ꓢꓲ-ꓢ ꓔꓯꓸ ꓟ ꓠꓬ ꓢꓲ-ꓢ ꓔꓯ ꓖꓶ꓾ ꓪꓴ-ꓢ ꓔꓯꓸ ꓟ ꓠꓬ ꓪꓴ-ꓢ ꓔꓯ ꓖꓶ꓾

29 ꓫꓵꓽ ꓠꓽ꓾ ꓠꓽ ꓦꓬ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶꓽ ꓝꓲꓸ

ꓬꓲ-ꓢ-ꓬ ꓕꓳꓽ ꓶ 45: 1, 4-6

ꓬꓰ-ꓧꓳ-ꓧꓪ ꓥꓪ ꓠꓬ ꓟꓰ ꓞꓶꓻ ꓡꓰ ꓟꓰ ꓔ_ ꓟ ꓘꓴ-ꓣ-ꓫꓵ ꓔꓯ ꓕꓱ ꓡꓱ ꓐꓯ_ ꓡꓳ꓾ (ꓮ ꓡꓲꓳ ꓐꓯ ꓠꓬ ꓬꓲ ꓟꓲ ꓙꓬ ꓗꓪ ꓞꓳ ꓫꓵ ꓞꓳ ꓙꓰ ꓐꓴ ꓔꓯ ꓙꓵꓽ ꓓꓳꓽ ꓡꓰ ꓝꓲ ꓠꓹ ꓟ_ ꓐꓰ ꓪ ꓔꓲ ꓐꓴ ꓙꓴꓽ ꓝꓲ ꓗꓪ ꓟ ꓙ ꓧꓷꓹ ꓔꓯ ꓥꓪ ꓒꓶ ꓗꓷ ꓠꓹ ꓟ꓾ ꓝꓮꓲ ꓬꓲ ꓟꓲ ꓙꓬ ꓗꓪ ꓠꓬꓲꓽ ꓔꓱꓹ ꓙꓳ_ ꓟ ꓗ ꓘꓶ ꓓꓽ ꓟ ꓒꓴ ꓖꓶ ꓢꓲ ꓟꓽ ꓚꓵꓸ ꓗꓷ ꓠꓹ ꓟ꓾ ꓬꓲ ꓡꓯ ꓙ ꓔꓯ ꓥꓪ ꓣꓴ ꓔ_ ꓡꓳ)꓾ ꓥꓪ ꓚꓳ ꓑ ꓬ-ꓗꓴ_ ꓐꓰ ꓥꓪ ꓡꓰ ꓢꓲꓺ ꓔ_ ꓟ ꓬꓲ-ꓢꓷ-ꓡꓰ ꓑꓶ ꓓꓴ꓾ ꓥꓪ ꓡꓰ ꓠꓴ ꓟꓬꓱꓺ ꓞꓶ ꓢꓲ ꓠꓴ ꓔꓯ ꓘꓴꓻ ꓗꓷꓳ꓿ ꓠꓴ ꓥꓪ ꓔꓯ ꓟꓽ ꓢꓷ ꓥ_ ꓟꓲ꓾ ꓥꓪ ꓡꓰ ꓠꓴ ꓔꓯ ꓫꓵꓽ ꓟꓬꓱꓺ ꓕꓲ ꓟꓬꓱ ꓡꓴꓽ ꓖꓶ_ ꓡꓳ꓿ ꓥꓪ ꓠꓬ ꓬꓰ-ꓧꓳ-ꓧꓪ ꓥ ꓡꓳ꓿ ꓠꓱ ꓐꓯ ꓕꓲ ꓣꓳ ꓟꓽ ꓙꓳ꓿ ꓥꓪ ꓟꓽ ꓥ ꓠꓬ ꓮ ꓫꓵ ꓢꓲꓺ ꓟꓽ ꓙꓳ꓿ ꓠꓴ ꓡꓰ ꓥꓪ ꓔꓯ ꓟꓽ ꓢꓷ ꓥ_ ꓟꓲ ꓥꓪ ꓠꓴꓻ ꓔꓯ ꓙ ꓧꓷꓹ ꓧꓷ ꓖꓶ_ ꓥꓳ꓿ ꓥꓪ ꓕꓱ ꓡꓱ ꓬꓰ_ ꓟ ꓠꓬ ꓟꓲꓽ ꓟꓲ ꓓꓳ ꓖꓴ ꓗꓪ ꓐꓰ ꓥ_ ꓟꓲ꓾ ꓐꓶ ꓓꓵ ꓘꓶ ꓗꓪ ꓐꓰ ꓥ_ ꓟꓲ꓾ ꓥꓪ ꓟꓽ ꓥ ꓠꓬ ꓠꓱ ꓐꓯ ꓢꓲꓺ ꓕꓲ ꓣꓳ_ ꓟꓲ ꓟꓽ ꓙꓳ꓾ ꓐꓰ꓾ ꓞꓳ ꓤ ꓥ ꓕ ꓑꓳ ꓔꓯ ꓢꓷ ꓡꓰ ꓝꓲ ꓠꓹ ꓟ ꓥ ꓡꓳ꓿ ꓥꓪ ꓠꓬ ꓬꓰ-ꓧꓳ-ꓧꓪ ꓥ ꓢꓲ꓾ ꓠꓱ ꓐꓯ ꓕꓲ ꓣꓳ ꓟꓽ ꓙꓳ꓿

Tꓰ-ꓢ-ꓡꓳ-ꓠꓲ-ꓬ 1ꓽ 1-5

ꓒꓳ-ꓡꓳ ꓥꓪˍ ꓐꓰ ꓫꓲ-ꓡˍ ꓐꓰ꓾ ꓕꓲ-ꓟꓳ-ꓕꓲ-ꓪꓴ ꓡꓰ꓾ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓟ꓾ ꓕꓰ-ꓢ-ꓡꓳ-ꓠꓲ-ꓬ ꓘꓴ ꓜꓲ ꓞꓳ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ꓥꓪ ꓠꓴꓽ ꓠꓬ ꓮ ꓕꓯˍ ꓟꓲ ꓠꓴ ꓪꓽ ꓮꓽ ꓙꓵ ꓢꓴ ꓑꓶꓸ ꓓꓴ ꓪꓴ-ꓢ ꓔꓯ ꓫꓸ ꓟꓳ ꓢꓲ꓾ ꓥꓪ ꓠꓴꓽ ꓪꓽ ꓘꓴˍ ꓕꓯ ꓠꓴ ꓪꓽ ꓟꓬꓱ ꓞꓶꓻ ꓔꓬ ꓥꓳ꓿ꓠꓴ ꓪꓽ ꓙꓵꓻ ꓠꓲꓹ ꓗꓪ ꓐꓰ ꓬꓰˍ ꓟ ꓟꓬꓱꓽ ꓐꓰ꓾ ꓠꓵ ꓠꓲꓹ ꓗꓪ ꓐꓰ ꓢꓯꓼ ꓕꓵꓼ ꓪꓴꓽ ꓧꓶˍ ꓟ ꓐꓰ꓾ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓔꓯ ꓥꓳ ꓡꓳꓸˍ ꓟ ꓗꓪ ꓠꓴ ꓪꓽ ꓜꓲꓽ ꓘꓴˍ ꓟ ꓔꓯ꓾ ꓥꓪ ꓠꓴꓽ ꓠꓬ ꓣꓳꓽ ꓐꓹ ꓐ ꓪꓴ-ꓢ ꓟꓲꓽ ꓙꓬ ꓗꓪ ꓟꓽ ꓠꓽ ꓠ ꓓꓵꓽ ꓙꓽ ꓛꓲ ꓡ ꓡꓳ꓿ꓪꓴ-ꓢ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓬꓲ ꓡꓰ ꓢꓲ ꓔ ꓢꓴ ꓥ ꓟ ꓥꓪ ꓠꓴꓽ ꓢꓷꓸˍ ꓡꓳ꓿ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓡꓰ ꓠꓴ ꓪꓽ ꓔꓯ ꓶꓼ ꓓꓳꓽ ꓫꓱꓹ ꓓꓳ ꓟꓸ ꓗꓷ ꓟ ꓠꓬ꓾ ꓐꓯ ꓘꓶ ꓗꓪ ꓐꓰˍ ꓡꓰꓽ ꓟꓽ ꓥ꓿ ꓪꓽ ꓠꓬꓲˍ ꓟ ꓐꓰ ꓢꓲ-ꓫꓬ-ꓟ-ꓦˍ ꓐꓰ꓾ ꓮꓽ ꓘꓶꓸ ꓙꓵꓻ ꓕꓶˍ ꓟ ꓠꓲꓹ ꓟ ꓗꓪ ꓐꓰ ꓥ ꓡꓳ꓿ ꓥꓪ ꓠꓴꓽ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓔꓬ ꓕꓯ ꓮ ꓡꓲ ꓞꓳ ꓙꓳ ꓗꓷ ꓟ ꓠꓴ ꓪꓽ ꓢꓷꓸˍ ꓡꓳ꓿

ꓟ-ꓕꓲ 22ꓽ 15- 21

ꓖꓳ ꓕꓯ ꓒ-ꓡꓲ-ꓢꓷ ꓐꓴ ꓓꓳ ꓙꓰ ꓢꓲ꓾ ꓬꓰ-ꓢꓴ ꓬꓲ ꓚꓲꓸ ꓛꓬ ꓐꓯ ꓘꓶꓽ ꓗꓪ ꓐꓰ ꓬꓲ ꓔꓯ ꓮ ꓡꓲ ꓠꓸ ꓣꓴ ꓠꓹ ꓟ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓪꓽ ꓢꓲ ꓤ ꓐꓴˍ ꓐꓰ ꓩꓴ-ꓡꓲ ꓕꓲ ꓧꓳꓽ ꓟ ꓡ ꓞꓳ ꓔꓯ ꓬꓲ ꓔꓬ ꓗꓪ ꓝꓲ ꓩꓴ ꓗꓷ ꓢꓲ꓾ ꓟꓸ ꓒꓽꓳ꓾ ꓠꓴ ꓠꓽ ꓞꓳ ꓔꓱꓹ ꓥ ꓟ ꓐꓰ꓾ ꓢꓴ ꓒꓬꓱꓽ ꓔꓯ ꓟꓽ ꓢꓲꓺ ꓢꓲꓺ꓾ ꓔꓱꓹ ꓔꓱꓹꓼ ꓐꓰ ꓪꓴ-ꓢ ꓙ ꓖꓴ ꓟꓸ ꓖꓶ ꓢꓴ ꓥ ꓟ ꓥꓪ ꓠꓴꓽ ꓢꓷˍ ꓡꓳ꓿ꓖꓳ ꓡꓱ ꓠꓬꓲ ꓠꓴ ꓮ ꓡꓲ ꓓꓵꓽ ꓙꓽˍ ꓟ ꓥꓪ ꓠꓴꓽ ꓔꓯ ꓐꓯ ꓖꓶ ꓡꓯ꓿ ꓢꓲ-ꓢ ꓔꓯ ꓔꓯꓹ ꓒꓵꓽ ꓓꓳ ꓓ ꓡ? ꓓꓳ ꓟꓽ ꓓ ꓡ?꓾ ꓐꓰ ꓠ ꓠꓬꓲ ꓬꓰ ꓝꓲˍ ꓡꓳ꓿ꓬꓰ-ꓢꓴ ꓠꓽ ꓬꓲ ꓪꓽ ꓥꓶˍ ꓟ ꓚꓴꓽ ꓬꓲꓹ ꓔꓯ ꓢꓷꓸˍ ꓠꓬꓲ ꓬꓲ ꓪꓽ ꓔꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓐꓴꓳ꓾ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓫꓵꓽ ꓠꓬꓲˍ ꓡ?ꓔꓯꓹ ꓒꓵ ꓐꓶꓻ ꓓꓴ ꓓꓲ-ꓠ-ꓣꓲ ꓕꓲ ꓒꓯꓼ ꓥꓪ ꓔꓯ ꓟꓳꓸ ꓖꓶ ꓡꓯ꓾ ꓐꓯ ꓗꓷ ꓠꓬ꓾ ꓬꓲ ꓪꓽ ꓡꓰ ꓬꓲ ꓔꓯ ꓓꓲ-ꓠ-ꓣꓲ ꓕꓲ ꓒꓯꓼ ꓔꓯꓹ ꓖꓶ ꓡ ꓡꓳ꓿ꓬꓲ ꓡꓰ ꓬꓲ ꓪꓽ ꓔꓯ꓾ ꓞꓳ ꓐꓬꓱꓽˍ ꓐꓰ ꓟꓬꓱꓺ ꓕꓱ ꓟ ꓮ ꓟ ꓔꓯꓸ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ꓖꓳ ꓕꓯ ꓬꓲ ꓪꓽ ꓡꓰ꓾ ꓪ ꓔꓲ ꓢꓲ-ꓢ ꓔꓯꓸ ꓟ ꓥ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ꓾ ꓢꓲ-ꓢ ꓔꓯꓸ ꓟ ꓠꓬ ꓢꓲ-ꓢ ꓔꓯ ꓖꓶ꓾ ꓪꓴ-ꓢ ꓔꓯꓸ ꓟ ꓠꓬ ꓪꓴ-ꓢ ꓔꓯ ꓖꓶ꓾ ꓐꓯ ꓖꓶˍ ꓡꓳ꓿

Add new comment

1 + 2 =