚꓺ ꓟ ꓥ ꓡꓳ꓿

ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓓꓽ ꓪꓴ. ꓬꓲ ꓪꓴ. ꓟ. ꓟꓲꓽ ꓚꓺ ꓓꓴ ꓟ ꓟ. ꓟꓲ ꓥ ꓡꓳ꓿ ꓟꓴ ꓗꓴꓷꓼ ꓓꓵ ꓗꓴꓷꓼ ꓗꓪ ꓛꓲ ꓬꓰ ꓠ, ꓟ ꓠꓲ, ꓟ ꓡꓶꓽ ꓢꓲ ꓢꓲ ꓠꓬꓲ ꓪꓴ‐ꓢ ꓙꓵꓻ ꓠ, ꓟ ꓮ ꓘꓶ. ꓛꓲ ꓣꓳ ꓚꓵ. ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓝꓴꓲ ꓔꓯ ꓓꓵꓽ ꓙ ꓢꓲ ꓠꓬꓲ ꓠꓲ, ꓟ ꓡꓶ. ꓢꓲ ꓠꓬ ꓪꓴ‐ꓢ ꓠꓯ ꓗꓪ ꓡ ꓠ, ꓟ ꓣꓳ ꓚꓵ. ꓟ ꓐꓰ ꓝꓮꓲ ꓕꓱ ꓟ ꓟ. ꓟ ꓚꓺ ꓠ, ꓟ ꓝꓲ ꓓꓴ ꓐꓴ ꓡꓲ ꓣꓳ ꓔꓯ ꓓꓽ ꓪꓴ. ꓘꓴ ꓗꓷ ꓟ ꓥ ꓡꓳ꓿ ꓠꓴ ꓥꓪ ꓔꓯ ꓥ ꓟꓲ ꓝꓴꓲ ꓔꓯ ꓓꓵ ꓙ ꓒꓳ ꓡꓶ ꓢꓲ ꓠꓬꓲ ꓪꓴ‐ꓢ ꓠꓯ ꓗꓪ ꓡ ꓠ,ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓘꓴ ꓔꓬ ꓟ ꓥ ꓡꓳ꓿

ꓪꓴ‐ꓢ ꓡꓰ ꓣꓳ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓝꓴꓲ ꓗꓪ ꓐꓰ ꓓꓵ ꓙ ꓒꓳ, ꓡꓶꓽ ꓡ ꓠ, ꓘꓴ ꓟ ꓐꓰ ꓬꓲ ꓐꓯ ꓘꓶꓽꓔꓯ ꓙꓵꓻ ꓠ, ꓠ ꓘꓴ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓮ ꓙꓵꓽ ꓠꓬ ꓟꓽ ꓙꓲ ꓟ ꓗꓪ ꓐꓰ ꓡꓶꓽ ꓠ, ꓟ ꓢꓯꓼ ꓕꓵꓼ ꓢꓲ ꓠꓬꓲ ꓢꓲꓺ ꓒ ꓗ. ꓠꓯ ꓛꓳ ꓙꓰ ꓠ, ꓟ ꓢꓯꓼ ꓕꓵꓼ ꓠ, ꓔ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓒ ꓐꓴ ꓠꓬ ꓝꓴꓲ ꓗꓪ ꓐꓰ ꓓꓵ ꓙ ꓒꓳ, ꓡꓶꓽ ꓠ, ꓟ ꓟ. ꓟꓲ ꓚꓺ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓘꓴ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓝꓴꓲ ꓗꓪ ꓐꓰ ꓓꓵ ꓙ ꓒꓳ ꓡꓶꓻ ꓠ, ꓟ ꓟ. ꓟꓲ ꓚꓺ ꓠ, ꓟ ꓘꓴ ꓟꓶ ꓡꓰ ꓢꓴ ꓔꓲꓺ ꓒ ꓔꓲꓺ ꓟ ꓐꓴ ꓐꓰ ꓟ. ꓒ ꓟ. ꓟ ꓐꓴ ꓠꓬ ꓣꓳ ꓤꓶꓻ ꓔꓯ ꓢꓲꓺ ꓒ ꓐꓱ ꓶ ꓔꓲ ꓖꓶ ꓢꓲ ꓠꓬꓲ ꓪꓴ‐ꓢ ꓟꓬꓱ ꓗꓪ ꓢꓯꓼ ꓕꓵꓼ ꓠ, ꓟ ꓢꓲꓺ ꓒ ꓬꓰ‐ꓢꓴ ꓠꓲ, ꓟ ꓥ ꓡꓳ꓿

ꓣꓳ ꓕꓲ ꓦꓲꓻ ꓣꓳ ꓒꓴ ꓫꓵ ꓮ ꓙꓵꓽ ꓔꓯ ꓛ ꓗꓷ ꓢꓲ ꓠꓬꓲ ꓢꓲꓺ ꓒ ꓗ. ꓠꓯ ꓛꓳ ꓐ ꓡ ꓢꓴ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓖꓳ ꓕꓯ ꓢꓲ ꓪꓴ‐ꓢ ꓗꓴꓷꓼ ꓶꓼ ꓓꓳ ꓫꓱ, ꓓꓳꓽ ꓚꓱ, ꓔꓯ ꓮ ꓘꓶ. ꓛꓲ ꓚꓺ ꓐ ꓡ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓢꓲꓺ ꓒ ꓐꓯ ꓘꓶꓽ ꓕꓯ ꓠ ꓠ, ꓡꓯ꓿ ꓢꓲꓺ ꓒ ꓗ. ꓠꓯ ꓢꓲ ꓛꓳ ꓓꓴ ꓬꓰ ꓡꓯ꓿