ꓢꓲꓺ ꓒ ꓬꓰ-ꓢꓴ ꓬꓲꓸ ꓟꓹ ꓟ ꓑꓮꓲꓽ ꓐꓱ ꓶ ꓶꓼ ꓓꓳꓽ ꓫꓱꓹ ꓓꓳꓽ

ꓢꓲꓺ ꓒ ꓬꓰ-ꓢꓴ ꓬꓲꓸ ꓟꓹ ꓟ ꓑꓮꓲꓽ ꓐꓱ ꓶ ꓶꓼ ꓓꓳꓽ ꓫꓱꓹ ꓓꓳꓽ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ ꓮ ꓙꓵꓽ ꓔꓯ ꓧꓪꓸ ꓧꓪꓸꓼ

ꓠꓬꓲ ꓠꓬꓲ ꓠꓬ ꓒꓵꓽ ꓓꓰ ꓡꓰˍ ꓟ ꓬꓰ-ꓢꓴ ꓬꓲ ꓟꓹ ꓟ ꓟ-ꓡꓲ ꓑꓮꓲꓽ ꓥ ꓡꓳ= ꓣꓳ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓘꓴꓽ ꓗꓪ ꓠꓬ ꓦꓵꓻ ꓦꓬꓼ ꓠꓬꓲ ꓑꓮꓲꓽ 3 ꓧꓪꓹ ꓬꓰˍ ꓟ ꓥ ꓡꓳ꓾

  1. ꓬꓰ-ꓢꓴ ꓦꓵꓻ ꓑꓮꓲꓽ
  2. ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓦꓵꓻ ꓑꓮꓲꓽ
  3. ꓟꓹ ꓟ ꓟ-ꓡꓲ ꓦꓵꓻ ꓑꓮꓲꓽ ꓐꓯ ꓢꓲ꓾ ꓬꓰˍ ꓟ ꓥ ꓡꓳ=

ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓦꓵꓻ ꓑꓮꓲꓽ ꓔꓯ ꓮ ꓫꓵꓽ ꓪꓴꓸ ꓠꓬꓲ ꓬꓰˍ ꓡ ꓐꓯˍ ꓠꓬ꓾ ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓐꓱ ꓶ ꓒꓬꓱꓽ ꓟꓳ ꓡ ꓢꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ= ꓬꓲ ꓕꓲ ꓤꓶ ꓡꓱꓸꓼ ꓬꓰ-ꓢꓴ ꓔꓯ ꓔꓲꓺ ꓡꓴꓹ ꓢꓲ ꓾ ꓪꓴꓽ ꓓꓰ ꓡꓰˍ ꓟ ꓟꓷꓽ ꓠꓷꓹ ꓝꓸ ꓒꓽ ꓕꓲ ꓣꓳ ꓥ ꓟ ꓪꓴꓸ ꓠꓬꓲ ꓥ ꓡꓳ=

ꓝꓮꓲ ꓠꓬ꓾ ꓠꓬꓲ ꓠꓬꓲ ꓣꓳ ꓬꓰ ꓔꓬ ꓟ ꓟꓹ ꓟ ꓟ-ꓡꓲ ꓦꓵꓻ ꓦꓬꓼ ꓠꓬꓲ ꓑꓮꓲꓽ ꓥˍ ꓟꓲ ꓖꓳ ꓟ ꓡꓰ ꓐꓰ ꓥꓳ=ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓣꓳ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓐꓴ ꓠꓬ꓾ ꓠꓬꓲꓸ ꓠꓬꓲ ꓟ-ꓡꓲ ꓦꓵꓻ ꓑꓮꓲꓽ ꓬꓰ ꓔꓬ ꓟ ꓥ ꓡꓳ= ꓟ-ꓡꓲ ꓥˍ ꓟꓲ ꓬꓲꓸ ꓕꓲ ꓤꓶꓻ ꓡꓱꓸꓼ ꓬꓰ-ꓢꓴ ꓔꓯ ꓡꓯꓼ ꓙꓱ ꓔ ꓡꓳ= ꓪꓴ-ꓢ ꓔꓯ ꓙꓵꓻ ꓢꓲ ꓬꓲꓸ ꓐꓯ ꓘꓶꓽ ꓔꓯ ꓒꓵꓽ ꓛꓳ ꓢꓲ ꓠꓬꓲ꓾ ꓟꓽ ꓓ ꓪꓴꓽ ꓓꓰ ꓡꓰˍ ꓟ ꓪꓴ-ꓢ ꓤ ꓔꓲ ꓬꓰ-ꓢꓴ ꓬꓲꓸ ꓟꓹ ꓟ ꓒꓬꓱꓼ ꓡ ꓟ ꓪꓴꓸ ꓠꓬꓲ꓾ ꓟ-ꓡꓲ ꓦꓵꓻ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ=

ꓟ-ꓡꓲ ꓠꓬꓲ ꓝꓴꓲꓸ ꓟꓽ ꓙꓳ ꓙꓳ ꓖꓳ ꓓꓱꓽ ꓠꓬꓲ ꓔꓱꓹ ꓐꓲꓺ ꓡ ꓢꓲ꓾ ꓒꓬꓱꓽ ꓟꓳ ꓡꓹ ꓡꓳ= ꓬꓲꓸ ꓮ ꓐ ꓮ ꓟ ꓥ ꓟ Joachim ꓐꓰ Anna ꓗꓪ ꓐꓰ ꓦꓵꓻ ꓡ ꓟ ꓮꓸ ꓟꓲꓽ ꓤ ꓥ ꓢꓲ꓾ ꓬꓲ ꓠꓬ ꓦꓵꓻ ꓡꓹ ꓕꓯ ꓡꓰ ꓝꓴꓲꓸ ꓟꓽ ꓙꓳ= ꓮ ꓡꓲꓳ ꓐꓯˍ ꓠꓬ ꓾ ꓬꓰ-ꓢꓴ ꓬꓲꓸ ꓟꓹ ꓟ ꓣꓱꓽ ꓠꓹ ꓟ ꓪꓴ-ꓢ ꓡꓰ ꓬꓲꓸ ꓔꓯ ꓢꓲꓺ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲꓸ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓟꓹ ꓟ ꓒꓬꓱꓼ ꓡ ꓗꓷꓳ= ꓟ-ꓡꓲ ꓠꓬ ꓬꓰ-ꓢꓴ ꓦꓵꓻ ꓡꓹ ꓗꓪ ꓐꓰ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓗꓪ ꓛꓲꓺ ꓬꓰ-ꓢꓴ ꓐꓰ ꓕꓲ ꓪꓽ ꓔꓬ ꓢꓲ꓾ ꓬꓲ ꓤꓶꓻ ꓔꓯ ꓪꓴ-ꓢ ꓔꓯ ꓡꓯꓼ ꓙꓱ ꓔ ꓡꓳ=

ꓠꓬꓲꓸ ꓠꓬꓲ ꓑꓮꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬꓹ ꓟ ꓠꓬ꓾ ꓣꓳ ꓟꓲ ꓠꓯ ꓔꓱ ꓟ ꓗꓪ ꓢꓯꓸ ꓔꓬ ꓟ ꓠꓬ ꓬꓲꓸ ꓔꓶꓻ ꓙꓱꓼ ꓙꓳˍ ꓡꓳ=ꓟꓹ ꓟ ꓟ-ꓡꓲ ꓡꓰ ꓐꓰ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓒꓵꓽ ꓛꓳ ꓠ ꓗꓹ ꓡꓳ= ꓟ-ꓡꓲ ꓡꓰ ꓐꓰ ꓛꓳ ꓫꓱꓽ ꓠꓯꓹ ꓡꓳ= ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓒꓵꓽ ꓛꓳ ꓢꓲ꓾ ꓙꓲˍ ꓟ ꓔꓯ ꓡꓰꓽ ꓣꓱꓽ ꓬꓰˍ ꓠꓬ ꓾ ꓣꓳ ꓠꓬ ꓟ-ꓡꓲ ꓡꓰ ꓐꓰ ꓒꓬꓱꓼ ꓡꓹ ꓥꓳ=

ꓮ ꓟꓶ ꓣꓳ ꓟꓹ ꓟ ꓠꓬ꓾ ꓧꓪꓽ ꓖꓳ ꓓꓱꓽ ꓐꓰ ꓦ ꓠꓬꓲꓽ ꓔꓱꓹ ꓡꓱꓸꓼ ꓟꓴꓽ ꓗꓪ ꓗꓴꓷꓼ ꓗꓪ ꓔꓬꓹ ꓡꓳ=

ꓪꓴ-ꓢ ꓠꓲꓹ ꓡꓶꓽ ꓔꓯ ꓒꓵꓽ ꓛꓳ ꓢꓲ ꓪꓴ-ꓢ ꓠꓲꓹ ꓫꓵˍ ꓟ ꓔꓯ ꓬꓰ ꓢꓲ ꓠꓬꓲ꓾ ꓣꓳ ꓐꓱ ꓶ ꓙꓽ ꓖꓶ ꓔ ꓟ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓪ ꓠꓹ ꓟ ꓢꓯꓼ ꓕꓵꓼ ꓡꓯ=

Rev Bro Joseph ꓛꓪ-ꓔ

Add new comment

3 + 12 =