ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓑꓮꓲ ꓦꓬꓼ ꓠꓬꓲ (Holy Trinity)

ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓑꓮꓲ ꓦꓬꓼ ꓠꓬꓲ (Holy Trinity)   

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓑꓮꓲ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ 28ꓽ16‐20 ꓝꓲ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓟꓲ ꓠꓯ ꓡ ꓞꓳ ꓔꓯ ꓬꓲ ꓝꓲ ꓓꓴ ꓒꓬꓱꓼ ꓡ ꓠ, ꓟ ꓐ, ꓐ ꓤ ꓔꓲ ꓢꓲ‐ꓫꓬ‐ꓟ‐ꓦ ꓟꓬꓱꓺ ꓗꓪ ꓐꓰ ꓖꓳ ꓓꓱ ꓔꓲ ꓖꓶ ꓢꓲ ꓠꓲ ꓪꓴ‐ꓢ ꓐꓯ ꓘꓶꓽ ꓟ. ꓖꓶ ꓠ, ꓟ ꓐꓯ ꓔ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿

ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓤꓶꓻ ꓗꓪ ꓐ,‐ꓐ ꓤ‐ꓔꓲ ꓢꓲꓽ‐ꓫꓬ‐ꓟ‐ꓦ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓯ ꓣꓳ ꓙꓵꓻ ꓢꓲ ꓠꓬꓲ ꓖꓳ ꓓꓱ ꓔꓲ ꓔ ꓢꓴ ꓐꓴ ꓥ ꓠꓬ ꓣꓳ ꓠꓬ ꓪꓽ ꓘꓴ ꓟ ꓙꓵ, ꓮ ꓫꓵꓽ ꓬꓰ ꓥ ꓟꓲ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓟꓬꓱꓺ ꓔꓯ ꓙꓵꓻ ꓢꓲ ꓠꓬꓲ ꓪꓽ ꓘꓴ ꓠ, ꓟ ꓣꓳ ꓚꓵ ꓟ ꓥ ꓡꓳ꓿ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓬ ꓟ ꓬꓲ ꓔꓶ. ꓗꓪ ꓪꓴ‐ꓢ ꓔꓬ ꓟ ꓥ ꓡꓳ꓿ ꓣꓳ ꓠꓬ ꓪꓴ‐ꓢ ꓐꓰ ꓢꓽ ꓢꓽ ꓡꓰ ꓘꓴ ꓗꓴ. ꓢꓴ ꓐꓴ ꓥ ꓡꓳ꓿ ꓣꓳ ꓔꓬ ꓢ ꓗ, ꓛꓲ ꓟ ꓙꓵ, ꓕꓯ ꓪꓴ‐ꓢ ꓔꓯ ꓫ. ꓟꓳ ꓡꓳ ꓐꓰ ꓟꓽ ꓐꓯ ꓟꓲ ꓡꓰ ꓟ ꓬꓲ ꓙꓵ, ꓮ ꓟꓬ, ꓧꓪ ꓙꓳˍ ꓡꓰ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲ, ꓠꓯ, ꓗꓪ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓯ ꓠꓵ, ꓟ ꓠꓬ ꓮ ꓘꓶ. ꓣꓳ ꓚꓵ. ꓟ ꓮ ꓘꓶ. ꓛꓲ ꓪꓴꓽ ꓡꓳˍ ꓬꓰˍ ꓟ ꓙꓵꓻ ꓠꓲ, ꓚꓰꓻ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓢꓽ ꓞꓲ ꓗꓪ ꓐꓰ ꓟ. ꓖꓶ ꓡ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓡꓰ ꓙꓵꓽ ꓪ (ꓑꓳꓪꓰꓣ) ꓖꓶ ꓔ ꓢꓴ ꓖꓶ ꓔ ꓟ ꓥ ꓡꓳ꓿ꓬꓲ ꓠꓬ ꓟꓴ ꓗꓪ ꓐꓰ ꓟꓲ ꓠꓯ ꓢꓲꓺ ꓒ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓪꓴ‐ꓢ ꓟꓬꓱꓽ ꓬꓰ ꓠ, ꓟ (ꓟꓲꓢꓢꓲꓳꓠ) ꓬꓰ ꓠ, ꓟ ꓙꓵꓽ ꓪ ꓖꓶ ꓔ ꓢꓴ ꓐꓴ ꓥ ꓡꓳ꓿ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓬ ꓬꓲ ꓝꓲ ꓓꓴ ꓒꓬꓱꓼ ꓡ ꓠ, ꓟ ꓝꓮꓲ ꓪꓴ‐ꓢ ꓦꓻ ꓡꓱ ꓡ ꓢꓴ ꓐꓴ ꓕꓯ ꓐ, ꓐ ꓤ‐ꓔꓲ ꓢꓲꓽ‐ꓫꓬ‐ꓟ‐ꓦ ꓟꓬꓱꓺ ꓗꓪ ꓐꓰ ꓖꓳ ꓓꓱ ꓔꓲ ꓖꓶ ꓠ, ꓟ ꓙꓵꓽ ꓪ ꓔꓯ ꓖꓶ ꓔ ꓟ ꓥ ꓡꓳ꓿

ꓬꓲ ꓪ ꓐꓰ ꓕꓲ ꓪ ꓮ ꓕꓯ ꓟꓲ ꓔꓬ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓝꓲ ꓓꓴ ꓐꓴ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓟꓲ ꓠꓯ ꓡꓳˍ ꓬꓰ ꓙꓵ, ꓗꓪ ꓐꓰ ꓥꓪ ꓠꓬ ꓠꓴ ꓪ ꓐꓰ ꓕꓲ ꓪ ꓔꓬ ꓡꓳ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿ ꓠꓴ ꓥꓪ ꓔꓯ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓡꓰ ꓐꓯ ꓔ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓐꓯ ꓔꓬ ꓟ ꓥ ꓡꓳ꓿

ꓕꓲ ꓧꓪ, ꓙꓳˍ ꓕꓯ ꓢꓲꓽ ꓫꓬ ꓢꓴ ꓮꓴꓖꓴꓢꓔꓲꓠꓰ ꓠꓬ ꓐ, ꓐ ꓤ ꓔꓲ ꓢꓲꓽ ꓫꓬ ꓟꓽ ꓦ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓚꓱ, ꓔꓯ ꓓꓴ ꓙ ꓫꓱ, ꓠꓬꓲˍ ꓢꓲ ꓠꓬꓲ ꓬꓲꓻ ꓡꓳ ꓐꓱ ꓘꓶꓽ ꓗꓪ ꓙ ꓖꓴ ꓫꓱ, ꓔꓬ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓤ ꓠꓱ ꓤ ꓕꓲ ꓣꓳ ꓣꓳ ꓬꓲꓻ ꓡꓴ ꓐꓱ ꓗꓪ ꓐꓰ ꓬꓲꓻ ꓙꓬ ꓔꓯ ꓒ ꓕꓲ ꓗꓪ ꓬꓲꓻ ꓐꓱ ꓗꓪ ꓘꓳꓼ ꓘꓶ ꓔꓬ ꓟ ꓔꓯ ꓡꓳ. ꓟꓳ ꓡꓳ ꓖꓳ ꓕꓯ ꓬꓲ ꓡꓰ ꓤ ꓠꓱ ꓤ ꓔꓯ ꓮ ꓫꓵꓽ ꓬꓰ ꓔꓬ ꓠꓬ ꓐꓰ ꓠꓻ ꓠꓬꓲ ꓕꓯ ꓬꓲꓻ ꓡꓴ ꓐꓱ ꓗꓪ ꓬꓲꓻ ꓙꓬ ꓮ ꓙꓵꓽ ꓔꓯ ꓕꓱ ꓬꓲꓻ ꓐꓱ  ꓗꓪ ꓘꓳꓼ ꓘꓶꓽ ꓓꓴ ꓬꓰ ꓔꓬ ꓡꓳ ꓐꓰ ꓐꓯ ꓗꓷ ꓡꓳ꓿

ꓤ  ꓠꓱ ꓤ ꓔꓯ ꓠꓴ ꓮ ꓕꓯ ꓟꓲ ꓧꓪ ꓡꓰ ꓟꓽ ꓓ ꓐꓰ ꓐꓯ ꓗꓷ ꓡꓳ ꓖꓳ ꓕꓯ ꓤ ꓠꓱ ꓤ ꓥ ꓟꓲ ꓔꓵ ꓢꓲ ꓠꓬꓲ ꓠꓴ ꓥ ꓟꓲ ꓥꓪ ꓡꓰ ꓐꓰ ꓬꓰ ꓔꓬ ꓡꓳ ꓐꓰ ꓐꓯ ꓖꓶ ꓡꓳ꓿ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓚꓱ, ꓠꓬ ꓟꓲ ꓠꓯ ꓡ ꓞꓳ ꓪꓴꓽ ꓠꓶ. ꓗꓪ ꓐꓰ ꓓꓵ ꓙ ꓫꓱ ꓟꓽ ꓓ ꓮ ꓘꓶ. ꓛꓲ ꓪꓴ ꓡꓳ ꓬꓰˍ ꓟ ꓙꓵꓻ ꓠꓲ, ꓥ ꓡꓳ꓿  ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓕꓯ ꓙꓵꓻ ꓠꓲ, ꓟꓬ ꓢꓷ ꓦꓻ ꓟꓬ ꓢꓷ ꓗꓪ ꓙꓵꓻ ꓠ, ꓟ ꓣꓳ ꓚꓵ. ꓟ ꓥ ꓡꓳ꓿

ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓤꓶꓻ ꓠꓯ ꓗꓪ ꓐ, ꓐ ꓤ ꓔꓲ ꓢꓲꓽ ꓫꓬ ꓟ ꓦ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓯ ꓙꓵꓻ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓣꓳ ꓚꓵ. ꓡꓳ꓿ ꓮ ꓟꓶ ꓟ ꓙꓵ, ꓗꓪ ꓥꓳꓽ ꓡꓰ ꓟ ꓛꓬ ꓡꓰ ꓟ ꓟ. ꓟꓲꓽ ꓚꓺ ꓒꓽ ꓮ ꓟꓬ, ꓔꓬ ꓟ ꓙꓵ, ꓟꓲ ꓥ ꓡꓳ꓿ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓡꓰ ꓣꓳ ꓔꓯ ꓪꓽ ꓡꓯ ꓘꓳ ꓟ꓾ ꓫꓱ ꓡꓯ ꓘꓳ ꓟ꓾ ꓠꓲ, ꓠꓵ ꓙꓳˍ ꓢꓴ ꓐꓴ ꓒꓬꓱꓼ ꓡ ꓝꓲ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓠꓴ ꓥꓪ ꓠꓬ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓕꓯ ꓙꓵꓻ ꓔꓬ ꓡ ꓝꓮꓲ ꓢꓽ ꓣꓳ ꓕꓲ ꓖꓳ ꓓꓱ ꓓꓴ ꓔꓯ ꓐꓰ ꓙꓽ ꓫꓱ ꓔꓬ ꓡ꓾ ꓐꓰ ꓠ ꓠꓬꓲˍ ꓔꓬ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓑꓮꓲ ꓦꓬꓼ ꓠꓬꓲ ꓗꓪ ꓠꓴ ꓥꓪ ꓔꓯ ꓘꓴ ꓔꓬ ꓟ ꓠꓬ ꓐ, ꓐ ꓤ ꓔꓲ ꓢꓲꓽ ꓫꓬ ꓟꓽ ꓦ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓠꓬ ꓠꓴ ꓥꓪ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓐꓰ ꓪꓴ‐ꓢ ꓚꓱ, ꓔꓯ ꓟꓲ ꓠꓯ ꓡ ꓞꓳ ꓮ ꓙꓵꓽ ꓢꓷ. ꓡꓰ ꓠ, ꓟ ꓐꓯ ꓟ. ꓖꓶ ꓠ, ꓟ ꓟꓬꓱꓽ ꓬꓰ ꓠ, ꓟ ꓶ ꓙꓳˍ ꓟ ꓥ ꓡꓳ꓿ ꓙꓰ ꓢꓲ ꓠꓬꓲ ꓞꓳ ꓫꓵꓽ ꓞꓳ ꓙꓵꓽ ꓥ ꓔ ꓑꓳ ꓔꓯ ꓝꓲ ꓓꓴ ꓒꓬꓱꓼ ꓡ ꓝꓲ ꓠ, ꓟꓬꓱꓽ ꓬꓰ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓯ ꓧꓪ ꓓꓴ ꓬꓰ ꓡꓯ꓿ ꓬꓲ ꓐꓰ ꓕꓲ ꓪ ꓙ ꓫꓱ ꓓꓴ ꓬꓰ ꓡꓯ ꓫ. ꓟꓳ꓿