ꓢꓲꓺ ꓒ ꓗ. ꓠꓯ ꓢꓲ ꓗꓪ ꓛꓳ ꓠ, ꓟ (Sunday reflection)

ꓢꓲꓺ ꓒ ꓗ. ꓠꓯ ꓢꓲ ꓗꓪ ꓛꓳ ꓠ, ꓟ (Sunday reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 10ꓽ 37‐42 ꓝꓲ. ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓗ. ꓠꓯ ꓢꓲ ꓛꓳ ꓠ, ꓟ ꓘꓴˍ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓬꓲ. ꓗ. ꓠꓯ ꓢꓲ ꓗꓪ ꓛꓳ ꓠ, ꓟ ꓗꓼ ꓠ, ꓟ ꓘꓴ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓗꓪ ꓛꓳ ꓟ ꓕꓯ ꓟꓲ ꓠꓯ ꓗꓪ ꓙꓳˍ ꓟ ꓕꓯ ꓢꓲ ꓢꓲꓺ ꓒ ꓔꓯ ꓠꓲ, ꓠꓵ ꓢꓲ ꓠꓬ ꓛꓳ ꓠ, ꓟ ꓣꓳꓺ ꓚꓵ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓛꓳ ꓫꓱ ꓟ ꓙꓵ, ꓕꓯ ꓮ ꓡꓰꓳ ꓫꓵꓽ ꓔꓳ, ꓜꓳ ꓡ  ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓧꓳꓻ ꓔ ꓠ, ꓟ ꓣꓳꓻ ꓚꓵ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓢꓷ. ꓔ ꓡꓳ ꓬꓲ. ꓗ. ꓠꓯ ꓢꓲ ꓗꓪ ꓛꓳ ꓠꓬ ꓚꓲ ꓛꓬ ꓕꓲ ꓦꓲꓻ ꓢꓴ ꓐꓰ ꓝꓮꓲ ꓐ, ꓐꓽ ꓟ, ꓟ ꓐꓴ ꓐꓰ ꓟꓽ ꓪ ꓡꓯ ꓘꓳ ꓓꓴ ꓙꓳˍ ꓡ ꓟ ꓔꓯ ꓐꓯ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓯ ꓗꓪ ꓛꓳ ꓠꓬ ꓙꓳꓺ ꓟꓽ ꓛꓵ ꓟ ꓐꓰ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓡ ꓥ ꓟꓲ ꓙꓵꓻ ꓠꓲ, ꓡꓰ ꓛꓳ ꓫꓱ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓔ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ. ꓝꓲ ꓓꓴ ꓐꓴ ꓔꓯ ꓟꓲ ꓠꓯ ꓕꓯ ꓢꓲ ꓗꓪ ꓙꓳˍ ꓟ ꓮ ꓙꓵꓽ ꓕꓯ ꓢꓲ ꓢꓲꓺ ꓒ ꓬꓰ‐ꓢꓴ ꓕ ꓯ ꓠꓲ, ꓠꓵ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓝꓮꓲ ꓬꓲ. ꓗ, ꓠꓯ ꓗꓪ ꓛꓳ ꓢꓲ ꓠꓬꓲ ꓙꓵꓻ ꓠꓲ, ꓕꓯ ꓕꓶ ꓕꓶ ꓡꓰ ꓙꓵꓻ ꓠ, ꓟ ꓐꓰ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓕꓯ ꓢꓲ ꓢꓲꓺ ꓒ ꓔꓯ ꓠꓲ, ꓥꓳ ꓠ, ꓟ ꓣꓳ ꓔꓯ ꓐꓯ ꓟ. ꓖꓶ ꓔ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓚꓲ ꓛꓬ ꓡꓯ ꓐꓳ ꓔꓶ. ꓓꓴ ꓑꓱ. ꓔ ꓢꓲ ꓥꓪ ꓗ. ꓠꓯ ꓢꓲ ꓛꓳ ꓡꓯ ꓣꓳ ꓔꓯ ꓘꓴˍ ꓔꓬ ꓟ ꓥ ꓡꓳ꓿ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓙꓵ, ꓕꓯ ꓫ. ꓓꓴ ꓟꓶ ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓟꓽ ꓙꓳꓺ ꓙꓳꓺ ꓢꓲꓺ ꓒ ꓬꓰ‐ꓢꓴ ꓐꓯ ꓘꓶ ꓔꓯ ꓠ, ꓡꓳ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓣꓳꓺ ꓚꓵ ꓟ ꓔꓯ ꓟ. ꓖꓶ ꓡ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓛꓳ ꓒꓯꓽ ꓛꓳ ꓤ ꓔꓯ ꓘꓳ, ꓣꓴ ꓠ, ꓟ ꓣꓳꓺ ꓚꓵ ꓚꓱ, ꓔꓯ ꓟ. ꓖꓶ ꓡ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓟꓬꓱꓺ ꓗꓪ ꓐꓰ ꓫ. ꓓꓴ ꓟꓷꓼ ꓢꓴ ꓔꓳ, ꓜꓳ ꓔꓬ ꓢꓴ ꓐꓴ ꓐꓰ ꓠꓻ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓠꓵꓻ ꓠꓲ, ꓗꓪ ꓬꓰ ꓙ ꓔꓳ, ꓙ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓬꓰ ꓙ ꓟ ꓐꓰ ꓫꓱ, ꓡꓯ ꓘꓳ, ꓟ ꓔꓯ ꓟ. ꓖꓶ ꓡ ꓡꓳ꓿`

ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓮ ꓡꓰ ꓐꓰ ꓙꓻ ꓡꓯ ꓘꓳ, ꓟ ꓔꓯ ꓣꓳ ꓓꓵ ꓙ ꓟ ꓐꓰ ꓟꓽ ꓓꓵ ꓙ ꓟ ꓟꓲ ꓙꓳˍ ꓟ ꓥ ꓡꓳ꓿ ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓮ ꓡꓰ ꓐꓰ ꓙꓻ ꓡꓯ ꓘꓳ, ꓟ  ꓐꓰ ꓫ. ꓕꓱ ꓟ ꓔꓯ ꓢꓷ. ꓡꓰ ꓝꓲ ꓟ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓫ. ꓕꓱ ꓟ ꓙꓻ ꓡꓯ ꓘꓳ, ꓟ ꓮ ꓙꓵꓽ ꓠꓬ ꓢꓲꓺ ꓒ ꓐꓰ ꓙꓻ ꓡꓯ ꓘꓳ, ꓟ ꓐꓰ ꓫꓱ ꓡꓯ ꓘꓳ, ꓟ ꓥ ꓡꓳ=

ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓢꓲ ꓤ ꓐꓴ ꓕꓱ ꓟꓬ ꓟ ꓗꓪ ꓣꓳ ꓓꓱˍ ꓟ ꓕꓲ ꓣꓳ ꓔꓯ ꓬꓲꓻ ꓛꓵꓼ ꓕꓲ ꓘꓶ. ꓤꓼ ꓡꓰ ꓖꓶ ꓓꓳꓻ ꓢꓴˍ ꓟꓲ ꓬꓲ ꓡꓯꓼ ꓫꓴ ꓟꓽ ꓒꓲꓼ ꓬꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓣꓳ ꓓꓱˍ ꓟ ꓟꓬꓱꓽ ꓔꓯ ꓬꓰ ꓥ ꓟꓲ ꓠꓵꓻ ꓠꓲ, ꓣꓱ ꓢꓲ ꓠꓬꓲ ꓬꓰ ꓠ, ꓟ ꓣꓳꓺ ꓚꓵ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓖꓳ ꓡꓱ  ꓥ ꓟ ꓪꓴ. ꓠꓬꓲ ꓢꓲꓺ ꓒ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓛꓳ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓢꓴ ꓐꓴ ꓐꓰ ꓫ. ꓢꓴ ꓟꓷꓼ ꓢꓴ ꓐꓴ ꓣꓱ ꓞ ꓔꓬ ꓢꓴ ꓐꓴ ꓔꓯ ꓐ ꓡ ꓟ ꓕꓲ ꓒꓳ, ꓗꓪ ꓐꓰ ꓬꓰ ꓙ ꓓꓴ ꓬꓰ ꓡꓯ꓿ ꓮ ꓘꓶ. ꓫ. ꓟꓳ ꓪ꓿