ꓢꓲꓺ ꓚꓰ ꓔ ꓟ ꓐꓰ ꓝꓲ ꓩꓴˍ ꓟ (Homily)

ꓘꓴ ꓜꓲ ꓞꓳ ꓟꓵꓽ ꓘꓳꓼ 14 ꓫꓵꓽ ꓠꓽ 

ꓬꓲ-ꓢ-ꓬ 66ꓽ 10- 14

ꓱ-ꓣꓴ-ꓢ-ꓡꓱˍ ꓐꓰ ꓕꓲ ꓛꓳˍ ꓗ ꓛꓲ꓿ ꓬꓲ ꓐꓱ ꓶ ꓠꓲꓹ ꓒꓴ꓿ ꓬꓲ ꓔꓯ ꓠꓲꓹ ꓠꓵ ꓢꓴ ꓠꓴ ꓪ ꓮ ꓙꓵꓽꓳ꓾ ꓬꓲ ꓐꓱ ꓶ ꓠꓲꓹ ꓥꓴ ꓢꓴ ꓠꓴ ꓪꓽꓳ꓾ ꓬꓲˍ ꓐꓰ ꓕꓲ ꓛꓳˍ ꓗ ꓛꓲ ꓠꓲꓹ ꓡꓰ ꓗꓹ ꓛꓲ꓿ ꓖꓳ ꓡꓱ ꓢꓲ ꓠꓴ ꓪ ꓠꓬ ꓠꓲꓹ ꓟ ꓗꓴ ꓖꓶ ꓓꓴ ꓬꓲ ꓮ ꓚꓵꓹ ꓛꓵꓼ ꓢꓲ꓾ ꓠꓲꓹ ꓘꓪ ꓫꓵ ꓡꓰˍ ꓥꓳ꓿ ꓠꓴ ꓪ ꓠꓬ ꓬꓲ ꓐꓳˍ ꓟ ꓟꓬꓱꓺ ꓓꓳ ꓔꓯ ꓞꓲꓹ ꓓꓳ ꓡ ꓢꓲ꓾ ꓖꓳ ꓟ ꓗꓪ ꓐꓰ ꓗꓹ ꓛꓲ ꓡꓰˍ ꓥꓳ꓾ ꓐꓯˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓡꓰ ꓕꓱ ꓡꓱ ꓐꓯˍ ꓡꓳ꓾ ꓠꓬꓲ ꓠꓹ꓾ ꓥꓪ ꓡꓰ ꓢꓲ ꓡꓲˍ ꓟ ꓔꓯ ꓠꓬ꓾ ꓠꓯꓺ ꓬꓲˍ ꓡꓰ ꓐꓰ ꓬꓲ ꓔꓯ ꓬꓲꓻ ꓩꓴ ꓡ ꓝꓲ ꓢꓲ꓾ ꓞꓳ ꓫꓵ ꓞꓳ ꓙꓰ ꓐꓴ ꓟꓬꓱ ꓓꓳꓽ ꓔꓯ ꓠꓬ꓾ ꓬꓲꓽ ꓟ ꓙꓵꓽ ꓡꓶꓽ ꓡꓰ ꓔꓬˍ ꓟˍ ꓡꓰ ꓐꓰ ꓬꓲ ꓔꓯ ꓬꓲꓻ ꓩꓴ ꓡ ꓝꓲˍ ꓥꓳ꓿ ꓖꓳ ꓡꓱ ꓢꓲ ꓠꓴ ꓪ ꓠꓬ ꓖꓳ ꓟ ꓗꓪ ꓐꓰ ꓛꓵꓼ ꓓꓳꓻ ꓢꓲ꓾ ꓙꓳꓽ ꓐꓬ ꓗꓪ ꓠꓴ ꓪ ꓔꓯ ꓔꓯꓹ ꓖꓶ ꓢꓲ꓾ ꓛꓲ ꓝꓲꓸ ꓠ ꓗ ꓗꓪ ꓠꓴ ꓪ ꓔꓯ ꓔꓯꓹ ꓗ ꓠꓬꓹˍ ꓥꓳ꓿ ꓟꓹ ꓟ ꓡꓰ ꓤ ꓠꓱ ꓔꓯ ꓠꓲꓹ ꓟ ꓮ ꓡꓲ ꓗꓴ ꓖꓶˍ ꓠꓬ꓾ ꓥꓪˍ ꓟꓲ ꓖꓳ ꓟˍ ꓡꓰ ꓐꓰ ꓠꓴ ꓪ ꓔꓯ ꓠꓲꓹ ꓟ ꓗꓴ ꓖꓶˍ ꓥꓳ꓿ ꓠꓴ ꓪ ꓠꓬ ꓙꓱ-ꓣꓴ-ꓢ-ꓡꓱ ꓠꓯꓸꓼ ꓗꓪ ꓠꓲꓹ ꓟ ꓗꓴ ꓖꓶˍ ꓟ ꓟꓶˍ ꓥꓳ꓿ ꓠꓴ ꓪ ꓖꓳ ꓟ ꓔꓯ ꓡꓳꓸ ꓟꓳ ꓗꓷ ꓠꓬ꓾ ꓠꓲꓹ ꓟ ꓗꓪ ꓗ ꓛꓲ ꓡꓰˍ ꓥꓳ꓿ ꓫꓵꓸ ꓡꓯ ꓤ ꓒꓴꓽ ꓡꓴꓽ ꓡꓴꓽ ꓪꓴ ꓡˍ ꓟˍ ꓡꓰ ꓐꓰ ꓠꓴ ꓪ ꓪꓳꓽ ꓔꓳˍ ꓟꓲ ꓪꓴꓽ ꓡˍ ꓥꓳ꓿ ꓖꓳ ꓡꓱ ꓢꓲ ꓬꓰ-ꓧꓳ-ꓧꓪ ꓡꓯ ꓒꓯ ꓠꓬ ꓬꓲ ꓚꓳ ꓑ ꓐꓴ ꓐꓱ ꓶ ꓢꓯꓼ ꓙꓳˍ ꓟˍ ꓐꓰ꓾ ꓬꓲ ꓔꓯ ꓛꓴ ꓙꓳ ꓢꓴ ꓔꓯ ꓟꓳꓸ ꓦꓶ ꓞ ꓠꓲꓹ ꓙꓳˍ ꓥꓳ꓾ ꓐꓰ ꓢꓴ ꓢꓷ ꓡꓰˍ ꓥꓳ꓿ 

ꓖ-ꓡ-ꓕꓲ-ꓬ 6ꓽ 14- 18

ꓥꓪ ꓠꓬ ꓣꓳꓽ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓠꓬꓲ ꓟꓽ ꓥ ꓠꓬ ꓮ ꓡꓲ ꓥ ꓟꓲ ꓘꓶꓽ ꓘꓹ ꓠꓲꓹ ꓟꓽ ꓫꓵ꓿ ꓡꓯꓼ ꓐꓳ ꓔꓶꓸ ꓓꓴ ꓕꓱ ꓟ ꓗꓪ ꓐꓰ꓾ ꓟꓲ ꓠꓯ ꓠꓬ ꓥꓪ ꓔꓯ ꓟꓳꓸ ꓕꓯꓼ ꓔꓶꓸ ꓔ ꓟ ꓥ ꓢꓲ꓾ ꓥꓪˍ ꓟꓲ ꓟꓲ ꓠꓯ ꓔꓯꓸ ꓟꓳꓸ ꓕꓯꓼ ꓔꓶꓸ ꓔ ꓟ ꓥ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓶꓺˍ ꓟ ꓥ ꓟꓲ꓾ ꓟꓽ ꓶꓺˍ ꓟ ꓥ ꓟꓲ ꓮꓸ ꓫꓵꓽ ꓟꓽ ꓥ꓿ ꓡꓽ ꓞꓳ ꓫꓵꓼ ꓣꓱꓽˍ ꓟ ꓕꓱ ꓟ ꓡꓰ ꓚꓬꓹ ꓒꓵꓽˍ ꓡꓳ꓿ 16 ꓕꓱ ꓡꓱ ꓞꓳ ꓙꓳ ꓔꓬ ꓟ ꓪꓴ-ꓢ ꓬꓲꓸ ꓬꓲ-ꓢꓷ-ꓡꓰ ꓐꓴ ꓕꓯ ꓢꓲ ꓗꓪ꓾ ꓢꓲ ꓡꓲ ꓟ ꓐꓰ ꓫꓱꓸ ꓤˍ ꓟ ꓬꓯꓼ ꓡ ꓝꓲ꓿ 17 ꓕꓱ ꓡꓱ ꓖꓳ ꓑꓳ ꓮꓽ ꓟˍ ꓟꓲ ꓥꓪ ꓔꓯ ꓕꓽ ꓘꓶꓻ ꓡꓶꓽ ꓡ ꓝꓲ꓿ ꓮ ꓡꓲꓳ ꓐꓯ ꓠꓬ ꓥꓪ ꓖꓳ ꓓꓱ ꓗꓪ ꓬꓰ-ꓢꓴ ꓬꓲ ꓢꓷꓸ ꓡꓰ ꓓꓴ ꓠꓻ ꓓꓴꓻ ꓔꓳꓹ ꓠꓷꓼ ꓔ ꓡꓳ꓿ 18 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓣꓳꓽ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽ ꓐꓰ ꓕꓲ ꓪꓺꓼ ꓙꓳ ꓝꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓡꓴ-ꓘ 10ꓽ 1- 12ꓹ 17- 20 

ꓕꓱ ꓟꓬ ꓫꓵꓽ ꓗꓸ ꓠꓯ꓾ ꓢꓲ ꓒꓽ ꓡꓰ ꓠꓱꓸ ꓐꓯꓼ ꓫꓵꓽ ꓞꓲ ꓣꓳ ꓢꓲ ꓚꓰꓸ ꓗꓷ ꓢꓲ꓾ ꓬꓲ ꓚꓲꓸ ꓛꓬ ꓙꓰˍ ꓐꓰ ꓬꓰˍ ꓟ ꓟꓵꓽ ꓕꓲ ꓡꓳ ꓒꓱ ꓡꓰ ꓕꓲ ꓡꓳ ꓒꓱ ꓗꓪ꓾ ꓬꓲ ꓪꓽ ꓔꓯ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓬꓲ ꓟꓲꓽ ꓕꓯꓽ ꓢꓲ ꓝꓲ ꓩꓴ ꓗꓷˍ ꓡꓳ꓿ 2 ꓬꓲ ꓠꓬ ꓬꓲ ꓪꓽ ꓔꓯ꓾ ꓫꓺ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓚꓵ ꓚꓵ ꓟꓬꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓟꓬꓱꓽ ꓬꓰ ꓢꓴ ꓠꓽ ꓠꓲꓸˍ ꓡꓳ꓿ ꓖꓳ ꓡꓱ ꓠꓬꓲ ꓜꓻ ꓫ ꓢꓲ ꓒꓽ ꓡꓰ ꓜꓽ ꓪꓳꓽ ꓡꓳ ꓪꓳꓽ ꓫ ꓢꓴ ꓝꓲ ꓩꓴ ꓗꓷ ꓠꓹ ꓟ ꓬꓲ ꓔꓯ ꓓꓰꓽ꓿ 3 ꓠꓴ ꓪꓽ ꓙꓰ Gꓽ꓿ ꓠ ꓠꓹ꓾ ꓪꓰꓻ ꓕꓳꓹ ꓜꓴꓻ ꓔꓬ ꓗꓪ ꓮ ꓣꓳ ꓤ ꓔꓯ ꓝꓲ ꓩꓴˍ ꓟ ꓡꓰ ꓐꓰ꓾ ꓥꓪ ꓡꓰ ꓠꓴ ꓪꓽ ꓔꓯ ꓝꓲ ꓩꓴ ꓗꓷˍ ꓟ ꓥ ꓡꓳ꓿ 4 ꓠꓴ ꓪꓽ ꓠꓬ ꓒꓴ ꓗꓶ ꓓꓴ ꓕꓽ ꓔꓯꓹ꓿ ꓡꓯꓼ ꓔꓲꓸˍ ꓟꓲ꓾ ꓛꓲ ꓠꓲˍ ꓟꓲ ꓕꓽ ꓔꓯꓹ꓿ ꓙ ꓖꓴ ꓗꓪ ꓮꓽ ꓟ ꓔꓯˍ ꓟꓲ ꓒꓵꓽ ꓗ ꓕꓽ ꓬꓰ꓿ 5 ꓮ ꓡꓲ ꓕꓲ ꓦꓲ ꓗꓪ ꓓꓵꓽ ꓡꓰˍ ꓟꓲ꓾ ꓖꓳ ꓕꓲ ꓦꓲ ꓗꓪ ꓢꓲ ꓡꓲ ꓟ ꓙꓳ ꓡ ꓝꓲ꓾ ꓐꓰ ꓧꓶꓸ ꓕꓯ ꓐꓯ ꓖꓶ꓿ 6 ꓖꓳ ꓡꓱ ꓢꓲ ꓢꓲ ꓡꓲ ꓟ ꓟꓶꓻ ꓒꓵꓽ ꓢꓴ ꓖꓳ ꓗꓪ ꓔꓬ ꓠꓬ꓾ ꓠꓴ ꓪꓽ ꓓꓰꓽˍ ꓟ ꓢꓲ ꓡꓲ ꓟ ꓠꓬ ꓖꓳ ꓕꓲ ꓦꓲ ꓗꓪ ꓬꓯꓼ ꓡ ꓥꓳ꓿ ꓟꓽ ꓥ ꓠꓬ ꓠꓴ ꓪꓽ ꓔꓯꓺ ꓬꓲꓼ ꓡ ꓥꓳ꓿ 7 ꓖꓳ ꓕꓲ ꓦꓲ ꓗꓪ ꓔꓬ ꓢꓲ ꓬꓲ ꓪꓽ ꓮꓸ ꓫꓵ ꓖꓶ ꓡ ꓠꓬ ꓖꓳ ꓫꓵꓽ ꓜꓽ ꓓꓳꓻ꓿ ꓮ ꓡꓲꓳ ꓐꓯ ꓠꓬ ꓪꓽ ꓤꓽ ꓠꓬ ꓪꓽ ꓒꓵꓽ ꓟꓶꓻ ꓒꓵꓽˍ ꓡꓳ꓿ ꓕꓱ ꓕꓲ ꓦꓲ ꓗꓪ ꓐꓰ ꓖꓳ ꓕꓲ ꓦꓲ ꓗꓪ ꓕꓽ ꓚꓵꓸ ꓙꓰ꓿ 8 ꓮ ꓡꓲ ꓕꓲ ꓡꓳ ꓒꓱ ꓗꓪ ꓓꓵꓽ ꓙꓰˍ ꓟꓲ꓾ ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓘꓳꓻ ꓣꓴ ꓢꓲ꓾ ꓮꓸ ꓫꓵ ꓖꓶ ꓡ ꓠꓬ ꓖꓳ ꓫꓵꓽ ꓜ꓿ 9 ꓖꓳ ꓗꓪ ꓟ ꓞꓳ ꓠꓻ ꓔꓯ ꓫꓬꓹ ꓖꓶ ꓢꓲ꓾ ꓪꓴ-ꓢ ꓗꓴꓷꓼ ꓠꓬ ꓠꓴ ꓪꓽ ꓔꓯ ꓠꓶꓽ ꓡꓺꓳ꓾ ꓐꓯ ꓖꓶ꓿ 10 ꓮ ꓡꓲ ꓕꓲ ꓡꓳ ꓒꓱ ꓗꓪ ꓠꓴ ꓪꓽ ꓔꓯ ꓟꓽ ꓘꓳꓻ ꓣꓴ ꓡ ꓠꓬ꓾ ꓡꓳ ꓒꓱ ꓙ ꓖꓴ ꓗꓪ ꓓꓳ ꓙꓰ ꓢꓲ ꓬꓲ ꓪꓽ ꓔꓯ꓾ 11 ꓥꓪ ꓠꓴꓽ ꓛꓲ ꓒꓯꓹ ꓗꓪ ꓠꓷꓼ ꓞꓹ ꓟ ꓠꓴ ꓪꓽ ꓡꓳ ꓒꓱ ꓗꓪ ꓟ ꓠꓱꓸ ꓦꓱꓼ ꓧꓶꓽˍ ꓟꓲ꓾ ꓠꓴ ꓪꓽ ꓔꓯ ꓔꓳꓹ ꓢꓲ ꓢꓷꓸ ꓙ ꓟꓳ ꓙ ꓓꓴ ꓬꓰ ꓠꓹ ꓟ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓟꓲꓽ ꓙꓬ ꓗꓪ ꓟꓱꓸ ꓦꓻ ꓗꓷˍ ꓥꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓗꓴꓷꓼ ꓠꓶꓽ ꓡ ꓟ ꓔꓯ ꓠꓽ ꓠꓴ ꓪꓽ ꓚꓵ ꓚꓵ ꓢꓷꓸ ꓠꓯꓹ ꓡꓳ꓾ ꓐꓯ ꓖꓶ꓿ 12 ꓠꓴ ꓪꓽ ꓔꓯ ꓥꓪ ꓐꓯ ꓖꓶꓽˍ ꓠꓬꓲ꓾ ꓦꓬꓼ ꓠꓬꓲ ꓖꓳ ꓟ ꓗꓪ ꓡꓳ ꓒꓱ ꓖꓳ ꓕꓲ ꓟ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓢꓳ-ꓓꓳ-ꓟ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟ ꓞꓲ ꓡꓲꓽˍ ꓥꓳ꓾ ꓐꓯˍ ꓡꓳ꓿

ꓖꓳ ꓫꓵꓽ ꓞꓲ ꓣꓳ ꓟ ꓠꓬ ꓠꓲꓹ ꓒꓴ ꓒꓴ ꓐꓰ ꓬꓲꓼ ꓡ ꓢꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓠꓴ ꓟꓬꓱ ꓗꓪ ꓐꓰ ꓠꓲꓽˍ ꓟꓲ ꓥꓪ ꓠꓴꓽ ꓙꓵꓽˍ ꓟ ꓔꓯ ꓛꓳˍ ꓡꓳ꓾ ꓐꓯˍ ꓡꓳ꓿ 18 ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓢ-ꓓꓯ ꓠꓬ ꓟꓲꓽ ꓐꓬꓱꓼ ꓤꓰꓽˍ ꓟ ꓡꓰ ꓐꓰ ꓟꓴꓽ ꓗꓪ ꓗꓪ ꓐꓰ ꓞꓰ ꓬꓯꓼ ꓡ ꓟ ꓔꓯ ꓥꓪ ꓟꓳꓻ ꓗꓷꓳ꓿ 19 ꓠ ꓠꓹ꓾ ꓩꓴˍ ꓐꓰ ꓟꓲꓻ ꓙꓱꓼ ꓔꓯ ꓕꓳꓼ ꓠꓹ ꓟ ꓐꓰ ꓛꓴꓽ ꓙꓳ ꓢꓴ ꓪꓽ ꓠꓬꓲˍ ꓟ ꓮꓽ ꓙꓵ ꓔꓯ ꓧꓪꓸ ꓡꓰ ꓓꓴ ꓙꓵꓽ ꓪ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓖꓶ ꓔ ꓡꓳ꓿ ꓮꓸ ꓫꓵ ꓡꓰ ꓥ ꓟꓲ ꓠꓴ ꓪꓽ ꓔꓯ ꓠꓻ ꓡꓰ ꓝꓲ ꓟꓽ ꓐ ꓡ꓿ 20 ꓖꓳ ꓡꓱ ꓥ ꓟꓲ ꓠꓲꓽ ꓠꓬ ꓠꓴ ꓪꓽ ꓙꓵꓽˍ ꓟ ꓔꓯ ꓛꓳˍ ꓟ ꓪꓴꓸ ꓠꓬꓲ ꓕꓽ ꓠꓲꓹ ꓒꓴ꓿ ꓠꓴ ꓪꓽ ꓟꓬꓱ ꓠꓽ ꓟꓴꓽ ꓗꓪ ꓗꓪ ꓐꓳ ꓔ ꓟ ꓪꓴꓸ ꓠꓬꓲ ꓠꓲꓹ ꓒꓴ꓾ ꓐꓯ ꓖꓶˍ ꓡꓳ꓿