ꓢꓲꓺ ꓒ ꓬꓰ-ꓢꓴ ꓠꓬ ꓙꓲˍ ꓟ ꓮꓸ ꓣꓳ ꓡꓳꓸ ꓒ ꓥ ꓡꓳ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮꓽ ꓟ ꓥˍ ꓟꓲ ꓣꓳ ꓤꓶꓻ ꓗꓪ ꓶꓻ ꓤ꓾ ꓚꓬ ꓢꓲꓸ ꓕꓲ ꓫꓵꓽ ꓫꓵꓽ ꓟꓽ ꓒꓲꓼ ꓡꓰ ꓠꓬꓲ ꓟ ꓟꓽ ꓙꓳ= ꓕꓲ ꓫꓵꓽ ꓟꓽ ꓥ ꓠꓬ ꓕꓲ ꓫꓵꓽ ꓒꓲꓼ ꓬꓰ ꓠꓬꓲꓸˍ ꓡꓳ= ꓶꓻ ꓤ ꓚꓬ ꓢꓲꓸ ꓮ ꓡꓰ ꓫꓵꓽ ꓥ ꓡ? ꓒꓴ ꓥ ꓡ? ꓟꓽ ꓥ ꓠꓬ ꓣꓳꓽ ꓣꓱꓽ ꓔꓬ ꓟ ꓖꓴꓽ ꓙꓴꓽ ꓖꓴꓽ ꓟꓲ ꓥ ꓡ? ꓣꓳꓽ ꓦꓲꓻ ꓗꓪ ꓓꓹ ꓟ ꓶꓻ ꓤ ꓚꓬ ꓢꓲꓸ ꓕꓲ ꓫꓵꓽ ꓫꓵꓽ ꓮꓽ ꓟ ꓥˍ ꓟꓲ ꓒꓲꓼ ꓡꓰ ꓠꓬꓲꓸˍ ꓡꓳ= ꓖꓳ ꓡꓱ ꓒꓲꓼ ꓡꓰˍ ꓕꓯ ꓣꓳ ꓮ ꓡꓰ ꓗꓹ ꓡ? ꓖꓳ ꓕꓯ ꓣꓳ ꓠꓬ ꓙꓽ ꓖꓳꓼˍ ꓡꓳ= ꓥꓪ ꓡꓰ ꓖꓳ ꓟ ꓔꓯ ꓮ ꓡꓰ ꓗꓪ ꓗꓶ ꓥꓳꓽ ꓗꓷ ꓢꓰꓽ= ꓮꓽ ꓟ ꓡꓰ ꓘꓴꓽ ꓔꓯꓹ ꓙꓰ ꓢꓰꓽ= ꓕꓱ ꓡꓱ ꓓꓵꓽ ꓙ ꓟꓬꓽ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓮ ꓟꓬꓹ ꓙꓳ ꓡ ꓗꓴꓸˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬ ꓒꓲꓼ ꓡꓰ ꓐꓯˍ ꓟ ꓮ ꓡꓰ ꓟ ꓥ ꓡ? ꓟꓬꓽ ꓠꓬꓲ ꓐꓶꓹ ꓠꓬꓲ ꓣꓳ ꓒꓵꓽ ꓗ ꓚꓰꓹ ꓟ ꓶꓻ ꓤ ꓕꓲ ꓫꓵꓽ ꓫꓵꓽ ꓒꓲꓼ ꓡꓰ ꓠꓬ ꓮ ꓘꓶꓸ ꓠꓲꓹ ꓟ ꓫꓸ ꓡꓳ= ꓖꓳ ꓡꓱ ꓠꓬꓲ ꓒꓲꓼ ꓡꓰˍ ꓟ ꓠꓬ ꓮꓽ ꓟˍ ꓟꓲ ꓔꓳꓹ ꓜꓳꓽ ꓠꓬꓲˍ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ-ꓕꓲ 18ꓽ12-14 ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓮ ꓣꓳ ꓕꓲꓽ ꓦꓬ ꓟ ꓗꓪ ꓕꓲ ꓟ ꓒꓲꓼ ꓡꓰ ꓠꓬ ꓖꓳ ꓕꓲ ꓟ ꓔꓯ ꓟꓽ ꓟꓳꓻ ꓟꓽ ꓞ ꓧꓪꓸˍ ꓟ ꓮꓸ ꓣꓳ ꓡꓳꓸ ꓒ ꓥꓳ ꓐꓯˍ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓙꓲˍ ꓟ ꓮ ꓣꓳ ꓡꓳꓸ ꓒ ꓥ ꓡꓳ= ꓒꓲꓼ ꓬꓰ ꓟ ꓮꓸ ꓣꓳ ꓖꓳ ꓟ ꓔꓯ ꓟꓽ ꓟꓳꓻ ꓟꓽ ꓞ ꓬꓲ ꓧꓪꓸˍ ꓡꓳ=

ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓮꓸ ꓣꓳ ꓡꓳꓸ ꓒ ꓕꓲ ꓣꓳ ꓐꓯˍ ꓟ ꓠꓬ ꓮ ꓘꓶꓸ ꓙꓲ ꓣꓴꓽ ꓟꓬ ꓑꓬ ꓓꓴ ꓙꓳˍ ꓡꓳ= ꓬꓲ ꓠꓬ ꓢ ꓘꓪ ꓢ ꓟꓲ ꓮꓸ ꓣꓳ ꓔꓯ ꓧꓪ ꓬꓰ ꓠ ꓔ ꓡꓳ= ꓟꓶꓽ ꓦ ꓦ ꓔꓬ ꓟ ꓗꓪ ꓥˍ ꓟꓲ ꓮꓸ ꓣꓳ ꓔꓯ ꓧꓪ ꓬꓰ ꓠ ꓔ ꓡꓳ= ꓭꓸ ꓛꓲ ꓭꓸ ꓐꓬꓼ ꓮ ꓟꓬꓹ ꓙꓳˍ ꓟ ꓗꓪ ꓐꓰˍ ꓟꓲ ꓬꓲ ꓧꓪ ꓬꓰ ꓠ ꓗꓹ ꓡꓳ= ꓬꓲ ꓢꓯꓼ ꓟꓬ ꓔꓯ ꓔꓶꓺ ꓢꓲ ꓠꓬꓲ ꓬꓲ ꓧꓪ ꓬꓰ ꓠ ꓗꓹ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓡꓽ ꓟ꓾ ꓪꓰ ꓕꓳꓹ꓾ ꓪꓴ ꓞꓲ꓾ ꓘꓳꓼ ꓫꓵꓽ ꓘꓳꓼ ꓙꓰꓽ ꓮ ꓟꓬꓹ ꓔꓯ ꓥˍ ꓟꓲ ꓬꓲ ꓔꓳꓹ ꓜꓳꓽ ꓪ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓮ ꓣꓳ ꓒꓲꓼ ꓬꓰ ꓟ ꓔꓯ ꓫꓱꓸ ꓤˍ ꓟ ꓑꓶꓸ ꓓꓴ꓾ ꓠꓲꓹ ꓠꓵˍ ꓟ ꓑꓶꓸ ꓓꓴ ꓟꓽ ꓓ ꓟꓽ ꓞ ꓧꓪ ꓬꓰˍ ꓡꓳ= ꓕꓱ ꓟ ꓠꓬ ꓙꓲˍ ꓟ ꓮꓸ ꓣꓳ ꓡꓳꓸ ꓒ ꓬꓲ ꓫꓱꓹ ꓥ ꓡꓳ=

ꓟꓽ ꓙꓲꓻ ꓟ ꓮꓸ ꓣꓳ ꓡꓳꓸ ꓒ ꓠꓬ ꓕꓲ ꓟ ꓒꓲꓼ ꓬꓰ ꓠꓬ ꓮꓸ ꓫꓵꓽ ꓟꓽ ꓛꓵ꓾ ꓝꓮꓲ 99 ꓟ ꓤꓰꓻ ꓓꓹ ꓢꓰꓽ ꓐꓯ ꓢꓲ ꓠꓲꓹ ꓒꓴ ꓔꓬ ꓡꓳ=ꓕꓱ ꓟ ꓠꓬ ꓟꓽ ꓙꓲꓻ ꓟ ꓮꓸ ꓣꓳ ꓡꓳꓸ ꓒ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓮꓸ ꓣꓳ ꓔꓯ ꓪꓰ ꓕꓳꓹ꓾ ꓡꓽ ꓟ ꓜꓽ ꓡ ꓕꓯ ꓟꓽ ꓙꓲꓻ ꓟ ꓮꓸ ꓣꓳ ꓡꓳꓸ ꓒ ꓠꓬ ꓛꓰꓹ ꓑꓬ ꓙꓰˍ ꓡꓳ= ꓬꓲ ꓠꓬ ꓬꓲ ꓢꓯꓼ ꓟꓬ ꓡꓲꓹ ꓗꓷ ꓐ ꓡ ꓠꓹ ꓟ ꓐꓱ ꓬꓲ ꓮꓸ ꓣꓳ ꓜꓴꓻ ꓔꓯ ꓡꓳ ꓔꓲꓸ ꓬꓰ ꓢꓲ ꓙꓰˍ ꓡꓳ= ꓕꓱ ꓟ ꓠꓬ ꓟꓽ ꓙꓲꓻ ꓟ ꓮꓸ ꓣꓳ ꓡꓳꓸ ꓒ ꓥ ꓡꓳ=

ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓙꓲˍ ꓟ ꓮꓸ ꓣꓳ ꓡꓳꓸ ꓒ ꓥ ꓡꓳ= ꓮꓸ ꓣꓳ ꓐꓱ ꓶ ꓬꓲ ꓠꓬ ꓬꓲ ꓢꓯꓼ ꓟꓬ ꓔꓯ ꓖꓶꓽ ꓐ ꓡˍ ꓡꓳ= ꓬꓲ ꓮꓸ ꓣꓳ ꓜꓴꓻ ꓔꓯ ꓮ ꓡꓰ ꓫꓵꓽ ꓪꓰ ꓕꓳꓹ ꓥˍ ꓟꓲ ꓟꓽ ꓜꓽ ꓡ ꓠꓹ ꓟ ꓬꓲ ꓡꓰ ꓢꓯꓼ ꓟꓬ ꓔꓶꓺ ꓢꓲ ꓠꓬ ꓗꓽ ꓔ ꓖꓶˍ ꓡꓳ= ꓮ ꓙꓵꓽ ꓔꓯ ꓬꓲ ꓡꓰ ꓡꓯꓼ ꓚꓳꓸ ꓡꓯꓼ ꓖꓳꓼ ꓠꓯꓸꓼ ꓗꓪ ꓧꓳꓽ ꓔ ꓖꓶˍ ꓡꓳ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓠꓵꓻ ꓠꓲꓹ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓚꓵ ꓚꓵ ꓣꓳ ꓔꓯ ꓠꓲꓹ ꓠꓵˍ ꓡꓳ= ꓣꓳ ꓔꓯ ꓧꓪ ꓔꓬ ꓡꓳ= ꓣꓳ ꓠꓬ ꓙ ꓖꓴ ꓟꓶꓽ ꓬꓰ ꓔꓬ ꓢꓴ ꓥ ꓡ? ꓢꓲꓺ ꓒ ꓪꓴ-ꓢ ꓬꓲ ꓚ ꓚꓱꓹ ꓟ ꓟꓽ ꓫꓱꓽ ꓔꓬ ꓢꓴ꓾ ꓬꓲ ꓠꓲꓹ ꓡꓶꓽ ꓗꓪ ꓟꓽ ꓖꓼ ꓛꓳ ꓔꓬ ꓢꓴ꓾ ꓬꓲ ꓐꓯ ꓘꓶꓽ ꓔꓯ ꓟꓽ ꓠ ꓠꓹ ꓔꓬ ꓢꓴ ꓥ ꓡ?

ꓮ ꓡꓲꓳ ꓐꓯˍ ꓠꓬ ꓣꓳ ꓠꓬ ꓪꓴ-ꓢ ꓔꓬ ꓗꓪ ꓟꓽ ꓙꓰ ꓔꓬ ꓠꓬ ꓪꓴ-ꓢ ꓔꓬ ꓗꓪ ꓐꓰ ꓧꓹ ꓙꓰˍ ꓟ ꓥ ꓡꓳ= ꓪꓴ-ꓢ ꓐꓯ ꓘꓶꓽ ꓟꓽ ꓠ ꓠꓹ ꓕꓯ꓾ ꓪꓴ-ꓢ ꓚꓱꓹ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓕꓯ ꓠꓱꓸ ꓐꓯ ꓙ ꓖꓴ ꓗꓪ ꓬꓲ ꓔꓱꓹ ꓬꓲ ꓙꓰ ꓔꓬ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓒꓲꓼ ꓬꓰ ꓟ ꓮꓸ ꓣꓳ ꓤ ꓥ ꓡ? ꓐꓯˍ ꓟ ꓣꓳ ꓠꓺ ꓠꓬꓲ ꓠ ꓗꓹ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓝꓮꓲ ꓕꓲ ꓫꓵꓽ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓮ ꓡꓰ ꓘꓶ ꓛꓲ ꓠꓲꓹ ꓠꓵ ꓔꓬ ꓡ ꓐꓯˍ ꓟ ꓢꓷꓸ ꓡꓰ ꓓꓴ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓖꓴ ꓡꓰ ꓟꓽ ꓓ ꓟ ꓬꓲ ꓠꓵꓻ ꓠꓲꓹ ꓗꓪ ꓐꓰ ꓣꓳ ꓔꓯ ꓠꓲꓹ ꓠꓵꓻ ꓔꓬ ꓡꓳ= ꓣꓳ ꓮ ꓡꓰ ꓗꓪ ꓮ ꓡꓰ ꓫꓵꓽ ꓫꓸ ꓙꓵꓻ ꓔꓬ ꓥˍ ꓟꓲ꓾ ꓭꓸ ꓛꓲ ꓭꓸ ꓖꓽ ꓡꓯꓽ ꓗꓪ ꓙꓰ ꓛꓲ ꓬꓰ ꓥˍ ꓟꓲ ꓚꓱꓹ ꓬꓲꓼ ꓡ ꓟꓽ ꓠ ꓗꓪ ꓛꓲ ꓙ ꓖꓴ ꓪꓴꓸ ꓡꓰ ꓙ ꓖꓴ ꓥꓳꓽ ꓡꓰ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓙꓵꓻ ꓔꓬ ꓕꓯ ꓬꓲ ꓠꓬ ꓣꓳ ꓔꓯ ꓚꓬꓴꓸ ꓙ ꓡˍ ꓥꓳ꓾ ꓐꓯ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓬꓲ ꓠꓵꓻ ꓠꓲꓹ ꓔꓯ ꓙꓵꓻ ꓡꓯ= ꓢꓲꓺ ꓒ ꓬꓰ-ꓢꓴ ꓬꓲ ꓠꓵꓻ ꓠꓲꓹ ꓕꓯꓽ ꓢꓲ ꓗꓪ ꓣꓳꓽ ꓑꓶꓸ ꓑꓶꓸ ꓡꓰꓽ ꓦꓰꓼ ꓞꓹ ꓢꓲ ꓠꓬꓲ ꓢꓯꓼ ꓙꓳ ꓙꓳ ꓡꓰꓽ ꓟꓲ ꓙꓬ ꓙꓰˍ ꓟ ꓦꓬꓼ ꓠꓬꓲ ꓗꓪ ꓢꓲꓺ ꓒ ꓬꓰ-ꓢꓴ ꓣꓱꓽ ꓛꓰꓽ ꓗꓪ ꓐꓰ ꓙꓰ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶ ꓠꓲꓹ ꓫꓵˍ ꓡꓳ=