ꓢꓲꓽ ꓫꓬ ꓢꓴ ꓐꓴ

ꓢꓲ ꓫꓬ ꓢꓴ ꓐꓴ ꓑꓮꓲꓽ ꓦꓯꓼ ꓠꓬꓲ (11ꓦ 1 ꓠꓬꓲ 2020 ꓘꓳꓼ)

ꓟꓳ. ꓖꓶ ꓓꓴ ꓕꓳꓽ ꓶ 7: 2-4, 9-14

ꓟꓴ ꓗꓪ ꓝꓲ ꓓꓴ ꓝꓮꓲ ꓕꓲ ꓣꓳ ꓠꓬ ꓢꓯꓸ ꓔꓬ_ ꓟ ꓪꓴ-ꓢ ꓬꓲ ꓔꓳꓹ ꓠꓷꓼ ꓓꓴ ꓔꓯꓹ ꓔ ꓢꓲ꓾ ꓐꓶ ꓓꓳ ꓘꓶꓽ ꓗꓪ ꓐꓰ ꓓꓯ ꓡ_ ꓟ ꓥꓪ ꓟꓳ_ ꓡꓳ꓿ ꓬꓲ ꓠꓬ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ ꓟꓲ ꓠꓯ_ ꓐꓰ ꓬꓲꓻ ꓡꓴ ꓐꓱ ꓔꓯ ꓗꓷ ꓡꓰ ꓝꓲ_ ꓟ ꓪꓽ ꓠꓬꓲ_ ꓟ ꓟꓶꓺ ꓢꓴ ꓟꓴ ꓗꓪ ꓝꓲ ꓓꓴ ꓖꓳ ꓡꓲꓸ ꓣꓳ ꓔꓯ꓾ ꓣꓳ ꓪꓴ-ꓢ ꓬꓲ ꓚꓳ ꓑ ꓐꓴ ꓥꓷꓼ ꓛꓲ ꓗꓪ꓾ ꓥꓪ ꓠꓴꓽ ꓡꓰ ꓟꓽ ꓔꓳꓹ ꓠꓷꓼ ꓗꓷ ꓕ ꓑꓳ꓾ ꓟꓲ ꓠꓯ_ ꓐꓰ ꓬꓲꓻ ꓡꓴ ꓐꓱ_ ꓐꓰ ꓢꓲꓹ ꓜꓲ ꓔꓯ ꓕꓽ ꓗꓷ ꓡꓰ ꓝꓲ꓾ ꓐꓯ_ ꓡꓳ꓿ ꓖꓳ ꓡꓱ ꓢꓲ ꓔꓳꓹ ꓠꓷꓼ_ ꓟ ꓟꓶ ꓢꓴ ꓵꓺ ꓟꓬꓱ ꓥꓪ ꓑ ꓙ_ ꓡꓳ꓿ ꓬꓲ-ꓢꓷ-ꓡꓰ ꓬꓲ ꓞꓲꓼ ꓤ ꓡꓯꓹ ꓤ ꓕꓲ ꓪꓳꓼ ꓡꓰ ꓕꓲ ꓪꓳꓼ ꓗꓪ ꓐꓰ ꓔꓳꓹ ꓠꓷꓼ_ ꓟ ꓟꓶ ꓢꓴ ꓕꓲ ꓫꓬꓹ ꓡꓲ ꓟꓶꓽ ꓡꓲꓸ ꓔꓴ ꓙꓳ_ ꓡꓳ꓿

ꓕꓱ ꓟ ꓗꓸ ꓠꓯ꓾ ꓠꓬꓲ ꓠꓹ꓾ ꓕꓲ ꓗꓴꓷꓼ ꓡꓰ ꓕꓲ ꓗꓴꓷꓼ_ ꓐꓰ꓾ ꓞꓳ ꓫꓵ ꓕꓲ ꓫꓵꓽ ꓡꓰ ꓕꓲ ꓫꓵꓽ_ ꓐꓰ꓾ ꓑ ꓫꓬꓼ ꓑ ꓟꓲ_ ꓐꓰ꓾ ꓥꓳꓽ ꓫꓵꓽ ꓥꓳ ꓙꓰꓽ ꓗꓪ ꓐꓰ꓾ ꓮ ꓟ_ ꓟꓲ ꓵ ꓖꓴ ꓟꓽ ꓓ ꓟ ꓡ ꓞꓳ ꓬꓲ ꓜꓴ ꓓꓽ ꓟ ꓠꓬ ꓐꓵ ꓞꓶ ꓒꓴ ꓛꓹ ꓟ ꓖꓪꓽ ꓢꓲ꓾ ꓡꓯ ꓒꓯꓹ ꓗꓪ ꓙꓲꓻ ꓫꓴ ꓡꓯꓼ ꓗꓸ ꓣꓴ ꓔ ꓢꓲ ꓠꓬꓲ꓾ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬ_ ꓐꓰ ꓮ ꓣꓳ ꓤ ꓟꓲꓽ ꓙꓬ ꓗꓪ ꓦꓰꓼ ꓞ_ ꓟ ꓥꓪ ꓟꓳ_ ꓡꓳ꓿ ꓬꓲ ꓪ ꓠꓬ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ ꓢꓯꓼ ꓟꓬ ꓝ_ ꓟ ꓣꓱ ꓛꓰ ꓠꓬ꓾ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓣꓳ ꓪꓴ-ꓢ_ ꓐꓰ ꓮ ꓣꓳ ꓤ ꓔꓯ ꓟ ꓥ ꓡꓳ꓾ ꓐꓯ_ ꓡꓳ꓿ ꓟꓴ ꓗꓪ ꓝꓲ ꓓꓴ ꓐꓴ ꓮ ꓙꓵ ꓠꓬ꓾ ꓙꓵꓽ ꓠꓬꓲꓸ ꓕꓲ_ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴ_ ꓐꓰ꓾ ꓢꓯꓸ ꓫꓵꓽ ꓡꓲꓺ ꓟꓻ ꓟ ꓚꓳ ꓡꓳ ꓡꓳ ꓗꓪ ꓦꓰꓼ ꓔ ꓢꓲ ꓠꓬꓲ꓾ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ꓾ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿ ꓫꓱꓸ ꓖꓶ ꓓꓴ_ ꓐꓰ꓾ ꓟꓬꓱ ꓓꓳꓽ_ ꓐꓰ꓾ ꓙꓽ ꓗꓴ ꓠꓲꓹ_ ꓐꓰ꓾ ꓫ ꓟꓳ_ ꓟ_ ꓐꓰ꓾ ꓞꓳ ꓒꓵꓽ ꓡ_ ꓟ_ ꓐꓰ꓾ ꓪꓽ ꓠꓬꓲ_ ꓟ_ ꓐꓰ꓾ ꓢꓯꓼ ꓪ ꓠꓬ꓾ ꓕꓲ ꓞꓲꓼ ꓕꓲ ꓑ ꓣꓳꓽ ꓪꓴ-ꓢ ꓔꓯ ꓟ ꓥ ꓡꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓰ ꓐꓯ_ ꓡꓳ꓿ ꓞꓳ ꓪꓴꓽ ꓞꓳ ꓔꓲ ꓗꓪ ꓟ ꓕꓲ ꓣꓳ ꓡꓰ ꓥꓪ ꓔꓯ꓾ ꓐꓵ ꓞꓶ ꓒꓴ ꓛꓹ ꓟ ꓖꓪꓽ ꓢꓴ ꓐꓴ ꓕꓱ ꓕꓷ ꓠꓬ ꓮ ꓟ ꓥ ꓡꓳꓺꓽ꓿ ꓮ ꓡꓲ ꓗꓪ ꓐꓰ ꓡ_ ꓟ ꓥ ꓡꓳꓺꓽ꓾ ꓐꓯ_ ꓡꓳ꓿ ꓥꓪ ꓠꓬ ꓬꓲ ꓔꓯ꓾ ꓥꓪ ꓢꓲꓺ ꓒꓽꓳ꓾ ꓠꓴ ꓢꓷ_ ꓡꓳ꓾ ꓐꓯ ꓖꓶ_ ꓡꓳ꓿ ꓖꓳ ꓡꓱ ꓢꓲ ꓬꓲ ꓡꓰ ꓥꓪ ꓔꓯ꓾ ꓡ ꓞꓳ ꓕꓱ ꓕꓷ ꓠꓬ ꓫꓸ ꓙꓵ_ ꓟ ꓬꓲ ꓓꓽ ꓟ ꓗꓪ ꓐꓰ ꓓꓳ ꓡ ꓢꓲ꓾ ꓮ ꓣꓳ ꓤ ꓫꓵꓽ ꓗꓪ ꓬꓲ ꓪ ꓐꓵ ꓞꓶ ꓞꓲꓽ ꓒꓴꓻ ꓡꓰ_ ꓟ ꓥ ꓡꓳ꓿

1 ꓬꓳ-ꓦ 3ꓽ 1-3

ꓣꓳꓽ ꓔꓯ ꓪꓴ-ꓢ ꓤ ꓠꓱ ꓘꓴ ꓪ ꓠꓹ ꓟ꓾ ꓐꓹ ꓐ ꓡꓰ ꓣꓳꓽ ꓔꓯ ꓮ ꓘꓶꓻ ꓛꓲ ꓪꓴꓽˍ ꓟ ꓠꓵꓻ ꓠꓲꓹ ꓡꓰ ꓠꓲꓹ ꓠꓵˍ ꓟ ꓔꓯ ꓓꓵꓽ ꓙꓽ ꓠꓬꓲ꓿ ꓣꓳꓽ ꓠꓽ ꓚꓵ ꓚꓵ ꓬꓲ ꓤ ꓠꓱ ꓥ ꓡꓳ꓿ ꓟꓲ ꓠꓯ ꓞꓳ ꓤ ꓠꓬ ꓪꓴ-ꓢ ꓔꓯ ꓟꓽ ꓢꓷꓸˍ ꓠꓬꓲ꓾ ꓣꓳꓽ ꓔꓯˍ ꓟꓲ ꓬꓲ ꓪꓽ ꓟꓽ ꓢꓷꓸ꓿ꓠꓲꓹ ꓠꓵ ꓢꓴ ꓐꓴꓳ꓾ ꓮ ꓟꓶ ꓣꓳꓽ ꓠꓬ ꓪꓴ-ꓢ ꓤ ꓠꓱ ꓥ ꓡꓳ꓿ ꓖꓳ ꓡꓱ ꓢꓲ ꓢ ꓖꓪ ꓣꓳ ꓮ ꓡꓲ ꓒꓬꓱꓼ ꓡ ꓠ ꓗꓹ ꓟ ꓠꓬ ꓣꓳ ꓬꓲ ꓜꓶ ꓟꓽ ꓢꓷꓸ ꓢꓰꓽ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡ ꓕꓯ꓾ ꓣꓳꓽ ꓠꓬ ꓬꓲ ꓒꓬꓱꓽ ꓶꓻ ꓡꓰˍ ꓥꓳ꓾ ꓐꓰ ꓣꓳꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓮ ꓡꓲ ꓥ ꓟ ꓢꓲꓽ ꓢꓲˍ ꓡꓰꓽ ꓣꓳ ꓬꓲ ꓔꓯ ꓟꓳꓻˍ ꓥꓳ꓿ꓮꓽ ꓟ ꓥ ꓟꓲ ꓢꓲ ꓒꓽ ꓠꓯꓸꓼ ꓗꓪ ꓥꓳ ꓡꓳꓸ ꓓꓴ ꓕꓱ ꓟ ꓙꓳ ꓢꓴ ꓠꓬ꓾ ꓢꓲ ꓒꓽ ꓢꓲꓽ ꓫꓬˍ ꓟ ꓡꓰ ꓐꓰ ꓚꓲꓸ ꓛꓬ ꓔꓯ ꓢꓲꓽ ꓫꓬ ꓡꓰ ꓝꓲˍ ꓡꓳ꓿

ꓟ-ꓕꓲ 5ꓽ 1- 12

ꓬꓰ-ꓢꓴ ꓠꓬ ꓞꓳ ꓜꓴꓻ ꓞꓳ ꓟꓯꓼ ꓔꓯ ꓟꓳꓻˍ ꓕꓯ꓾ ꓪꓽ ꓚꓲ ꓗꓪ ꓓꓯ ꓙꓰ ꓢꓲ ꓠꓬꓲꓸ ꓠꓸ ꓗꓷ ꓠꓬ꓾ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓬ ꓗꓪ ꓜꓲꓼ ꓡ ꓡꓳ꓿ꓬꓲ ꓠꓬ ꓘꓶꓽ ꓒꓴ ꓢꓲ ꓬꓲ ꓪꓽ ꓔꓯ ꓕꓱ ꓡꓱ ꓟꓸ ꓖꓶˍ ꓡꓳ꓿ꓦꓻ ꓗꓪ ꓞꓳ ꓫꓸ ꓥ ꓟ ꓚꓬꓹ ꓪ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ ꓬꓲ ꓪꓽ ꓔꓯ ꓟ ꓥ ꓡꓳ꓿ꓠꓲꓹ ꓥꓴꓻ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓠꓲꓹ ꓗꓴ ꓟꓬ ꓗꓴ ꓟꓶˍ ꓥꓳ꓿ꓠꓲꓹ ꓟ ꓠꓴꓽ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓠꓽ ꓬꓲ ꓪꓽ ꓡꓯꓼ ꓪ ꓒꓬꓱꓼ ꓡ ꓥꓳ꓿ꓔꓱꓹ ꓜꓳꓽˍ ꓟ ꓔꓯ ꓟꓷꓼ ꓢꓲꓼ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓢꓲꓼ ꓘꓪꓽ ꓓꓰꓼ ꓡꓰˍ ꓥꓳ꓿ꓢꓴ ꓔꓯ ꓫꓱꓸ ꓤ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓫꓱꓸ ꓤ ꓟ ꓟꓶˍ ꓥꓳ꓿ꓠꓲꓹ ꓟ ꓢꓲꓽ ꓫꓬ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓪꓴ-ꓢ ꓔꓯ ꓟꓳꓻ ꓪˍ ꓥꓳ꓿ꓢꓴ ꓔꓯ ꓧꓳꓹ ꓡꓯꓽ ꓘꓳ ꓝꓲ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓔꓯ ꓠꓽ ꓪꓴ-ꓢ ꓤ ꓠꓱ꓾ ꓐꓰ ꓘꓴˍ ꓥꓳ꓿ꓔꓱꓹ ꓜꓳꓽˍ ꓟ ꓪꓴꓸ ꓠꓬꓲ ꓗꓸ ꓧꓪ ꓟ ꓟꓶ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ ꓬꓲ ꓪꓽ ꓔꓯ ꓟ ꓥ ꓡꓳ꓿ꓥꓪ ꓪꓴꓸ ꓠꓬꓲ ꓢꓴꓻ ꓠꓴ ꓪꓽ ꓔꓯ ꓫꓸ ꓚꓲ꓾ ꓠꓴ ꓪꓽ ꓔꓯ ꓗꓸ ꓧꓪ꓾ ꓝꓮꓲ ꓠꓴ ꓪꓽ ꓔꓯ ꓥꓶˍ ꓟ ꓬꓲ ꓫꓵꓽ ꓬꓲ ꓙꓰꓽ ꓮꓽ ꓔꓳ ꓐꓯ ꓡ ꓕꓯ꓾ ꓠꓴ ꓪꓽ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ꓠꓴ ꓪꓽ ꓠꓬ ꓠꓲꓹ ꓒꓴ ꓗꓹ ꓛꓲ ꓔꓬ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓠꓴ ꓪꓽ ꓡꓯꓼ ꓫꓴ ꓠꓽ ꓬꓲ ꓓꓽ ꓟ ꓥ ꓡꓳ꓿ ꓠꓴ ꓪꓽ ꓧꓶꓸ ꓕꓯ ꓗꓪ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯˍ ꓟꓲ꓾ ꓬꓲ ꓪꓽ ꓕꓱ ꓡꓱ ꓗꓸ ꓧꓪ ꓗꓷꓳ꓿

Add new comment

1 + 5 =