ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓬꓯꓼ ꓡ ꓟ ꓑꓮꓲꓽ꓿ (Pentecost Sunday)

ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓬꓯꓼ ꓡ ꓟ ꓑꓮꓲꓽ꓿

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓟꓲ ꓠꓯ ꓗꓪ ꓬꓯꓼ ꓡ ꓟ ꓑꓮꓲꓽ ꓦꓬꓼ ꓠꓬꓲ ꓟ  ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ (ꓬꓳ‐ꓦ 20ꓽ19‐23) ꓝꓲ. ꓗꓪ ꓐꓰ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓬꓴ‐ꓔ ꓡ ꓞꓳ ꓔꓯ ꓙꓳꓺ ꓠꓬꓲ ꓗ ꓘꓶꓽ ꓢꓳ ꓔ ꓢꓲ ꓔꓬ  ꓕꓯ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓦꓰꓼ ꓡ ꓢꓲ ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ ꓐꓰ ꓐꓯ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓟꓳ ꓗꓷ ꓠꓬꓲ ꓮ ꓘꓶ. ꓗ, ꓛꓲˍ ꓡꓳ꓿ ꓘꓴ ꓜꓲꓼ ꓞꓳ ꓠꓬ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓯ ꓗꓪ ꓐꓰ ꓮ ꓕꓯ ꓥ ꓟꓲ ꓕꓲ ꓠꓲ, ꓕꓲ ꓪ ꓥ ꓡꓳ꓿ ꓝꓲ ꓓꓴ ꓒꓳ‐ꓡꓳ ꓡꓰ ꓐꓯ ꓔ ꓟ ꓠꓬ ꓖꓳ ꓓꓱ ꓠꓽ ꓕꓲ ꓟˍ ꓥ ꓟꓲ ꓡꓯꓼ ꓗ. ꓮꓽ ꓟꓬ, ꓙꓳˍ ꓟˍ ꓡꓰ ꓐꓰ ꓝꓮꓲ ꓖꓳ ꓓꓱ ꓡꓯꓼ ꓗ. ꓮ ꓟꓬ, ꓙꓳˍ ꓟꓲ ꓕꓲ ꓖꓳ ꓓꓱꓽˍ ꓡꓰ ꓥ ꓟ ꓡꓰ ꓐꓰ ꓙꓲ‐ꓢꓴ ꓔꓯ ꓙꓵꓻ ꓢꓴ ꓐꓴˍ ꓟꓲ ꓖꓳ ꓡꓱ ꓥꓳ ꓐꓰ ꓝꓲ ꓓꓴ ꓒꓳ‐ꓡꓳ ꓬꓰ ꓐꓯ ꓔ ꓟ ꓥ ꓡꓳ꓿

ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓗꓪ ꓐꓰ ꓣꓳ ꓠꓬ ꓮꓽ ꓙꓵꓽ ꓢꓴ ꓠꓬ ꓖꓳ ꓓꓱ ꓕꓲ ꓟ ꓥ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓘꓴ ꓜꓲꓼ ꓞꓳ ꓠꓯ ꓗꓪ ꓣꓳ ꓮ ꓙꓵꓽ ꓢꓴ ꓠꓬ ꓣꓳꓺ ꓚꓵ. ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓝꓲ ꓓꓴ ꓐꓴ ꓔꓯ ꓢꓲ‐ꓫ‐ꓟ‐ꓦ ꓪꓴ‐ꓢ ꓗꓪ ꓐꓰ ꓖꓶ ꓡ ꓟ ꓡꓯ ꓫꓴꓻ ꓖꓶ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓝꓴꓲ ꓔꓯ ꓖꓽ ꓖꓶ ꓟꓶ ꓠ, ꓟ ꓐꓰ ꓕꓲ ꓣꓳ ꓛꓳ ꓕꓲ ꓣꓳ ꓪꓽ ꓡꓯ ꓘꓳ, ꓠ, ꓟ ꓪꓴ‐ꓢ ꓐꓯ ꓘꓶꓼ ꓔꓯ ꓚꓺ ꓟ. ꓖꓶ ꓠ, ꓟ ꓐꓯ ꓟ. ꓖꓶ ꓟ ꓥ ꓡꓳ꓿ ꓟꓲ ꓠꓯ ꓕꓯ ꓢꓲ ꓗꓪ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓢꓲ‐ꓫ‐ꓟ‐ꓦ ꓪꓴ‐ꓢ ꓗꓪ ꓐꓰ ꓖꓶ ꓶ ꓠ, ꓡꓯ ꓫꓴ ꓗꓪ ꓐꓰ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ. ꓖꓶ ꓠ, ꓟ ꓶꓻ ꓙꓳ ꓟ ꓥ ꓡꓳ꓿

ꓢꓲꓺ ꓒˍ ꓬꓰ‐ꓢꓴ ꓠꓯ, ꓗꓪ ꓐꓰ ꓝꓴꓲ ꓖꓽ ꓖꓶ ꓡꓯ ꓘꓳ, ꓟ ꓐꓰ ꓕꓲ ꓣꓳ ꓛꓳ ꓕꓲ ꓣꓳ ꓪꓽ ꓡꓯ ꓘꓳ, ꓟ ꓶꓼ ꓓꓳꓽ ꓫꓱ, ꓓꓳꓽ ꓚꓱ, ꓐꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓯ ꓗꓪ ꓐꓰ ꓢꓯ. ꓪ ꓖꓶ ꓡ ꓟ ꓶꓼ ꓓꓳꓽ ꓫꓰ, ꓓꓳꓽ ꓬꓰ ꓠ, ꓟ ꓣꓳꓺ ꓚꓵ. ꓟ ꓔꓯ ꓟ. ꓖꓶ ꓡ ꓡꓳ꓿ ꓝꓮꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓦꓻ ꓢꓯꓼ ꓪ ꓪ, ꓠ, ꓟ ꓪꓴ‐ꓢ ꓐꓯ ꓘꓶꓽ ꓵꓻ ꓠ, ꓟ ꓥ ꓡꓳ

  ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓶꓼ ꓓꓳꓽ ꓫꓱ, ꓓꓳ ꓗꓪ ꓐꓰ ꓪꓴ. ꓡꓳˍ ꓟ ꓕꓲ ꓟ ꓥ ꓟꓲ ꓝꓴꓲ ꓖꓽ ꓖꓶ ꓡꓯ ꓘꓳ, ꓠ, ꓟ ꓔꓯ ꓬꓰ ꓠ, ꓟ ꓣꓳꓺ ꓚꓵ. ꓟ ꓔꓯ ꓬꓲ. ꓝꓲ ꓓꓴ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓔꓯ ꓪꓴ‐ꓢ ꓶ ꓓꓳꓽ ꓫꓱ, ꓓꓳꓽ ꓟꓬꓱꓽ ꓔꓯ ꓬꓰ ꓠ, ꓟ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿ ꓫ. ꓟꓳ ꓪ꓿