ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓑꓮꓲꓽ (Trinity Sunday Reflection)

ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ  ꓑꓮꓲꓽ (Trinity Sunday Reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓑꓮꓲ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓬꓳ‐ꓦ ꓕꓳ ꓶ 3ꓽ16‐18 ꓝꓲ ꓗꓪ  ꓐ, ꓐ꓾ ꓤ ꓔꓲ ꓢꓲ‐ꓫꓬ‐ꓟ ꓦ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ ꓮ ꓙꓵꓽ ꓢꓴ ꓕꓲ ꓡꓰ ꓥ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓡꓳ. ꓟꓳ ꓪ ꓡꓳ꓿

ꓧꓳ, ꓡꓯꓽ ꓘꓳ ꓟ ꓢꓲꓽ ꓫꓬ ꓟ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ ꓮ ꓕꓱ ꓥ ꓟꓲ ꓔꓬ ꓟ ꓪꓴ‐ꓢ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐ, ꓐ ꓤ ꓔꓲ ꓢꓲ‐ꓫꓬ‐ꓟ‐ꓦ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓥ ꓟꓲ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓧꓳ, ꓡꓯꓽ ꓘꓳ ꓟ ꓪꓽ ꓡꓯ ꓘꓳ ꓟ ꓚꓱ, ꓔꓯ ꓣꓳ ꓟꓲ ꓠꓯ ꓡ ꓞꓳ ꓪꓴ. ꓠꓶ, ꓗꓪ ꓐꓰ ꓓꓵꓽ ꓙ ꓟꓽ ꓐ ꓡ꓿ ꓖꓳ ꓡꓱ ꓥ ꓟꓲ ꓦꓻ ꓟꓬ, ꓢꓶꓽ ꓗꓪ ꓐꓰ ꓡꓳ. ꓟꓳ ꓪ ꓓ ꓡꓳ꓿ ꓠꓵꓻ ꓠꓲ, ꓐꓰ ꓣꓱ ꓛꓱ ꓡꓯ ꓫꓴꓻ ꓠꓬ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓗꓪ ꓮ ꓕꓯ ꓥ ꓟꓲ ꓣꓳ ꓔꓯ ꓖꓶ ꓔꓬ ꓟ ꓥ ꓡꓳ꓿

ꓕꓱ ꓡꓱ ꓐꓰ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓡꓰ ꓖꓶ ꓡ ꓟ ꓠꓵꓻ ꓠꓲ, ꓐꓰ ꓣꓱ ꓛꓰ ꓡꓯ ꓫꓴꓻ ꓠꓬ ꓣꓳ ꓙꓵꓻ ꓢꓴ ꓢꓲꓺ ꓤ ꓐꓴ ꓠꓯ ꓗꓪ ꓙꓵꓻ ꓠꓲ, ꓬꓲ. ꓚꓰ ꓒꓬꓱꓼ ꓡ ꓟ ꓥ ꓡꓳ꓿ ꓐ, ꓐ ꓪꓴ‐ꓢ ꓠꓵꓻ ꓠꓲ, ꓠꓬ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓔꓯ  ꓚꓬꓴ ꓠ, ꓟ ꓤ ꓔꓲ ꓢꓲꓺ ꓒ ꓬꓰ‐ꓢꓴ ꓔꓯ ꓟꓲ ꓠꓯ ꓗꓪ ꓝꓲ. ꓩꓴ ꓡ ꓟ ꓥ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐ, ꓐ ꓪꓴ‐ꓢ ꓠꓲ, ꓡꓶ ꓔꓯ ꓛꓳ ꓟ ꓪꓴ. ꓠꓬꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓯ ꓗꓪ ꓝꓮꓲ ꓬꓯꓼ ꓡ ꓝꓲ ꓟ ꓥ ꓡꓳ꓿

ꓢꓲꓽ ꓕꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ ꓣꓳ ꓙꓵꓻ ꓢꓴ ꓢꓲꓺ ꓤ ꓐꓴ ꓠꓯ ꓗꓪ ꓮ ꓟꓬ, ꓣꓳꓺ ꓚꓵ. ꓓꓴ ꓙꓵꓻ ꓠꓲ, ꓕꓲ ꓟ ꓥ ꓡꓳ꓿ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ    ꓕꓲ ꓣꓳ ꓡꓰ ꓕꓲ ꓣꓳ ꓪꓽ ꓡꓯ ꓙꓻ ꓡꓯ ꓘꓳ ꓟ ꓡꓰ ꓐꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓔꓯ ꓥ ꓟꓲ ꓠꓵꓻ ꓠꓲ, ꓡꓰ ꓪꓽ ꓡꓯ ꓘꓳ ꓠ, ꓟ ꓠꓴ ꓐꓰ ꓥꓪ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓔ ꓡꓳ꓿

ꓚꓬꓴ ꓙ ꓟ ꓣꓱ ꓛꓰ ꓠꓬ ꓣꓳ ꓟꓲ ꓠꓯ ꓡ ꓞꓳ ꓐꓴ ꓓꓻ ꓟ ꓗꓪ ꓐꓰ ꓣꓳ ꓔꓯ ꓪꓴ‐ꓢ ꓡꓰ ꓖꓶ ꓔ ꓟ ꓟꓽ ꓥ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ ꓣꓳ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓪꓴ. ꓠꓬꓲ ꓚꓬꓴ ꓙ ꓟ ꓣꓱ ꓛꓰ ꓖꓶ ꓔ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓡꓳ꓿

ꓠꓬꓲ. ꓠꓬꓲ ꓗꓪ ꓣꓳ ꓔꓯ ꓓꓵꓽ ꓙ ꓠ, ꓟ ꓠꓬ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ ꓣꓳ ꓟꓲ ꓠꓯ ꓡ ꓞꓳ ꓪꓴ. ꓠꓶ. ꓗꓪ ꓓꓵꓽ ꓙ ꓢꓷ. ꓠ, ꓟ ꓫ. ꓔ ꓥ ꓟꓲ ꓦꓻ ꓟꓬ, ꓢꓶ ꓣꓳ ꓙꓵꓻ ꓠꓲ, ꓗꓪ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓔꓯ ꓙꓵꓻ ꓠ, ꓟ ꓟ. ꓖꓶ ꓔ ꓡꓳ꓿ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓤꓶ ꓗꓪ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓙꓵꓻ ꓢꓲ ꓠꓬꓲ ꓢꓯ. ꓔꓬ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿