ꓢꓲ ꓒꓽ ꓬꓰ-ꓢꓴ ꓫꓵꓽ ꓧꓪꓽ ꓑꓮꓲꓽ (ꓧꓳꓟꓲꓡꓬ)

ꓬꓰ-ꓢꓴ ꓫꓵꓽ ꓐꓰ ꓧꓪꓽ ꓑꓮꓲꓽ ꓦꓬꓼ ꓠꓬꓲ

ꓓꓳ ꓙꓰ ꓕꓳꓽ ꓶ 24: 3- 8

 ꓖꓳ ꓡꓱ ꓠꓬ ꓟꓳ-ꓫꓲ ꓬꓯꓼ ꓙꓰ ꓢꓲ꓾ ꓬꓰ-ꓧꓳ-ꓧꓪ ꓬꓲ ꓐꓯ ꓘꓶ_ ꓐꓰ ꓬꓲ ꓙꓵꓽ ꓚꓱꓹ ꓮ ꓙꓵ ꓑ ꓫꓬ ꓐꓴ ꓔꓯ ꓐꓯ ꓟꓸ ꓖꓶ ꓗꓷ ꓠꓬ꓾ ꓑ ꓫꓬ ꓐꓴ ꓠꓽ ꓕꓲ ꓢꓯꓼ_ ꓐꓰ ꓒꓳꓹ ꓖꓶ ꓢꓲ꓾ ꓬꓰ-ꓧꓳ-ꓧꓪ ꓡꓰ ꓐꓯ ꓩꓴ ꓡ_ ꓟ ꓮ ꓙꓵ ꓠꓬ ꓥꓪ ꓠꓴꓽ ꓬꓰ_ ꓥꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓟꓳ-ꓫꓲ ꓡꓰ ꓬꓰ-ꓧꓳ-ꓧꓪ ꓐꓯ ꓘꓶ ꓮ ꓙꓵ ꓕꓳ ꓶ ꓗꓪ ꓐꓳ ꓔ ꓢꓲ꓾ ꓠꓯꓼ ꓠꓯꓼ ꓔꓴ ꓡ ꓠꓬ ꓪꓽ ꓚꓲ ꓛꓲ ꓔꓲ ꓗꓪ ꓔꓲ ꓖꓴ ꓕꓲ ꓟ ꓜꓶ_ ꓡꓳ꓿ ꓬꓲ-ꓢꓷ-ꓡꓰ ꓞꓲ ꓠꓬꓲ ꓪꓳꓼ ꓔꓯ ꓛꓳ ꓢꓲ꓾ ꓬꓲꓻ ꓘꓴ ꓞꓲ ꓠꓬꓲꓽ ꓕꓷꓹ ꓞꓳ_ ꓡꓳ꓿ ꓬꓲ ꓡꓰ ꓬꓲ-ꓢꓷ-ꓡꓰ ꓗꓳ ꓡꓳ ꓗꓪ ꓟ ꓤ ꓖꓴ ꓡꓯꓸ ꓐꓴ ꓔꓯ ꓝꓲ ꓩꓴ ꓗꓷ ꓠꓬ꓾ ꓬꓲ ꓪ ꓠꓽ ꓛꓴ ꓔꓲ ꓓꓴ ꓔꓲꓺ ꓖꓶ ꓢꓲ ꓠꓬꓲ꓾ ꓬꓰ-ꓧꓳ-ꓧꓪ ꓔꓯ ꓟꓳꓸ ꓧꓳꓹ ꓡꓰ_ ꓟ ꓔꓲ ꓓꓴ ꓮ ꓠꓬꓲ ꓑ ꓡꓯꓸ ꓢꓰꓼ ꓔꓲ ꓖꓶ_ ꓡꓳ꓿ ꓖꓳ ꓕꓯ ꓟꓳ-ꓫꓲ ꓡꓰ ꓫꓵꓽ ꓕꓲ ꓐꓶꓽ ꓟ ꓠꓬ ꓡꓴ ꓠꓯꓸꓼ ꓗꓪ ꓓꓽ ꓗꓶ ꓔ ꓢꓲ꓾ ꓕꓲ ꓐꓶꓽ ꓟ ꓠꓬ ꓔꓲ ꓖꓴ ꓕꓯ ꓢꓲ ꓗꓪ ꓧꓶꓺ ꓗꓷ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ ꓘꓶꓽ ꓫꓵ ꓕꓳ ꓶ ꓣꓴ ꓔ ꓢꓲ ꓑ ꓫꓬ ꓐꓴ ꓒꓬꓱꓽ ꓕꓯ ꓗꓪ ꓵ ꓟꓸ ꓖꓶ ꓗꓷ ꓠꓬ꓾ ꓬꓲ ꓪ ꓡꓰ꓾ ꓬꓰ-ꓧꓳ-ꓧꓪ ꓡꓰ ꓐꓯ ꓩꓴ ꓡ_ ꓟ ꓮ ꓙꓵ ꓠꓬ ꓥꓪ ꓠꓴ ꓠꓺ ꓡꓳ ꓢꓲ ꓛꓳ ꓬꓰ_ ꓥꓳ꓾ ꓐꓯ_ ꓡꓳ꓿ꓖꓳ ꓡꓱ ꓠꓬ ꓟꓳ-ꓫꓲ ꓡꓰ ꓫꓵꓽ ꓖꓳ ꓟ ꓣꓴ ꓢꓲ꓾ ꓑ ꓫꓬ ꓐꓴ ꓖꓳ ꓓꓱ ꓗꓪ ꓧꓶꓺ ꓗꓷ_ ꓡꓳ꓿ ꓬꓲ ꓡꓰ꓾ ꓠꓬꓲ ꓠꓹ꓾ ꓕꓱ ꓟ ꓠꓬ ꓬꓰ-ꓧꓳ-ꓧꓪ ꓡꓰ ꓐꓯ ꓘꓶ ꓕꓱ ꓟꓬ ꓟ ꓔꓯ ꓛꓳ ꓢꓲ꓾ ꓠꓴ ꓪ_ ꓐꓰ ꓬꓰ ꓔ_ ꓟ ꓘꓶꓽ ꓫꓵ ꓬꓲ ꓫꓵꓽ ꓥ ꓡꓳ꓾ ꓐꓯ_ ꓡꓳ꓿

ꓦꓲ ꓐꓱ ꓣꓴ 9ꓽ 11- 15

ꓖꓳ ꓡꓱ ꓥ ꓟꓲ ꓙꓲˍ ꓟ ꓖꓶ ꓢꓴ ꓔꓲ ꓒ ꓓꓽ ꓟ ꓙꓲ-ꓢꓴ ꓛꓲ ꓡ ꓕꓯ꓾ ꓬꓲ ꓠꓬ ꓪ ꓜꓲꓻ ꓪꓴꓽˍ ꓟ ꓐꓰ ꓪ ꓜꓲ ꓜꓳꓽ ꓓꓰˍ ꓟ ꓟꓶ ꓔꓶꓸ ꓦꓲ ꓗꓪ ꓐꓰ ꓗꓳꓸ ꓙꓰꓳ꓿ ꓟꓶ ꓔꓶꓸ ꓦꓲ ꓕꓱ ꓟ ꓠꓬ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓟꓽ ꓥ꓿ ꓚꓰꓼ ꓔ ꓡꓳ ꓫꓵꓽ ꓗꓪ ꓟˍ ꓟꓲ ꓟꓽ ꓥ꓿ 12 ꓬꓲ ꓠꓬ ꓮꓸ ꓛꓵꓼ ꓫꓵꓽˍ ꓐꓰ ꓮꓸ ꓠꓬꓲꓽ ꓤ ꓫꓵꓽ ꓗꓪ ꓐꓰ ꓟꓽ ꓥ ꓥ꓾ ꓬꓲ ꓚꓲ ꓛꓬ ꓫꓵꓽ ꓗꓪ ꓐꓰ ꓢꓲꓽ ꓫꓬ ꓖꓴ ꓗꓪ ꓬꓲ ꓕꓲ ꓧꓪꓹˍ ꓡꓰꓽ ꓓꓵꓽ ꓙꓰ ꓢꓲ꓾ ꓣꓳꓽ ꓐꓱ ꓶ ꓕꓲ ꓞꓲꓼ ꓕꓲ ꓑ ꓫꓴꓹ ꓣꓴˍ ꓟ ꓟꓬꓱꓽ ꓬꓰ ꓓꓳ ꓡꓰꓳ꓿ 13 ꓮ ꓡꓲꓳ ꓐꓯ ꓠꓬ ꓮꓸ ꓛꓵꓼˍ ꓐꓰ ꓮꓸ ꓠꓬꓲꓽ ꓑ ꓫꓵꓽˍ ꓐꓰ ꓮꓸ ꓠꓬꓲꓽ ꓟ ꓡꓯꓸ ꓤ ꓘꓴꓽ ꓦ ꓡꓰ꓾ ꓟꓽ ꓫꓬꓻ ꓟ ꓠꓷꓼ ꓞ ꓢꓴ ꓔꓯ ꓧꓶꓺ ꓗꓷ ꓢꓲ꓾ ꓧꓪꓽ ꓖꓳ ꓓꓱꓽ ꓔꓯ ꓫꓬꓻ ꓡꓰ ꓝꓲ ꓐ ꓡ ꓕꓯ ꓠꓽ꓾ 14 ꓬꓰ-ꓢꓴ ꓬꓲ ꓫꓵꓽ ꓡꓰ ꓟꓬꓽ ꓠꓬꓲ ꓣꓳꓽ ꓔꓯ ꓞꓲꓽ ꓫꓬꓻ ꓡꓰ ꓝꓲ ꓐ ꓡ ꓥꓳ ꓟꓽ ꓥ ꓡ? ꓬꓲ ꓠꓬ ꓕꓲ-ꓞꓲ-ꓕꓲ-ꓑ-ꓟ-ꓦ ꓗꓪ ꓐꓰ꓾ ꓬꓲ ꓚꓲ ꓛꓬ ꓖꓳ ꓓꓱ ꓠꓬ ꓜꓳꓽ ꓓꓰˍ ꓟ ꓔꓲ ꓓꓴ ꓬꓰ ꓢꓲ ꓪꓴ-ꓢ ꓔꓯ ꓔꓲ ꓖꓶ ꓗꓷꓳ꓿ ꓖꓳ ꓡꓱ ꓠꓬꓲ ꓣꓳꓽ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓔꓯ ꓣꓱꓽ ꓙ ꓪ ꓠꓹ ꓟ꓾ ꓙꓲ ꓖꓴ ꓟꓽ ꓙꓳ ꓟ ꓫꓵꓻ ꓟꓬꓱꓽ ꓗꓪ ꓟ ꓣꓳꓽ ꓦꓰꓽ ꓠꓲꓹ ꓔꓯ ꓬꓰ-ꓢꓴ ꓫꓵꓽ ꓡꓰ ꓫꓬꓻ ꓡꓰ ꓝꓲꓳ꓿ 15 ꓕꓱ ꓟ ꓑꓶꓸ ꓓꓴ ꓬꓲ ꓠꓬ ꓘꓶꓽ ꓫꓵꓽ ꓫꓵꓼ ꓜꓲꓽ ꓟꓳꓽ ꓬꓰˍ ꓡꓳ꓿ ꓕꓱ ꓟ ꓠꓬ ꓬꓲ ꓪꓴꓸ ꓟ ꓘꓶꓽ ꓫꓵꓽ ꓠꓯꓸ ꓘꓪ ꓛꓬ ꓗꓷ ꓥꓳꓽ ꓗꓷ ꓢꓴ ꓔꓯ ꓬꓲ ꓫꓵꓻˍ ꓟ ꓗꓪ ꓐꓰ ꓫꓴꓹ ꓣꓴ ꓠ ꓟ ꓐꓰ꓾ ꓘꓴ ꓔ ꓢꓴ ꓔꓯ ꓙ ꓟꓳ ꓔ ꓟ ꓕꓲ ꓞꓲꓼ ꓕꓲ ꓑ ꓟ ꓡꓯꓼ ꓪ ꓟꓶꓻ ꓝꓲ ꓠꓹ ꓟ ꓥ ꓡꓳ꓿

ꓟ-ꓘꓳ 14ꓽ 12- 16ꓹ 22- 26

ꓦꓲ-ꓘꓳ-ꓑꓮꓲꓽ ꓬꓰ ꓓꓴ ꓮ ꓣꓳ ꓢꓰꓼˍ ꓟ ꓦꓬꓼ ꓠꓬꓲ꓾ ꓙꓵꓽ ꓧꓶꓽ ꓟꓽ ꓣꓱꓽˍ ꓟ ꓑꓮꓲꓽ ꓬꓲ ꓪꓴꓸ ꓕꓲꓽ ꓠꓬꓲ ꓗꓪ꓾ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓦꓲ-ꓘꓳ-ꓑꓮꓲꓽ ꓬꓰ ꓠꓹ ꓟ ꓠꓴ ꓥꓪ ꓠꓴꓽ ꓔꓯ ꓮ ꓡꓲ ꓗꓪ ꓙꓰ ꓢꓲ ꓙꓽ ꓖꓶ ꓬꓰ ꓝꓲ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 13 ꓬꓲ ꓡꓰ ꓛꓳꓽ ꓒꓯꓹ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓡꓳ ꓒꓱ ꓗꓪ ꓓꓵꓽ ꓙꓰ꓿ ꓖꓳ ꓗꓪ ꓬꓲꓻ ꓙꓬ ꓕꓲ ꓠꓱꓸ ꓐꓰꓻ ꓑꓱꓸ ꓔ ꓟ ꓡꓽ ꓞꓳ ꓕꓲ ꓣꓳ ꓔꓯ ꓠꓴ ꓪꓽ ꓔꓳꓹ ꓜꓳꓽˍ ꓥꓳ꓿ ꓖꓳ ꓕꓯ ꓬꓲ ꓔꓯ ꓛꓳ ꓙꓰ꓿ 14 ꓬꓲ ꓓꓵꓽ ꓡꓰˍ ꓟ ꓦꓲꓻ ꓬꓲ ꓢꓲ ꓒꓽ ꓔꓯ꓾ ꓟꓸ ꓒ ꓡꓰ ꓥꓪˍ ꓐꓰ ꓥꓪ ꓛꓳꓽ ꓒꓯꓹ ꓐꓴ ꓕꓲ ꓪꓺꓼ ꓦꓲ-ꓘꓳ-ꓑꓮꓲꓽ ꓬꓰ ꓠꓹ ꓟ꓾ ꓪꓰ ꓤ ꓗꓳꓹ ꓮ ꓡꓲ ꓗꓪ ꓥ ꓡ?꓾ ꓐꓰ ꓐꓯˍ ꓡꓳ꓾ ꓐꓯ ꓖꓶ꓿ 15 ꓖꓳ ꓡꓱ ꓠꓬ ꓬꓲ ꓡꓰ ꓣꓱꓽ ꓓꓴ ꓟꓴ ꓓꓴ ꓮꓽ ꓙꓵ ꓙꓽ ꓖꓶ ꓔ ꓟ꓾ ꓜꓳꓻ ꓗꓳꓹ ꓓꓽ ꓟ ꓕꓲ ꓗꓳꓹ ꓠꓴ ꓪꓽ ꓔꓯ ꓟꓳꓸ ꓖꓶ ꓡ ꓥꓳ꓿ ꓠꓴ ꓪꓽ ꓠꓬ ꓖꓳ ꓗꓪ ꓣꓳ ꓐꓱ ꓶ ꓙꓽ ꓖꓶ꓾ ꓐꓯˍ ꓡꓳ꓿ 16 ꓖꓳ ꓡꓱ ꓠꓬ ꓛꓳꓽ ꓒꓯꓹ ꓖꓳ ꓠꓬꓲꓽ ꓣꓳ ꓓꓳ ꓙꓰ ꓢꓲ ꓡꓳ ꓒꓱ ꓗꓪ ꓓꓵꓽ ꓡꓰ ꓠꓬ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓐꓯˍ ꓟ ꓡꓰ ꓐꓰ ꓧꓪ ꓟꓳꓻ ꓢꓲ꓾ ꓖꓳ ꓗꓪ ꓦꓲ-ꓘꓳ-ꓑꓮꓲꓽ ꓜꓽ ꓓꓴ ꓙꓽ ꓖꓶˍ ꓡꓳ꓿ 

ꓬꓲ ꓪꓽ ꓜ ꓜꓽˍ ꓐꓰ ꓬꓰˍ ꓕꓯ꓾ ꓬꓰ-ꓢꓴ ꓠꓬ ꓑ ꓑ ꓣꓴ ꓢꓲ ꓶꓼ ꓥꓳ ꓙꓱꓽ ꓗꓷ ꓠꓬ꓾ ꓦꓶꓹ ꓗꓷ ꓢꓲ ꓠꓬꓲ ꓬꓲ ꓪꓽ ꓔꓯ ꓖꓶ ꓢꓲ꓾ ꓠꓴ ꓪꓽ ꓣꓴ ꓢꓲ ꓜꓽ꓾ ꓕꓱ ꓟ ꓠꓽ ꓥꓪ ꓖꓳ ꓓꓱ ꓥ ꓡꓳ꓾ ꓐꓯˍ ꓡꓳ꓿ 23 ꓝꓮꓲ ꓬꓲ ꓡꓴꓻ ꓗꓶꓸ ꓣꓴ ꓢꓲ ꓪꓴ-ꓢ ꓔꓯ ꓫꓸ ꓟꓳ ꓗꓷ ꓢꓲ ꓠꓬꓲ꓾ ꓬꓲ ꓪꓽ ꓔꓯ ꓖꓶ ꓗꓷ ꓠꓬ ꓮꓽ ꓙꓵ ꓢꓴ ꓓꓳꓻˍ ꓡꓳ꓿ 24 ꓬꓲ ꓠꓬ ꓬꓲ ꓪꓽ ꓔꓯ꓾ ꓕꓱ ꓟ ꓠꓽ ꓮꓽ ꓟꓬꓹ ꓣꓳ ꓐꓱ ꓶ ꓧꓳꓸ ꓗꓷ ꓟ꓾ ꓥꓪ ꓘꓶꓽ ꓫꓵꓽ ꓫꓵꓽ ꓥ ꓡꓳ꓿ 25 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓡꓱ ꓖꓳ ꓑꓳ ꓪꓴ-ꓢ ꓗꓴꓷ ꓠꓯꓸꓼ ꓗꓪ꓾ ꓛꓱꓼ ꓡꓱꓼ ꓢꓶꓽ ꓪꓴꓽ ꓬꓲꓻ ꓬꓲ ꓫꓵꓼ ꓓꓳꓻˍ ꓟ ꓖꓳ ꓕꓲ ꓠꓬꓲ ꓗꓪ ꓛꓲ꓾ ꓛꓱꓼ ꓡꓱ ꓢꓶꓽ ꓪꓴꓽ ꓬꓲꓻ ꓕꓱ ꓟ ꓥꓪ ꓟꓽ ꓓꓳꓻꓳ꓾ ꓐꓯˍ ꓡꓳ꓿ 26 ꓬꓲ ꓪꓽ ꓟꓴꓽ ꓖꓪꓽ ꓕꓲ ꓚꓱꓹ ꓖꓪ ꓓꓳ ꓡꓰ ꓠꓬ꓾ ꓮꓽ-ꓛꓬ-ꓪꓽ-ꓚꓲ ꓗꓪ ꓙꓰˍ ꓡꓳ꓿