ꓢꓽ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓑꓮꓲꓽ

ꓢ ꓣꓳ ꓐꓯ ꓥ ꓟꓲ ꓪꓴ-ꓢ ꓠꓬ ꓕꓲ ꓟˍ ꓥꓳ꓾ ꓕꓲ ꓣꓳˍ ꓥꓳ꓾ ꓐꓯ ꓟ ꓑꓮꓲꓽ ꓣꓳ ꓬꓰˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓢ ꓣꓳ ꓥ ꓢꓲ ꓠꓬꓲ ꓪꓴ-ꓢ ꓠꓬ ꓕꓲ ꓟˍ ꓥ꓾ ꓐꓰ ꓣꓳ ꓠ ꓠꓬꓲ ꓓꓴ ꓙꓳˍ ꓡꓳ= ꓐꓹ ꓐ ꓤ ꓔꓲꓸ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓠꓬ ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓥ ꓡꓳ꓾ ꓐꓯ ꓟ ꓔꓯ ꓣꓳ ꓣꓷꓠꓸˍ ꓟ ꓑꓮꓲꓽ ꓥ ꓡꓳ= ꓝꓮꓲ ꓢꓽ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓕꓱ ꓟ ꓮ ꓡꓲ ꓫꓵꓽ ꓪꓴ-ꓢ ꓥ꓾ ꓐꓰ ꓣꓳ ꓡꓳꓸ ꓠꓬꓲˍ ꓕꓯ ꓐꓹ ꓐ ꓠꓬ ꓬꓲ ꓤ ꓔꓲꓸ ꓐꓱ ꓶ ꓬꓲ ꓦꓰꓼ ꓞꓹ ꓡꓳ= ꓤ ꓔꓲꓸ ꓬꓰ-ꓢꓴ ꓠꓬ ꓐꓹ ꓐ ꓐꓱ ꓶ ꓬꓲꓸ ꓦꓰꓼ ꓞꓹ ꓡꓳ= ꓕꓱ ꓟˍ ꓡꓰ ꓐꓰ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓥˍ ꓟꓲ ꓤ ꓔꓲꓸ ꓬꓰ-ꓢꓴ ꓐꓱ ꓶ ꓦꓰꓼ ꓞꓹ ꓡꓳ꓾ ꓐꓹ ꓐ ꓐꓱ ꓶ ꓦꓰꓼ ꓞꓹ ꓡꓳ=

ꓖꓳ ꓡꓱ ꓠꓬꓲ ꓕꓰ ꓡꓰ꓾ ꓐꓹ ꓐ ꓤ ꓔꓲꓸ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓔꓯ ꓣꓳ ꓡꓳꓸ ꓠꓬꓲˍ ꓕꓯ꓾ ꓬꓲ ꓪ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓦꓰꓼ ꓞꓹ ꓡꓯ ꓘꓳꓹ ꓟ ꓔꓯ ꓣꓳ ꓡꓳꓸ ꓟꓳˍ ꓡꓳ= ꓕꓲ ꓣꓳ ꓛꓳꓽ ꓕꓲ ꓣꓳ ꓫꓱꓸ ꓖꓶ ꓡꓯ ꓘꓳ꓾ ꓕꓲ ꓣꓳ ꓐꓱ ꓶ ꓕꓲ ꓣꓳ ꓦꓰꓼ ꓞꓹ ꓢꓲ ꓠꓬꓲ꓾ ꓕꓲ ꓣꓳ ꓐꓱ ꓶ ꓕꓲ ꓣꓳ ꓢꓯꓸ ꓔꓬ ꓡꓳ꓾ ꓐꓯ ꓟ ꓣꓳꓽ ꓡꓳꓸ ꓟꓳˍ ꓡꓳ=

ꓔꓯ ꓥꓳꓽ ꓐꓯ ꓠꓬ꓾ ꓐꓹ ꓐ ꓪꓴ-ꓢ ꓠꓬ ꓬꓲ ꓤ ꓔꓲꓸ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓗꓷˍ ꓡꓳ= ꓕꓱ ꓡꓱ ꓝꓲ ꓩꓴ ꓗꓷ ꓗ ꓠꓯꓸ ꓞꓳ ꓤ ꓟꓲꓽ ꓙꓬ ꓗꓪ ꓐꓹ ꓐ ꓪꓴ-ꓢ ꓠꓬ “ꓕꓱ ꓟ ꓠꓬ ꓥꓪ ꓠꓲꓹ ꓠꓵˍ ꓟ ꓥꓪ ꓮ ꓐꓲ ꓥ ꓡꓳ= ꓠꓴ ꓪ ꓬꓲꓸ ꓔꓯ ꓠ ꓠꓹ” ꓐꓯ ꓢꓲ ꓠꓬꓲ ꓞꓳ ꓤ ꓟꓲꓽ ꓙꓬ ꓗꓪ ꓤ ꓔꓲꓸ ꓪꓴ-ꓢ ꓔꓯ ꓢꓷꓸ ꓙ ꓟꓳ ꓙˍ ꓡꓳ= ꓕꓱ ꓟˍ ꓡꓰ ꓐꓰ ꓤ ꓔꓲꓸ ꓪꓴ-ꓢ ꓬꓰ-ꓢꓴ ꓠꓬ꓾ ꓬꓲ ꓟꓲ ꓠꓯ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓕꓯ ꓐꓹ ꓐ ꓠꓲꓹ ꓡꓶꓽ ꓛꓳ ꓢꓲ꓾ ꓐꓹ ꓐ ꓠꓬ ꓮ ꓡꓲ ꓫꓵꓽ ꓐꓹ ꓐ ꓥ ꓡ꓾ ꓐꓹ ꓐ ꓟꓬꓱꓺ ꓔꓯ ꓬꓲ ꓛꓵ ꓔꓴꓸˍ ꓡꓳ= ꓬꓲꓸ ꓬꓰˍ ꓟ ꓮ ꓙꓵꓽ ꓬꓲꓸ ꓫꓸ ꓕꓱˍ ꓟ ꓮ ꓙꓵꓽ ꓬꓲ ꓟꓸ ꓖꓶˍ ꓟ ꓮ ꓙꓵꓽ ꓠꓬ ꓐꓹ ꓐ ꓪꓴ-ꓢ ꓟꓬꓱꓺ ꓓꓳꓽ ꓓꓳ ꓠꓹ ꓟ ꓐꓱ ꓶ ꓥ ꓡꓳ=

ꓕꓱ ꓟˍ ꓡꓰ ꓐꓰ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓬꓯꓼ ꓡ ꓕꓯ ꓥˍ ꓟꓲ꓾ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓬꓲ ꓝꓲ ꓓꓴ ꓐꓴ ꓕꓯꓽ ꓢꓲ ꓗꓪ ꓬꓯꓼ ꓙꓰˍ ꓕꓯ ꓬꓲ ꓝꓲ ꓓꓴ ꓐꓴ ꓠꓬ ꓢꓯꓼ ꓙꓳ ꓪꓽ ꓠꓬꓲˍ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓚꓱꓹ ꓔꓯ ꓚꓺˍ ꓡꓳ= ꓕꓲ ꓚꓱꓹ ꓐꓯˍ ꓠꓬ ꓢꓲꓽ-ꓫꓬ-ꓟ-ꓦ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓚꓵ ꓚꓵ ꓪꓴ-ꓢ-ꓮ-ꓐꓲ ꓥꓳ ꓐꓯ ꓟ ꓢꓲꓽ-ꓫꓬ-ꓟ-ꓦ ꓠꓬ ꓐꓯ ꓟꓸ ꓖꓶˍ ꓡꓳ= ꓢꓲ ꓒ ꓬꓰ-ꓢꓴ ꓥˍ ꓟꓲ ꓢꓲꓽ-ꓫꓬ-ꓟ-ꓦ ꓠꓬ ꓮ ꓡꓲ ꓡꓴ ꓫꓵꓽ ꓥ ꓟ ꓔꓯ ꓬꓲ ꓡꓰ ꓐꓯ ꓟꓸ ꓖꓶˍ ꓡꓳ= ꓐꓯ ꓑꓶ ꓖꓶˍ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓓꓵꓽ ꓙ ꓟꓶ ꓓꓴ ꓥ ꓡꓳ=

ꓐꓹ ꓐ ꓪꓴ-ꓢ ꓠꓬ ꓬꓲ ꓚꓲꓸ ꓛꓬ ꓐꓱ ꓶ ꓬꓲ ꓢꓷꓸ ꓙ ꓟꓳ ꓙˍ ꓟ ꓟꓽ ꓬꓰ= ꓤ ꓔꓲꓸ ꓪꓴ-ꓢ ꓥ ꓟꓲ ꓬꓲ ꓚꓲꓸ ꓛꓬ ꓐꓱ ꓶ ꓬꓲ ꓢꓷꓸ ꓙ ꓟꓳ ꓙˍ ꓟ ꓟꓽ ꓬꓰ ꓬꓰ ꓐꓰ꓾ ꓐꓹ ꓐ ꓪꓴ-ꓢ ꓐꓱ ꓶ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓐꓱ ꓶ ꓬꓲ ꓢꓷꓸ ꓙ ꓟꓳ ꓙˍ ꓡꓳ= ꓕꓱ ꓟˍ ꓡꓰ ꓐꓰ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓥˍ ꓟꓲ ꓬꓲ ꓚꓲꓸ ꓛꓬ ꓐꓱ ꓶ ꓬꓲ ꓢꓷꓸ ꓙ ꓟꓳ ꓙˍ ꓟ ꓟꓽ ꓬꓰ= ꓢꓲ ꓒ ꓬꓰ-ꓢꓴ ꓐꓱ ꓶ ꓬꓲ ꓢꓷꓸ ꓙ ꓟꓳ ꓙˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓓꓵꓽ ꓙ ꓓꓴ ꓠꓬ꓾ ꓐꓹ ꓐ ꓪꓴ-ꓢ꓾ ꓤ ꓔꓲꓸ ꓪꓴ-ꓢ ꓾ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓠꓬ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓦꓰꓼ ꓞꓹ ꓡꓯ ꓘꓳ ꓢꓲ ꓠꓬꓲ ꓕꓲ ꓣꓳ ꓐꓱ ꓶ ꓕꓲ ꓣꓳ ꓦꓰꓼ ꓞꓹ ꓔꓬ ꓡꓳ꓾ ꓐꓯ ꓟ ꓔꓯ ꓣꓳ ꓡꓳꓸ ꓟꓳˍ ꓡꓳ= ꓕꓲ ꓣꓳ ꓐꓱ ꓶ ꓕꓲ ꓣꓳ ꓢꓯꓸ ꓔꓬ ꓡꓳ= ꓬꓲ ꓪ ꓢꓯꓸ ꓔꓬ ꓟ ꓠꓬ ꓕꓲ ꓣꓳ ꓐꓱ ꓶ ꓕꓲ ꓣꓳ ꓥ ꓡꓳ꓾ ꓐꓯ ꓟ ꓔꓯ ꓣꓳꓽ ꓡꓳꓸ ꓟꓳˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓔꓣꓲꓮꓡ ꓢꓑꓲꓣꓲꓔꓴꓮꓡꓲꓔꓬ ꓐꓯ ꓟ꓾ ꓔꓣꓲꓠꓲꓔꓬ ꓢꓑꓲꓣꓲꓔꓴꓮꓡꓲꓔꓬ ꓐꓯ ꓟ ꓢꓽ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓦ ꓚꓱꓹ ꓔꓯ ꓣꓳꓽ ꓡꓳꓸ ꓠꓬꓲˍ ꓕꓯ꓾ ꓣꓳ ꓠꓬ ꓟꓲ ꓠꓯ ꓞꓳ ꓥˍ ꓟꓲ ꓕꓲ ꓣꓳ ꓐꓱ ꓶ ꓕꓲ ꓣꓳ ꓦꓰꓼ ꓞꓹ ꓠꓯꓹ ꓡꓳ ꓐꓯ ꓟ ꓬꓲꓸ ꓪꓴꓸ ꓕꓲ ꓟ ꓣꓳ ꓡꓳꓸ ꓟꓳˍ ꓡꓳ= ꓮ ꓡꓲꓳ ꓐꓯ ꓠꓬ ꓣꓳꓽ ꓠꓬ꓾ ꓕꓲ ꓣꓳ ꓔꓵꓸꓼ ꓔꓬ ꓚꓳꓽ ꓟꓽ ꓥ= ꓕꓲ ꓣꓳ ꓔꓵꓸꓼ ꓢꓯꓸ ꓔꓬ ꓐ ꓡˍ ꓟ ꓞꓳ ꓤ ꓟꓽ ꓥ= ꓣꓳ ꓒꓬꓱꓽ ꓟꓳꓻ ꓡˍ ꓕꓯ ꓡꓰ ꓣꓳꓽ ꓠꓬ ꓮꓽ ꓐ ꓮ ꓟ ꓫꓱꓸ ꓤ ꓠꓲꓹ ꓗꓪ ꓐꓰ꓾ ꓮꓽ ꓐ ꓮ ꓟ ꓡꓰ ꓠꓬꓲ ꓡꓳꓸ ꓗꓪꓼ ꓫꓵꓼˍ ꓟ ꓗꓪ ꓐꓰ ꓣꓳ ꓢꓯꓸ ꓡˍ ꓡꓳ=

ꓣꓳꓽ ꓠꓬ ꓣꓳꓽ ꓚꓲꓸ ꓛꓬ ꓣꓳ ꓢꓯꓸ ꓔꓬ ꓟꓽ ꓘꓴꓻ꓾ ꓮ ꓡꓲ ꓥˍ ꓟꓲ ꓠꓱꓸ ꓐꓯ ꓕꓲ ꓣꓳ ꓛꓹ ꓡꓳ= ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪˍ ꓟꓲ ꓕꓱ ꓡꓱ ꓥꓳ= ꓣꓳ ꓠꓬ ꓕꓲ ꓣꓳ ꓐꓱ ꓶ ꓕꓲ ꓣꓳ ꓦꓰꓼ ꓞꓹ ꓠ ꓗꓹ ꓡꓳ= ꓕꓲ ꓣꓳ ꓐꓱ ꓶ ꓕꓲ ꓣꓳ ꓚꓲꓸ ꓛꓬ ꓔꓯ ꓙꓳˍ ꓟ ꓢꓷꓸ ꓠꓲꓹ ꓔꓯ ꓡ ꓞꓳ ꓮ ꓟꓬꓹ ꓐꓱ ꓶ ꓢꓯꓸ ꓓꓹ ꓠꓹ ꓟ ꓠꓬ ꓟꓽ ꓓ ꓬꓳꓸ ꓚꓰꓽ ꓓꓰ ꓡꓰˍ ꓟ ꓥ ꓡꓳ=

ꓝꓮꓲ ꓕꓲ ꓫꓵꓽ ꓟ ꓠꓬ꓾ ꓐꓹ ꓐ ꓤ ꓔꓲꓸ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓙꓲꓻˍ ꓟ ꓐꓯ ꓡꓯ ꓘꓳꓹ ꓟ ꓡꓰ ꓐꓰ꓾ ꓣꓳ ꓥˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓙꓲꓻˍ ꓟ ꓐꓯ ꓡꓯ ꓘꓳ ꓠ ꓔ ꓡꓳ= ꓟꓬꓽ ꓠꓬꓲ ꓣꓳ ꓠꓬ꓾ ꓣꓳ ꓬꓰ ꓗꓷ ꓟ꓾ ꓣꓳ ꓢꓴ ꓔꓯ ꓬꓰ ꓙ ꓗꓷ ꓟ꓾ ꓣꓳ ꓮ ꓡꓲ ꓓꓻˍ ꓟ ꓔꓯ ꓘꓶ ꓘꓹ ꓠꓲꓹ ꓫꓵˍ ꓡꓳ= ꓣꓳ ꓠꓬ ꓮ ꓡꓲ ꓐꓰ ꓪꓽ ꓠꓬꓲˍ ꓡꓳ꓾ ꓣꓳ ꓠꓬ ꓮ ꓡꓲ ꓐꓰ ꓢꓴ ꓕꓯꓽ ꓢꓲ ꓗꓪ ꓓꓻˍ ꓡꓳ= ꓢꓴ ꓕꓯꓽ ꓢꓲ ꓗꓪ ꓢꓷꓸˍ ꓡꓳ꓾ ꓢꓴ ꓕꓯꓽ ꓢꓲ ꓐꓳˍ ꓡꓳ꓾ ꓢꓴ ꓕꓯꓽ ꓢꓲ ꓙꓳꓻ ꓙꓽˍ ꓡꓳ꓾ ꓐꓯ ꓟ ꓔꓯ ꓣꓳ ꓠꓬ ꓘꓶ ꓘꓹ ꓠꓲꓹ ꓫꓵˍ ꓡꓳ= ꓚꓲꓸ ꓛꓬ ꓐꓱ ꓶˍ ꓡꓰꓽ꓾ ꓚꓲꓸ ꓛꓬ ꓙꓲꓻˍ ꓟ ꓡꓰꓽ ꓫꓸ ꓕꓱ ꓠꓲꓹ ꓫꓵˍ ꓡꓳ= ꓠꓱꓸ ꓐꓯ ꓢꓴ ꓙꓲꓻˍ ꓟ ꓔꓯ ꓠꓬ ꓐꓯ ꓠꓲꓹ ꓟꓽ ꓫꓵ=

ꓣꓳꓽ ꓠꓬꓲꓸ ꓠꓬꓲ ꓢꓽ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓑꓮꓲꓽ ꓦꓬꓼ ꓠꓬꓲ ꓗꓪ ꓣꓳ ꓠꓲꓹ ꓟ ꓔꓯ ꓛꓵ ꓔꓴ ꓡꓯ= ꓣꓳꓽ ꓠꓲꓹ ꓟ ꓔꓯ ꓡꓶꓸ ꓗꓷ ꓡꓯ= ꓣꓳꓽ ꓒ ꓕꓲ ꓗꓪ ꓔꓬ ꓟ ꓣꓳꓽ ꓛꓳꓽ ꓒꓯꓹ ꓛꓳꓽ ꓤ ꓐꓴ ꓚꓱꓹ ꓙꓲꓻˍ ꓟ ꓔꓯ ꓣꓳ ꓫꓸ ꓕꓱ ꓐ ꓡˍ ꓡ꓾ ꓐꓯ ꓟ ꓣꓳꓽ ꓓꓵꓽ ꓙꓽ ꓠꓬꓲ ꓡꓯ= ꓝꓮꓲ ꓣꓳ ꓔꓯ ꓙꓳˍ ꓟ ꓢꓷꓸ ꓠꓲꓹ꓾ ꓣꓳ ꓔꓯ ꓙꓳˍ ꓟ ꓖꓴꓽ ꓙꓴꓽ ꓠꓬ ꓣꓳ ꓐꓱ ꓶˍ ꓡꓰꓽ ꓟꓽ ꓥ꓾ ꓠꓱꓸ ꓐꓯ ꓢꓴ ꓐꓱ ꓶˍ ꓟꓲ ꓥ ꓡꓳ꓾ ꓐꓯ ꓟ ꓔꓯ ꓣꓳ ꓢꓷꓸ ꓢꓲ ꓠꓬꓲ ꓞꓳ ꓙꓳ ꓙꓰ ꓡꓯ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓧꓳꓡꓬ ꓔꓣꓲꓠꓲꓔꓬ ꓑꓮꓲꓽ ꓗꓪ ꓣꓳꓽ ꓓꓵꓽ ꓙꓽ ꓓꓴ ꓠꓬ꓾ ꓣꓳꓽ ꓦ ꓡꓱ ꓔꓬ ꓟ ꓪꓴ-ꓢ ꓠꓬ ꓣꓳ ꓔꓯ ꓠꓲꓹ ꓠꓵˍ ꓡꓳ= ꓕꓱ ꓟˍ ꓡꓰ ꓐꓰ ꓣꓳ ꓥˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ꓾ ꓣꓳꓽ ꓔꓯ ꓙꓳˍ ꓟ ꓢꓷꓸ ꓠꓲꓹ ꓔꓯ꓾ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓔꓯ ꓠꓱꓸ ꓐꓯ ꓢꓴ ꓐꓱ ꓶ ꓦꓰꓼ ꓞꓹ ꓔꓬ ꓠꓹ ꓟ ꓐꓰ꓾ ꓠꓱꓸ ꓐꓯ ꓢꓴ ꓚꓱꓹ ꓔꓯ ꓙꓲꓻˍ ꓟ ꓐꓯ ꓠꓹ ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓙꓰ ꓡꓯ=