ꓢꓲꓺ ꓒ ꓬꓰ‐ꓢꓴ ꓬꓲꓻ ꓙꓬ ꓕꓯꓽ ꓢꓲ ꓫꓱꓽˍ ꓟ (Sunday Reflection)

ꓢꓲꓺ ꓒ ꓬꓰ‐ꓢꓴ ꓬꓲꓻ ꓙꓬ ꓕꓯꓽ ꓢꓲ ꓫꓱꓽˍ ꓟ   (Sunday Reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓶ ꓘꓳꓼ ꓠꓯ ꓗꓪ ꓐꓰ (19) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓔꓲ ꓕꓳ ꓶ (14:22-33) ꓝꓲ. ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓬꓲꓻ ꓙꓬ ꓕꓯꓽ ꓢꓲ ꓙꓻ ꓖꓴ ꓫꓱꓽ ꓟ ꓢꓲꓽ ꓫꓬ ꓕꓳ ꓶ ꓥ ꓡꓳ꓿ꓢꓲꓽ ꓫꓬ ꓕꓳ ꓶ ꓔꓯ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓓꓴ ꓙ ꓫꓪ ꓠꓬꓲˍ ꓢꓲ ꓠꓬꓲ ꓚꓲ. ꓛꓬ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓟꓬ, ꓛꓲ ꓙꓵꓻ ꓟ ꓙꓵꓻ ꓠꓲ, ꓔꓯ ꓣꓳ ꓓꓴ ꓙ ꓠ, ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓝꓲ ꓒꓲ‐ꓕꓱ ꓔꓯ ꓬꓲꓻ ꓙꓬ ꓓꓯ ꓢꓲ ꓗꓪ ꓙ ꓖꓴ ꓫꓱꓽ ꓠ, ꓟ ꓘꓴˍ ꓟ ꓡꓰ ꓐꓰ  ꓣꓳ ꓚꓲ. ꓛꓬ ꓤꓶ ꓗꓪ ꓥ ꓟꓲ ꓮ ꓡꓰ ꓐꓰ ꓙ ꓫꓱꓽ ꓠ, ꓟ ꓣꓳ ꓔꓯ ꓘꓴˍ ꓔꓬ ꓟ ꓥ ꓡꓳ꓿ ꓓꓽ ꓪꓴ. ꓕꓲ ꓠꓬ ꓚꓲ. ꓛꓬ ꓙꓵꓻ ꓠꓲ, ꓠꓬ ꓜꓲꓻ ꓤ ꓠ, ꓟ ꓐꓰ ꓣꓳ ꓙꓵꓻ ꓠꓲ, ꓮ ꓘꓶ. ꓛꓲ ꓪꓴꓽ ꓠ, ꓟ ꓢꓯꓼ ꓕꓵꓼ ꓠ, ꓟ ꓣꓳ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿

ꓣꓳ ꓠꓬ ꓢꓽ ꓢꓽ ꓡꓰ ꓛꓳꓽ ꓙꓳ ꓢꓯ. ꓔꓬ ꓟ ꓤꓶ ꓻ ꓗꓪ ꓐꓰ ꓓꓳˍ ꓢꓲ ꓠꓬꓲ ꓚꓲ. ꓛꓬ ꓦꓻ ꓕꓲ ꓒꓳ, ꓐꓰ ꓧꓪꓽ ꓖꓳ ꓓꓱ ꓕꓲ ꓒꓳ, ꓗꓪ ꓪꓴꓽ ꓟꓴ ꓡ ꓠ, ꓟ ꓢꓯꓼ ꓕꓵꓼ ꓠ, ꓟ ꓢꓲꓺ ꓒ ꓡꓰ ꓟ. ꓖꓶ ꓔ ꓡꓳ꓿ꓚ  ꓝꓲ ꓓꓴ ꓒꓲ‐ꓕꓱ ꓠꓬ ꓬꓲ ꓤꓶꓻ ꓠꓯ ꓗꓪ ꓮ ꓕꓯ ꓥ ꓟꓲ ꓟꓽ ꓟꓳ ꓠꓬꓲˍ ꓟ ꓢꓲꓺ ꓒ ꓬꓰ‐ꓢꓴ  ꓬꓲꓻ ꓙꓬ ꓗꓪ ꓙ ꓫꓱꓽ ꓟ ꓔꓯ ꓡꓳ. ꓟꓳ ꓗꓷ ꓗ ꓠꓯ. ꓬꓲ ꓥ ꓟꓲ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓫꓱꓽ ꓠ, ꓟ ꓢꓲꓺ ꓒ ꓬꓰ‐ꓢꓴ ꓔꓯ ꓓꓰꓽ ꓗꓷ ꓟ ꓥ ꓡꓳ꓿ ꓒꓲ‐ꓕꓱ ꓠꓬ ꓗ, ꓛꓲꓽ ꓛꓲꓼ ꓡꓰ ꓡꓲ ꓘꓴꓽ ꓗꓪ ꓤꓶꓽ ꓔꓬ ꓟ ꓗꓪ ꓐꓰ ꓬꓲꓻ ꓙꓬ ꓗꓪ ꓙ ꓫꓱꓽ ꓠ, ꓟ ꓢꓯꓼ ꓕꓵꓼ ꓗꓷ ꓟ ꓥ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓠꓯ, ꓗꓪ ꓙꓳˍ ꓟ ꓑꓶ. ꓔ ꓟ ꓠꓲ, ꓟ ꓐꓰ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓟ ꓙꓵꓻ ꓠꓲ, ꓡꓰ ꓬꓲꓻ ꓙꓬ ꓕꓯꓽ ꓢꓲ ꓙꓽ ꓫꓱꓽ ꓗꓷꓳ꓿ ꓖꓳ ꓡꓰ ꓐꓰ ꓣꓳ ꓥ ꓟꓲ ꓢꓽ ꓢꓽ ꓢꓯꓼ ꓔꓬ ꓟ ꓤꓶꓻ ꓔꓲ. ꓗꓪ ꓐꓰ ꓓꓳˍ ꓢꓲ ꓠꓬꓲ ꓢꓲꓺ ꓒ ꓐꓰ ꓕꓲ ꓪ ꓣꓳ ꓤꓶꓻ ꓗꓪ ꓙ ꓫꓱꓽ ꓠ, ꓟ ꓢꓲꓺ ꓒ ꓡꓰ ꓣꓳ ꓔꓯ ꓟ. ꓖꓶ ꓔ ꓟ ꓥ ꓡꓳ꓿

ꓠꓬꓲ. ꓝꓲ. ꓠꓬ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓠꓬ ꓠꓱ. ꓐꓯꓼ ꓢꓴ ꓐꓰ ꓟꓽ ꓫꓱ. ꓡꓯ ꓘꓳ, ꓟ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓲ ꓠꓬꓲ ꓙꓽ ꓫꓱꓽ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓲ ꓠꓬꓲ ꓮ ꓡꓰ ꓫꓵꓽ ꓫ. ꓓꓴ ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓐꓰ ꓕꓲ ꓪ ꓙ ꓫꓱꓽ ꓠ, ꓟ ꓣꓳ ꓚꓵ. ꓡꓳ꓿ ꓝꓲ ꓓꓴ ꓒꓲ‐ꓕꓱ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓬꓰ ꓙ ꓔ ꓙ ꓟ ꓗꓪ ꓐꓰ ꓬꓲꓻ ꓙꓬ ꓕꓯꓼ ꓢꓲ ꓙꓽ ꓫꓱꓽ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓲꓽ ꓦꓲ ꓓꓽ ꓟ ꓙꓱ ꓟ ꓔꓯ ꓟꓳꓻ ꓗꓷ ꓠꓬ ꓒꓲ‐ꓕꓱ ꓠꓬ ꓙꓳꓺ ꓡꓰ ꓠꓬꓲ ꓦꓱꓺ ꓡꓰ ꓐꓰ ꓗ, ꓢꓲ ꓢꓲꓺ ꓒ ꓥꓪ ꓔꓯ ꓚꓬꓴ ꓙ ꓡꓯ ꓐꓰ ꓐꓯ ꓗꓷ ꓟ ꓥ ꓡꓳ꓿ ꓣꓳ ꓤꓶꓻ ꓠꓯ ꓗꓪ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓟ ꓙꓵꓻ ꓠꓲ, ꓔꓯ ꓡꓰ ꓒꓵꓽ ꓛꓳꓽ ꓢꓲ ꓠꓬꓲ ꓑꓶ. ꓑꓶ. ꓡꓰ ꓙ ꓫꓱꓽ ꓠ, ꓟ ꓣꓳ ꓚꓵ. ꓡꓳ꓿ ꓢꓲꓺ ꓒ ꓐꓰ ꓙ ꓫꓱꓽ ꓕꓯ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓡ ꓟ ꓐꓰ ꓣꓳ ꓔꓯ ꓢꓴ ꓡꓰ ꓫꓵꓽ ꓪꓴꓽ ꓮ ꓟꓬ, ꓛꓲ ꓖꓶ ꓡ ꓥ ꓟꓲ ꓢꓲꓺ ꓒ ꓔꓯ ꓠꓲ, ꓠꓵ ꓟ ꓠꓲ, ꓟ ꓐꓰ ꓢꓲꓺ ꓒ ꓔꓯ ꓙꓵꓻ ꓟ ꓙꓵꓻ ꓠꓲ, ꓔꓯ ꓮ ꓕꓯ ꓥ ꓟꓲ ꓣꓳ ꓠꓲ, ꓟ ꓗꓪ ꓗꓶ. ꓔ ꓠ, ꓟ ꓣꓳ ꓚꓵ. ꓡꓳ꓿

ꓟꓲ ꓠꓯ ꓗꓪ ꓮ ꓡꓰꓳ ꓫꓵꓽ ꓫꓵꓽ ꓪꓴꓽ ꓔꓳ ꓜꓳ ꓔꓬ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓔꓶ ꓐꓬꓱꓻ ꓥ ꓟ ꓐꓰ ꓬꓲ ꓐꓰ ꓕꓲ ꓪ ꓙ ꓫꓱꓽ ꓠ, ꓟ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿ ꓣꓳ ꓠꓬ ꓟꓲ ꓠꓯ ꓡ ꓞꓳ ꓥ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷ ꓥ ꓟꓲ ꓧꓪ, ꓡꓰ ꓟꓽ ꓓ ꓙꓽ ꓫꓱꓽ ꓟꓽ ꓓ ꓗꓷ ꓡꓰ ꓟ ꓙꓵ, ꓔꓯ ꓝꓲ ꓓꓴ ꓒꓲ‐ꓕꓱ ꓡꓰ ꓐꓰ ꓢꓲꓺ ꓒ  ꓥꓪ ꓔꓯ ꓚꓬꓴ ꓡꓯ ꓐꓰ ꓓꓰꓽ ꓠ, ꓟ ꓣꓳ ꓚꓵ. ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓫ. ꓓꓴ ꓟꓶ ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓢꓲꓺ ꓒ ꓔꓯ ꓘꓴˍ ꓗꓷ ꓡ ? ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓕꓯ ꓥ ꓟꓲ ꓪꓽ ꓘꓴ ꓡ ? ꓐꓰ ꓣꓳ ꓓꓴ ꓙ ꓠ, ꓟ ꓙꓳˍ ꓟ ꓥ ꓡꓳ꓿ ꓡꓲ ꓗꓪ ꓐꓰ ꓓꓳꓻ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓕꓲ ꓪ ꓣꓳ ꓤꓶꓻ ꓗꓪ ꓙ ꓫꓱꓽ ꓓꓴ ꓬꓰ ꓡꓯ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓣꓳ ꓙꓵꓻ ꓠꓲ, ꓔꓯ ꓪꓴꓽ ꓟꓴ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ ꓪ꓿