ꓢꓲꓺꓒ ꓬꓰ‐ꓢꓴ ꓡꓰ ꓪꓽ ꓚꓲ ꓗꓪ ꓚꓺ ꓟ ꓟ. ꓟꓲꓽ (Sunday reflection)

ꓢꓲꓺꓒ ꓬꓰ‐ꓢꓴ ꓡꓰ ꓪꓽ ꓚꓲ ꓗꓪ ꓚꓺ ꓟ ꓟ. ꓟꓲꓽ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓼ ꓘꓳꓼ ꓠꓯ, ꓗꓪ ꓐꓰ 31 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓢꓲ ꓠꓬꓲ. ꓠꓬꓲ ꓠꓬ ꓙꓲꓻ ꓫꓬ ꓢꓴ ꓐꓴ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ (5ꓽ1‐12) ꓝꓲ ꓗꓪ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓪꓽ  ꓚꓲ ꓗꓪ ꓓꓯ ꓙꓰ ꓢꓲ ꓠꓬꓲ ꓬꓲ ꓝꓲ. ꓓꓴ ꓐꓴ ꓔꓯ ꓶꓼ ꓘꓶꓽ ꓫꓱ, ꓘꓶꓼ ꓟ. ꓟꓲꓽ ꓔꓯ ꓟ. ꓖꓶ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿

 ꓢꓲꓽ ꓫꓬ ꓕꓳ ꓶ  ꓗꓪ ꓙꓲ ꓫꓬ, ꓟ ꓔꓯ ꓟꓷꓼ ꓢꓲꓼ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠ ꓢꓲꓼ ꓘꓪꓽ ꓓꓰꓼ ꓡꓰ ꓥꓳ꓿ ꓢꓴ ꓔꓯ ꓧꓳ, ꓡꓯ ꓳ ꓝꓲ ꓢꓴ ꓠꓬ ꓶꓼ ꓙꓳ ꓫꓱ, ꓙꓳ ꓡꓳ꓿ ꓮ ꓡꓲꓳ ꓐ ꓮꓠꓬ ꓬꓲ ꓪ ꓔꓯ ꓠꓽ ꓪꓴ‐ꓢ ꓗꓴꓓꓼ ꓬꓲ ꓪ ꓔꓯ. ꓟ ꓥ ꓡꓳ꓿ ꓠꓲ, ꓟ ꓠꓴꓽ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓲꓠꓯ ꓠꓽ ꓬꓲ ꓪ ꓡꓯꓼ ꓪ ꓒꓬꓱꓼ ꓡˍ ꓥꓳ ꓐꓰ ꓐꓯ ꓔ ꓟ ꓥ ꓡꓳ꓿

ꓠꓬꓲ. ꓠꓬꓲ ꓙꓲꓻ ꓫꓬ ꓢꓴ ꓐꓴ ꓑꓮꓲꓽ ꓦꓬꓼ ꓠꓬꓲ ꓗꓪ ꓕꓲ ꓟꓲ ꓠꓯ ꓡꓱ ꓗꓪ ꓙꓳˍ ꓟ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓕꓱ ꓑꓮꓲꓽ ꓠꓬ ꓙꓲꓻ ꓫꓬ ꓢꓴ ꓐꓴ ꓡꓰ ꓟꓽ ꓛꓲ ꓟꓴ ꓗꓴꓷꓼ ꓗꓪ ꓛꓲ ꓡꓰ ꓢꓲ ꓢꓴ ꓐꓴ ꓣꓳ ꓕꓲ ꓦꓲꓻ ꓢꓴ ꓝꓮꓲ ꓮ ꓬꓲ ꓠꓬꓲ ꓤ ꓐꓴ ꓝꓮꓲ ꓣꓳ ꓮ ꓘꓶ. ꓛꓲ ꓠꓵꓻ ꓠꓲ, ꓗꓷ ꓟ ꓛꓳꓽ ꓒꓯꓼ ꓐꓴ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓺ ꓳ ꓬꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ ꓟ ꓑꓮꓲꓽ ꓦꓬꓼ ꓠꓬꓲ ꓟꓲ ꓥ ꓡꓳ꓿

ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓢꓴ ꓐꓴ ꓠꓬ ꓟꓲ ꓟꓯ ꓗꓪ ꓔꓬ ꓟ ꓗꓷ ꓟ ꓙꓵ, ꓕꓯ ꓟ ꓕꓲ ꓕꓳ ꓶ (5ꓽ 1‐12 ) ꓗꓪ ꓔꓯ ꓬꓰ ꓗꓷ ꓢꓴ ꓐꓴ ꓥ ꓢꓲ ꓠꓬꓲ ꓟꓴ ꓗꓪ ꓗꓴꓷꓼ ꓗꓪ ꓬꓰ ꓪ ꓠꓬ ꓪꓴ‐ꓢ ꓒ ꓕꓲ ꓗꓪ ꓔꓬ ꓪ ꓢꓴ ꓐꓴ ꓥ ꓡꓳ꓿

ꓝꓮꓲ ꓟꓳ‐ꓖꓶ‐ꓓꓴ ꓕꓳ ꓶ 7 ꓕꓱ ꓗꓪ ꓝꓲ ꓓꓴ ꓬꓳ‐ ꓦ ꓡꓰ ꓡꓳ. ꓟꓳ ꓟ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓺ ꓳ ꓢꓴ ꓐꓴ ꓟꓴ ꓗꓪ ꓗꓴꓷꓼ ꓗꓪ ꓮ ꓡꓰ ꓐꓰ ꓪꓴ‐ꓢ ꓒ ꓕꓲ ꓗꓪ ꓛꓲ ꓡꓰ ꓟ ꓔꓯ ꓐꓳ ꓔ ꓟ ꓥ ꓡꓳ꓿ ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓗꓪ  ꓘꓴ ꓜꓲꓼ ꓞꓳ ꓢꓽ ꓟ ꓙꓳˍ ꓟ ꓥ ꓡꓳ꓿

ꓓꓽ ꓪꓴ. ꓠꓬ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓐꓴ ꓘꓴ ꓜꓲꓼ ꓞꓳ ꓥ ꓢꓲ ꓠꓬꓲ ꓠꓬꓲꓽ ꓟ ꓠꓬ ꓛꓬ ꓟꓴ ꓤ ꓤ ꓠꓬꓲ ꓗꓪ ꓔꓬ ꓟ ꓦꓻ ꓐꓴ ꓘꓴ ꓜꓲꓼ ꓞꓳ ꓥ ꓡꓳ꓿ (ꓬꓲ ꓪ ꓠꓬ ꓝꓲ ꓔꓯ ꓢꓲꓽ ꓫꓬ ꓡꓰ ꓗ. ꓠꓯ ꓪꓴ‐ꓢ ꓗꓴꓷꓼ ꓗꓪ ꓛꓲ ꓡꓰ ꓓꓽ ꓢꓴ ꓐꓴ ꓥ ꓡꓳ꓿ ꓢꓽ ꓟ ꓕꓲ ꓟ ꓘꓴ ꓜꓲꓼ ꓞꓳ ꓠꓬ ꓟꓴ ꓗꓪ ꓗꓴꓷꓼ ꓛꓲ ꓡꓰ ꓢꓴ ꓐꓴ ꓥ ꓡꓳ꓿ ꓬꓲ ꓪ ꓡꓰ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓲꓺ ꓢꓴ ꓢꓲꓺ ꓤ ꓐꓴ ꓐꓱ ꓶ ꓪꓽ ꓘꓴ ꓙ ꓟ ꓥ ꓡꓳ꓿ ꓕꓱ ꓙꓵꓻ ꓠꓲ, ꓔꓯ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓙꓵꓻ ꓠꓲ, ꓪꓽ ꓘꓴ ꓓꓴ ꓗꓪ ꓡꓳ. ꓟꓳ ꓓꓽ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓝꓲ. ꓗꓪ ꓐꓰ ꓠꓴ ꓥꓪ ꓔꓯ ꓫ. ꓓꓴ ꓟꓶ ꓓꓴ ꓔꓳ ꓜꓳꓻ ꓡ ꓟ ꓙꓵ, ꓔꓯ ꓣꓳ ꓮ ꓡꓰ ꓐꓰ ꓢꓯꓼ ꓕꓵꓼ ꓢꓲ ꓠꓬꓲ ꓠꓲ, ꓫ. ꓟꓬ, ꓫ. ꓓꓴ ꓔꓯ ꓗꓳ. ꓙꓰ ꓝꓲ ꓡꓰ ꓣꓳ ꓓꓴ ꓙ ꓠ, ꓟ ꓥ ꓡꓳ꓿ ꓣꓳ ꓕꓲ ꓛꓳꓽ ꓕꓲ ꓣꓳ ꓣꓳ ꓮ ꓡꓰ ꓐꓰ ꓫ. ꓢꓴ ꓔꓯ ꓬꓰ ꓙ ꓡ ꓝꓮꓲ ꓣꓳ ꓮ ꓡꓰ ꓬꓲ ꓤ ꓠꓬꓲ ꓤ ꓐꓴ ꓔꓯ ꓫ. ꓕꓱ ꓡ ꓙꓻ  ꓡꓯꓽ ꓘꓳ ꓡ ꓐꓰ ꓚꓲ. ꓛꓬ ꓣꓳ ꓓꓴ ꓙ ꓠ, ꓟ ꓥ ꓡꓳ꓿ ꓝꓮꓲ ꓣꓳ ꓔꓯ ꓪꓴ‐ꓢ ꓶꓻ ꓥꓳꓽ ꓙꓱ ꓖꓶ ꓡ ꓟ ꓚꓱ, ꓔꓯ ꓣꓳ ꓢꓷ. ꓡ ꓠꓬ ꓣꓳ ꓤꓶꓻ ꓗꓪ ꓗ, ꓛꓲ ꓓꓴ ꓙꓳ ꓡ ꓟ ꓥ ꓥꓳ꓿ ꓙꓻ ꓣꓳ ꓟ ꓠꓲ, ꓗꓪ ꓐꓰ ꓪꓴ‐ꓢ ꓔꓯ ꓧꓪ, ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓡꓰ ꓐꓰ ꓣꓳ ꓤꓶꓻ ꓗꓪ ꓢꓯ. ꓔꓬ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓫ. ꓟꓳ꓿