ꓣꓳ ꓓꓵꓽ ꓙꓽ ꓔ ꓟ ꓡꓰ ꓐꓰ ꓟꓽ ꓒꓬꓱꓼ ꓡ ꓟ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓪ ꓜꓲ ꓙꓲˍ ꓟ ꓗꓪ ꓬꓲ ꓡꓰ ꓟꓳꓸ ꓖꓶ ꓠꓹ ꓟ ꓥ ꓡꓳ꓾

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓿

ꓣꓳ ꓟꓲ ꓠꓯ ꓞꓳ ꓤ ꓤꓶꓻ ꓗꓪ ꓞꓲꓼ ꓣꓳˍ ꓕꓯ ꓓꓵꓽ ꓙ ꓔ ꓟˍ ꓡꓰ ꓐꓰ꓾ ꓞꓲꓼ ꓪꓴꓽ ꓡ ꓕꓯ ꓟꓽ ꓒꓬꓱꓼ ꓡ ꓟ ꓮ ꓟꓬ, ꓙꓳˍ ꓡꓳ꓿ ꓣꓳ ꓡꓰ ꓥꓪ ꓪꓴꓽ ꓡ ꓕꓯ ꓕꓱ ꓡꓱ ꓫꓵꓽ ꓬꓰˍ ꓥꓳ꓾ ꓐꓰ ꓓꓵꓽ ꓙ ꓔ ꓥˍ ꓟꓲ ꓚꓵ ꓚꓵ ꓒꓬꓱꓼ ꓡ ꓟ ꓠꓬ ꓝꓮꓲ ꓕꓲ ꓙꓰꓽ꓾ ꓕꓱ ꓡꓱ ꓔꓳ, ꓜꓳꓽˍ ꓡꓳ꓿ ꓣꓳ ꓟꓽ ꓥꓳ ꓡꓳ. ꓔ ꓟ ꓔꓬ ꓖꓴ꓾ ꓣꓳ ꓟꓽ ꓓꓵꓽ ꓙ ꓔ ꓟ ꓤꓶꓻ ꓔꓯ ꓟꓶ ꓡꓰ ꓗꓴ.ˍ ꓡꓳ꓿ ꓣꓳ ꓧꓶ. ꓕꓯ ꓕꓲ ꓧꓪ,ˍ ꓟꓲ ꓟꓽ ꓥꓳ ꓡꓳ. ꓔ ꓟ ꓫꓵꓽ ꓪꓴˍ ꓟꓲ ꓓꓳ ꓡ ꓗꓴ.ˍ ꓡꓳ꓿ ꓕꓱ ꓟˍ ꓡꓰ ꓐꓰ ꓣꓳ ꓟꓽ ꓓꓵꓽ ꓙ ꓠꓬꓲ ꓗꓳ. ꓟ ꓔꓬ ꓖꓴ ꓗꓪˍ ꓟꓲ ꓛꓲ ꓬꓰ ꓗꓴ.ˍ ꓡꓳ꓿ ꓕꓱ ꓟ ꓔꓯ ꓠꓬ ꓞꓲꓼ ꓣꓳˍ ꓕꓯ ꓟꓽ ꓓꓵꓽ ꓙ ꓔ꓿

ꓖꓳ ꓡꓱ ꓐꓯ ꓥ ꓟꓲ ꓮ ꓟꓶ ꓣꓳ ꓔꓬ ꓟ꓾ ꓣꓳ ꓐꓰ ꓔꓬ ꓟ ꓛꓳꓽ ꓒꓯ, ꓛꓳꓽ ꓤ ꓮ ꓙꓵꓽ ꓠꓬ ꓣꓳ ꓞꓲꓼ ꓣꓳˍ ꓕꓯ ꓓꓵꓽ ꓙ ꓔ ꓟ ꓡꓰ ꓐꓰ ꓟꓽ ꓥ꓾ ꓕꓱ ꓡꓱ ꓫꓵꓽ ꓒꓬꓱꓼ ꓡˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓡꓰ ꓣꓳ ꓔꓯ ꓙ ꓖꓴ ꓟꓳ. ꓖꓶ ꓡˍ ꓟ ꓥ ꓡꓳ꓿ ꓣꓳ ꓓꓵꓽ ꓙ ꓔ ꓟ ꓕꓲ ꓫꓵꓽ꓾ ꓪꓴ‐ꓢ ꓡꓰ ꓣꓳ ꓔꓯ ꓖꓶꓽ ꓡˍ ꓟ ꓕꓲ ꓫꓵꓽ ꓕꓱ ꓡꓱ ꓗꓷ ꓡꓰˍ ꓡꓳ꓿ ꓖꓳ ꓡꓱ ꓥ ꓟꓲ  ꓟꓽ ꓓ ꓬꓳ. ꓚꓵˍ ꓟ ꓠꓬ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓙ ꓟꓳˍ ꓟ ꓙ ꓖꓴ ꓔꓯ ꓬꓲ ꓔꓯ ꓠꓲ, ꓠꓵˍ ꓟˍ ꓡꓰ ꓐꓰ ꓬꓲ ꓔꓯ ꓙꓵꓻ ꓢꓲ ꓞꓳ ꓙꓳ ꓠ, ꓟ ꓬꓳ. ꓚꓵˍ ꓡꓳ꓿

ꓠꓬꓲ. ꓠꓬꓲ ꓗꓪ ꓠꓬ ꓒꓲ‐ꓕꓱ ꓐꓰ ꓒꓳ‐ꓡꓳ ꓑꓮꓲꓽ ꓔꓯ ꓣꓳ ꓬꓰ ꓔꓬ ꓡꓳ꓿ ꓒꓲ‐ꓕꓱ ꓐꓰ ꓒꓳ‐ꓡꓳ ꓠꓬ ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓬꓳ. ꓚꓵ ꓓꓰ ꓡꓰ ꓢꓴ ꓐꓴ ꓥ ꓡꓳ꓿ ꓒꓲ‐ꓕꓱ ꓠꓬ ꓘꓴ ꓜꓲꓼ ꓞꓳ ꓬꓲ ꓪꓴ. ꓓꓵ ꓣꓱꓽ ꓢꓴ꓾ ꓘꓴ ꓜꓲꓼ ꓞꓳ ꓜꓳ ꓜꓴ ꓔꓯ, ꓢꓴ ꓕꓲ ꓣꓳ ꓥ ꓡꓳ꓿ ꓝꓮꓲ ꓒꓳ‐ꓡꓳ ꓠꓬ ꓢꓲꓽ ꓫꓬ ꓕꓳ ꓶ ꓐꓳ ꓢꓴ꓾ ꓢꓲ ꓫꓬ ꓕꓳ ꓶ ꓮ ꓟꓬ, ꓐꓳ ꓢꓲ ꓬꓲ ꓤꓶꓻ ꓔꓯ ꓢꓲ ꓒ ꓬꓰ‐ꓢꓴ ꓐꓱ ꓶ ꓖꓶꓽ ꓗꓷ ꓢꓴ ꓥ ꓡꓳ꓿

ꓖꓳ ꓡꓱ ꓠꓬꓲ ꓧꓶ. ꓕꓯ ꓐꓯ ꓗꓷ ꓟ ꓡꓰ ꓒꓲ‐ꓕꓱ ꓤꓶꓻ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓠꓬ ꓥꓪ. ꓓꓳꓽ ꓢꓴ꓾ ꓥꓪ. ꓠ. ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓥꓪ. ꓠ. ꓢꓲ ꓦꓲꓻ ꓘꓴꓽ ꓢꓴ ꓔꓯ ꓧꓪ ꓖꓶ ꓜꓽ ꓢꓲ ꓦꓬꓼ ꓠꓬꓲ ꓗꓳ. ꓔꓬ ꓡꓳ꓿ ꓥꓪ. ꓠ. ꓥꓪ. ꓓꓳꓽˍ ꓟ ꓶꓻ ꓡꓯꓼ ꓔꓯ ꓬꓲ ꓕꓲ ꓤꓶꓻ ꓬꓰ ꓠ, ꓟ ꓓꓵꓽ ꓙ ꓔ ꓡꓳ꓿

ꓖꓳ ꓡꓱ ꓥ ꓟꓲ ꓕꓲ ꓠꓬꓲ ꓙꓳˍ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓘꓴˍ ꓡꓳ꓿ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰ ꓢꓲ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓲ ꓠꓬꓲ꓾ ꓬꓲ ꓔꓯ ꓙꓳˍ ꓟ ꓮ ꓙꓵꓽ ꓡꓳ ꓗꓷ ꓢꓲ ꓢꓲ ꓒ ꓬꓰ‐ꓢꓴ ꓔꓯ ꓛꓳ ꓙꓰˍ ꓡꓳ꓿ ꓬꓲ ꓕꓲ ꓤꓶꓻ ꓡꓱꓸꓼ ꓗꓪ ꓕꓱ ꓡꓱ ꓔꓳ, ꓜꓳꓽ ꓡ, ꓥꓳ ꓐꓰ ꓬꓲ ꓟꓽ ꓓꓵꓽ ꓙꓽ ꓔ꓿ ꓬꓲ ꓤꓶꓻ ꓗꓪ ꓬꓰ‐ꓢꓴ ꓔꓯ ꓛꓳꓻ ꓢꓲ꓾ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓠ ꓗ, ꓡꓳ ꓐꓯ ꓟ ꓔꓯˍ ꓟꓲ ꓬꓲ ꓟꓽ ꓥꓳ ꓡꓳ. ꓔ꓿

ꓖꓳ ꓡꓱ ꓐꓯ ꓥ ꓟꓲ ꓬꓲ ꓙꓽ ꓖꓶ ꓔ ꓟ ꓐꓰ ꓬꓲ ꓔꓳ, ꓜꓳꓽ ꓡˍ ꓟ ꓐꓰ ꓟꓽ ꓫꓱ. ꓡꓯ ꓘꓳ꓿ ꓪꓴ‐ꓢ ꓙꓽ ꓖꓶ ꓔ ꓟ ꓙ ꓖꓴ ꓗꓪ ꓬꓲ ꓠꓬ ꓗ, ꓛꓲꓽ ꓛꓲꓽ ꓡꓰꓽ꓾ ꓑꓶ. ꓑꓶ. ꓡꓰꓽ ꓫꓱꓽ ꓗꓳ. ꓙꓰˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰ ꓗ ꓠꓯ.꓾ ꓢꓲ ꓒ ꓬꓰ‐ꓢꓴ ꓔꓯ ꓟꓶ ꓡꓰ ꓗ ꓠꓯ. ꓧꓶ. ꓕꓯ ꓬꓲ ꓡꓰ ꓙꓽ ꓖꓶ ꓔ ꓟ꓾ ꓬꓲ ꓡꓰ ꓓꓵꓽ ꓙꓽ ꓔ ꓟ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓛꓲ ꓟꓽ ꓬꓳ. ꓚꓵ ꓐꓰ ꓬꓲ ꓢꓷ. ꓡꓰꓳ꓿

ꓖꓳ ꓡꓱ ꓠꓬꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶꓽ ꓗꓷˍ ꓗꓪ ꓛꓲ ꓢꓲ ꓒ ꓬꓰ‐ꓢꓴ ꓔꓯ ꓠꓲ, ꓠꓵ ꓙꓰꓳ꓿ ꓬꓲ ꓡꓳ, ꓬꓰˍ ꓟ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓐꓱ ꓶ ꓬꓲ ꓫꓵˍ ꓐꓰ ꓬꓰˍ ꓕꓯ꓾ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓡꓰ, ꓡꓯꓼ ꓐꓳ ꓔꓶ. ꓗꓪ ꓕꓯꓼ ꓢꓰꓼ ꓠ, ꓟ ꓐꓶꓽ ꓞꓳ ꓐꓴ ꓡꓰ ꓬꓲ ꓔꓯ ꓐꓯ ꓟꓳ ꓘꓶꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓥꓪ ꓔꓯ ꓥꓪ ꓢꓲ ꓒ ꓥꓪ ꓟ. ꓒˍ ꓡꓰ ꓐꓰ ꓡꓯꓼ ꓐꓳ ꓔꓶ. ꓓꓴ ꓗꓪ ꓕꓽ ꓢꓰꓼ꓿ ꓥꓪ ꓠꓬ ꓥꓪ ꓢꓲ ꓒˍ ꓡꓰ ꓐꓰ ꓡꓯꓼ ꓐꓳ ꓔꓶ. ꓓꓴ ꓗꓪ ꓫꓵꓻ ꓠ, ꓟ ꓟꓽ ꓒꓵꓽ꓿ ꓠꓴ ꓪ ꓕꓯꓼ ꓢꓰꓼ ꓠꓲ, ꓫꓵˍ ꓠꓬ ꓥꓪ ꓔꓯ ꓪꓴ. ꓔꓲ. ꓪꓴ. ꓑ ꓕꓯꓼ ꓢꓰꓼ ꓗꓷ ꓡꓯ꓾ ꓐꓰ ꓐꓯ ꓢꓲ ꓬꓲ ꓠꓬ ꓪꓴ. ꓔꓲ. ꓪꓴ. ꓑ ꓔꓶ ꓔ ꓟ ꓡꓯꓼ ꓐꓳ ꓔꓶ. ꓓꓴ ꓗꓪ ꓢꓰꓼ ꓗꓷ ꓟꓶ ꓢꓲ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ꓿

ꓠꓬꓲ. ꓠꓬꓲ ꓬꓲ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓔꓬ ꓢꓲ ꓠꓬꓲ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓡꓳ꓿ ꓕꓱ ꓟˍ ꓡꓰ ꓐꓰ ꓙꓲꓻ ꓫꓬ ꓢꓴ ꓒꓳ‐ꓡꓳ ꓥ ꓟꓲ ꓬꓲ ꓤꓶꓻ ꓗꓪ ꓢꓲ ꓒ ꓬꓰ‐ꓢꓴ ꓐꓰ ꓟꓳꓻ ꓪˍ ꓥꓳ ꓐꓰ ꓬꓲ ꓟꓽ ꓓꓵꓽ ꓙꓽ  ꓔ꓿ ꓬꓲ ꓠꓬ ꓧꓶ. ꓕꓯ ꓕꓯ ꓒ‐ꓡꓲ‐ꓢꓷ ꓕꓲ ꓣꓳ ꓥ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓢꓰꓼ ꓢꓴ꓾ ꓣꓴ ꓢꓲ ꓐꓱ ꓓꓴꓽ ꓗꓪ ꓧꓳꓽ ꓢꓴ꓾ ꓢꓲ ꓒ ꓬꓰ‐ꓢꓴ ꓔꓯ ꓛꓳ ꓢꓴ ꓮ ꓙꓵꓽ ꓔꓯ ꓢꓰꓼ ꓢꓴ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓕꓲ ꓠꓬꓲ ꓙꓳˍ ꓕꓯ ꓬꓲ ꓠꓬ ꓮ ꓟꓴꓽ ꓜꓶꓽ ꓢꓲ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓢꓷ. ꓡꓰꓳ꓿ ꓖꓳ ꓡꓱ ꓢꓷ. ꓡꓰ ꓗ ꓠꓯ. ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓛꓳ ꓢꓴ ꓕꓲ ꓣꓳ ꓒꓬꓱꓼ ꓡꓺꓳ꓿ ꓬꓲ ꓤꓶꓻ ꓠꓯꓸꓼ ꓗꓪ ꓫꓵꓽ ꓪꓴ ꓕꓱ ꓟ ꓔꓯ ꓕꓲ ꓧꓪ,ˍ ꓟꓲ ꓟꓽ ꓓꓵꓽ ꓙꓽ ꓔ꓿ ꓢꓲ ꓒ ꓬꓰ‐ꓢꓴ ꓔꓯ ꓛꓳ ꓢꓴ ꓐꓴ ꓔꓯ ꓖꓼ ꓢꓰꓼ ꓢꓴ ꓕꓲ ꓣꓳ ꓗꓪ ꓐꓰ ꓬꓰ‐ꓢꓴ ꓐꓱ ꓶ ꓫꓵꓻ ꓙ ꓢꓴ꓾ ꓢꓲ ꓒ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓢꓴ ꓕꓲ ꓣꓳ ꓒꓬꓱꓼ ꓡˍ ꓥꓳ ꓐꓰ ꓬꓲ ꓤꓶꓻ ꓗꓪ ꓕꓲ ꓧꓪ, ꓟꓲ ꓟꓽ ꓓꓵꓽ ꓙ ꓗꓳ. ꓠꓬꓲ꓿

ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰ ꓗ ꓠꓯ.꓾ ꓢꓲ ꓒ ꓬꓰ‐ꓢꓴ ꓔꓯ ꓢꓷ. ꓡꓰ ꓗ ꓠꓯ. ꓮ ꓙꓵꓽ ꓠꓬ ꓬꓲ ꓖꓳꓽ ꓥꓳ ꓐꓰ ꓬꓲ ꓡꓰ ꓐꓯ ꓔ ꓡꓳ꓿ ꓡꓳ, ꓬꓰˍ ꓟ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓪꓴ. ꓓꓵ ꓞꓷ, ꓗꓷ ꓢꓴ ꓕꓲ ꓣꓳ ꓒꓬꓱꓼ ꓡꓺꓳ꓿ ꓢꓴ ꓡꓰ ꓪꓴ. ꓓꓵ ꓓꓶ ꓗꓷˍ ꓗꓪ ꓛꓲ ꓬꓲ ꓠꓬ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓮ ꓙꓵꓽ ꓥˍ ꓟꓲ ꓣꓳ ꓮ ꓟꓶ ꓟꓬꓱꓽ ꓬꓰ ꓔꓬ ꓟ꓾ ꓙꓰ ꓔꓬ ꓟ ꓚꓱ, ꓠꓬ ꓮ ꓠꓱ ꓕꓯ ꓣꓳ ꓟꓽ ꓓꓵꓽ ꓙꓽ ꓔ ꓟ ꓟꓽ ꓥꓳ ꓡꓳ. ꓔ ꓟ ꓕꓲ ꓫꓵꓽ ꓥ ꓗꓴ.ˍ ꓡꓳ꓿ ꓖꓳ ꓡꓰ ꓐꓯ ꓥ ꓟꓲ ꓕꓱ ꓟ ꓠꓬ ꓪꓴ‐ꓢ ꓣꓱꓽ ꓛꓰꓽ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓙꓽ ꓖꓶ ꓔ ꓟ꓾ ꓣꓳ ꓓꓵꓽ ꓙꓽ ꓔ ꓟ ꓐꓰ ꓕꓲ ꓡꓰ, ꓕꓲ ꓖ ꓕꓲ ꓧꓪ, ꓟꓽ ꓬꓰ ꓖꓶ ꓡ ꓥˍ ꓟꓲ ꓬꓲ ꓠꓬ ꓣꓳ ꓔꓯ ꓪ ꓜꓲ ꓙꓲˍ ꓟ ꓔꓬ ꓖꓴ ꓗꓪ ꓬꓲ ꓡꓰ ꓟꓳ. ꓖꓶˍ ꓡꓳ꓿ ꓣꓳ ꓟꓽ ꓥꓳ ꓡꓳ. ꓔ ꓟ ꓗꓪ ꓬꓲ ꓡꓰ ꓟꓳ. ꓖꓶˍ ꓡꓳ꓿

ꓬꓳ. ꓚꓵ ꓓꓰ ꓡꓰ ꓟ ꓠꓬ ꓬꓲ ꓡꓰ ꓧꓳꓽ ꓔ ꓖꓶˍ ꓟ ꓙ ꓖꓴ ꓗꓪ ꓙꓵꓻ ꓠꓲ, ꓡꓰ ꓛꓳ ꓫꓱꓽ ꓠ, ꓟ ꓬꓳ. ꓚꓵˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓚꓲ. ꓛꓬ ꓒꓵꓽ ꓶ꓾ ꓚꓲ. ꓛꓬ ꓪꓴ‐ꓢ꓾ ꓢꓯꓼ ꓟꓬ ꓖꓶ ꓒꓵꓽˍ ꓟ ꓪꓴ‐ꓢ ꓥ ꓡꓳ ꓐꓯ ꓟ ꓣꓷꓠ. ꓠ, ꓟ ꓬꓳ. ꓚꓵˍ ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓒꓲ‐ꓕꓱ ꓐꓰ ꓒꓳ‐ꓡꓳ ꓑꓮꓲꓽ ꓗꓪ ꓮ ꓙꓵꓽ ꓢꓴ ꓬꓲ ꓪ ꓠꓬꓲꓽ ꓣꓳ ꓔꓯ ꓔꓯꓺ ꓢꓳ ꓢꓲ ꓠꓬꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓕꓲ ꓑꓶ. ꓕꓲ ꓡꓯꓼ ꓗꓪ ꓐꓰ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓮ ꓙꓵꓽ ꓔꓯ ꓬꓲꓼ ꓠꓬꓲ. ꓖꓶ ꓠꓲ, ꓫꓵˍ ꓡꓳ꓿