ꓢꓲꓺ ꓒ ꓬꓰ‐ꓢꓴ ꓠꓬ ꓠꓵꓻ ꓠꓲ, ꓢꓲꓺ ꓒ ꓥ ꓟ (Sunday reflection)

#rvalisu #Zangyaw #region #photo by Paul

Sunday, May 05, 2024

ꓢꓲꓺ ꓒ ꓬꓰ‐ꓢꓴ ꓠꓬ ꓠꓵꓻ ꓠꓲ, ꓢꓲꓺ ꓒ ꓥ ꓟ (Sunday reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓗ. ꓠꓯ (6) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ (15ꓽ9‐17) ꓝꓲ ꓗꓪ ꓛꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓐ, ꓐ ꓡꓰ ꓥꓪ ꓔꓯ ꓠꓲ, ꓠꓵꓻ ꓟ ꓡꓰ ꓐꓰ ꓥꓪ ꓟꓲ ꓠꓴ ꓪ ꓔꓯ ꓠꓲ, ꓠꓵ ꓡꓳ ꓐꓰ ꓐꓯ ꓔ ꓡꓳ꓿ ꓝꓮꓲ ꓠꓴ ꓪ ꓔꓯ ꓥꓪ ꓠꓲ, ꓠꓵ ꓟ ꓡꓰ ꓐꓰ ꓠꓴ ꓪ ꓟ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓠ, ꓟ ꓕꓱ ꓟ ꓠꓬ ꓥꓪ ꓕꓱꓼ ꓪ ꓥ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓪꓴ‐ꓢ ꓠꓬ ꓠꓵꓻ ꓠꓲ, ꓢꓲꓺ ꓒ ꓥ ꓢꓲ ꓠꓬꓲ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓥ ꓟꓲ ꓠꓲ, ꓠꓵ ꓡꓯ ꓘꓳ ꓠ, ꓟ ꓣꓳ. ꓚꓵ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓠꓬ ꓣꓳ ꓔꓯ ꓪꓴ‐ꓢ ꓡꓰ ꓠꓲ ꓠꓵ ꓟ ꓔꓯ ꓟ. ꓖꓶ ꓟ ꓥ ꓢꓲ ꓠꓬꓲ ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓤ ꓠꓱ ꓐꓴ ꓒꓬꓱꓼ ꓡ ꓟ ꓥ ꓡꓳ꓿ ꓪꓴ‐ꓢ ꓠꓬ ꓠꓵ, ꓠꓲ ꓥ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓲ, ꓟ ꓠꓯ ꓗꓪ ꓠꓵ, ꓠꓲ ꓔꓯ ꓮ ꓕꓯ ꓟꓲ ꓙꓳˍ ꓟ ꓠ, ꓟ ꓝꓮꓲ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓟ. ꓖꓶ ꓠ, ꓟ ꓥ ꓡꓳ꓿ ꓣꓳ ꓢꓲꓽ ꓫꓬ ꓕꓳ ꓶ ꓥ ꓟ ꓬꓳ‐ꓦ ꓕꓳ ꓶ (15ꓽ 7‐12) ꓝꓲ ꓗꓪ ꓠꓵꓻ ꓠꓲ, ꓐꓯ ꓟ ꓔꓯ ꓢꓽ ꓚꓱ, ꓗꓪ ꓐꓰ ꓡꓳ. ꓟꓳ ꓪ ꓡꓳ꓿

ꓠꓵꓻ ꓠꓲ, ꓐꓯ ꓟ ꓠꓬ ꓪꓴ‐ꓢ ꓗꓪ ꓐꓰ ꓡ ꓟ ꓥ ꓢꓲ ꓮ, ꓐꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓠꓵꓻ ꓠꓲ, ꓟ. ꓖꓶ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓗ. ꓠꓯ ꓛꓳꓽ ꓐꓴ ꓠꓬ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓠꓵꓻ ꓠꓲ, ꓟ. ꓖꓶ ꓠ, ꓟ ꓣꓳ. ꓚꓵ ꓟ ꓥ ꓡꓳ꓿ ꓪꓴ‐ꓢ ꓠꓬ ꓠꓵꓻ ꓠꓲ, ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓮ ꓙꓵꓽ ꓔꓯ ꓪꓴ‐ꓢ ꓡꓰ ꓠꓵꓻ ꓠꓲ, ꓑꓶ. ꓓꓴ ꓕꓲ ꓠꓲ, ꓕꓲ ꓪ ꓒꓬꓱꓼ ꓡ ꓝꓲ ꓗꓷ ꓟ ꓥ ꓡꓳ꓿ ꓣꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓠꓵꓻ ꓠꓲ, ꓔꓯ ꓘꓳ, ꓣꓴ ꓢꓲ ꓠꓬꓲ ꓪꓴ‐ꓢ ꓔꓯ ꓫ. ꓟꓳ ꓓꓳ ꓟꓴ ꓠ, ꓟ ꓙꓳˍ ꓟ ꓥ ꓡꓳ꓿

ꓣꓳ ꓠꓬ ꓪꓴ‐ꓢ ꓠꓲ, ꓠꓵ ꓠꓬ ꓣꓳ ꓛꓳ ꓒꓯ ꓐꓴ ꓐꓰ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓠꓲ, ꓠꓵ ꓠ, ꓟ ꓟꓲ ꓣꓳ. ꓚꓵ ꓟ ꓥ ꓡꓳ꓿ ꓬꓳ‐ꓦ ꓕꓳ ꓶ 15ꓽ 17 ꓝꓲ ꓗꓪ ꓠꓴ ꓪ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓠ, ꓟ ꓥꓪ ꓡꓰ ꓠꓴ ꓪ ꓔꓯ ꓕꓵꓼ ꓪ ꓖꓶˍ ꓥꓳ꓿

ꓪꓴ‐ꓢ ꓗꓪ ꓐꓰ ꓡ ꓟ ꓠꓵꓻ ꓠꓲ, ꓠꓬ ꓟꓲ ꓠꓯ ꓡ ꓞꓳ ꓔꓯ ꓠꓲ, ꓠꓵ ꓠ, ꓟ ꓬꓰ ꓐ ꓒꓬꓱꓼ ꓡ ꓠ, ꓟ ꓣꓳ. ꓚꓵ ꓡꓳ꓿ ꓣꓳ ꓢꓯ. ꓔꓬ ꓟ ꓤꓶꓻ ꓗꓪ ꓪꓴ‐ꓢ ꓠꓵꓻ ꓠꓲ, ꓔꓯ ꓟ. ꓖꓶ ꓐ ꓡ ꓢꓴ ꓐꓴ ꓒꓬꓱꓼ ꓡ ꓠ, ꓟ ꓣꓳ. ꓚꓵ. ꓡꓳ꓿ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓕꓯ ꓢꓲ ꓪꓴ‐ꓢ ꓔꓯ ꓠꓲ, ꓠꓵ ꓠ, ꓟ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓟ. ꓖꓶ ꓔ ꓟ ꓠꓵꓻꓠꓲ, ꓟꓽ ꓙꓳˍ ꓢꓴ ꓐꓴ ꓠꓬ ꓙꓲ‐ꓢꓴ ꓢꓲꓺ ꓤ ꓚꓵ ꓟꓽ ꓥ ꓐꓰ ꓢꓲꓽ ꓫꓬ ꓢꓴ ꓝꓣꓮꓠꓚꓲꓢ ꓮꓢꓢꓲꓢꓲ ꓡꓰ ꓐꓯ ꓔ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓓꓴ ꓙ ꓠ, ꓟ ꓚꓱ, ꓠꓬ ꓪꓴ‐ꓢ ꓠꓬ ꓣꓳ ꓔꓯ ꓠꓲ, ꓠꓵ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓔꓯ ꓪꓴ‐ꓢ ꓡꓰ ꓠꓲ, ꓠꓵ ꓟ ꓪꓴ. ꓠꓬꓲ ꓣꓳ ꓠꓬ ꓗ, ꓛꓲ ꓠ, ꓔ ꓡꓳ꓿

ꓪꓴ‐ꓢ ꓠꓬꓲ ꓣꓳ ꓔꓯ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓠ, ꓟ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓠꓲ, ꓠꓵ ꓔꓯ ꓣꓳ ꓗꓪ ꓐꓰ ꓟꓳ. ꓠ, ꓟ ꓣꓳ. ꓚꓵ ꓡꓳ꓿

ꓪꓴ‐ꓢ ꓠꓬ ꓠꓵ, ꓠꓲ ꓢꓲꓺ ꓒ ꓥ ꓡꓳ꓿ ꓣꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓠꓬ ꓟꓲ ꓠꓯ ꓗꓪ ꓪꓴ‐ꓢ ꓠꓵ, ꓠꓵ ꓝꓲ ꓓꓴ ꓐꓴ ꓒꓬꓱꓼ ꓡ ꓠ, ꓟ ꓣꓳ ꓚꓵ ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓫꓵꓽ ꓤ ꓪꓳꓽ ꓤ ꓕꓲ ꓦꓲꓻ ꓢꓴ ꓮ ꓙꓵꓽ ꓔꓯ ꓠꓲ, ꓠꓵ ꓟ ꓪꓴ. ꓠꓬꓲ ꓣꓳ ꓥ ꓟꓲ ꓬꓲ ꓪ ꓮ ꓙꓵꓽ ꓔꓯ ꓠꓲ, ꓠꓵ ꓠ, ꓟ ꓣꓳ ꓚꓵ. ꓡꓳ꓿ ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓟꓽ ꓒꓳ, ꓡꓶꓼ ꓬꓰ ꓟ ꓠꓵꓻ ꓠꓲ, ꓡꓰ ꓣꓳ ꓔꓯ ꓠꓲ ꓠꓵ ꓟ ꓥ ꓡꓳ꓿ ꓪꓴ‐ꓢ ꓤ ꓠꓱ ꓣꓳ ꓠꓬ ꓪꓴ‐ꓢ ꓠꓵ, ꓠꓲ ꓔꓯ ꓣꓳ ꓠꓯ ꓗꓪ ꓙꓳˍ ꓝꓲ ꓠ, ꓟ ꓮ ꓘꓶ. ꓛꓲ ꓣꓳ ꓚꓵ ꓡꓳ꓿

ꓕꓱ ꓡꓱ ꓐꓰ ꓪꓴ‐ꓢ ꓠꓵ, ꓠꓵ ꓔꓯ ꓣꓳ ꓠꓯ, ꓗꓪ ꓙꓳˍ ꓢꓲ ꓪꓴ‐ꓢ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓒꓵꓽ ꓛꓳꓽ ꓠꓬ ꓣꓳ ꓞꓳ ꓙꓳ ꓢꓯ. ꓔꓬ ꓟ ꓤꓶꓻ ꓗꓪ ꓗ, ꓛꓲ ꓓꓴ ꓒꓬꓱ ꓡ ꓓꓴ ꓥꓳ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓵ, ꓠꓵ ꓔꓯ ꓣꓳ ꓠꓯ, ꓗꓪ ꓙꓳˍ ꓝꓲ ꓠ, ꓟ ꓢꓯꓼ ꓕꓵꓼ ꓡꓯ꓿ ꓣꓳ ꓬꓰ ꓟ ꓟꓬꓱꓽ ꓮ ꓙꓵꓽ ꓗꓪ ꓪꓴ‐ꓢ ꓠꓵꓻ ꓠꓲ, ꓡꓰ ꓬꓰ ꓡꓯ꓿ ꓫ. ꓟꓳ꓿