ꓢꓲꓺ ꓒ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓗꓳ ꓡꓳ ꓗꓪ ꓠꓬꓲꓸ ꓠꓬꓲ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓠꓬ ꓮ ꓫꓵꓽ ꓥ ꓡ ꓐꓯ ꓠꓬ ꓪꓽ ꓘꓴˍ ꓕꓯ ꓮ ꓫꓵꓸ ꓫꓵ ꓘꓴ ꓗꓴꓸ ꓢꓴ꓾ ꓐꓯ ꓘꓶꓽ ꓐꓲ ꓐꓲˍ ꓡꓰꓽ ꓣꓱꓽ ꓢꓲ ꓪꓽ ꓘꓴ ꓗꓴꓸ ꓢꓴ ꓔꓯ ꓠꓬ ꓣꓳ ꓮ ꓘꓶꓸ ꓠꓲꓹ ꓫꓵˍ ꓡꓳ꓾ ꓠꓲꓹ ꓠꓵˍ ꓡꓳ= ꓔꓯꓺ ꓥꓳꓽ ꓟꓸ ꓒ ꓕꓲ ꓣꓳ ꓡꓰ ꓣꓳ ꓦꓲ ꓗꓪ ꓪꓽ ꓘꓴ ꓖꓶ ꓡ ꓕꓯ ꓣꓳ ꓦꓲ ꓘꓴꓽ ꓗꓪ ꓔꓬ ꓟ ꓦꓲ ꓢꓴ ꓮ ꓙꓵꓽˍ ꓡꓰꓽ ꓟꓽ ꓞꓲꓺ꓾ ꓦꓲ ꓗꓪ ꓦꓵꓻ ꓔ ꓟ ꓙꓱꓽ ꓤ ꓙꓱꓽ ꓟꓲ ꓮ ꓙꓵꓽ ꓗꓪ ꓛꓲꓺ ꓪꓽ ꓘꓴ ꓖꓶˍ ꓕꓯ꓾ ꓮ ꓫꓵꓸ ꓫꓵ ꓐꓰ ꓐꓯ ꓘꓶꓽ ꓐꓲ ꓐꓲ ꓡꓰꓽ ꓪꓽ ꓘꓴ ꓖꓶ ꓡ ꓕꓯ ꓣꓳ ꓠꓬ ꓮ ꓘꓶꓸ ꓗꓹ ꓛꓲꓽˍ ꓡꓳ= ꓕꓱ ꓡꓱ ꓪꓽ ꓘꓴ ꓢꓴ ꓔꓯ ꓣꓳ ꓮ ꓘꓶꓸ ꓠꓲꓹ ꓒꓴˍ ꓡꓳ= ꓝꓮꓲ ꓕꓲ ꓧꓪꓹ ꓪꓽ ꓘꓴˍ ꓕꓯ ꓬꓲ ꓔꓯ ꓡꓰꓽ ꓧꓪˍ ꓡꓳ= ꓖꓳ ꓡꓱ ꓠꓬꓲ ꓕꓱ ꓟ ꓠꓬ ꓡꓲꓽ ꓒꓰꓼ ꓕꓲ ꓟˍ ꓡꓰ ꓐꓰ ꓒꓬꓱꓼ ꓡ ꓔꓬ ꓡꓳ= ꓮ ꓡꓰ ꓗꓪ ꓔꓬ ꓥ ꓟꓲ ꓪꓽ ꓮ ꓫꓵꓸ ꓫꓵ ꓘꓴ ꓗꓴꓸ ꓢꓴ ꓔꓯ ꓠꓬ ꓮ ꓘꓶꓸ ꓓꓻˍ꓾ ꓮ ꓘꓶꓸ ꓙꓲꓻˍ꓾ ꓪꓴ-ꓢ ꓔꓬ ꓗꓪ ꓕꓲꓺ ꓡꓰˍ ꓗꓪ ꓛꓲꓺ ꓪꓽ ꓘꓴ ꓗꓴꓸˍ ꓐꓯ ꓢꓲ ꓠꓬꓲ ꓫꓱꓸ ꓖꓶ ꓔꓬ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓕꓲ 6ꓽ7-15 ꓗꓪ ꓢꓲ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓠꓴ ꓪ ꓪꓽ ꓘꓴˍ ꓕꓯ ꓒ-ꓡꓲ-ꓢꓷ ꓐꓴ ꓡꓰ ꓐꓰ ꓐꓯ ꓘꓶꓽ ꓐꓲ ꓐꓲˍ ꓣꓱꓽ ꓢꓲ ꓮ ꓫꓵ ꓛꓲꓺ ꓕꓽ ꓘꓴ꓾ ꓐꓰ ꓐꓯˍ ꓡꓳ= ꓮ ꓡꓲꓳ ꓐꓯ ꓠꓬ ꓣꓳꓽ ꓣꓱꓽ ꓞꓹ ꓟ ꓔꓯ ꓠꓬ ꓣꓳ ꓟꓽ ꓓꓰꓽ ꓧꓶꓸ ꓕꓯ ꓡꓰ ꓪꓴ-ꓢ ꓢꓷꓸˍ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓬꓰ-ꓢꓴ ꓡꓰ ꓕꓱ ꓡꓰ ꓐꓯ ꓔ ꓠꓬ ꓮ ꓫꓵꓽ ꓑꓶꓸ ꓓꓴ ꓣꓳ ꓪꓽ ꓘꓴˍ ꓡ? ꓟꓽ ꓓꓰ ꓧꓶꓸ ꓕꓯ ꓡꓰ ꓣꓳ ꓣꓱꓽ ꓞꓹ ꓟ ꓔꓯ ꓪꓴ-ꓢ ꓡꓰ ꓢꓷꓸˍ ꓡꓳ ꓐꓯ ꓠꓬ ꓮ ꓫꓵꓽ ꓑꓶꓸ ꓓꓴ ꓪꓽ ꓘꓴ ꓛꓵˍ ꓡ? ꓐꓰ ꓣꓳ ꓓꓵꓽ ꓙ ꓠꓬꓲ ꓓꓴ ꓥ ꓡꓳ=

ꓪꓽ ꓘꓴˍ ꓐꓯ ꓟ ꓮ ꓫꓵꓽ ꓥ ꓡ? ꓪꓽ ꓘꓴˍ ꓐꓯ ꓟ ꓠꓬ ꓣꓳ ꓮ ꓫꓵꓽ ꓠꓲꓹ ꓫꓵˍ ꓟ꓾ ꓣꓳ ꓔꓯ ꓮ ꓡꓲ ꓗꓹ ꓟ ꓪꓴ-ꓢ ꓟꓽ ꓢꓷꓸ ꓟ ꓑꓶꓸ ꓓꓴ ꓬꓲ ꓔꓯ ꓐꓯ ꓟꓳꓸ ꓖꓶˍ ꓟ ꓟꓽ ꓥ= ꓪꓴ-ꓢ ꓠꓬ ꓣꓳ ꓣꓱꓽ ꓞꓹ ꓟ꓾ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓫꓵꓽ ꓓꓹ ꓟ꓾ ꓣꓳ ꓓꓵꓽ ꓙ ꓔ ꓟ ꓮ ꓙꓵꓽ ꓔꓯ ꓬꓲ ꓢꓷꓸˍ ꓟ ꓑꓶꓸ ꓓꓴ ꓪꓴ-ꓢ ꓟꓽ ꓢꓷꓸ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ= ꓖꓳ ꓡꓱ ꓠꓬꓲ ꓣꓳ ꓬꓲ ꓔꓯ ꓐꓯ ꓟꓳꓸ ꓖꓶˍ ꓟ ꓠꓬ ꓣꓳ ꓠꓬ ꓪꓴ-ꓢ ꓐꓰ ꓟꓽ ꓥ ꓕꓯ ꓠꓽ ꓮ ꓫꓵꓽˍ ꓟꓲ ꓟꓽ ꓐ ꓡ꓾ ꓐꓯ ꓢꓲ ꓙ ꓣꓳˍ ꓟ ꓠꓲꓹ ꓟ ꓡꓰꓽ ꓓꓰꓽˍ ꓟ ꓥ ꓡꓳ=

ꓣꓳ ꓔꓯ ꓣꓱꓽ ꓞꓹ ꓟ ꓮ ꓙꓵꓽ ꓠꓬ ꓪꓴ-ꓢ ꓢꓷꓸˍ ꓡꓳ= ꓣꓳ ꓫꓸ ꓙꓵ ꓔꓬ ꓟ꓾ ꓔꓳꓹ ꓜꓳꓽ ꓔꓬ ꓟ ꓮ ꓙꓵꓽ ꓔꓯ ꓪꓴ-ꓢ ꓡꓰ ꓢꓷꓸ ꓖꓴˍ ꓡꓳ= ꓖꓳ ꓟ ꓑꓶꓸ ꓓꓴ ꓪꓽ ꓘꓴˍ ꓐꓯ ꓟ ꓠꓬ꓾ ꓣꓳ ꓠꓽ ꓢꓯꓼ ꓐꓽ ꓢꓴ ꓥ ꓡꓳ꓾ ꓣꓳ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ꓾ ꓠꓴ ꓔꓯ ꓦ ꓡꓱˍ ꓥꓳ꓾ ꓮꓽ ꓐꓽꓳ꓾ ꓐꓯ ꓟ ꓬꓲ ꓢꓷꓸ ꓡꓰ ꓓꓴ ꓥ ꓡꓳ= ꓙ ꓣꓳˍ ꓟ ꓠꓲꓹ ꓟ ꓡꓰ ꓟꓳꓸ ꓖꓶ ꓠꓹ ꓟ ꓥ ꓡꓳ= ꓕꓱ ꓡꓱ ꓣꓳ ꓠꓬ ꓐꓯ ꓘꓶꓽ ꓐꓲ ꓐꓲˍ ꓣꓱꓽ ꓢꓲ ꓢꓴ ꓡꓳꓸ ꓟꓳ ꓓꓹ ꓟ꓾ ꓪꓽ ꓮ ꓘꓶꓸ ꓘꓴ ꓗꓴꓸˍ ꓐꓰ ꓢꓴ ꓡꓰ ꓫꓱꓸ ꓖꓶ ꓡ ꓠꓹ ꓟ ꓔꓶꓺ ꓙꓱꓼ ꓗꓷ ꓢꓲ ꓪꓽ ꓘꓴ ꓔꓬ ꓥꓳ ꓐꓯ ꓠꓬ ꓮ ꓫꓵꓽ ꓣꓱꓽ ꓛꓰꓽ ꓡꓯꓼ ꓫꓴ ꓟꓽ ꓟꓶ=

ꓪꓴ-ꓢ ꓠꓬ ꓘꓪꓼ ꓢꓴ꓾ ꓪꓽ ꓪꓴꓽ ꓘꓳꓹ ꓢꓴ ꓔꓯ ꓠꓲꓹ ꓙꓳꓺˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓪꓽ ꓘꓴˍ ꓕꓯ ꓬꓰ ꓠ ꓔ ꓟ ꓬꓲ ꓪꓴꓸ ꓕꓲ ꓟ ꓠꓬ꓾ ꓐꓯ ꓘꓶꓽ ꓮ ꓫꓵꓸ ꓫꓵ ꓣꓱꓽ ꓢꓲ꓾ ꓐꓯ ꓘꓶꓽ ꓐꓲ ꓐꓲ ꓡꓰꓽ ꓣꓱꓽ ꓢꓲ ꓪꓽ ꓘꓴ ꓠꓹ ꓟ ꓟꓽ ꓥ= ꓙ ꓣꓳˍ ꓟ ꓠꓲꓹ ꓟ ꓡꓰ ꓪꓴ-ꓢ ꓛꓲ ꓔꓲ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓠꓹ ꓟ ꓥ ꓡꓳ= ꓝꓮꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓕꓳ ꓶ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶˍ ꓟ ꓠꓬ꓾ ꓠꓴ ꓪ ꓕꓱ ꓡꓱ ꓪꓽ ꓘꓴ ꓐꓯ ꓢꓲ꓾ ꓬꓲ ꓡꓰ “ꓢꓲꓺ ꓒ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ” ꓔꓯ ꓘꓴ ꓟꓸ ꓖꓶ ꓗꓷ ꓟ ꓥ ꓡꓳ=

“ꓢꓲꓺ ꓒ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ” ꓗꓪ ꓣꓳ ꓡꓳꓸ ꓠꓬꓲˍ ꓕꓯ ꓬꓲ ꓪꓴꓸ ꓗꓪ “ꓟꓴ ꓗꓪ ꓕꓯꓽ ꓢꓲ ꓗꓪ ꓔꓬ ꓟ ꓥꓪ ꓠꓴꓽ ꓐꓹ ꓐꓽꓳ” ꓐꓯ ꓢꓲ ꓬꓲ ꓪꓴꓸ ꓔꓴ ꓔ ꓡꓳ= ꓥꓪ ꓠꓴꓽ ꓐꓹ ꓐꓽꓳ ꓐꓯ ꓟ ꓠꓬ ꓕꓲ ꓣꓳ ꓐꓱ ꓶˍ ꓡꓰꓽ ꓟꓽ ꓥ= ꓟꓲ ꓠꓯ ꓞꓳ ꓤ ꓮ ꓙꓵꓽ ꓐꓱ ꓶ ꓥ ꓡꓳ= ꓣꓳ ꓮ ꓙꓵꓽ ꓠꓬ ꓪꓴ-ꓢ ꓬꓲ ꓤ ꓠꓱ ꓒꓬꓱꓼ ꓡꓺꓳ= ꓖꓳ ꓡꓱ ꓠꓬꓲ ꓮ ꓙꓵꓽ ꓠꓬ ꓕꓲ ꓣꓳˍ ꓟ ꓠꓯꓸꓼ ꓗꓪ ꓥ ꓢꓲ ꓠꓬꓲ ꓮ ꓙꓵꓽ ꓠꓬ ꓮ ꓬꓲꓼ ꓠꓬꓲ ꓤ ꓒꓬꓱꓼ ꓡꓺꓳ= ꓖꓳ ꓡꓱ ꓠꓬꓲ ꓣꓳ ꓪꓽ ꓘꓴˍ ꓕꓯ ꓣꓳ ꓐꓱ ꓶˍ ꓡꓰꓽ ꓓꓵꓽ ꓙ ꓟꓽ ꓓ ꓐꓯ ꓟ ꓔꓯ ꓟꓳꓸ ꓖꓶ ꓡ ꓔꓬ ꓡꓳ= ꓥꓪ ꓠꓴꓽ ꓐꓹ ꓐꓽꓳ꓾ ꓥꓪ ꓠꓴꓽ ꓔꓯ ꓖꓶꓽ ꓜꓽ ꓡꓯ꓾ ꓥꓪ ꓠꓴꓽ ꓸꓸꓸ ꓐꓰ ꓐꓯ ꓔ ꓟ ꓑꓶꓸ ꓓꓴ꓾ ꓥꓪ ꓐꓯ ꓟ ꓐꓯ ꓘꓶꓽ ꓟꓽ ꓐꓯ ꓔ ꓟ ꓑꓶꓸ ꓓꓴ꓾ ꓥꓪ ꓔꓯ ꓖꓶꓽ ꓡꓯ ꓐꓹ ꓐꓽꓳ ꓐꓰ ꓟꓽ ꓐꓯ= ꓪꓽ ꓘꓴˍ ꓕꓯ ꓥꓪ ꓠꓴꓽ ꓔꓯ ꓖꓶ ꓡꓯ꓾ ꓥꓪ ꓠꓴꓽ ꓔꓯ ꓬꓰ ꓙ ꓡꓯ꓾ ꓐꓰ ꓐꓯ ꓟ ꓑꓶꓸ ꓓꓴ ꓣꓳ ꓓꓵꓽ ꓙꓽˍ ꓟ꓾ ꓫꓸ ꓕꓱˍ ꓟ ꓮ ꓙꓵꓽ ꓠꓬ ꓥꓪ ꓐꓱ ꓶˍ ꓡꓰꓽ ꓟ ꓥ= ꓥꓪ ꓕꓲ ꓚꓳ ꓡꓳ ꓗꓪ ꓔꓬ ꓢꓴ ꓐꓴ ꓐꓱ ꓶ꓾ ꓝꓮꓲ ꓕꓲ ꓟꓲ ꓠꓯ ꓡꓱꓸꓼ ꓐꓱ ꓶ ꓥꓳ꓾ ꓐꓯ ꓟ ꓔꓯ ꓓꓵꓽ ꓙ ꓠ ꓔ ꓡꓳ=

ꓖꓳ ꓡꓱ ꓠꓬꓲ ꓕꓱ ꓟ ꓠꓬ ꓠꓵ ꓠꓲꓹ ꓥ ꓡꓳ= ꓪꓽ ꓘꓴˍ ꓕꓯ ꓠꓵ ꓠꓲꓹ ꓟꓽ ꓙꓳ ꓠꓬ꓾ ꓕꓲ ꓚꓱꓹ ꓐꓯ ꓠꓬ꓾ ꓚꓲꓸ ꓛꓬ ꓐꓱ ꓶˍ ꓡꓰꓽ ꓓꓵꓽ ꓙ ꓢꓲ ꓠꓬꓲ ꓚꓲꓸ ꓛꓬ ꓐꓱ ꓶˍ ꓡꓰꓽ ꓪꓽ ꓘꓴ ꓔꓬ ꓠꓬ ꓮ ꓫꓵꓽ ꓡꓯꓼ ꓫꓴ ꓟꓽ ꓟꓶ=

ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓔꓯꓺ ꓥꓳꓽ ꓕꓲ ꓟ ꓗꓪ꓾ ꓬꓲ ꓘꓳꓸ ꓫ ꓢꓴ ꓐꓰ ꓒ-ꓡꓲ-ꓢꓷ ꓕꓲ ꓣꓳ ꓪꓽ ꓘꓴˍ ꓕꓯ꓾ ꓒ-ꓡꓲ-ꓢꓷ ꓡꓰ ꓥꓪ ꓠꓬ ꓕꓲ ꓠꓬꓲ ꓗꓪ ꓪꓽ ꓮ ꓟꓬꓹ ꓧꓪꓹ ꓘꓴˍ ꓡꓳ= ꓕꓲ ꓠꓽ ꓗꓪ ꓜꓽ ꓓꓴ ꓮ ꓟꓬꓹ ꓧꓪꓹ ꓚꓲꓸˍ ꓡꓳ= ꓕꓲ ꓠꓽ ꓗꓪ ꓞꓲ ꓐꓱ ꓕꓲ ꓐꓱ ꓗꓷˍ ꓡꓳ꓾ ꓐꓯ ꓢꓲ ꓪꓽ ꓘꓴˍ ꓡꓳ= ꓝꓮꓲ ꓕꓲ ꓣꓳ ꓠꓬ ꓙ ꓣꓳˍ ꓟ ꓠꓲꓹ ꓟ ꓡꓰ ꓪꓴ-ꓢ ꓔꓯ ꓡꓳꓸ ꓟꓽ ꓑꓶꓸ꓾ ꓟꓲ ꓛꓬ ꓗꓪ ꓟꓳꓼ ꓢꓲ ꓠꓬꓲ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓾ ꓐꓰ ꓪꓽ ꓘꓴˍ ꓡꓳ꓾ꓐꓰ ꓐꓯ ꓔ ꓡꓳ=ꓬꓲ ꓪ ꓠꓬꓲꓽ ꓣꓳ ꓘꓴꓽ ꓗꓪ ꓬꓲ ꓘꓳꓸ ꓖꓳ ꓢꓴ ꓝꓴꓲꓸ ꓙꓳ ꓢꓴ ꓬꓲ ꓪꓽ ꓘꓴ ꓘꓶꓽ ꓔꓯ ꓪꓴ-ꓢ ꓓꓽ ꓔꓳꓹ ꓡꓳ꓾ ꓐꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓽ ꓘꓴˍ ꓐꓯ ꓟ ꓠꓬ ꓣꓳ ꓠꓲꓹ ꓫꓵˍ ꓟ ꓣꓳ ꓠꓲꓹ ꓡꓶꓽ ꓙꓳˍ ꓟ ꓪꓴ-ꓢ ꓟꓽ ꓢꓷꓸ ꓟ ꓑꓶꓸ ꓓꓴ ꓬꓲ ꓔꓯ ꓐꓯ ꓟꓳꓸ ꓖꓶ ꓔꓬ ꓟꓽ ꓥ= ꓪꓴ-ꓢ ꓠꓬ ꓮ ꓙꓵꓽ ꓢꓷꓸˍ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓬꓰ ꓠ ꓔ ꓟ ꓠꓬ꓾ ꓙ ꓣꓳˍ ꓟ ꓠꓲꓹ ꓟ ꓡꓰ ꓮ ꓡꓰ ꓐꓯ ꓗꓴꓸˍ ꓮ ꓡꓰ ꓪꓽ ꓘꓴ ꓠꓹ ꓟ ꓡꓰꓽ ꓬꓳꓸ ꓚꓵˍ ꓟ ꓥ ꓡꓳ= ꓝꓮꓲ ꓕꓲ ꓫꓵꓽ ꓠꓬ꓾ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓣꓳ ꓐꓱ ꓶˍ ꓡꓰꓽ ꓟꓽ ꓓꓵꓽ ꓙꓽ ꓙꓽ꓾ ꓠꓶꓽ ꓛꓳ ꓐꓴ ꓐꓱ ꓶ ꓕꓲ ꓦꓲ ꓢꓴ ꓐꓱ ꓶ ꓓꓵꓽ ꓙ ꓢꓲ ꓠꓬꓲ ꓪꓽ ꓘꓴˍ ꓥꓳ ꓐꓯ ꓠꓬ꓾ ꓣꓳ ꓪꓽ ꓘꓴ ꓘꓶꓽ ꓠꓬ ꓪꓴ-ꓢ ꓔꓬ ꓗꓪ ꓛꓲꓺ ꓬꓰˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=