ꓢꓲꓺ ꓒ ꓬꓰ‐ꓢꓴ ꓬꓲ. ꓛꓳ ꓒꓯ, ꓐꓴ ꓔꓯ ꓟꓳ. ꓖꓶˍ ꓟ (Sunday reflection)

#creditphoto #Getty photo #Jesus and St.Thomas

Sunday, April 16, 2023

ꓢꓲꓺ ꓒ ꓬꓰ‐ꓢꓴ ꓬꓲ. ꓛꓳ ꓒꓯ, ꓐꓴ ꓔꓯ ꓟꓳ. ꓖꓶˍ ꓟ

ꓠꓬꓲ. ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓑꓮꓲꓽ ꓬꓰ ꓗꓷ ꓗ ꓠꓯ. ꓠꓬꓲꓽ ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓣꓳ ꓐꓴ ꓵꓻ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓬꓳ‐ꓦ ꓕꓳ ꓶ( 20ꓽ 19‐31 ) ꓝꓲ. ꓗꓪ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓬꓴ‐ꓔ ꓡ ꓞꓳ ꓔꓯ ꓙꓳꓺ ꓠꓬꓲ ꓗ ꓘꓶꓽ ꓢꓳ ꓔ ꓢꓲ ꓕꓯ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓦꓰꓼ ꓡ ꓢꓲ꓾ ꓠꓴ ꓪ ꓢꓲ ꓡꓲ ꓟꓶ ꓝꓲ ꓐꓯˍ ꓖꓶ ꓡꓳ꓿ ꓢꓲꓽ ꓫꓬ ꓟ ꓦ ꓪꓴ‐ꓢ ꓠꓬ ꓝꓲ ꓓꓴ ꓔꓯ ꓢꓲ ꓬꓲꓼ ꓡ ꓟ ꓔꓯ ꓡꓳ. ꓟꓳ ꓪ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓝꓲ ꓓꓴ ꓐꓴ ꓔꓯ ꓶꓼ ꓓꓳ ꓫꓱ, ꓓꓳ ꓐꓯ ꓟ. ꓖꓶ ꓢꓲ ꓠꓬꓲ ꓪꓴ‐ꓢ ꓠꓵꓻ ꓠꓲ, ꓟ ꓐꓰ ꓚꓬꓴ ꓙ ꓟ ꓣꓱ ꓛꓰ ꓔꓯ ꓟ. ꓖꓶ ꓠ, ꓟ ꓐꓯ ꓟ ꓔ ꓡꓳ꓿ ꓝꓮꓲ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓝꓲ ꓓꓴ ꓐꓴ ꓔꓯ ꓝꓴꓲ ꓖꓽ ꓖꓶ ꓠ, ꓟ ꓙꓵꓽ ꓪ ꓥ ꓟꓲ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓥꓳꓽ ꓡꓰ ꓟ ꓝꓴꓲ ꓔꓯ ꓖꓽ ꓖꓶ ꓡꓯ ꓘꓳ, ꓠ, ꓟ ꓢꓲꓺ ꓒ ꓬꓰ‐ꓢꓴ ꓠꓲ, ꓫꓵˍ ꓟ ꓥ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓟ ꓔꓯ ꓝꓲ ꓓꓴ ꓐꓴ ꓔꓯ ꓟ. ꓖꓶ ꓟ ꓙꓵ, ꓕꓯ ꓝꓲ ꓓꓴ ꓕꓳ‐ꓟ ꓠꓬ ꓟꓽ ꓡꓳ. ꓟꓳ ꓟ ꓪꓴ. ꓠꓬꓲ ꓟꓽ ꓙꓵꓽ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓝꓲ ꓓꓴ ꓕꓳ‐ꓟ ꓔꓯ ꓠꓴ ꓡꓯꓼ ꓠꓬꓲ ꓡꓰ ꓥꓪ ꓡꓯ ꓒꓯ, ꓔꓯ ꓡꓷ, ꓠꓬꓲ ꓡꓯ꓿ ꓝꓮꓲ ꓠꓴ ꓡꓯ ꓒꓯ ꓛꓱ ꓢꓲ ꓥꓪ ꓙꓳꓽ ꓐꓬ ꓗꓪ ꓢꓶ ꓠꓬꓲ ꓢꓲ ꓙꓵꓻ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓟ ꓥ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓠꓬ ꓥꓪ ꓔꓯ ꓟꓳˍ ꓠꓬꓲ ꓙꓵꓻˍ ꓟ ꓥ ꓡ ? ꓟꓽ ꓟꓳꓻ ꓠꓬꓲˍ ꓟꓲ ꓙꓵꓻ ꓢꓴ ꓠ ꓶꓼ ꓙꓳ ꓫꓱ, ꓙꓳˍ ꓡꓳ꓾ ꓐꓯ ꓖꓶ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓪꓴ‐ꓢ ꓠꓵꓻ ꓠꓲ, ꓐꓰ ꓫꓱ. ꓤ ꓠꓲ, ꓔꓯ ꓣꓱ ꓠ, ꓟ ꓐꓰ ꓪꓴ‐ꓢ ꓡꓰ ꓘꓴˍ ꓟ ꓢꓯꓼ ꓔꓯ ꓠ, ꓡꓳ ꓠ, ꓟ ꓥ ꓡꓳ꓿ ꓫꓱ. ꓤ ꓠꓲ, ꓗꓪ ꓡꓰ ꓕꓲ ꓣꓳ ꓛꓳ ꓕꓲ ꓣꓳ ꓪ ꓡꓯ ꓘꓳ, ꓠ, ꓟ ꓪꓴ‐ꓢ ꓡꓰ ꓣꓳ ꓔꓯ ꓘꓴˍ ꓡꓳ꓿ ꓣꓳ ꓬꓰ ꓟ ꓟꓬꓱꓽ ꓗꓪ ꓐꓰ ꓥ ꓟꓲ ꓫ. ꓕꓱ ꓟ ꓢꓯꓼ ꓗꓪ ꓐꓰ ꓥ ꓟꓲ ꓫꓱ. ꓤ ꓟ ꓠꓲ, ꓟ ꓣꓱ ꓠ, ꓟ ꓣꓳ ꓔꓯ ꓠꓬꓲ. ꓠꓬꓲ ꓗꓪ ꓟ. ꓖꓶ ꓡ ꓟ ꓥ ꓡꓳ꓿

ꓣꓳ ꓞꓳ ꓫꓱ, ꓟ ꓤꓶꓻ ꓗꓪ ꓣꓱ. ꓤ ꓟ ꓠꓲ, ꓟ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓠꓲ, ꓟ ꓘꓴꓽ ꓗꓪ ꓗꓷ ꓔ ꓠ, ꓟ ꓥ ꓡꓳ꓿ ꓜ ꓓꓴ ꓟꓽ ꓙꓳˍ ꓢꓴ ꓐꓰ ꓓꓳꓻ ꓓꓴ ꓟꓽ ꓙꓳ ꓢꓴ ꓐꓴ ꓔꓯ ꓜ ꓓꓴ ꓐꓰ ꓓꓳꓻ ꓓꓴ ꓬꓰ ꓙ ꓔꓳ, ꓟ ꓠ, ꓟ ꓥ ꓡꓳ꓿ ꓝꓮꓲ ꓠꓻ ꓔꓬ ꓢꓴ ꓐꓴ ꓔꓯ ꓙꓰ ꓢꓲ ꓠꓬꓲ ꓪꓽ ꓘꓴ ꓙ ꓖꓶ ꓠ, ꓐꓰ ꓐꓱꓻ ꓓꓴꓽ ꓔꓳ, ꓦꓲꓻ ꓗꓪ ꓔꓬ ꓢꓴ ꓐꓴ ꓔꓯ ꓙꓰ ꓢꓲ ꓢꓲ ꓠꓬꓲ ꓜꓲꓼ ꓠ, ꓟ ꓥ ꓡꓳ꓿

ꓣꓳ ꓠꓬ ꓚꓲ ꓛꓬꓽ ꓐꓱ ꓶ ꓥ ꓟꓲ ꓪꓽ ꓘꓴ ꓢꓲ ꓠꓬꓲ ꓢꓲꓽ ꓫꓬ ꓟ ꓦꓻ ꓪꓴ‐ꓢ ꓔꓯ ꓪꓽ ꓘꓴ ꓠ, ꓟ ꓣꓳꓺ ꓚꓵꓻ ꓡꓳ꓿ ꓪꓴ‐ꓢ ꓬꓲ. ꓧꓪ ꓖꓳꓽ ꓓꓱ ꓢꓲꓽ ꓫꓬ ꓑ. ꓑ ꓔꓯ ꓥ ꓟꓲ ꓮ ꓕꓯ ꓥ ꓟꓲ ꓘꓳ, ꓣꓴ ꓟꓶ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓙꓵꓻ ꓠꓲ, ꓔꓯ ꓪꓴꓽ ꓟꓴ ꓡ ꓠ, ꓟ ꓕꓲ ꓠꓬꓲꓽ ꓡꓰ ꓕꓲ ꓠꓬꓲ ꓪ ꓘꓴ ꓓꓴ ꓬꓰ ꓡꓯ꓿

ꓝꓲ ꓓꓴ ꓕꓳ‐ꓟ ꓙꓵꓻ ꓠꓲ, ꓔꓯ ꓣꓳ ꓡꓳ. ꓟꓳ ꓗꓷ ꓗ ꓠꓯ. ꓣꓳ ꓙꓵꓻ ꓠꓲ, ꓔꓯ ꓑꓶ. ꓑꓶ. ꓞꓳ ꓫꓱ, ꓓꓴ ꓬꓰ ꓡꓯ꓿ ꓣꓳ ꓙꓵꓻ ꓠꓲ, ꓔꓯ ꓣꓳ ꓠꓲ, ꓟ ꓘꓴꓽ ꓗꓪ ꓢꓳꓻ ꓔ ꓓꓴ ꓟꓽ ꓥ ꓣꓳ ꓕꓲ ꓦꓲꓻ ꓢꓴ ꓐꓰ ꓣꓳ ꓕꓲ ꓘ, ꓞꓳ ꓤ ꓐꓰ ꓛꓳ ꓒꓯ, ꓛꓳ ꓤ ꓐꓴ ꓔꓯ ꓐꓯ ꓟ. ꓖꓶ ꓠ, ꓟ ꓥ ꓡꓳ꓿ ꓟꓲ ꓠꓯ ꓕꓯ ꓢꓲ ꓗꓪ ꓢꓯ. ꓔꓬ ꓢꓴ ꓙꓲ‐ꓢꓴ ꓢꓲꓻ ꓤ ꓐꓴ ꓮ ꓙꓵꓽ ꓠꓬ ꓢꓲꓺ ꓒ ꓬꓰ‐ꓢꓴ ꓐꓶ ꓶ ꓠꓬꓲꓽ ꓟꓳꓻ ꓓꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓮ ꓘꓶ. ꓫ. ꓟꓳ ꓪ꓿