ꓢꓲꓽ ꓫꓬ ꓟ ꓦ ꓠꓬ ꓟꓲꓽ ꓦꓲ ꓡꓰ ꓐꓰ ꓗꓹ ꓟ

ꓢꓲꓽ ꓫꓬ ꓟ ꓦ ꓡꓰ ꓑꓶꓸ ꓖꓶ ꓡˍ (ꓒꓳꓹ ꓡꓶꓸ ꓖꓶ ꓡˍ ꓟ) ꓟ ꓢꓯꓼ ꓪ ꓗꓪ ꓐꓰ ꓪꓴ-ꓢ ꓡꓰ ꓖꓶ ꓡˍ ꓟ ꓢꓯꓼ ꓟꓬ ꓫꓵꓼ ꓔꓯ ꓠꓴ ꓢꓲꓼ ꓔꓬ ꓡ?

ꓬꓰ-ꓢꓴ ꓡꓰ ꓠꓲ-ꓗꓳ-ꓓꓲ-ꓟꓴ ꓔꓯ ꓕꓱ ꓡꓱ ꓐꓯ ꓡꓳ꓾ “ꓥꓪ ꓡꓰ ꓠꓴ ꓔꓯ꓾ ꓠꓴ ꓠꓽ ꓫꓬꓹ ꓦꓵꓻ ꓠ ꓗꓹ ꓢꓰꓽ ꓡꓳ꓾ ꓐꓯ ꓖꓶˍ ꓟ ꓔꓯ ꓕꓽ ꓓꓵꓽ ꓙ ꓟꓶꓻ= ꓟꓲꓽ ꓦꓲ ꓠꓬ ꓮ ꓡꓲ ꓗꓪ ꓙꓱꓼ ꓠꓲꓹ ꓫꓵˍ ꓠꓬ ꓙꓱꓼˍ ꓡꓳ= ꓬꓲ ꓢꓯꓼ ꓠꓴ ꓑ ꓙꓽˍ ꓟꓲ꓾ ꓮ ꓡꓲ ꓗꓪ ꓐꓰ ꓡˍ ꓟ ꓐꓰ ꓮ ꓡꓲ ꓗꓪ ꓙꓰˍ ꓟ ꓠꓴ ꓟꓽ ꓢꓷꓸ= ꓦ ꓡꓰ ꓦꓵꓻ ꓔ ꓢꓴ ꓥ ꓕ ꓑꓳꓸ ꓠꓬ ꓖꓳ ꓡꓱ ꓗꓹ ꓡꓳ꓾” ꓐꓰ ꓐꓯ ꓖꓶˍ ꓡꓳ= (ꓬꓳ-ꓦ 3ꓽ7-8)

ꓠꓴ ꓤꓶꓻ ꓠꓯꓸꓼ ꓗꓪ ꓢꓲꓽ ꓫꓬ ꓟ ꓦ ꓙꓳ ꓔꓬ ꓟ ꓔꓯ ꓠꓴ ꓙꓵꓻˍ ꓡ? ꓢꓲꓽ ꓫꓬ ꓕꓳ ꓶ ꓕꓱ ꓕꓲ ꓝꓲꓸ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓴ ꓠꓯꓸꓼ ꓗꓪ ꓢꓲꓽ ꓫꓬ ꓟ ꓦ ꓠꓬ ꓮ ꓡꓲ ꓐꓰ ꓟꓬꓱꓽ ꓬꓰˍ ꓟ ꓚꓱꓹ ꓔꓯ ꓟꓸ ꓖꓶ ꓔ ꓡꓳ= ꓬꓲ ꓠꓬ ꓢꓲꓽ ꓫꓬ ꓟ ꓦ ꓔꓯ ꓟꓲꓽ ꓦꓲ ꓐꓰ ꓔꓯꓺ ꓟꓸ ꓖꓶ ꓔ ꓡꓳ= ꓟꓲꓽ ꓦꓲ ꓙꓱꓼ ꓢꓯꓼ ꓔꓯ ꓑ ꓙꓽˍ ꓥ ꓟꓲ ꓟꓳꓻ ꓟꓽ ꓓ= ꓖꓳ ꓡꓱ ꓥˍ ꓟꓲ ꓟꓲꓽ ꓦꓲ ꓙꓱꓼ ꓡˍ ꓟ ꓔꓯ ꓣꓳ ꓢꓷꓸˍ ꓡꓳ= ꓔꓯꓺ ꓥꓳꓽ ꓾ ꓢꓲꓹ ꓜꓲ ꓕꓲ ꓜꓲ ꓓꓵꓺ ꓔꓬ ꓕꓯ ꓟꓲꓽ ꓦꓲ ꓙꓱꓼ ꓔꓬ ꓟ ꓔꓯ ꓢꓷꓸˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓕꓱ ꓟ ꓠꓬ ꓣꓳ ꓐꓴ ꓤꓶꓻ ꓗꓪ ꓟ ꓢꓲꓽ ꓫꓬ ꓟ ꓦ ꓥ ꓡꓳ= ꓢꓲꓽ ꓫꓬ ꓟ ꓦ ꓠꓬ ꓮ ꓡꓲ ꓗꓪ ꓐꓰ ꓬꓯꓼ ꓡˍ ꓟ ꓔꓯ ꓠꓬ ꓣꓳ ꓐꓴ ꓫꓬꓽ ꓫꓬꓽ ꓡꓰꓽ ꓟꓳꓻ ꓟꓽ ꓐ ꓡ ꓥ ꓟꓲ꓾ ꓢꓲꓽ ꓫꓬ ꓟ ꓦ ꓬꓲ ꓣꓱꓽ ꓛꓰꓽ ꓔꓯ ꓠꓬ ꓣꓳꓽ ꓐꓴ ꓟꓳꓻ ꓐ ꓡˍ ꓟ ꓥ ꓡꓳ= ꓣꓳ ꓠꓯꓸꓼ ꓗꓪ ꓢꓯꓼ ꓬꓲ ꓫꓵꓼ ꓕꓲ ꓟ ꓙꓳ ꓡ꓾ ꓥ ꓠꓬ꓾ ꓙꓲꓻ ꓓꓰꓺˍ ꓟ ꓕꓲ ꓫꓵꓽ ꓣꓳ ꓠꓯꓸꓼ ꓗꓪ ꓙꓳ ꓡˍ ꓟ꓾ ꓣꓳ ꓔꓯ ꓛꓬ ꓡ ꓢꓴ ꓔꓯ ꓖꓼ ꓖꓶ ꓐ ꓡˍ ꓟ ꓢꓯꓼ ꓪ ꓣꓳ ꓠꓯꓸꓼ ꓙꓳ ꓡ ꓟ ꓔꓯ ꓢꓷꓸ ꓡ ꓕꓯ꓾ ꓢꓲꓽ ꓫꓬ ꓟ ꓦ ꓠꓬ ꓙꓳ ꓔꓬ ꓡꓳ꓾ ꓢꓲꓽ ꓫꓬ ꓟ ꓦ ꓠꓬ ꓣꓳ ꓐꓴ ꓔꓯ ꓒꓳꓹ ꓡꓶꓸ ꓝꓲ ꓢꓲ ꓣꓳ ꓐꓴ ꓔꓯ ꓙꓻ ꓖꓴ ꓟꓸ ꓖꓶ ꓔꓬ ꓡꓳ ꓐꓯ ꓟ ꓔꓯ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓟꓲꓽ ꓦꓲ ꓠꓬ ꓣꓳ ꓔꓯ ꓐꓰ ꓙꓱꓼ ꓗꓳꓸ ꓙꓰˍ ꓕꓯ ꓕꓱ ꓟ ꓠꓬ ꓮ ꓡꓰ ꓔꓯ ꓟꓳꓸ ꓙꓱꓼ ꓙꓰ ꓔꓬ ꓟ ꓔꓯ ꓣꓳ ꓢꓷꓸ ꓟꓽ ꓐ ꓡ= ꓖꓳ ꓟ ꓪꓴꓸ ꓠꓬꓲ ꓕꓱ ꓟ ꓠꓬ ꓢꓲꓽ ꓫꓬ ꓟ ꓦ ꓐꓰ ꓗꓴꓸ ꓙꓲ ꓙꓳˍ ꓟ ꓥ ꓡꓳ= ꓣꓳ ꓤꓶꓻ ꓠꓬ ꓢꓲꓽ ꓫꓬ ꓟ ꓦ ꓬꓲ ꓪꓽ ꓠꓬꓲˍ ꓟ ꓐꓰ꓾ ꓢꓲꓽ ꓫꓬ ꓟ ꓦ ꓡꓰ ꓠꓬꓲ ꓙ ꓡꓳꓸ ꓙ ꓖꓶˍ ꓟ ꓠꓯꓸꓼ ꓗꓪ ꓓꓹ ꓕꓯ ꓠꓽ꓾ ꓣꓳ ꓐꓴ ꓔꓯ ꓮ ꓡꓰ ꓗꓪ ꓧꓳꓽ ꓙꓰˍ ꓟ ꓔꓯ ꓣꓳꓽ ꓟꓽ ꓢꓷꓸ ꓟ ꓥ ꓡꓳ=

ꓢꓲꓽ ꓫꓬ ꓟ ꓦ ꓠꓬ ꓣꓳ ꓐꓴ ꓔꓯ ꓕꓲ ꓑꓹ ꓤ ꓗꓪ ꓧꓳꓽ ꓙꓰꓽ ꓔꓬ ꓥ ꓟꓲ꓾ ꓚꓵꓺ ꓚꓵꓺ ꓠꓬ ꓡ ꓠꓹ ꓟ ꓣꓳꓽ ꓤꓶꓻ ꓕꓲ ꓟ ꓡꓱꓸꓼ ꓔꓯ ꓟꓸ ꓖꓶˍ ꓟ ꓟꓽ ꓥ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ-ꓢ ꓠꓬ ꓣꓳ ꓐꓰ ꓕꓲ ꓪ ꓔꓬ ꓟ ꓤꓶꓻ ꓔꓯ ꓘꓳꓹ ꓣꓴ ꓟꓶ ꓔꓬ ꓟ ꓐꓱ ꓶ ꓣꓳ ꓐꓴ ꓠꓬ ꓗꓹ ꓛꓲꓽ ꓢꓲ꓾ ꓣꓳ ꓤꓶꓻ ꓔꓯ ꓠꓲꓹ ꓟ ꓢꓻ ꓠ ꓗꓹ ꓟ ꓥ ꓡꓳ= ꓪꓴ-ꓢ ꓡꓰ ꓧꓳꓽ ꓣꓱꓽ ꓖꓶ ꓡˍ ꓟ ꓤꓶꓻ ꓗꓪ ꓙ ꓫꓱꓽ ꓔꓬ ꓠꓹ ꓟ ꓐꓱ ꓶ ꓣꓳ ꓤꓶꓻ ꓔꓯ ꓡꓯꓼ ꓙꓱ ꓗꓷ ꓢꓲ ꓢꓯꓸ ꓔꓬ ꓪˍ ꓟ ꓔꓯ ꓣꓳ ꓐꓴ ꓠꓲꓹ ꓒꓴ ꓠ ꓗꓹ ꓟ ꓥ ꓡꓳ= ꓕꓱ ꓟ ꓐꓱ ꓶ ꓙꓵꓻ ꓠꓲꓹ ꓐꓰ ꓡꓳꓻ ꓗꓷ ꓐ ꓡ ꓓꓴ ꓮ ꓟꓬꓹ ꓣꓱꓽ ꓞꓹ ꓟ ꓥ ꓡꓳ=

ꓠꓬꓲꓸ ꓠꓬꓲ ꓗꓪ ꓣꓳ ꓤꓶꓻ ꓗꓪ  ꓢꓲꓽ ꓫꓬ ꓟ ꓦ ꓬꓲ ꓪꓽ ꓠꓬꓲˍ ꓟ ꓙꓳ ꓔꓬ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓣꓳ ꓤꓶꓻ ꓗꓪ ꓢꓲꓽ ꓫꓬ ꓟ ꓦ ꓠꓬ ꓚꓵ ꓚꓵ ꓧꓳꓽ ꓣꓱꓽ ꓖꓶ ꓔꓬ ꓡ ꓐꓯ ꓟ ꓔꓯ ꓢꓷꓸ ꓡꓰ ꓝꓲˍ ꓟ ꓢꓷꓸ ꓡꓰ ꓓꓴ ꓙꓳ ꓟꓽ ꓙꓳ ꓟ ꓔꓯ ꓧꓪ ꓠꓬꓲ ꓡꓯ = ꓣꓳ ꓚꓲꓸ ꓛꓬ ꓔꓯ ꓪꓴ-ꓢ ꓬꓲ ꓦ ꓔꓬ ꓟ ꓢꓯꓼ ꓗꓪ ꓐꓰ ꓧꓳꓽ ꓣꓱꓽ ꓝꓲ ꓢꓲ ꓣꓳꓽ ꓔꓯ ꓷꓹ ꓡꓵꓺ ꓖꓶ ꓡ ꓠꓹ ꓟ ꓡꓯꓼ ꓙꓱ ꓗꓷ ꓢꓲ꓾ ꓣꓳ ꓤꓶꓻ ꓠꓯꓸꓼ ꓗꓪ ꓪꓴꓽ ꓓꓰˍ ꓟ ꓢꓷꓸ ꓡꓰ ꓓꓴ ꓔꓯ ꓥꓳ ꓡꓳꓸ ꓔꓬ ꓡꓯ=

ꓪꓽ ꓘꓴ ꓢꓲ ꓡꓯ

ꓢꓲꓽ ꓫꓬ ꓟ ꓦ ꓳ꓾ ꓬꓯꓼ ꓡ ꓖꓶ ꓡꓯ= ꓞꓲꓽ ꓫꓬ ꓟ ꓖꓳ ꓓꓱꓽ ꓔꓲꓹ ꓕꓯ ꓟꓶˍ ꓟ ꓣꓱꓽ ꓛꓰꓽ ꓥꓪ ꓠꓯꓸꓼ ꓗꓪ ꓢꓯꓼ ꓪ ꓬꓲ ꓫꓵꓼ ꓡꓴꓽ ꓖꓶ= ꓢꓲꓺ ꓒ ꓠꓲꓹ ꓡꓶꓽ ꓙꓳˍ ꓟ ꓡꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓥꓪ ꓔꓯ ꓧꓳꓽ ꓙꓰ ꓡꓯ= ꓥꓪ ꓠꓬ ꓢꓲꓺ ꓒ ꓠꓴ ꓪꓽ ꓠꓬꓲˍ ꓟ ꓠꓬꓲ ꓙˍ ꓟ ꓐꓰ ꓥꓪ ꓤꓶꓻ ꓗꓪ ꓢꓲꓺ ꓒ ꓠꓴ ꓙꓳꓻ ꓔꓬ ꓟ ꓬꓲ ꓢꓷꓸ ꓡꓰ ꓓꓴ ꓔꓯ ꓙꓵꓻ ꓠꓹ ꓟ ꓐꓱ ꓶ ꓥꓪ ꓚꓲꓸ ꓛꓬ ꓥꓪ ꓡꓳꓻ ꓒꓰꓹ ꓗꓷˍ ꓥꓳ= ꓢꓲꓺ ꓒ ꓬꓰ-ꓢꓴꓳ꓾ ꓥꓪ ꓠꓴꓻ ꓔꓯ ꓙꓵꓻˍ ꓡꓳ= ꓮꓟꓰꓠ