ꓡ ꓞꓳ ꓥꓪꓽ ꓔꓴ ꓣꓳ ꓔꓯ ꓖꓶ ꓜꓽˍ ꓟ (Sunday reflection)

#Jesus feeding five thousant Men #creditphoto

Sunday, July 21, 2024

ꓡ ꓞꓳ ꓥꓪꓽ ꓔꓴ ꓣꓳ ꓔꓯ ꓖꓶ ꓜꓽˍ ꓟ (Sunday reflection)

ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (16) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ ꓶ (6‐30‐43) ꓝꓲ. ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓬ ꓗꓪ ꓜꓲꓼ ꓡ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓠꓬ ꓢꓲ ꓡꓲ ꓟ ꓕꓲ ꓖ ꓗꓪ ꓙꓰ ꓢꓲ ꓪꓴꓽ ꓧꓶ ꓠꓽ ꓬꓰ ꓡꓯ ꓐꓰ ꓐꓯˍ ꓢꓲ ꓠꓬꓲ ꓡꓲ ꓞꓶꓽ ꓢꓲ ꓠꓬꓲ ꓖꓳ ꓒ ꓢꓲ ꓗꓪ ꓙꓰ ꓬꓰ ꓡꓳ꓿

ꓖꓳ ꓕꓯ ꓞꓳ ꓜꓴ ꓞꓳ ꓟꓯ ꓠꓬ ꓢꓲꓺ ꓒ ꓬꓰ‐ꓢꓴ ꓐꓰ ꓝꓲ ꓓꓴ ꓐꓴ ꓙꓰ ꓟ ꓪꓴꓽ ꓧꓶꓽ ꓠꓽ ꓔꓶ. ꓗꓪ ꓛꓲ ꓔꓬ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓘꓶ. ꓛꓲ ꓫ. ꓠꓲ, ꓤ ꓟ ꓥ ꓡꓳ꓿

ꓬꓰ‐ꓢꓴ ꓡꓰ ꓝꓲ ꓓꓴ ꓐꓴ ꓔꓯ ꓞꓳ ꓜꓴꓻ ꓔꓯ ꓜ ꓖꓶ ꓜ ꓠ, ꓟ ꓐꓯ ꓗꓷ ꓟ ꓙꓵ, ꓕꓯ ꓢꓲꓺ ꓒ ꓐꓴ ꓠꓬ ꓬꓲ ꓪ ꓠꓬ ꓞꓳ ꓜꓴꓻ ꓔꓯ ꓒ ꓕꓲ ꓗꓪ ꓙꓳˍ ꓟ ꓞꓳ ꓘ, ꓗꓪ ꓡ ꓙꓰ ꓢꓲ ꓠꓬꓲ ꓜ ꓜ ꓡꓰ ꓠ, ꓟ ꓬꓰ ꓥ ꓟꓲ ꓟꓰꓺ ꓡꓰ ꓟ ꓪꓴ. ꓠꓬꓲ ꓫ. ꓔ ꓟ ꓔꓯ ꓐꓯ ꓗꓷꓳ꓿ ꓖꓳ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓑ ꓑ ꓮ ꓟꓬ ꓑꓬ ꓙꓳˍ ꓟ ꓔꓯ ꓡꓳ. ꓠꓬꓲˍ ꓐꓰ ꓐꓯ ꓗꓷ ꓟ ꓙꓵ, ꓕꓯ ꓝꓲ ꓓꓴ ꓐꓴ ꓠꓬ ꓑ ꓑ ꓥꓪꓽ ꓑꓬ ꓐꓰ ꓥꓪ. ꓠꓬꓲ ꓟ ꓧꓪ ꓟꓶ ꓡꓳ ꓐꓰ ꓐꓯ ꓗꓷ ꓡꓳ꓿

ꓖꓳ ꓕꓯ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓞꓳ ꓜꓴꓻ ꓔꓯ ꓕꓲ ꓜꓴꓻ ꓗꓪ ꓕꓲ ꓦꓬ ꓣꓳ ꓔꓬ ꓝꓲ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓶ ꓥꓳꓽ ꓙꓱ ꓗꓷ ꓠꓬ ꓜ ꓓꓴ ꓑ ꓑ ꓮ ꓟꓬ, ꓒꓬꓱꓼ ꓡ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓞꓳ ꓜꓴꓻ ꓞꓳ ꓟꓯ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓜ ꓖꓶ ꓜ ꓟ ꓥ ꓡꓳ꓿

ꓢꓲꓽ ꓫꓬ ꓕꓳ ꓶ ꓗꓪ ꓙꓵꓽ ꓗꓽ ꓟ. ꓒ ꓐꓴ ꓑ‐ꓡꓲ‐ꓢꓷ ꓐꓴ ꓠꓬꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓗꓪ ꓗꓪ ꓡꓰ ꓔꓬ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓕꓱ ꓗꓪ ꓬꓲ ꓪ ꓠꓬ ꓒꓴ ꓮ ꓟꓬ ꓧꓪ, ꓟ ꓐꓰ ꓡ ꓞꓳ ꓮ ꓟꓬ, ꓞꓳ ꓒꓴ ꓢꓴ ꓐꓴ ꓥ ꓟ ꓪꓴ. ꓠꓬꓲ ꓥ ꓡꓳ꓿ꓞꓳ ꓘ, ꓤ ꓗꓪ ꓔꓬ ꓢꓴ ꓐꓴ ꓔꓯ ꓠꓬ ꓙꓵꓽ ꓗꓽ ꓟ. ꓒ ꓐꓴ ꓐꓰ ꓑ‐ꓡꓲ‐ꓢꓷ ꓐꓴ ꓟꓽ ꓢꓷ. ꓢꓴ ꓟꓽ ꓓꓵ ꓙ ꓢꓴ ꓐꓴ ꓥ ꓡꓳ꓿ ꓞꓳ ꓡꓱ ꓥ ꓟꓲ ꓞꓳ ꓘ, ꓗꓪ ꓔꓬ ꓢꓴ ꓐꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓐꓰ ꓬꓲ ꓪ ꓡꓳ. ꓟꓳ ꓗꓷ ꓗ. ꓠꓬꓲ ꓬꓲ ꓪ ꓙꓲ ꓟ ꓮ ꓣꓳ ꓡꓳ. ꓒ ꓐꓰ ꓡꓳ. ꓟꓳ ꓪ ꓟ ꓪꓴ. ꓠꓬꓲ ꓮ ꓘꓶ. ꓗ, ꓛꓲ ꓓꓴ ꓙꓳˍ ꓡꓰ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓢꓯꓼ ꓒ ꓢꓴ ꓠꓻ ꓢꓴ ꓐꓴ ꓝꓮꓲ ꓙꓵꓽ ꓗꓽ ꓟ. ꓒ ꓐꓴ ꓐꓰ ꓑ‐ꓡꓲ‐ꓢꓷ. ꓪ ꓡꓰ ꓡꓳ ꓔ ꓢꓴ ꓐꓴ ꓔꓯ ꓢꓯꓼ ꓖꓶ ꓘꓶꓽ ꓢꓲ ꓠꓬꓲ ꓬꓲ ꓠꓽ ꓙꓵ, ꓔꓯ ꓥ ꓟꓲ ꓕꓱ ꓗꓪ ꓣꓱ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓙꓲˍ ꓟ ꓟꓬꓱꓽ ꓮ ꓟꓬ, ꓔꓯ ꓟ. ꓖꓶ ꓟ ꓥ ꓡꓳ꓿ ꓝꓮꓲ ꓖ‐ꓡꓲ‐ꓡꓲ ꓟꓵꓽ ꓗꓪ ꓔꓬ ꓢꓴ ꓐꓴ ꓠꓬ ꓮ ꓘꓶ. ꓙ ꓣꓳ ꓟ ꓠꓴ ꓠꓲ, ꓙꓳ ꓢꓴ ꓐꓴ ꓥ ꓟ ꓪꓴ. ꓠꓬꓲ ꓠꓴ ꓥꓪ ꓔꓯ ꓥ ꓟꓲ ꓕꓱ ꓡꓱ ꓫꓵꓽ ꓠꓲ, ꓟ ꓣꓳ ꓠꓯ, ꓗꓪ ꓙꓳˍ ꓠ, ꓟ ꓟ. ꓖꓶ ꓗꓷꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓥꓪ ꓠꓴ ꓔꓯ ꓬꓲ ꓮ ꓣꓳ. ꓐꓱ ꓗꓪ ꓓꓵ ꓡ ꓠ, ꓘꓴꓽ ꓔꓬ ꓟ ꓥ ꓡꓳ꓿

ꓬꓲ ꓡꓰ ꓘꓴ ꓟ ꓢꓯꓼ ꓔꓯ ꓣꓳ ꓠ ꓠ, ꓥ ꓟ ꓥ ꓡꓳ꓿ ꓖ‐ꓡꓲ‐ꓡꓲ ꓟꓵꓽ ꓗꓪ ꓔꓬ ꓢꓴ ꓐꓴ ꓠꓬ ꓠꓴ ꓥꓪ ꓡꓰ ꓐꓰ ꓚꓬꓴ ꓙꓳˍ ꓢꓴ ꓝꓮꓲ ꓢꓯꓼ ꓒ ꓢꓴ ꓐꓴ ꓥ ꓢꓲ ꓠꓬꓲ ꓬꓲ ꓪ ꓠꓬ ꓫ. ꓓꓴ ꓟꓷ ꓓꓴ ꓔꓳ,ꓜꓳ ꓡ ꓟ ꓙꓵ, ꓕꓯ ꓡꓰ ꓪꓴ‐ꓢ ꓔꓯ ꓙꓵꓻ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓠꓬ ꓬꓲ ꓪ ꓔꓯ ꓝꓴꓲ ꓟꓽ ꓓꓰ ꓝꓴꓲ ꓟꓽ ꓟꓳ ꓬꓲ ꓪ ꓔꓯ ꓫꓱ ꓤ ꓟꓲ ꓠꓲ, ꓗꓪ ꓐꓰ ꓘꓳ,ꓣ ꓴ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓮ ꓘꓶ. ꓛꓲ ꓫꓱ ꓤ ꓢꓲ ꓠꓬꓲ ꓮ ꓘꓶ. ꓛꓲ ꓠꓲ, ꓠꓵ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓝꓲ ꓓꓴ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓰꓙ ꓡꓯ ꓘꓳ, ꓠ, ꓟ ꓢꓲꓺ ꓒ ꓬꓰ‐ꓢꓴ ꓠꓲ, ꓫꓵˍ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓢꓷ. ꓡꓲ ꓓꓴ ꓔꓯ ꓬꓰ ꓟ ꓙꓵ, ꓕꓯ ꓣꓳ ꓠꓯ, ꓗꓪ ꓮ ꓫꓵꓽ ꓙꓳˍ ꓟ ꓔꓯ ꓧꓶ ꓕꓯ ꓠ ꓠꓬꓲˍ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓣꓳ ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡ ꓢꓲ ꓠꓬꓲ ꓬꓲ ꓐꓰ ꓙ ꓡꓯ ꓘꓳ,ꓠ, ꓟ ꓠꓲ, ꓫꓵˍ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓖꓳ ꓔꓯ ꓪꓴ‐ꓢ ꓐꓰ ꓧꓽ ꓡꓲ ꓝꓲ ꓟ ꓚꓱ, ꓔꓯ ꓣꓳ ꓠꓬꓲ ꓟꓲ ꓠꓯ ꓡ ꓞꓳ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓗ, ꓛꓲ ꓓꓴ ꓚꓱ, ꓔꓯ ꓣꓳ ꓧꓪ, ꓡ? ꓝꓮꓲ ꓟꓲ ꓠꓯ ꓒꓴ ꓫꓵꓽ ꓖꓴ ꓙꓴꓽ ꓔꓯ ꓡꓰ ꓥꓳꓽ ꓡꓰ ꓢꓲ ꓢꓯꓼ ꓔꓬ ꓢꓴ ʼꓥ ꓡ ꓐꓰ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠˍ ꓠꓬꓲ ꓔꓬ ꓟ ꓥ ꓡꓳ꓿ ꓣꓳ ꓠꓬ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓥ ꓟ ꓪꓴ. ꓠꓬꓲ ꓣꓳ ꓬꓰ ꓥꓳꓽ ꓡꓰ ꓟ ꓝꓴꓲ ꓔꓯ ꓭ. ꓠ, ꓟ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓝꓴꓲ ꓭ. ꓠ, ꓟ ꓢ‐ꓗ‐ꓟꓲ‐ꓔꓴ ꓔꓯ ꓣꓳ ꓔꓯ ꓖꓶ ꓔ ꓟ ꓥ ꓡꓳ꓿ ꓝꓴꓲ ꓗꓪ ꓐꓰ ꓓꓵ ꓙ ꓒꓳ, ꓡꓶꓽ ꓓꓴ ꓬꓰ ꓡꓯ꓿ ꓣꓳ ꓠꓯ ꓗꓪ ꓝꓴꓲ ꓮ ꓟꓬ, ꓙꓳˍ ꓥ ꓟꓲ ꓪꓴ‐ꓢ ꓠꓬ ꓣꓳ ꓝꓴꓲ ꓔꓯ ꓖꓼ ꓖꓶ ꓐ ꓡ ꓟ ꓪꓴ‐ꓢ ꓥ ꓡꓳ꓿

ꓪꓴ‐ꓢ ꓠꓬ ꓠꓵꓻ ꓠꓲ, ꓢꓲꓺ ꓒ ꓥ ꓡꓳ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓖ‐ꓡꓲ‐ꓡꓲ ꓟꓵꓽ ꓗꓪ ꓔꓬ ꓢꓴ ꓐꓴ ꓚꓱ, ꓔꓯ ꓓꓴ ꓙ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓬ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓠ, ꓟ ꓟꓲ ꓠꓯ ꓗꓪ ꓬꓯꓼ ꓡ ꓢꓴ ꓥ ꓡꓳ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿