ꓢꓲꓺ ꓒ ꓬꓰ‐ꓢꓴ ꓡꓰ ꓛꓳꓽ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷˍ ꓟ (Sunday reflection)

#creditphoto #Jesusu #hisdisciples

Sunday, July 14, 2024

ꓢꓲꓺ ꓒ ꓬꓰ‐ꓢꓴ ꓡꓰ ꓛꓳꓽ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷˍ ꓟ (Sunday reflection)

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓗꓪ ꓐꓰ (15) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ ꓶ 6ꓽ7‐13 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓠ, ꓟ ꓝꓲ. ꓩꓴ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓠꓬꓲꓽ ꓣꓳ ꓕꓲ ꓒꓳ, ꓙꓰ ꓢꓲ ꓠꓬꓲ ꓠꓻ ꓢꓴ ꓒꓬ ꓢꓴ ꓐꓴ ꓔꓯ ꓠꓻ ꓫꓬ, ꓖꓶ ꓝꓮꓲ ꓠꓲꓽ ꓮ ꓟꓬ, ꓔꓯ ꓥ ꓟꓲ ꓖꓼ ꓓꓳ ꓗꓷ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓶ ꓓꓳ ꓫꓱ, ꓔꓯ ꓕꓲ ꓟꓲ ꓠꓯ ꓡꓱ ꓗꓪ ꓛꓲ ꓡꓰ ꓠ, ꓟ ꓟꓬꓱꓽ ꓬꓰ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓗ. ꓠꓯ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓢꓷ. ꓡꓰ ꓓꓴ ꓮ ꓟꓬ, ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓒ ꓟ ꓟꓲ ꓠꓯ ꓡ ꓞꓳ ꓔꓯ ꓘꓴ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓶ ꓓꓳ ꓫꓱ, ꓓꓳ ꓔꓯ ꓢꓰ ꓢꓲ ꓠꓬꓲ ꓕꓲ ꓟꓲ ꓠꓯ ꓡꓱ ꓗꓪ ꓚꓺ ꓟ. ꓖꓶ ꓠ, ꓟ ꓝꓲ ꓩꓴ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓐ ꓟ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓟ ꓟꓬꓱꓽ ꓗꓪ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓠ, ꓟ ꓟꓬꓱꓽ ꓬꓰ ꓟ ꓠꓬ ꓮ ꓘꓶ. ꓙꓲˍ ꓜꓳ ꓓꓰ ꓡꓰ ꓬꓲ ꓚꓱ, ꓕꓲ ꓫꓵꓽ ꓥ ꓡꓳ꓿

ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓔꓯ ꓚꓲ. ꓛꓬ ꓠꓲ, ꓫꓵˍ ꓟꓬꓱꓽ ꓔꓯ ꓬꓰ ꓠ, ꓟ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿ ꓚꓲ. ꓛꓬ ꓠꓲ, ꓫꓵˍ ꓟ ꓔꓯ ꓬꓰ ꓐ ꓡ ꓠ, ꓟ ꓙꓵꓽ ꓪ ꓖꓶ ꓔ ꓡꓳ꓿ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓟꓴ ꓗꓪ ꓗꓴꓷꓼ ꓠꓬ ꓕꓲ ꓞꓲꓼ ꓐꓱ ꓶ ꓦꓲꓻ ꓥ ꓟ ꓔꓯ ꓢꓲ ꓠ,ꓟ ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓠꓬ ꓙꓵꓽ ꓪ ꓣꓱ ꓢꓲ ꓠꓬꓲ ꓟꓬꓱꓽ ꓟꓽ ꓬꓰ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓠ, ꓟ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓝꓲ ꓓꓴ ꓐꓴ ꓔꓯ ꓢꓲ ꓖꓶ ꓢꓲ ꓠꓬꓲ ꓟꓬꓱꓽ ꓬꓰ ꓝꓲ ꓟ ꓥ ꓡꓳ꓿

ꓪꓴ‐ꓢ ꓐꓯ ꓘꓶꓽ ꓔꓯ ꓘꓳ, ꓣꓴ ꓠ, ꓟ ꓣꓳ ꓚꓵ, ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓚꓬꓴ ꓙ ꓗꓷꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓐꓴ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓠ, ꓟ ꓙ ꓚꓱ, ꓔꓯ ꓥ ꓟꓲ ꓟ. ꓖꓶ ꓗꓷꓳ꓿ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓠ, ꓟ ꓪꓴꓽ ꓡꓳ ꓬꓰ ꓟ ꓕꓲ ꓫꓵꓽ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓒꓴ ꓛꓳ ꓠ, ꓟ ꓥ ꓡꓳ꓿ ꓝꓮꓲ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓥ ꓡꓳ꓿

ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓢꓷ. ꓢꓴ ꓡ ꓞꓳ ꓮ ꓟꓬ, ꓔꓬ ꓡꓳ ꓖꓳ ꓡꓱ ꓥ ꓟꓲ ꓬꓲ ꓚꓱ, ꓮ ꓟꓬ, ꓫꓵꓽ ꓗꓪ ꓐꓰ ꓙꓲ‐ꓢꓴ ꓢꓲꓺ ꓤ ꓟꓽ ꓒꓬꓱꓼ ꓡ ꓢꓴ ꓮ ꓟꓬ, ꓔꓬ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓮ ꓘꓶ. ꓠꓲ, ꓟ ꓪꓴ. ꓠꓬꓲ ꓡꓯꓼ ꓐꓳ ꓔꓶ ꓓꓴ ꓗꓪ ꓣꓳ ꓐꓱ ꓶ ꓫꓵꓻ ꓙ ꓗꓷꓳ꓿ ꓠꓴ ꓥꓪ ꓠꓬ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓗꓷꓟ ꓪꓴ. ꓠꓬꓲ ꓪꓴ‐ꓢ ꓔꓯꓫ. ꓟꓳ ꓡꓯ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓠꓻ ꓠꓬꓲˍ ꓔꓬ ꓟ ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓡꓳ ꓐ ꓗꓷ ꓢꓲ ꓪꓴ‐ꓢ ꓐꓯ ꓘꓶꓽ ꓔꓯ ꓒꓴ ꓞꓳ ꓡˍ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓚꓱ, ꓔꓯ ꓘꓳ, ꓣꓴ ꓡ? ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓟ. ꓖꓶ ꓗꓷ ꓶ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠˍ ꓠꓬꓲ ꓔꓬ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓔꓯ ꓧꓪ ꓓꓴ ꓬꓰ ꓡꓯ꓿ ꓟꓴ ꓗꓳ ꓓꓵ ꓓꓵ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓐ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓪꓴ‐ꓢ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓪꓽ ꓘꓴ ꓙ ꓓꓴ ꓬꓰ ꓡꓯ꓿