ꓣꓳꓽ ꓢꓲ ꓒ ꓬꓰ-ꓢꓴ ꓗ ꓠꓯ ꓢꓲ ꓖꓼ ꓢꓴ ꓠꓬ꓾ ꓚꓲꓸ ꓛꓬ ꓖꓴꓽ ꓙꓴꓽ ꓔꓯ ꓟꓽ ꓦ ꓡꓱ ꓡꓱ ꓐꓰ ꓪꓴ-ꓢ ꓔꓯ ꓡꓰ ꓦ ꓡꓱ ꓠꓹ ꓟ ꓥ ꓡꓳ

ꓕꓱ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓠꓬ 11 ꓠ ꓟ ꓠꓽ ꓦꓬꓼ ꓠꓬꓲ ꓥˍ ꓡꓳ= ꓕꓱ ꓕꓲꓽ ꓠ ꓗꓪ ꓣꓳꓽ ꓵ ꓪ  ꓟ ꓢꓲ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲꓸ ꓝꓲ ꓓꓴ ꓐꓴ ꓔꓯ ꓟꓸ ꓟꓲ ꓚꓺ ꓙꓰ ꓠ ꓟ ꓝꓲ ꓩꓴ ꓗꓷˍ ꓡꓳ=

ꓬꓲꓸ ꓡꓰ ꓕꓱ ꓡꓱ ꓝꓲ ꓩꓴˍ ꓕꓯ ꓜꓽ ꓓꓴ ꓓꓳ ꓓꓴ ꓐꓱ ꓶ ꓓꓵꓽ ꓙ ꓫꓸ ꓟꓽ ꓛꓵ ꓟ꓾ ꓝꓮꓲ꓾ ꓙ ꓚꓱ ꓐꓱ ꓶ ꓮ ꓫꓵˍ ꓟꓲ ꓕ ꓔꓯ ꓙꓰ ꓠ ꓟ ꓡꓯ ꓘꓪ ꓫꓵꓽ ꓥˍ ꓡꓳ=

ꓣꓳꓽ ꓢꓲ ꓒ ꓬꓰ-ꓢꓴ ꓗ ꓠꓯ ꓢꓲ ꓖꓼ ꓢꓴ ꓠꓬ꓾ ꓚꓲꓸ ꓛꓬ ꓖꓴꓽ ꓙꓴꓽ ꓔꓯ ꓟꓽ ꓦ ꓡꓱ ꓡꓱ ꓐꓰ ꓪꓴ-ꓢ ꓔꓯ ꓡꓰ ꓦ ꓡꓱ ꓠꓹ ꓟ ꓥ ꓡꓳ= ꓕꓲꓽ ꓐꓱ ꓙꓳ ꓟ ꓠꓬ ꓚꓲꓸ ꓛꓬ ꓡꓯ ꓒꓯ ꓗꓪ ꓒꓴ ꓫꓵꓺ ꓙꓳˍ ꓕꓯ ꓠ ꓪꓴ-ꓢ ꓔꓯ ꓟꓲ ꓡꓰ ꓗꓴꓸ ꓡꓳ= ꓜꓽ ꓓꓴ ꓓꓳ ꓓꓴ ꓛꓲꓸ ꓟꓽ ꓛꓵ ꓟ ꓑꓶꓸ ꓓꓴ ꓪꓴ-ꓢ ꓔꓯ ꓮ ꓘꓶꓸ ꓟꓽ ꓦ ꓡꓱ ꓳ=

ꓠꓬꓲ ꓠꓬꓲ ꓢꓲ ꓒ ꓠꓲꓹ ꓡꓬ ꓠꓬ ꓣꓳꓽ ꓔꓯ ꓫꓬꓽ ꓫꓬꓽ ꓡꓰ ꓟꓳꓸ ꓖꓶꓽ ꓡ-ꓳ= ꓬꓲꓸ ꓠꓬ ꓣꓳꓽ ꓢꓯꓼ ꓪ ꓔꓯ ꓟꓽ ꓦ ꓡꓱ ꓠꓹ ꓟ꓾ ꓣꓳꓽ ꓒꓴ ꓫꓵꓺ  ꓔꓯ ꓕ ꓦ ꓡꓱ ꓠꓹ ꓟ꓾ ꓢꓲ ꓒ ꓢꓲꓺ ꓤ ꓕꓲ ꓣꓳ ꓬꓲꓸ ꓠꓲꓹ ꓟ ꓗꓪ ꓠꓬ ꓮ ꓕꓯˍ ꓟꓲ ꓢꓲ ꓒ ꓔꓯ ꓡꓰ ꓠꓲꓹ ꓥꓳ ꓠꓹ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳꓽ ꓔꓯ ꓟꓳꓸ ꓖꓶꓽ ꓡ ꓔꓬˍ ꓡꓳ=

ꓖꓳ ꓡꓱ ꓠꓬꓲ ꓣꓳꓽ ꓓꓵꓽ ꓙ ꓓꓴ ꓠꓬ꓾ ꓣꓳꓽ ꓠꓬ ꓪꓴ-ꓢ ꓔꓯ ꓚꓵꓹ ꓚꓵꓹ ꓦ ꓡꓱ ꓐꓳ ꓔꓬ ꓡ? ꓟꓽ ꓥ ꓠꓬ ꓪꓴ-ꓢ ꓔꓯ ꓠꓽ ꓑꓼ ꓠꓬꓲꓽ ꓗꓪ ꓞ ꓗꓷ ꓔ ꓡ? ꓒꓴ ꓫꓵ ꓠꓬ ꓬꓲꓸ ꓪꓴꓸ ꓥ ꓡ= ꓢꓲ ꓒ ꓠꓬ ꓬꓲꓸ ꓪꓴꓸ ꓥ ꓡ ꓐꓯ ꓟ ꓣꓳꓽ ꓓꓵꓽ ꓙ ꓠꓬꓲ ꓡꓯ=