ꓢꓲꓽ ꓫꓬ ꓗꓳ ꓓꓱꓽ ꓑꓮꓲ (Homily)

ꓢꓲꓽ ꓫꓬ ꓗꓳ ꓓꓱꓽ ꓑꓮꓲ 

ꓬꓲ ꓚꓰꓺ ꓬꓲ ꓪꓴꓸ 14ꓽ 18- 20

ꓢ-ꓡꓱ ꓪ ꓔꓲ ꓟꓷ-ꓚꓲ-ꓫꓲ-ꓔꓷˍ ꓟꓲ ꓫꓪ ꓒꓵꓼˍ ꓐꓰ ꓛꓱ ꓡꓱ ꓙꓵꓻ ꓔꓯꓹ ꓓꓳ ꓡˍ ꓡꓳ꓿ ꓬꓲ ꓠꓬ ꓟꓴ-ꓡꓳꓹ-ꓬꓰ-ꓟ-ꓪꓴ-ꓢ ꓬꓲ ꓔꓲ ꓒ ꓥ ꓡꓳ꓿ ꓬꓲ ꓡꓰ ꓮ-ꓐꓷ-ꓡ ꓔꓯ ꓶꓼ ꓥꓳ ꓙꓱꓽ ꓖꓶ ꓢꓲ꓾ ꓟꓴ ꓗꓪ ꓟꓲ ꓠꓯ ꓚꓰꓼ ꓢꓴ꓾ ꓟꓴ-ꓡꓳꓹ-ꓬꓰ-ꓟ-ꓪꓴ-ꓢ ꓡꓰ ꓮ-ꓐꓷ-ꓡ ꓔꓯ ꓶꓼ ꓙꓳ ꓫꓱꓹ ꓙꓳ ꓝꓲ꓿ ꓠꓴ ꓔꓯ ꓛꓴꓽ ꓙꓳ ꓢꓴ ꓔꓯ ꓠꓴ ꓡꓯ ꓒꓯꓹ ꓗꓪ ꓡꓯꓼ ꓙꓱ ꓖꓶ ꓢꓴ ꓟꓴ-ꓡꓳꓹ-ꓬꓰ-ꓟ-ꓪꓴ-ꓢˍ ꓟꓲ ꓶꓼ ꓙꓳ ꓫꓱ ꓙꓳˍ ꓟ ꓥ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓮ-ꓐꓷ-ꓡ ꓡꓰ ꓮ ꓙꓵ ꓟ ꓗꓪ ꓐꓰ ꓞꓲ ꓐꓱꓻ ꓕꓲ ꓐꓱ ꓬꓲ ꓔꓯ ꓖꓶˍ ꓡꓳ꓿

1 ꓘꓳ-ꓡꓱ-ꓕꓴ 11ꓽ 23-26

ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓡꓯꓼ ꓙꓱ ꓖꓶˍ ꓟ ꓠꓬ꓾ ꓢꓲ ꓒꓽ ꓗꓪ ꓐꓰ ꓥꓪ ꓟꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓢꓲ ꓒꓽ ꓬꓰ-ꓢꓴ ꓔꓯ ꓪꓴꓽ ꓜ ꓗꓷˍ ꓟ ꓖꓳ ꓕꓲ ꓦꓬꓼ ꓗꓪ꓾ ꓬꓲ ꓠꓬ ꓑ ꓑ ꓣꓴ ꓢꓲ꓾ 24 ꓫꓸ ꓟꓳ ꓗꓷ ꓠꓬ ꓦꓶꓹ ꓢꓲ ꓠꓬꓲ꓾ ꓕꓱ ꓟ ꓠꓽ ꓥꓪ ꓖꓳ ꓓꓱꓽ ꓠꓴ ꓪꓽ ꓐꓱ ꓶ ꓖꓶ ꓔ ꓟ ꓥꓳ꓿ ꓠꓴ ꓪꓽ ꓥꓪ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ ꓕꓱ ꓡꓱ ꓬꓰ꓾ ꓐꓯˍ ꓡꓳ꓿ 25 ꓜ ꓜꓽ ꓗꓷ ꓗꓸ ꓠꓯꓸˍ ꓟꓲ ꓖꓳ ꓟ ꓡꓰ ꓐꓰ ꓡꓴ ꓗꓶꓸ ꓣꓴ ꓢꓲ꓾ ꓡꓴ ꓗꓶꓸ ꓕꓱ ꓟ ꓠꓬ ꓥꓪ ꓫꓵꓽ ꓡꓰ ꓬꓰ ꓔ ꓟ ꓘꓶꓽ ꓫꓵꓽ ꓫꓵꓼ ꓥ ꓡꓳ꓿ ꓠꓴ ꓪꓽ ꓮ ꓕꓯ ꓓꓳˍ ꓠꓬ ꓖꓳ ꓕꓯ ꓥꓪ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ ꓕꓱ ꓡꓱ ꓬꓰ꓾ ꓐꓯˍ ꓡꓳ꓿ 26 ꓮ ꓡꓲꓳ ꓐꓯ ꓠꓬ ꓑ ꓑ ꓕꓱ ꓟ ꓠꓴ ꓪꓽ ꓮ ꓕꓯ ꓜꓽˍ ꓠꓬ꓾ ꓡꓴ ꓗꓶꓸ ꓕꓱ ꓟ ꓠꓴ ꓪꓽ ꓮ ꓕꓯ ꓓꓳꓻˍ ꓠꓬ꓾ ꓢꓲ ꓒꓽ ꓫꓵꓻ ꓗꓷ ꓟ ꓔꓯ ꓬꓲ ꓝꓮꓲ ꓬꓲꓼ ꓡ ꓗꓪ ꓛꓲ ꓠꓴ ꓪꓽ ꓢꓷꓸ ꓙ ꓟꓳ ꓙˍ ꓟ ꓥ ꓡꓳ꓿

ꓡꓴ-ꓘ 9ꓽ 11-17

ꓖꓳ ꓡꓱ ꓥ ꓟꓲ ꓞꓳ ꓜꓴ ꓐꓴ ꓢꓷꓸ ꓡꓰ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓘꓳꓻ ꓣꓴ ꓢꓲ꓾ ꓪꓴ-ꓢ ꓗꓴꓷꓼ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿ ꓠꓻ ꓫꓬꓹ ꓖꓶ ꓠꓯꓹ ꓟ ꓔꓯˍ ꓟꓲ ꓫꓬꓹ ꓖꓶˍ ꓡꓳ꓿ 12 ꓟꓲꓽ ꓟꓲ ꓓꓵꓽ ꓡꓰˍ ꓐꓰ ꓗꓹ ꓕꓯ ꓞꓲ ꓠꓬꓲꓽ ꓣꓳ ꓟ ꓬꓲ ꓔꓯ ꓡ ꓢꓲ꓾ ꓕꓱ ꓗꓪ ꓠꓬ ꓡꓲ ꓛꓲ ꓥ ꓠꓬꓲ꓾ ꓞꓳ ꓜꓴꓻ ꓐꓴ ꓔꓯ ꓠꓬ ꓚꓳ ꓡꓳ ꓟ ꓡꓳ ꓒꓱ ꓘꓹ ꓒꓱ ꓗꓪ ꓬꓲꓼ ꓔꓸ ꓖꓴꓺˍ ꓐꓰ ꓜꓽ ꓓꓴ ꓧꓪ ꓙꓰ ꓠꓹ ꓟ ꓙꓰ ꓝꓲ꓾ ꓐꓯˍ ꓡꓳ꓿ 13 ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓬꓲ ꓪꓽ ꓔꓯ ꓠꓴ ꓪꓽ ꓖꓶ ꓜꓽ꓾ ꓐꓯ ꓖꓶˍ ꓡꓳ꓿ ꓬꓲ ꓪꓽ ꓡꓰ꓾ ꓥꓪ ꓠꓴꓽ ꓠꓬ ꓡꓽ ꓞꓳ ꓕꓱ ꓟꓬ ꓟ ꓐꓱ ꓶ ꓜꓽ ꓓꓴ ꓟꓽ ꓪꓴꓻ ꓙꓰ ꓠꓬ꓾ ꓕꓱ ꓗꓪ ꓠꓽ ꓑ ꓑ ꓥꓪꓽ ꓑꓬˍ ꓐꓰ ꓥꓪꓸ ꓠꓬꓲꓽ ꓟˍ ꓡꓰꓽ ꓙꓳˍ ꓡꓳ꓾ ꓐꓯˍ ꓡꓳ꓿ 14 (ꓮ ꓡꓲꓳ ꓐꓯˍ ꓠꓬ꓾ ꓖꓳ ꓗꓪ ꓞꓳ ꓑꓸ ꓤˍ ꓡꓰꓽ ꓥꓪꓽ ꓔꓴ ꓣꓳ ꓛꓲ ꓙꓳˍ ꓡꓳ꓿) ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓬꓲ ꓪꓽ ꓔꓯ ꓕꓲ ꓜꓴ ꓟ ꓥꓪꓽ ꓞꓲ ꓣꓳ ꓛꓲ꓾ ꓕꓲ ꓜꓴ ꓕꓲ ꓜꓴ ꓐꓰ ꓠꓬꓲꓸ ꓠꓸ ꓝꓲ꓾ ꓐꓯˍ ꓠꓬꓲ꓾ 15 ꓬꓲ ꓪꓽ ꓡꓰ ꓞꓳ ꓜꓴꓻ ꓔꓯ ꓬꓲ ꓖꓳ ꓡꓱ ꓠꓬꓲꓸ ꓠꓸ ꓝꓲˍ ꓡꓳ꓿ 16 ꓬꓲ ꓠꓬ ꓑ ꓑ ꓖꓳ ꓥꓪꓽ ꓑꓬˍ ꓐꓰ ꓥꓪꓸ ꓠꓬꓲꓽ ꓟꓻ ꓟ ꓣꓴ ꓔꓸ ꓢꓲ꓾ ꓟꓴꓽ ꓗꓪ ꓗꓪ ꓡꓳꓸ ꓢꓲ ꓠꓬꓲ꓾ ꓶꓼ ꓥꓳꓽ ꓙꓱꓽ ꓖꓶꓽ ꓗꓷ ꓠꓬ ꓦꓶꓹ ꓗꓷ ꓢꓲ꓾ ꓞꓳ ꓜꓴ ꓔꓯ ꓑꓶ ꓖꓶ ꓠꓹ ꓟ ꓛꓳꓽ ꓒꓯꓹ ꓐꓴ ꓔꓯ ꓖꓶˍ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓜꓽ ꓐꓳ ꓡꓰˍ ꓡꓳ꓿ ꓜꓰꓻ ꓡꓰˍ ꓟ ꓬꓲ ꓧꓶꓽ ꓬꓲ ꓟꓲ ꓠꓬ ꓛꓳꓽ ꓒꓯꓹ ꓐꓴ ꓡꓰ ꓞꓲ ꓠꓬꓲꓽ ꓠꓳꓸ ꓘꓴꓽ ꓖꓳ ꓫ ꓟꓶˍ ꓡꓳ꓿