ꓢ-ꓘꓰ-ꓬꓴ ꓠꓲꓹ ꓟ ꓡꓶꓸˍ ꓟ

ꓬꓰ-ꓢꓴ ꓠꓬ ꓙꓱ-ꓡꓲ-ꓘꓳ ꓡꓳ ꓒꓱ ꓗꓪ ꓓꓵꓽ ꓡꓰ ꓢꓲ ꓗꓳꓸ ꓙꓰ ꓔꓬ ꓕꓯ꓾ ꓝꓲꓸ ꓫ ꓢꓴ ꓪꓴꓸ ꓓꓵ ꓣꓱꓽ ꓒ꓾ ꓢ-ꓘꓰ-ꓬꓴ ꓟꓬꓱ ꓔ ꓟ ꓞꓳ ꓐꓳ ꓕꓲ ꓣꓳ ꓖꓳ ꓗꓪ ꓔꓬ ꓡꓳ꓿ ꓬꓲ ꓠꓬ ꓬꓰ-ꓢꓴ ꓮꓽ ꓟ ꓥ ꓟ ꓡꓳꓸ ꓠꓬꓲ ꓠꓲꓹ ꓫꓵˍ ꓟꓲ꓾ ꓬꓲ ꓠꓽ ꓞꓳ ꓔꓰꓼ ꓡꓰꓼ ꓥ ꓢꓲ꓾ ꓞꓳ ꓜꓴꓻ ꓡꓰ ꓬꓲ ꓔꓯ ꓛꓸ ꓞꓹ ꓠꓬꓲ꓾ ꓬꓰ-ꓢꓴ ꓔꓯ ꓟꓽ ꓟꓳ꓿ ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓠꓹ ꓟ ꓬꓲ ꓠꓬ ꓟꓲꓽ ꓕꓯꓽ ꓢꓲ ꓔꓷꓹ ꓙꓰ ꓢꓲ꓾ ꓬꓰ-ꓢꓴ ꓗꓳꓸ ꓬꓯꓼ ꓠ ꓗꓹ ꓟ ꓚꓱꓹ ꓗꓪ ꓟ ꓐꓵꓽ ꓜꓻ ꓜꓲꓻ ꓕꓲ ꓜꓲ ꓗꓪ ꓓꓯ ꓙꓰˍ ꓡꓳ꓿ ꓬꓰ-ꓢꓴ ꓖꓳ ꓗꓪ ꓛꓲ ꓡ ꓠꓬ ꓖꓽ ꓑꓳꓸ ꓬꓲ ꓔꓯ ꓡꓳꓸ ꓢꓲ꓾ ꓢ-ꓘꓰ-ꓬꓴꓳ꓾ ꓮꓸ ꓟꓲꓸ ꓬꓯꓼ ꓡꓯ꓿ ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓥꓪ ꓠꓬ ꓠꓴ ꓦꓲ ꓗꓪ ꓔꓬ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓮꓸ ꓟꓲꓸ ꓟꓲꓸ ꓬꓯꓼ ꓡ ꓢꓲ꓾ ꓠꓲꓹ ꓒꓴ ꓒꓴˍ ꓐꓰ ꓬꓰ-ꓢꓴ ꓔꓯ ꓘꓳꓻ ꓣꓴˍ ꓡꓳ꓿  ꓬꓲ ꓪꓽ ꓮꓽ ꓙꓵ ꓖꓳ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓠꓽ ꓝꓴꓲ ꓙꓳ ꓢꓴ ꓦꓲ ꓗꓪ ꓪꓰ ꓤ ꓟꓴ ꓙꓰꓳ꓾ ꓐꓰ ꓱ'ꓽ ꓠꓱꓽˍ ꓡꓳ꓿  ꓢ-ꓘꓰ-ꓬꓴ ꓠꓬ ꓦꓰꓼ ꓞꓹ ꓢꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓥꓪ ꓙꓳˍ ꓟ ꓖꓴꓽ ꓙꓴꓽ ꓠꓬ ꓞꓳ ꓫꓸ ꓔꓯ ꓕꓲ ꓐꓶꓽ ꓐꓱꓻ ꓖꓶˍ ꓥꓳ꓿ ꓝꓮꓲ ꓠꓬ ꓥꓪ ꓮꓽ ꓟ ꓔꓯ ꓘꓳꓹ ꓜ ꓗꓷ ꓐꓷˍ ꓟꓲ ꓬꓲ ꓔꓯ ꓡꓲ ꓩꓴꓸ ꓡꓲꓸ ꓖꓶˍ ꓥꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓢꓯꓼ ꓟꓬ ꓝˍ ꓟ ꓣꓱꓽ ꓛꓰꓽ ꓠꓬ ꓠꓬꓲꓸ ꓠꓬꓲ ꓕꓱ ꓕꓲ ꓦꓲ ꓗꓪ ꓛꓲ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓬꓲˍ ꓟꓲ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓡꓳ꓿ ꓡ-ꓞꓳ-ꓮ-ꓐꓲ ꓠꓽ ꓒꓲꓼ ꓬꓰ ꓟ ꓡꓽ ꓞꓳ ꓔꓯ ꓧꓪ ꓢꓲ ꓚꓬꓴˍ ꓐꓰ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓝꓲꓸ ꓫ ꓢꓴ ꓐꓴ ꓪꓴꓸ ꓓꓵ ꓥ ꓟ ꓡꓰꓽ ꓟꓽ ꓞꓲ꓾ ꓒꓴꓻ ꓫꓵ ꓮ ꓟꓬꓹ ꓙꓳ ꓢꓴ꓾ ꓐꓳ ꓶꓼ ꓮ ꓟꓬꓹ ꓙꓳ ꓢꓴ ꓕꓲ ꓣꓳ ꓥ ꓟ ꓢ-ꓘꓰ-ꓬꓴ ꓟꓬꓱ ꓔ ꓟ ꓡ ꓞꓳ ꓕꓲ ꓣꓳ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓐꓱ ꓶ ꓚꓲꓸ ꓛꓬ ꓐꓳ ꓶꓼ ꓐꓰ ꓒꓴꓻ ꓫꓵ ꓐꓴ ꓔꓯ ꓑꓶꓸ ꓑꓶꓸ ꓡꓰꓽ ꓖꓶ ꓗꓷ ꓟ ꓟꓸ ꓟꓲꓽ ꓔꓯ ꓣꓳ ꓑ ꓙꓽ ꓗꓷ ꓟ ꓥ ꓡꓳ=

ꓢ-ꓘꓰ-ꓬꓴ ꓠꓬ ꓝꓲꓸ ꓫ ꓒ ꓕꓲ ꓣꓳ ꓥ ꓠꓬꓲ ꓠꓱꓸ ꓐꓯ ꓢꓴ ꓡꓰ ꓬꓲ ꓔꓯ ꓝꓴꓲꓸ ꓙꓳ ꓢꓴ ꓥ ꓡꓳ ꓐꓰ ꓢꓷꓸ ꓙ ꓟꓳ ꓙ ꓔ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓢ-ꓘꓰ-ꓬꓴ ꓬꓲ ꓦꓲꓻ ꓗꓪ ꓓꓵꓽ ꓙꓰˍ ꓡꓳ= ꓕꓱ ꓗꓪ ꓣꓳ ꓚꓲꓸ ꓔ ꓠꓯꓹ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓞꓳ ꓤ ꓐꓴ ꓡꓳꓸ ꓟꓳꓻˍ ꓟ ꓡꓰ ꓬꓲ ꓟꓽ ꓡꓳꓸ꓾ ꓞꓳ ꓤ ꓐꓴ ꓐꓯ ꓞꓷꓹ ꓟ ꓡꓰ ꓬꓲ ꓠꓬ ꓐꓯ ꓞꓷꓹ ꓟ ꓟꓽ ꓥ= ꓢꓲ ꓒ ꓬꓰ-ꓢꓴ ꓠꓽ ꓔꓱꓹ ꓔꓱꓹ ꓚꓵ ꓚꓵˍ ꓡꓰꓽ ꓐꓰ ꓐꓯ ꓟꓴ ꓘꓶꓽˍ ꓡꓳ꓾ ꓡꓳꓸ ꓠꓬꓲˍ ꓡꓳ ꓐꓯ ꓟ ꓔꓯ ꓣꓳ ꓢꓷꓸ ꓔ ꓠ ꓗꓹ ꓡꓳ=

ꓪꓴ-ꓢ ꓔꓯ ꓘꓳ ꓣꓴ ꓢꓲ ꓙꓵꓻ ꓢꓴ ꓠꓬ ꓚꓲꓸ ꓛꓬ ꓝꓴꓲꓸ ꓐꓱ ꓶ ꓠꓲꓹ ꓥꓴꓻ ꓢꓲ ꓓꓵꓽ ꓙꓽ ꓡꓰꓼ ꓡ ꓕ ꓑꓳꓸꓼ ꓢꓲ ꓒ ꓠꓬ ꓣꓳ ꓝꓴꓲꓸ ꓔꓯ ꓮ ꓕꓯ ꓟꓲ ꓖꓼ ꓖꓶ ꓔꓬ ꓡꓳ= ꓢ-ꓘꓰ-ꓬꓴ ꓡꓰ ꓐꓰ ꓓꓵꓽ ꓙ ꓒꓳꓹ ꓬꓲꓼ ꓡ ꓕꓯ ꓠꓽ ꓣꓳ ꓠꓬ ꓝꓴꓲꓸ ꓖꓼ ꓖꓶˍ ꓟ ꓟꓶˍ ꓥꓳ=

ꓢꓲ ꓒ ꓬꓰ-ꓢꓴ ꓠꓬ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸꓼ ꓔꓯ ꓠꓲꓹ ꓠꓵ ꓢꓲ ꓬꓲ ꓠꓵꓻ ꓠꓲꓹ ꓖꓳ ꓟ ꓗꓪ ꓐꓰ ꓝꓴꓲꓸ ꓙꓳ ꓢꓴ ꓠꓲꓹ ꓟ ꓔꓯ ꓒꓳꓹ ꓡꓶꓸ ꓡꓰ ꓝꓲ ꓢꓲ ꓠꓬꓲ꓾ ꓬꓲ ꓪ ꓓꓵꓽ ꓙ ꓚꓱꓹ ꓐꓰ ꓬꓲ ꓪ ꓬꓲ ꓫꓱꓹ ꓐꓴ ꓔꓯ ꓥˍ ꓟꓲ ꓙꓲꓻˍ ꓟ ꓚꓱꓹ ꓠꓯꓸꓼ ꓗꓪ ꓒꓳꓹ ꓬꓲꓼ ꓡ ꓝꓲꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ=