ꓢꓲ ꓒ ꓡˍ ꓟ ꓔꓯ ꓦꓴ ꓠꓬꓹ ꓠꓯꓹ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓔꓯ ꓧꓪꓸ ꓧꓪꓸꓼ=

ꓠꓬꓲꓸ ꓠꓬꓲ ꓗꓪ ꓵꓻ ꓠꓹ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓟ-ꓕꓲ 24ꓽ43-51 ꓥ ꓡꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓙꓽ ꓖꓶ ꓔ ꓠꓯꓹ ꓟ꓾ ꓧꓪꓸ ꓛꓲꓽ ꓔ ꓠꓯꓹ ꓟ꓾ ꓞꓳ ꓘꓴꓽ ꓠꓬ ꓮ ꓕꓯ ꓡˍ ꓟ ꓔꓯ ꓟꓽ ꓢꓷꓸ ꓟ ꓡꓰ ꓐꓰ ꓟꓽ ꓬꓲꓼ ꓔ ꓔ ꓢꓲ ꓒ ꓡˍ ꓟ ꓔꓯ ꓡꓳꓸ ꓠꓬ ꓠꓯꓹ ꓟ ꓐꓰ ꓡ-ꓞꓳ-ꓮ-ꓐꓲ ꓮ ꓕꓯ ꓡˍ ꓟ ꓔꓯ ꓟꓽ ꓢꓷꓸ ꓟ ꓑꓶꓸ ꓓꓴ ꓠꓴ ꓪ ꓦꓴ ꓠꓬꓹ ꓔ꓾ ꓧꓪꓸ ꓛꓲꓽ ꓔ ꓐꓰ ꓐꓯ ꓖꓶˍ ꓟ ꓟꓸ ꓟꓲꓽ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓟꓲ ꓠꓯ ꓞꓳ ꓤ ꓐꓴ ꓟꓬꓽ ꓠꓬꓲ ꓬꓰ ꓞꓳꓸ ꓡꓰ꓾ ꓬꓰ ꓚꓳꓼ ꓡꓰ ꓟ꓾ ꓛꓬ ꓡꓰ ꓟ ꓘꓴꓽ ꓗꓪ ꓟꓬꓽ ꓠꓬꓲ ꓠꓬ ꓟꓽ ꓢꓷꓸ ꓟ ꓗꓪ ꓐꓰ ꓟꓽ ꓥ꓾ ꓟꓽ ꓗꓴꓸ ꓟ ꓗꓪ ꓐꓰ ꓟꓽ ꓥ= ꓟꓽ ꓙꓽ ꓜꓲꓼ ꓟ꓾ ꓟꓽ ꓧꓪꓸ ꓛꓲꓽ ꓟ ꓗꓪ ꓐꓰ ꓥ ꓡꓳ= ꓣꓳ ꓛꓬ ꓡꓰ꓾ ꓥꓳꓽ ꓡꓰ꓾ ꓞꓳꓸ ꓡꓰ ꓟ ꓔꓯ ꓟꓽ ꓚꓲꓸ ꓔ ꓕꓯ꓾ ꓖꓳ ꓟ ꓔꓯ ꓡꓰꓽ ꓮ ꓕꓯ ꓟꓲ ꓬꓰˍ ꓕꓯ ꓚꓲꓸ ꓫꓰ ꓟꓽ ꓙꓳ ꓟ꓾ ꓚꓲꓸ ꓔ ꓟꓽ ꓘꓴ ꓟ ꓞꓳ ꓤ ꓔꓯ ꓫꓱꓸˍ ꓡꓳ=

ꓟꓲ ꓠꓯ ꓕꓱ ꓟ ꓗꓪ ꓣꓳ ꓞꓳ ꓙꓳ ꓔꓬ ꓕꓯ ꓟꓬꓽ ꓠꓬꓲ ꓠꓬ ꓟꓽ ꓢꓷꓸ ꓟ ꓢꓶꓸ ꓟꓽ ꓞꓲꓺ꓾ ꓟꓽ ꓙꓽ ꓜꓲꓼ ꓟ ꓑꓶꓸ ꓓꓴ ꓛꓬ ꓡꓰ ꓝꓳꓼ ꓡꓰ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓡꓳꓽ-ꓟꓲꓽ ꓥꓳꓽ ꓗꓪ ꓐꓰ ꓑꓬꓲ-ꓠꓬ-ꓔ-ꓓꓲꓸꓼ ꓐꓯ ꓟ ꓢꓷꓸ ꓠꓲꓹ ꓐꓰ ꓙꓽ ꓜꓲꓼ ꓠꓲꓹ꓾ ꓢꓷꓸ ꓠꓲꓹ ꓐꓰ ꓧꓪꓸ ꓛꓲꓽ ꓠꓲꓹ ꓐꓯ ꓟ ꓠꓬ ꓬꓳꓸ ꓚꓵ ꓓꓰ ꓡꓰ ꓟ ꓥ ꓡꓳ=

ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓪꓴ-ꓢ ꓔꓯ ꓪꓽ ꓘꓴ꓾ ꓪꓴ-ꓢ ꓔꓯ ꓶꓼ ꓓꓰꓽ꓾ ꓪꓴ-ꓢ ꓗꓪ ꓐꓰ ꓣꓱꓽ ꓛꓰꓽ ꓣꓳ ꓓꓰꓽˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓣꓳ ꓢꓷꓸˍ ꓟ꓾ ꓣꓳ ꓗꓴꓸˍ ꓟ ꓔꓯ ꓣꓳ ꓟꓽ ꓞꓳ ꓙꓳ ꓕꓯ꓾ ꓟꓽ ꓥ ꓠꓬ ꓣꓳ ꓟꓽ ꓙꓽ ꓜꓲꓼ ꓕꓯ ꓧꓶꓸ ꓕꓯ ꓛꓬ ꓗꓷ ꓥꓳꓽ ꓗꓷ ꓟˍ ꓡꓰ ꓝꓮꓲ ꓕꓲ ꓧꓪꓹ ꓒꓬꓱꓼ ꓡˍ ꓥꓳ= ꓔꓯ ꓥꓳꓽ꓾ ꓕꓲꓽ ꓧꓪꓹ ꓛꓲ ꓕꓲꓽ ꓗꓷ ꓕꓯ ꓮ ꓡꓲ ꓗꓪ ꓛꓲ ꓕꓲꓽ ꓗꓷ ꓟ ꓔꓯ ꓣꓳ ꓟꓽ ꓚꓲꓸ ꓔ ꓕꓯ ꓖꓳ ꓕꓲ ꓖꓻ ꓗꓪ ꓡꓰꓽ ꓝꓮꓲ ꓕꓲ ꓧꓪꓹ ꓛꓲ ꓕꓲꓽ ꓪ ꓡꓰˍ ꓥꓳ= ꓕꓱ ꓟˍ ꓡꓰ ꓐꓰ ꓝꓴꓲꓸ ꓕꓲ ꓧꓪꓹ ꓬꓰ ꓪ ꓡꓰ ꓠꓬ ꓝꓮꓲ ꓕꓲ ꓧꓪꓹ ꓟꓽ ꓬꓰ ꓪ ꓡꓰ ꓠꓹ ꓟ꓾ ꓖꓳ ꓗꓪ ꓙꓰ ꓗꓷ ꓠꓬ ꓝꓴꓲꓸ ꓬꓰ ꓪ ꓡꓰˍ ꓡꓳ꓾ ꓕꓱ ꓡꓱ ꓫꓸ ꓕꓱ ꓗꓷ ꓠꓬ ꓝꓴꓲꓸ ꓙꓳˍ ꓡꓳ꓾ ꓐꓯ ꓟ ꓔꓯ ꓟꓽ ꓚꓲꓸ ꓔ ꓕꓯ ꓡꓯꓽ ꓫꓵ ꓖꓳ ꓡꓱ ꓞꓳꓸ ꓡꓰˍ ꓡꓳ=

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓧꓪꓸ ꓛꓲꓽ ꓔ= ꓞꓳ ꓘꓴꓽ ꓡˍ ꓟ ꓔꓯ ꓦꓲꓻ ꓢꓴ ꓢꓷꓸˍ ꓠꓬ ꓦꓲꓻ ꓢꓲ ꓒ ꓠꓬ ꓟꓽ ꓬꓲꓼ ꓔ ꓔ ꓦꓴ ꓠꓬꓹ ꓔꓬ ꓟˍ ꓡꓰ ꓐꓰ꓾ ꓣꓳ ꓥˍ ꓟꓲ ꓣꓳ ꓫꓸ ꓕꓱ ꓘꓶꓽ꓾ ꓣꓳ ꓓꓵꓽ ꓙꓽ ꓚꓱꓹ ꓮ ꓙꓵꓽ ꓔꓯ ꓙꓽ ꓜꓲꓼ ꓢꓲ ꓠꓬꓲ ꓧꓪꓸ ꓛꓲꓽ ꓛꓲꓽ ꓡꓰꓽ ꓡꓳꓸ ꓔ ꓠ ꓗꓹ ꓡꓳ= ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓡꓲ ꓫꓵꓽ ꓓꓵꓽ ꓙꓽ ꓔꓬ ꓡ? ꓮ ꓡꓲ ꓙꓻ ꓖꓴ ꓗꓪ ꓣꓳ ꓞꓳ ꓙꓳ ꓔꓬ ꓡ? ꓐꓯ ꓟ ꓔꓯ ꓟꓽ ꓠꓽ ꓠꓽ ꓙꓽ ꓜꓲꓼ ꓢꓲ ꓢꓯꓸ ꓔꓬ ꓠꓬ ꓣꓳ ꓢꓷꓸˍ ꓟ ꓡꓰ ꓣꓳ ꓞꓳ ꓙꓳ ꓐ ꓡˍ ꓥꓳ= ꓣꓳ ꓗꓴꓸˍ ꓟ ꓡꓰ ꓣꓳ ꓬꓰ ꓐ ꓡˍ ꓥꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓟꓽ ꓢꓷꓸ ꓟ ꓢꓶꓸ ꓟꓽ ꓞꓲꓺ ꓟꓽ ꓙꓽ ꓜꓲꓼ ꓟ ꓑꓶꓸ ꓓꓴ ꓛꓬ ꓡꓰ ꓥꓳꓽ ꓡꓰ ꓟ ꓟꓬꓽ ꓠꓬꓲ ꓒꓬꓱꓼ ꓔꓬ ꓟ ꓔꓯ ꓣꓳ ꓢꓷꓸ ꓡꓰ ꓠꓬꓲ꓾ ꓟꓲ ꓕꓯꓽ ꓢꓲ ꓟ ꓦꓬꓼ ꓠꓬꓲ ꓗꓪ ꓣꓳ ꓬꓰˍ ꓟ ꓮ ꓙꓵꓽ ꓔꓯ ꓙꓽ ꓜꓲꓼ ꓢꓲ ꓠꓬꓲ꓾ ꓤ ꓟꓳ ꓔ ꓢꓲ ꓠꓬꓲ꓾ ꓩꓼ ꓔ ꓢꓲ ꓠꓬꓲ꓾ ꓞꓳ ꓙꓳ ꓙꓰ ꓡꓯ ꓐꓰ ꓮ ꓙꓵꓽ ꓔꓯ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ=