ꓢ ꓣꓳ ꓕꓲꓽ ꓗꓳ ꓓꓱꓽ ꓪꓴ-ꓢ (ꓧꓳꓟꓲꓡꓬ)

ꓢ ꓣꓳ ꓕꓲꓽ ꓗꓳ ꓓꓱꓽ ꓪꓴ-ꓢ ꓑꓮꓲꓽ ꓦꓬꓼ ꓠꓬꓲ

ꓙꓵꓽ ꓗ ꓐꓯ ꓟꓸ ꓕꓳꓽ ꓶ 4: 32-24, 39-40

ꓠꓴ ꓪ ꓧꓶꓸ ꓕꓯ ꓟ ꓤꓶꓻ ꓗꓪ꓾ ꓪꓴ-ꓢ ꓡꓰ ꓟꓲ ꓠꓯ ꓗꓪ ꓟ ꓞꓳ ꓤ ꓔꓯ ꓚꓰꓼ ꓗꓷ ꓟ ꓕ ꓑꓳ ꓦꓬꓼ ꓠꓬꓲ ꓮ ꓙꓵ ꓟ ꓗꓪ ꓧꓪꓺ ꓠ ꓠꓬꓲ꓾ ꓟꓴ ꓗꓪ ꓖꓳ ꓕꓲ ꓑꓶꓸ ꓗꓪ ꓐꓰ ꓕꓱ ꓕꓲ ꓑꓶ ꓗꓪ ꓛꓲ ꓓꓰꓽ ꓠ ꓠꓬꓲ꓾ ꓫꓵ ꓪꓴ ꓓꓽ ꓟ ꓕꓱ ꓟ_ ꓡꓰ ꓐꓰ ꓮ ꓡꓲ ꓗꓪ ꓙꓳ ꓠꓬꓲ_ ꓡꓳꓺꓽ꓾ ꓕꓱ ꓟ_ ꓡꓰ ꓐꓰ ꓮ ꓡꓲ ꓗꓪ ꓑ ꓙ ꓠꓬꓲ_ ꓡꓳꓺꓽ꓿ ꓠꓴ ꓪ_ ꓡꓰ ꓐꓰ ꓮ ꓔꓳꓸ ꓗꓳ ꓡꓳ ꓗꓪ ꓐꓰ ꓪꓴ-ꓢ ꓢꓯꓼ ꓫ ꓕꓱ ꓓꓳ ꓡ_ ꓟ ꓔꓯ ꓑ ꓙ ꓗꓷ ꓢꓲ ꓢꓯꓸ ꓔꓬ ꓢꓰꓽ ꓟ_ ꓡꓰ ꓐꓰ꓾ ꓠꓱ ꓐꓯꓼ ꓑ ꓫꓬ ꓮ ꓡꓲ ꓕꓲ ꓫꓵ ꓠꓬ ꓕꓱ ꓡꓱ ꓑ ꓙ ꓠꓬꓲ_ ꓡꓺꓽ꓿ ꓠꓴ ꓪ ꓒꓬꓱꓽ ꓕꓯ ꓗꓪ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓡꓰ ꓠꓴ ꓪ ꓐꓱ ꓶ ꓬꓲ-ꓙꓲ ꓟꓵ ꓠꓯꓸꓼ ꓗꓪ ꓬꓰ ꓗꓷ ꓟ_ ꓡꓰ ꓐꓰ꓾ ꓤꓹ ꓠꓬꓲ_ ꓟ ꓗꓪ ꓐꓰ꓾ ꓢꓷ ꓡꓰ ꓓꓴ ꓗꓪ ꓐꓰ꓾ ꓓꓵ ꓙ ꓟꓶ ꓓꓴ ꓗꓪ ꓐꓰ꓾ ꓓꓶꓽ ꓡꓯ ꓘꓳ_ ꓟ ꓗꓪ ꓐꓰ꓾ ꓪꓽ ꓠꓬꓲ_ ꓟ ꓡꓯ ꓒꓯ ꓗꓪ ꓐꓰ꓾ ꓛꓱꓺ ꓓꓳ ꓡ_ ꓟ ꓡꓯꓼ ꓪꓵ ꓗꓪ ꓐꓰ꓾ ꓙꓳꓺ ꓛꓱꓽ ꓓꓴ ꓓꓽ ꓟ ꓡꓰ ꓠꓱ ꓐꓯ ꓞꓳ ꓫꓵꓽ ꓗꓳ ꓡꓳ ꓗꓪ ꓐꓰ ꓞꓳ ꓫꓵꓽ ꓕꓲ ꓫꓵ ꓧꓳꓽ ꓓꓳ ꓡ_ ꓟ ꓢꓲꓺ ꓮ ꓡꓲ ꓗꓪ ꓬꓰ ꓠꓬꓲ_ ꓡꓺꓽ꓿ ꓖꓳ ꓡꓱ ꓠꓬꓲ ꓬꓰ-ꓧꓳ-ꓧꓪ ꓠꓬ ꓟꓴ ꓗꓪ ꓕꓯ ꓢꓲ ꓗꓪ ꓟ_ ꓐꓰ꓾ ꓟꓲ ꓠꓯ ꓕꓯ ꓢꓲ ꓗꓪ ꓟ ꓪꓴ-ꓢ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓠꓴ ꓪ ꓢꓷꓸ ꓔ ꓢꓲ꓾ ꓠꓴ ꓪ ꓠꓲꓹ ꓟ ꓗꓪ_ ꓟꓲ ꓧꓪꓸ ꓛꓲ ꓔ꓿ ꓬꓲ ꓟꓽ ꓥ ꓠꓬ ꓠꓱ ꓐꓯ ꓪꓴ-ꓢ ꓟꓽ ꓙꓳ꓿ ꓖꓳ ꓡꓱ ꓢꓲ ꓠꓴ ꓪ_ ꓐꓰ ꓠꓴ ꓪ ꓗ ꓠꓯ ꓢꓲ ꓗꓪ ꓟ ꓞꓲ ꓤ ꓡꓯ ꓤ ꓐꓴ ꓠꓬ ꓶꓼ ꓛꓳ ꓫꓱꓹ ꓛꓳ ꓠꓹ ꓟ_ ꓐꓰ꓾ ꓕꓲ ꓞꓲ ꓕꓲ ꓑ ꓗꓪ ꓛꓲ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓡꓰ ꓠꓴ ꓪ ꓔꓯ ꓖꓶ ꓡ_ ꓟ ꓟꓵ ꓠꓯꓸꓼ ꓗꓪ ꓠꓴ ꓪ ꓤꓶꓻ ꓙꓳ ꓟꓯ ꓙꓳ ꓠꓹ ꓟ꓾ ꓠꓬꓲꓸ ꓠꓬꓲ ꓥꓪ ꓡꓰ ꓠꓴ ꓪ ꓔꓯ ꓖꓶ ꓔ_ ꓟ ꓬꓲ ꓙꓵꓽ ꓚꓱꓹ_ ꓐꓰ ꓬꓲ ꓕꓵꓼ ꓪ ꓔꓯ ꓠꓴ ꓪ ꓒꓵꓽ ꓛꓳ ꓠ ꓗ_ ꓡꓳ꓾ ꓐꓯ_ ꓡꓳ꓿

ꓣꓳ-ꓟ 8ꓽ 14- 17

ꓮ ꓡꓲꓳ ꓐꓯ ꓠꓬ ꓪꓴ-ꓢ ꓦ ꓡꓰ ꓧꓳꓽ ꓙꓰ ꓔꓬ ꓢꓴ ꓥ ꓕ ꓑꓳꓸ ꓠꓬ ꓪꓴ-ꓢ ꓤ ꓐꓴ ꓥ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓟꓶˍ ꓟ ꓦ ꓠꓬ꓾ ꓠꓴ ꓪꓽ ꓔꓯ ꓝꓮꓲ ꓕꓲ ꓧꓪ ꓙꓳꓺˍ ꓟ ꓚꓳ ꓑꓸ ꓬꓰ ꓝꓲ ꓢꓴ ꓟꓽ ꓥ꓿ ꓠꓴ ꓪꓽ ꓔꓯ ꓠꓽ ꓪꓴ-ꓢ ꓤꓽ ꓒꓬꓱꓼ ꓡ ꓝꓲ ꓢꓲ꓾ ꓬꓲ ꓔꓯ ꓮꓽ ꓐꓽ꓾ ꓐꓹ ꓐ꓾ ꓐꓰ ꓘꓴ ꓐ ꓡ ꓝꓲˍ ꓟ ꓦꓻ ꓥ ꓡꓳ꓿ 16 ꓣꓳ ꓠꓬ ꓪꓴ-ꓢ ꓤ ꓠꓱ ꓥꓳ꓾ ꓐꓰ ꓢꓲ-ꓫꓬ-ꓟ-ꓦ ꓠꓬ ꓣꓳ ꓦˍ ꓐꓰ ꓕꓲ ꓛꓳꓺꓼ ꓢꓷ ꓙ ꓟꓳ ꓙˍ ꓡꓳ꓿ 17 ꓣꓳ ꓠꓬ ꓬꓲ ꓤ ꓠꓱ ꓥ ꓕꓯ ꓠꓽ ꓡꓯꓼ ꓪ ꓟꓶ ꓢꓴˍ ꓟꓲ ꓥꓳ꓿ ꓬꓲꓸˍ ꓐꓰ ꓕꓲ ꓪꓺꓼ ꓣꓳ ꓟꓬꓱ ꓓꓳꓽ ꓟꓶ ꓠꓹ ꓟ꓾ ꓣꓳ ꓬꓲ ꓫꓸ ꓙꓵˍ ꓟ ꓔꓯ ꓑꓯꓹ ꓟꓶ ꓗꓷ ꓕꓯ ꓠꓽ ꓪꓴ-ꓢ ꓡꓯꓼ ꓪ ꓟꓶ ꓢꓴ ꓥ ꓢꓲ꓾ ꓙꓲ-ꓢꓴˍ ꓐꓰ ꓡꓯꓼ ꓪ ꓑꓯꓹ ꓟꓶ ꓢꓴ ꓐꓴ ꓥꓳ꓿ 

ꓟ-ꓕꓲ 28ꓽ 16-20

 ꓖꓳ ꓗꓸ ꓠꓯ ꓛꓳꓽ ꓒꓯꓹ ꓞꓲ ꓕꓲ ꓣꓳ ꓟ ꓠꓽ ꓖ-ꓡꓲ-ꓡꓲ ꓗꓪ ꓓꓵꓽ ꓡꓰ ꓢꓲ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓐꓯ ꓖꓶ ꓔ ꓟ ꓪꓽ ꓚꓲ ꓗꓪ ꓙꓰˍ ꓡꓳ꓿ 17 ꓬꓲ ꓪꓽ ꓬꓲ ꓔꓯ ꓟꓳꓻ ꓗꓷ ꓠꓬ ꓪꓴꓸ ꓓꓵ ꓕꓱꓼˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓲ ꓐꓱ ꓠꓽ ꓓꓵꓽ ꓙꓽ ꓟꓬꓽˍ ꓡꓳ꓿ 18 ꓖꓳ ꓡꓱ ꓠꓬ ꓬꓰ-ꓢꓴ ꓬꓲ ꓪꓽ ꓔꓯ ꓡ ꓢꓲ꓾ ꓟꓴꓽ ꓗꓪ ꓟꓲ ꓠꓯ ꓗꓪ ꓟ ꓙꓵꓽ ꓪꓽ ꓮꓽ ꓙꓵ ꓥꓪ ꓔꓯ ꓖꓶ ꓔ ꓡꓳ꓿ 19 ꓖꓳ ꓡꓱ ꓠꓬꓲ ꓠꓴ ꓪꓽ ꓙꓰ ꓢꓲ꓾ ꓞꓳ ꓫꓵꓽ ꓥ ꓕ ꓑꓳꓸ ꓔꓯ ꓢꓲ ꓤꓽ ꓬꓰ ꓝꓲ ꓢꓲ ꓠꓬꓲ꓾ ꓐꓹ ꓐ꓾ ꓮ ꓐꓲ꓾ ꓢꓲ-ꓫꓬ-ꓟ-ꓦ ꓟꓬꓱꓺ ꓗꓪ ꓐꓰ ꓬꓲ ꓪꓽ ꓔꓯ ꓖꓳ ꓓꓱ ꓔꓲꓹ ꓖꓶ꓿ 20 ꓖꓳ ꓡꓱ ꓢꓲ ꓠꓴ ꓪꓽ ꓔꓯ ꓥꓪ ꓕꓵꓼ ꓪꓽ ꓖꓶꓽ ꓗꓷ ꓟ ꓮꓽ ꓙꓵ ꓬꓲ ꓪꓽ ꓛꓳꓻ ꓠꓹ ꓟ ꓟꓸ ꓖꓶ꓿ ꓠ ꓠꓹ꓾ ꓟꓲ ꓠꓯ ꓕꓱ ꓕꓲ ꓡꓶꓸ ꓡꓳꓹ ꓬꓰ ꓗꓪ ꓛꓲ ꓥꓪ ꓠꓬ ꓮ ꓕꓯꓽˍ ꓟꓲ ꓠꓴ ꓪꓽ ꓐꓰ ꓔꓬ ꓥꓳ꓾ ꓐꓯˍ ꓡꓳ꓿