ꓢꓲꓺ ꓒ ꓬꓰ‐ꓢꓴ ꓡꓰ ꓛꓳ: ꓒꓯ, ꓠꓬꓲꓽ ꓣꓳ ꓔꓯ ꓟꓳ. ꓖꓶˍ ꓟ

ꓢꓲꓺ ꓒ ꓬꓰ‐ꓢꓴ ꓡꓰ ꓛꓳ: ꓒꓯ, ꓠꓬꓲꓽ ꓣꓳ ꓔꓯ ꓟꓳ. ꓖꓶˍ ꓟ

ꓠꓬꓲ. ꓠꓬꓲ ꓢꓯ. ꓬꓲꓼ ꓡ ꓑꓮꓲꓽ ꓗꓳ. ꓙꓰ ꓗ. ꓠꓯ ꓠꓽ ꓫꓵꓽ ꓠꓽ ꓠ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿  ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 24ꓽ13‐35 ꓝꓲ. ꓗꓪ ꓛꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓙ ꓖꓴ ꓗꓪ ꓛꓳꓽ ꓒꓯ, ꓠꓬꓲꓽ ꓣꓳ ꓔꓯ ꓬꓲ. ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓟꓳ. ꓖꓶˍ ꓟ ꓟ. ꓟꓲ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓠꓬꓲꓽ ꓣꓳ ꓠꓬ ꓬꓲ‐ꓟ‐ꓪꓴ‐ꓢꓶ ꓟꓬꓱꓽ ꓔ ꓟ ꓞꓳ ꓘ, ꓗꓪ ꓙꓰ ꓟ ꓥ ꓡꓳ꓿ ꓙ ꓖꓴ ꓙꓰ ꓔꓬ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓠꓬ ꓝꓲ ꓓꓴ ꓐꓴ ꓔꓯ ꓫ. ꓕꓱ ꓢꓲ ꓠꓬꓲ ꓠꓴ ꓪ ꓮ ꓫꓵꓽ ꓚꓱ, ꓫ. ꓕꓱ ꓡꓯ ꓘꓳ, ꓡ ꓐꓰ ꓐꓯ ꓖꓶ ꓡꓳ꓿ ꓬꓲ‐ꓟ‐ꓪꓴ‐ꓢꓶ ꓘ, ꓙ ꓖꓴ ꓗꓪ ꓐꓰ ꓢꓷ. ꓡꓰ ꓢꓴ ꓠꓬ ꓟꓽ ꓓꓵꓽ ꓙ ꓔ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓽ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓔꓯ ꓟꓳ. ꓖꓶ ꓟ ꓢꓷ. ꓡꓲ ꓓꓴ ꓓꓽ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓝꓲ ꓓꓴ ꓐꓴ ꓐꓰ ꓕꓲ ꓪ ꓜ ꓜ ꓠ, ꓟ ꓬꓰ ꓔꓬ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓑ ꓑ ꓣꓴ ꓢꓲ ꓶꓼ ꓥꓳꓽ ꓙꓱꓽ ꓢꓲ ꓠꓬꓲ꓾ ꓦꓶ, ꓢꓲ ꓬꓲ ꓪ ꓔꓯ ꓖꓶˍ ꓡꓳ꓿ ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ. ꓧꓪꓽ ꓖꓳ ꓓꓱ ꓥ ꓟ ꓟꓲ‐ꓢ ꓔꓶ ꓖꓶ (ꓑ ꓑ ꓠꓯ, ꓗꓪ ) ꓟ ꓠꓬ ꓮ ꓘꓶ. ꓛꓲ ꓣꓳꓺ ꓚꓵ. ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓢꓲꓽ ꓫꓬ ꓖꓳ ꓓꓱ ꓥ ꓟ  ꓟ ꓑ ꓑ ꓐꓰ ꓛꓱ ꓡꓱ ꓙꓵꓻ ꓗꓪ ꓬꓲ. ꓚꓵ. ꓚꓵ. ꓔꓬ ꓟ ꓔꓯ ꓣꓳ. ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓣꓳ ꓔꓯ ꓬꓲ. ꓠꓬ ꓫꓵꓻ ꓟ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓪꓴ‐ꓢ ꓥ ꓟ ꓔꓯ ꓣꓳ ꓒꓻ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓐꓯ ꓟ. ꓖꓶ ꓠ, ꓟ ꓥ ꓟ ꓐꓰ ꓬꓲ. ꓔꓯ ꓙꓵꓻ ꓠ, ꓟ ꓟ. ꓖꓶ ꓡ ꓡꓳ꓿ ꓝꓮꓲ ꓗꓳ. ꓗꓷ ꓟ ꓙꓵ, ꓕꓯ ꓣꓳ ꓢꓯ. ꓔꓬ ꓟ ꓗꓷ ꓟ ꓟꓽ ꓙꓲꓻ ꓟ ꓚꓱ, ꓔꓯ ꓡꓳ, ꓗꓷ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓓꓵꓽ ꓙ ꓒꓳ, ꓡꓶ ꓠ, ꓟ ꓣꓳ ꓔꓯ ꓢꓲꓺ ꓒ ꓘꓴˍ ꓔꓬ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓠꓬ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓡꓳ. ꓟꓳ ꓗꓷ ꓗ. ꓠꓯ. ꓙꓱ‐ꓣꓴ‐ꓢ‐ꓡꓱ ꓗꓪ ꓙꓰ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓟ. ꓟꓲ ꓚꓺ ꓟ. ꓖꓶ ꓗꓷ ꓟ ꓥ ꓡꓳ꓿

ꓝꓮꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓓꓵꓽ ꓙ ꓚꓱ, ꓫ. ꓕꓱ ꓚꓱ, ꓬꓲ. ꓒꓳ ꓒꓳ ꓮ ꓟꓬ, ꓫꓵꓽ ꓗꓪ ꓐꓰ ꓬꓲ. ꓔꓯ ꓙꓵꓻ ꓠ, ꓟ ꓥ ꓡꓳ꓿ ꓝꓮꓲ ꓙꓲ‐ꓢꓴ ꓢꓲꓻ ꓤ ꓐꓴ ꓣꓳ ꓙꓵꓻ ꓠꓲ, ꓔꓯ ꓠꓱ. ꓐꓯ ꓢꓴ ꓔꓯ ꓐꓯ ꓟ. ꓖꓶ ꓠ, ꓟ ꓐꓰ ꓞꓳ ꓫꓱ, ꓠ, ꓟ ꓣꓳ ꓔꓯ ꓘꓴˍ ꓔ ꓡꓳ꓿ ꓝꓮꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙꓲꓻ ꓟ ꓕꓲ ꓒꓳ, ꓗꓪ ꓒꓳ, ꓡꓶ ꓠ, ꓟ ꓐꓰ ꓢꓲꓽ ꓫꓬ ꓕꓳ ꓶ ꓵꓻ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓢꓳ ꓣꓴ ꓠ, ꓟ ꓣꓳ ꓔꓯ ꓘꓴˍ ꓔ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓢꓲꓽ ꓫꓬ ꓖꓳꓽ ꓓꓱ ꓔꓯ ꓣꓳ ꓙꓲ‐ꓢꓴ ꓢꓲꓺ ꓤ    ꓮ ꓙꓵꓽ ꓢꓴ ꓘꓳ, ꓣꓴ ꓟꓶ ꓠ, ꓟ ꓢꓯꓼ ꓕꓵꓼ ꓠ, ꓟ ꓣꓳ ꓔꓯ ꓢꓲꓺ ꓒ ꓘꓴˍ ꓔꓬ ꓟ ꓥ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓓꓵꓽ ꓙ ꓢꓲ ꓠꓬꓲ ꓬꓲ. ꓔꓯ ꓙꓵꓻ ꓠ, ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓝꓲ ꓓꓴ ꓐꓴ ꓡꓰ ꓐꓰ ꓛꓳ ꓢꓲ ꓠꓬꓲ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓐꓰ ꓣꓳ ꓘꓴ ꓜꓲꓼ ꓞꓳ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓙꓵꓻ ꓠꓲ, ꓚꓱ, ꓗꓪ ꓪꓴꓽ ꓟꓴ ꓡ ꓠ, ꓟ ꓬꓰ ꓙ ꓔꓳ, ꓙ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓠꓬꓲ. ꓠꓴ ꓥꓪ ꓔꓯ ꓘꓴˍ ꓔꓬ ꓟ ꓥ ꓡꓳ꓿ ꓫ.  ꓟꓳ ꓪ꓿