ꓢꓲ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓧꓪꓸ ꓡꓰˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓔꓯ ꓧꓪꓸ ꓧꓪꓸꓼ꓾

ꓠꓬꓲꓸ ꓠꓬꓲ ꓠꓬ ꓢꓲ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓧꓪꓸ ꓡꓰˍ ꓟ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓧꓪꓸ ꓡꓰˍ ꓟ ꓑꓮꓲꓽ ꓔꓯ ꓮ ꓫꓵꓽ ꓪꓴꓸ ꓠꓬꓲ ꓬꓰ ꓔꓬ ꓡ? ꓡꓯꓼ ꓐꓳ ꓔꓶꓸ ꓓꓴ ꓬꓲ ꓚꓺ ꓟꓲꓽ ꓠꓬ꓾ ꓮ ꓠꓱ ꓢꓲ ꓒ ꓬꓰ-ꓢꓴ ꓟꓲ ꓠꓯ ꓗꓪ ꓔꓬ ꓕꓯ ꓡꓯꓼ ꓐꓳ ꓔꓶꓸ ꓓꓴ ꓐꓯ ꓟ ꓠꓬ꓾ ꓞꓳꓻ ꓘꓴꓽ꓾ ꓛꓬ-ꓔꓮꓪꓸ (ꓦꓴꓻ ꓜꓽ ꓢꓴ) ꓔꓯ ꓢꓰꓼ ꓖꓴ ꓥ ꓡꓳ= ꓟꓬꓱꓺ ꓓꓳꓽ ꓟꓽ ꓙꓳ ꓔꓰꓼ ꓡꓰ ꓟ꓾ ꓢꓴ ꓡꓰ ꓠꓲꓹ ꓒꓳˍ ꓟ꓾ ꓠꓲꓹ ꓶˍ ꓟ ꓕꓲ ꓟˍ ꓟꓲ ꓥ ꓡꓳ= ꓮꓽ ꓟˍ ꓟꓲ ꓡꓳꓸ ꓠꓲꓹ ꓟꓽ ꓫꓵ ꓟ ꓕꓲ ꓟ ꓥ ꓡꓳ=

ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓡꓯꓼ ꓐꓳ ꓔꓶꓸ ꓓꓴ ꓖꓳ ꓟ ꓔꓯ ꓑꓱꓸ ꓢꓲ ꓬꓲ ꓢꓯꓼ ꓟꓬ ꓖꓶ ꓗꓷˍ ꓡꓳ= ꓖꓳ ꓗ ꓠꓯꓸ ꓮꓽ ꓟˍ ꓟꓲ ꓠꓲꓹ ꓜꓳˍ ꓟ꓾ ꓮꓽ ꓟˍ ꓟꓲ ꓠꓲꓹ ꓒꓳˍ ꓟ ꓖꓳ ꓟ ꓠꓬ ꓟꓲ ꓠꓯ ꓞꓳ ꓤ ꓮꓽ ꓟˍ ꓟꓲ ꓠꓲꓹ ꓒꓴˍ ꓟ ꓒꓬꓱꓼ ꓡˍ ꓡꓳ= ꓞꓳ ꓤ ꓮ ꓙꓵꓽ ꓠꓲꓹ ꓠꓵˍ ꓟ ꓡꓯꓼ ꓐꓳ ꓔꓶꓸ ꓓꓴ ꓒꓬꓱꓼ ꓡˍ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ?

ꓕꓱ ꓟ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓖꓳ ꓟ ꓬꓲ ꓢꓯꓼ ꓪ ꓗꓪ ꓐꓰ ꓟꓽ ꓥ= ꓡꓯꓼ ꓐꓳ ꓔꓶꓸ ꓓꓴ ꓖꓳ ꓟ ꓕꓯꓽ ꓢꓲ ꓗꓪ ꓢꓲ ꓒ ꓬꓰ-ꓢꓴ ꓫꓵꓻ ꓙ ꓗꓷ ꓟ ꓑꓶꓸ ꓓꓴ꓾ ꓡꓯꓼ ꓐꓳ ꓔꓶꓸ ꓓꓴ ꓖꓳ ꓟ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓫꓵꓻ ꓢꓲ꓾ ꓢꓯꓸ ꓬꓲꓼ ꓡ ꓗꓷ ꓗ ꓠꓯꓸ ꓞꓳ ꓤ ꓮ ꓙꓵꓽ ꓔꓯ ꓚꓬꓴꓸ ꓙ ꓗꓷ ꓟ ꓑꓶꓸ ꓓꓴ꓾ ꓡ ꓞꓳ ꓐꓴ ꓡꓰ ꓠꓲꓹ ꓒꓳꓹ ꓓꓴ ꓐꓰ ꓚꓬꓹ ꓔ ꓟ ꓡꓯꓼ ꓐꓳ ꓔꓶꓸ ꓓꓴ ꓖꓳ ꓟ ꓠꓬ ꓮ ꓙꓵꓽ ꓐꓱ ꓶ ꓗꓹ ꓛꓲꓽ ꓓꓴ꓾ ꓮ ꓙꓵꓽ ꓐꓱ ꓶ ꓥꓳ ꓡꓳꓸ ꓓꓴ ꓒꓬꓱꓼ ꓡˍ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓫꓵꓻ ꓓꓴꓽ ꓔꓯ ꓧꓪꓸ ꓡꓰꓳ= ꓡꓯꓼ ꓐꓳ ꓔꓶꓸ ꓖꓳ ꓟ ꓗꓪ ꓐꓰ ꓧꓪꓸ ꓡꓰꓳ= ꓣꓳ ꓐꓱ ꓶ ꓗꓹ ꓛꓲꓽ ꓓꓴ ꓥꓳ= ꓠꓬꓲꓸ ꓠꓬꓲ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸˍ ꓟ ꓢꓲ ꓒ ꓬꓰ-ꓢꓴ ꓔꓯ ꓖꓼ ꓛꓳ ꓠꓹ ꓟ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=

ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ Costly grace ꓐꓰ cheap grace ꓐꓰ ꓐꓯ ꓟ ꓠꓬꓲꓽ ꓙꓰꓽ ꓙꓳˍ ꓡꓳ= Costly grace ꓐꓰ ꓐꓯ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸˍ ꓟ ꓡꓰ ꓐꓰ ꓣꓳ ꓥ ꓟꓲ ꓚꓲꓸ ꓛꓬ ꓤꓶꓻ ꓗꓪ ꓚꓲꓸ ꓛꓬ ꓔꓳꓹ ꓜꓳꓽ ꓠ ꓔ ꓟ ꓮ ꓙꓵꓽ ꓔꓯ ꓠꓲꓸ ꓒꓴ ꓒꓴ ꓡꓰꓽ ꓘꓳ ꓣꓴ ꓢꓲ ꓙꓰˍ ꓟ꓾ ꓚꓲꓸ ꓛꓬ ꓤꓶꓻ ꓗꓪ ꓪꓴ-ꓢ ꓐꓯ ꓘꓶꓽ ꓔꓯ ꓗꓶ ꓔ ꓢꓲ ꓠꓬꓲ꓾ ꓕꓲ ꓠꓬꓲ ꓕꓲ ꓠꓬꓲ ꓪꓴ-ꓢ ꓐꓰ ꓒ ꓕꓲ꓾ ꓢꓲ ꓒ ꓬꓰ-ꓢꓴ ꓐꓰ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓠꓬꓲ ꓙꓰˍ ꓟ ꓔꓯ ꓐꓯˍ ꓡꓳ=

Cheap grace ꓐꓯˍ ꓟ ꓠꓬ ꓬꓲ ꓒꓵꓽ ꓮ ꓘꓶꓸ ꓟꓽ ꓠꓯꓸ ꓟ꓾ ꓕꓲ ꓚꓱꓹ ꓐꓯ ꓠꓬ꓾ ꓣꓳ ꓪꓴ-ꓢ ꓔꓯ ꓙꓵꓻˍ ꓟ꓾ ꓣꓳ ꓪꓴ-ꓢ ꓔꓯ ꓥꓳ ꓡꓳꓸˍ ꓟ ꓠꓬ ꓣꓳ ꓐꓱ ꓶ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳ ꓡ ꓓꓴ ꓐꓱ ꓶˍ ꓡꓰꓽ ꓦ ꓡꓱ ꓔꓬ ꓡꓳ= ꓪꓴ-ꓢ ꓔꓯ ꓙꓵꓻˍ꓾ ꓢꓲ ꓒ ꓬꓰ-ꓢꓴ ꓔꓯ ꓙꓵꓻˍ ꓐꓯ ꓟ ꓠꓬ ꓚꓲꓸ ꓛꓬ ꓤꓶꓻ ꓡꓶꓸ ꓠꓹ ꓟ ꓟꓽ ꓥ ꓥ꓾ ꓚꓲꓸ ꓛꓬ ꓔꓯ ꓟꓽ ꓙꓲꓻ ꓟꓽ ꓫꓬ ꓟ ꓟꓽ ꓒꓬꓱꓼ ꓡ ꓠꓹ ꓟ꓾ ꓢ-ꓓꓯ ꓡꓰ ꓟꓽ ꓤꓹ ꓠꓬꓲ ꓡ ꓠꓹ ꓟ꓾ ꓕꓱ ꓟ ꓐꓱ ꓶ ꓪꓴ-ꓢ ꓔꓯ ꓫꓸ ꓑꓬ ꓖꓴ ꓕꓲ ꓟˍ ꓡꓰ ꓐꓰ ꓓꓵꓽ ꓙ ꓢꓲ ꓠꓬꓲ ꓪꓴ-ꓢ ꓔꓯ ꓙꓵꓻˍ ꓟ ꓔꓯ ꓐꓯ ꓡꓳ= ꓖꓳ ꓡꓱ ꓠꓬꓲ ꓣꓳ ꓮ ꓙꓵꓽ ꓠꓬ costly grace ꓐꓯˍ ꓟ ꓬꓲ ꓒꓵꓽ ꓠꓯꓸˍ ꓟ꓾ ꓚꓲꓸ ꓛꓬ ꓖꓳ ꓓꓱꓽ ꓚꓵꓸ ꓓꓳ ꓢꓲ ꓢꓯꓼ ꓕꓵꓼ ꓪˍ ꓟ ꓙꓵꓻ ꓠꓲꓹ ꓕꓱ ꓟ ꓙꓳ ꓠ ꓗꓹ ꓡꓳ=

ꓮ ꓟꓶ ꓟ ꓦꓬꓼ ꓠꓬꓲ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓚꓱꓹ ꓔꓯ ꓖꓳ ꓟꓬ ꓟꓽ ꓚ= ꓢꓲ ꓒ ꓬꓰ-ꓢꓴ ꓔꓯ ꓙꓵꓻˍ ꓠꓬ ꓚꓬꓴꓸ ꓟꓶ ꓡꓰꓳ= ꓪꓴ-ꓢ ꓔꓯ ꓙꓵꓻˍ ꓠꓬ ꓚꓬꓴꓸ ꓟꓶˍ ꓡꓳ꓾ ꓐꓯ ꓢꓲ ꓟꓸ ꓟꓲꓽ ꓚ ꓔꓬ ꓟ ꓮ ꓟꓬꓹ ꓙꓳˍ ꓡꓳ= ꓠꓬꓲꓸ ꓠꓬꓲ ꓕꓱ ꓟ ꓗꓪ ꓐꓰ ꓣꓳ ꓔꓯ ꓙꓳꓺ ꓗꓽ ꓖꓶ ꓔ ꓟ ꓠꓬ ꓣꓳ ꓮ ꓙꓵꓽ ꓠꓬ ꓙꓵꓻˍ ꓕꓲ ꓖꓼ ꓟꓽ ꓥ ꓥ꓾ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓠ ꓗꓹ ꓡꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓢꓲ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓠ ꓗꓹ ꓡꓳ ꓐꓯ ꓖꓶˍ ꓕꓯ ꓢꓲ-ꓟꓴ ꓒꓲ-ꓕꓱ ꓐꓰ ꓝꓲ ꓓꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓕꓼˍ ꓡꓳ= ꓕꓽ ꓙꓰ꓾ ꓕꓽ ꓬꓰ꓾ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓟꓽ ꓛꓵ꓾ ꓐꓰ ꓬꓲ ꓪ ꓡꓰ ꓐꓯ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓡꓰ ꓒꓲ-ꓕꓱ ꓔꓯ ꓢ-ꓓꓯ ꓠꓴ ꓗ ꓠꓯꓸ ꓢꓲ ꓗꓪ ꓤꓸ ꓙꓰ ꓐꓯ ꓖꓶˍ ꓡꓳ=