ꓢꓲ ꓒ ꓬꓰ‐ꓢꓴ ꓬꓲ ꓪꓽ ꓠꓬꓲˍ ꓟ ꓐꓰ ꓙꓵꓽ ꓪ

ꓘꓹ-ꓒꓱ-ꓠꓴ ꓜꓲꓼ ꓦꓲ ꓗꓪ ꓠꓲꓽ ꓖꓼ ꓓꓳ ꓗꓷˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓘꓹ-ꓒꓱ-ꓠꓴ ꓜꓲꓼ ꓦꓲ ꓗꓪ ꓬꓰ-ꓢꓴ ꓠꓬ ꓟꓸ ꓟꓲꓽ ꓟꓸ ꓖꓶ ꓔꓬ ꓕꓯ ꓢꓲ ꓒ ꓬꓲ ꓪꓽ ꓠꓬꓲˍ ꓟ ꓢꓷꓸ ꓡꓰ ꓓꓴ ꓕꓲ ꓟ ꓔꓯ ꓣꓳ ꓟꓳꓻ ꓪˍ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓟꓸ ꓖꓶˍ ꓟ ꓠꓬ ꓬꓴ-ꓔ ꓡ ꓞꓳ ꓐꓴ ꓬꓲ ꓪ ꓑ ꓙꓽ ꓠꓬꓲˍ ꓟ ꓔꓯ ꓟꓽ ꓫꓱꓸ ꓠꓬꓲ ꓬꓲ ꓪ ꓠꓬ ꓮ ꓘꓶꓸ ꓓꓵꓽ ꓙ ꓟꓶˍ ꓡꓳ= ꓢꓲ ꓒ ꓬꓲ ꓐꓯ ꓘꓶꓽ ꓕꓲ ꓘꓶꓽ ꓡꓰ ꓕꓲ ꓘꓶꓽ ꓠꓯꓸꓼ ꓗꓪ ꓙꓵꓽ ꓪ ꓙꓳˍ ꓠꓬꓲ ꓬꓴ-ꓔ ꓡ ꓞꓳ ꓐꓴ ꓠꓬ ꓓꓵꓽ ꓙ ꓮ’ ꓡꓰꓳ= ꓖꓳ ꓡꓱ ꓟꓸ ꓖꓶ ꓔꓬ ꓕꓯ꓾ ꓬꓲ ꓪ ꓠꓯꓸꓼ ꓗꓪ ꓐꓰ ꓥꓶˍ ꓟ ꓦ ꓓꓯꓹ ꓟ ꓡ ꓞꓳ ꓣꓳ ꓠꓬ꓾ “ꓪꓴ-ꓢ ꓬꓲ ꓢꓲꓽ ꓫꓬ ꓢꓴ ꓖꓳ ꓕꓲ ꓣꓳ” ꓐꓰ ꓘꓴꓻ ꓔꓴ ꓡ ꓢꓲ ꓢꓲ ꓒ ꓬꓰ-ꓢꓴ ꓔꓯ ꓢꓷꓸ ꓙ ꓟꓳꓻ ꓙˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ “ꓕꓽ ꓪꓳꓹ꓾ ꓬꓲ ꓔꓯˍ ꓐꓰ ꓓꓳ ꓙꓰ” ꓐꓰ ꓐꓯ ꓖꓶ ꓗꓷˍ ꓠꓬ ꓥꓶˍ ꓟ ꓦꓻ ꓠꓬ ꓖꓳ ꓕꓲ ꓣꓳ ꓔꓯ ꓚꓵꓹ ꓓꓳꓽ ꓗꓷ ꓢꓲ ꓓꓳ ꓙꓰꓳ= ꓡ ꓞꓳ ꓖꓳ ꓕꓲ ꓣꓳ ꓠꓽ ꓮ ꓡꓲˍ ꓟꓲ ꓟꓽ ꓗꓷ ꓡꓰ= ꓖꓳ ꓕꓯ ꓖꓳ ꓗꓪ ꓔꓬ ꓢꓴ ꓮ ꓙꓵꓽ ꓓꓵꓽ ꓙ ꓟꓶ ꓡꓰ ꓢꓲ ꓠꓬꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓕꓱ ꓡꓱ ꓠ ꓠꓬꓲ ꓡꓯ ꓘꓳꓹˍ ꓡꓳ= ꓕꓱ ꓟ ꓠꓬ ꓮ ꓡꓲ ꓡꓴ ꓫꓵꓽ ꓥ ꓡ? ꓥꓶˍ ꓟ ꓦ ꓔꓯˍ ꓟꓲ ꓬꓲ ꓙꓵꓽ ꓪ ꓐꓰ ꓪꓽ ꓠꓬꓲˍ ꓟ ꓡꓰ ꓕꓵꓼ ꓪ ꓖꓶ ꓗꓷ ꓠꓬ ꓓꓳ ꓙꓰˍ ꓡꓳ꓾ ꓐꓰ ꓐꓯ ꓡꓯ ꓘꓳˍ ꓡꓳ=

ꓢꓲꓽ ꓫꓬ ꓕꓳꓽ ꓶ ꓝꓲꓸ ꓕꓱ ꓟ ꓗꓪ ꓮ ꓘꓶꓸ ꓬꓳꓸ ꓚꓵˍ ꓟ ꓠꓬꓲꓽ ꓚꓱꓹ ꓔꓯ ꓖꓴ ꓟꓸ ꓖꓶ ꓔꓬ ꓡꓳ= ꓕꓱ ꓟ ꓠꓬ ꓢꓲ ꓒ ꓬꓲ ꓪꓽ ꓠꓬꓲˍ ꓟ ꓟꓸ ꓖꓶ ꓘꓶꓽ ꓐꓰ ꓥꓶˍ ꓟ ꓔꓯ ꓖꓼ ꓓꓳ ꓐ ꓡˍ ꓟ ꓢꓯꓼ ꓪ ꓔꓯ ꓖꓴ ꓟꓸ ꓖꓶ ꓔꓬ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓙꓵꓽ ꓪ ꓠꓬ ꓐꓯ ꓘꓶꓽ ꓐꓰ ꓢꓷꓸ ꓠꓲꓹˍ ꓡꓰꓽ ꓟꓽ ꓥ= ꓠꓯ ꓞꓲꓹ ꓟ ꓗꓪ ꓞꓳꓹ ꓔ ꓟꓶ ꓢꓴ꓾ ꓠꓯ ꓞꓲꓹ ꓟ ꓗꓪ ꓪꓳꓽ ꓞꓹ ꓢꓴ ꓐꓴ ꓔꓯ ꓠꓬꓲ ꓟꓳꓻ ꓓꓴ ꓠꓯꓸꓼ ꓗꓪ ꓧꓳꓽ ꓙꓰˍ ꓟ ꓪꓽ ꓠꓬꓲˍ ꓟ ꓢꓯꓼ ꓪ ꓥ ꓡꓳ= ꓥꓶˍ ꓟ ꓦ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙˍ ꓟ ꓠꓬ꓾ ꓥꓶˍ ꓟ ꓢꓯꓼ ꓪ ꓐꓴ ꓥˍ ꓟꓲ ꓢꓲ ꓒ ꓬꓲ ꓙꓵꓽ ꓪ ꓔꓯ ꓢꓷꓸ ꓢꓲ ꓖꓳ ꓟ ꓔꓯ ꓙꓳˍ ꓟ ꓔꓯ ꓖꓴ ꓟꓸ ꓖꓶˍ ꓡꓳ=

ꓣꓳ ꓤꓶꓻ ꓗꓪ꓾ ꓣꓳ ꓐꓴ ꓠꓬ ꓫꓸ ꓙꓵꓻ ꓓꓴ꓾ ꓙꓳ ꓛꓱꓽ ꓓꓴ꓾ ꓣꓳ ꓫꓬꓹ ꓔꓱꓹ ꓐ ꓡˍ ꓟ ꓕꓯꓽ ꓢꓲ ꓪꓴꓽˍ ꓡꓳ ꓐꓰ ꓚꓬꓹ ꓪˍ ꓟ ꓣꓳ ꓦꓻ ꓐꓱ ꓶ ꓢꓯꓼ ꓕꓵꓼˍ ꓟ ꓗꓪ ꓣꓳ ꓠꓬ꓾ ꓕꓱ ꓟꓬ ꓫꓵꓽ ꓡꓰ ꓣꓳ ꓠꓯꓸꓼ ꓗꓪ ꓐꓲ ꓞꓹˍ ꓡꓳ ꓐꓰ ꓓꓵꓽ ꓙ ꓟꓶˍ ꓟ ꓬꓲ ꓙꓵꓹ ꓣꓳ ꓔꓳꓹ ꓜꓳꓽ ꓗꓴꓸˍ ꓡꓳ= ꓣꓳ ꓔꓳꓹ ꓜꓳꓽˍ ꓟ ꓫꓸ ꓙꓵ ꓓꓴ꓾ ꓠꓲꓹ ꓫ ꓓꓴ ꓔꓯ ꓮ ꓡꓲ ꓐꓰ ꓗꓳꓸ ꓘꓳ ꓙꓰ ꓠꓯꓹ ꓟ ꓟꓽ ꓢꓷꓸ ꓗꓷ ꓡꓰ ꓢꓲ꓾ ꓖꓳ ꓟ ꓔꓯ ꓧꓪꓸ ꓡꓰ ꓠꓹ ꓟ ꓢꓯꓼ ꓪ ꓟꓽ ꓙꓳ꓾ ꓐꓰ ꓓꓵꓽ ꓙ ꓟꓶˍ ꓥꓳ= ꓖꓳ ꓡꓱ ꓥˍ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓬ꓾ ꓣꓳ ꓐꓴ ꓔꓯ ꓢꓷꓸ ꓠꓲꓹ ꓚꓴꓽ ꓬꓲꓹ ꓟꓸ ꓖꓶˍ ꓟ ꓡꓰꓽ ꓟꓽ ꓞꓲꓺ꓾ ꓣꓳ ꓐꓴ ꓔꓯ ꓫꓸ ꓙꓵ ꓡꓰ ꓝꓲ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓥꓶˍ ꓟ ꓢꓯꓼ ꓪꓽ ꓐꓴ ꓕꓯꓽ ꓢꓲ꓾ ꓢꓲ ꓒ ꓠꓬ ꓵꓻ ꓖꓴ ꓟꓽ ꓓꓻ ꓟ ꓙꓵꓽ ꓪ ꓙꓳ ꓢꓴ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓐꓴ ꓔꓯ ꓐꓯ ꓖꓶ ꓔꓬ ꓡꓳ=

ꓙꓲ-ꓢꓴ ꓬꓲ ꓙꓵꓽ ꓪ ꓠꓬ ꓣꓳ ꓐꓴ ꓐꓱ ꓶ ꓬꓲ ꓚꓵ ꓘꓶꓽ ꓠꓯꓸˍ ꓟ ꓥꓳ ꓡꓳꓸ ꓓꓴ ꓐꓰ ꓣꓳ ꓐꓴ ꓩꓴ ꓗꓷ ꓟꓶˍ ꓟ ꓬꓲ ꓝꓳꓹ ꓟꓶ ꓥ ꓡꓳ= ꓣꓳ ꓐꓴ ꓠꓬ ꓫꓸ ꓙꓵ ꓓꓴ ꓔꓳꓹ ꓜꓳꓽˍ ꓕꓯ꓾ ꓢꓲ ꓒ ꓬꓲ ꓙꓵꓽ ꓪ ꓠꓬ ꓣꓳ ꓔꓯ ꓒꓳꓹ ꓔꓳꓹ ꓔꓬ ꓟ ꓮ ꓙꓵꓽ ꓟ ꓕꓯꓽ ꓢꓲ ꓟꓬꓽ ꓠꓬꓲ ꓪꓴꓽˍ ꓡꓳ ꓐꓯ ꓟ ꓔꓯ ꓙꓵꓻ ꓢꓲ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓙꓰ ꓐ ꓡˍ ꓡꓳ= ꓬꓲ ꓠꓬ ꓣꓳ ꓤꓶꓻ ꓠꓯꓸꓼ ꓗꓪ ꓔꓳꓹ ꓜꓳꓽ ꓡˍ ꓟ ꓟꓲꓽ ꓦꓲ ꓕꓳꓽ ꓥꓳꓽ ꓔꓯ ꓠꓽ ꓗꓷ ꓠꓹ ꓟ ꓕꓵꓼ ꓪ ꓖꓶ ꓐ ꓡˍ ꓡꓳ꓾ ꓣꓳ ꓐꓴ ꓔꓯ ꓞꓳꓹ ꓔ ꓟ ꓧꓳꓹ ꓚ ꓐꓴ ꓔꓯ ꓞꓷꓹ ꓡꓰ ꓝꓲ ꓢꓲ꓾ ꓣꓳ ꓠꓲꓹ ꓟ ꓠꓻ ꓓꓴ ꓔꓯ ꓥˍ ꓟꓲ ꓬꓲ ꓢꓯꓼ ꓪ ꓗꓪ ꓐꓰ ꓓꓻ ꓡꓰˍ ꓟ ꓐꓰ ꓝꓮꓲ ꓕꓲ ꓧꓪꓹ ꓬꓲ ꓫꓵꓼ ꓒꓬꓱꓼ ꓡ ꓝꓲˍ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ꓾ ꓙꓲ-ꓢꓴ ꓬꓲ ꓙꓵꓽ ꓪ ꓠꓬ ꓣꓳ ꓐꓰ ꓶꓽ ꓤ ꓗꓪ ꓓꓻˍ ꓟ ꓟꓽ ꓥ꓾ ꓝꓮꓲ ꓣꓳ ꓡꓯꓼ ꓟꓽ ꓑꓰ ꓟˍ ꓟꓲ ꓟꓽ ꓥ= ꓬꓲ ꓠꓵꓻ ꓠꓲꓹ ꓐꓰ ꓙꓵꓽ ꓪ ꓔꓯ ꓣꓱꓽ ꓢꓲ ꓠꓲꓹ ꓫ ꓟꓬ ꓫ ꓔꓬ ꓢꓴ ꓐꓰ ꓬꓲ ꓔꓯ ꓣꓱꓽ ꓞꓹ ꓔꓬ ꓢꓴ ꓐꓴ ꓔꓯ ꓬꓰ ꓙ ꓗꓷ ꓟ ꓥ ꓡꓳ= ꓬꓲ ꓔꓯ ꓛꓳꓻ ꓔꓬ ꓢꓴ ꓥ ꓟ ꓣꓳ ꓐꓴ ꓠꓬ꓾ ꓢꓲ ꓒ ꓬꓲ ꓙꓵꓽ ꓪ ꓔꓯ ꓙꓵꓻ ꓠꓹ ꓟ ꓐꓰ ꓣꓳ ꓐꓴ ꓔꓯ ꓖꓶ ꓙ ꓟꓳ ꓔ ꓟ ꓩꓴꓻ ꓗꓷ ꓟꓶˍ ꓟ ꓗꓪ ꓙ ꓫꓱꓽ ꓠꓹ ꓟ ꓣꓳ ꓐꓴ ꓔꓯ ꓘꓴꓻ ꓔ ꓡꓳ= ꓚꓬꓴꓸ ꓙˍ ꓟ ꓐꓰ ꓠꓻ ꓫꓬꓹ ꓖꓶˍ ꓟ ꓣꓱꓽ ꓞꓹ ꓔꓬ ꓟ ꓠꓱꓸ ꓐꓯ ꓢꓴ ꓐꓴ ꓔꓯ ꓢꓲ ꓒ ꓬꓲ ꓙꓵꓽ ꓪ ꓥꓳ ꓡꓳꓸ ꓓꓴ ꓔꓯ ꓐꓱ ꓖꓶ ꓠꓹ ꓟ꓾ ꓬꓲ ꓠꓵꓻ ꓠꓲꓹ ꓐꓰ ꓪꓽ ꓠꓬꓲˍ ꓟ ꓬꓲ ꓙꓻ ꓖꓴ ꓚꓱꓹ ꓒꓬꓱꓼ ꓡ ꓠꓹ ꓟ ꓣꓳ ꓐꓴ ꓔꓯ ꓘꓴꓻ ꓔꓬ ꓡꓳ=

ꓖꓳ ꓟ ꓪꓴꓸ ꓠꓬꓲ ꓣꓳ ꓐꓴ ꓠꓬ꓾ ꓢꓲ ꓒ ꓠꓯꓸꓼ ꓗꓪ ꓢꓯꓼ ꓟꓬ꓾ ꓢꓲ ꓡꓲ ꓟ ꓐꓰ ꓩꓴ ꓗꓷˍ ꓟ ꓔꓯ ꓣꓴ ꓔꓯꓹ ꓡˍ ꓟ ꓙꓵꓽ ꓪ ꓟꓶ ꓐ ꓡˍ ꓡꓳ ꓐꓯ ꓟ ꓔꓯ ꓢꓷꓸ ꓢꓲ ꓠꓬꓲ꓾ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓙꓰ ꓠꓹ ꓟ ꓣꓳ ꓢꓯꓼ ꓕꓵꓼ ꓙꓰ ꓡꓯ= ꓮ ꓫꓵꓽ ꓔꓳꓹ ꓜꓳꓽ ꓪˍ ꓥˍ ꓟꓲ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓴ ꓐꓰ ꓕꓲ ꓪ ꓔꓬ ꓟ ꓐꓰ꓾ ꓢꓲ ꓒ ꓬꓲ ꓪꓽ ꓠꓬꓲˍ ꓟ ꓙꓵꓽ ꓪ ꓠꓬ ꓮ ꓡꓲ ꓫꓵꓽ ꓫꓸ ꓘꓶꓻ ꓓꓴ ꓔꓯ ꓥˍ ꓟꓲ ꓗꓳꓸ ꓘꓳ ꓙꓰ ꓐ ꓡˍ ꓡꓳ꓾ ꓧꓪꓸ ꓡꓰ ꓐ ꓡˍ ꓡꓳ꓾ ꓐꓯ ꓟ ꓔꓯ ꓙꓵꓻ ꓢꓲ ꓞꓳ ꓙꓳ ꓙꓰ ꓐ ꓡ ꓝꓲ=