ꓣꓳ ꓔꓯ ꓔꓳ, ꓢꓴ ꓟꓽ ꓥ ꓠꓬ ꓣꓳ ꓔꓯ ꓬꓰ ꓙ ꓢꓴ ꓥ ꓡꓳ꓾

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓲ‐ꓢꓴ ꓦ ꓡꓱ ꓢꓴ ꓪꓴ‐ꓢ ꓔꓯ ꓦ ꓡꓱ ꓢꓴ ꓘꓴ ꓜꓲꓼ ꓞꓳ ꓮ ꓟꓬ, ꓙꓳˍ ꓡꓳ꓿ ꓕꓱ ꓡꓱ ꓙꓳ ꓔꓬ ꓟ ꓗꓪ ꓘꓴ ꓜꓲꓼ ꓞꓳ ꓕꓲ ꓟ ꓡꓰ ꓕꓲ ꓟ꓾ ꓟ. ꓒ ꓕꓲ ꓣꓳ ꓡꓰ ꓕꓲ ꓣꓳ꓾ ꓦ ꓡꓱ ꓚꓱ, ꓕꓲ ꓟ ꓡꓰ ꓕꓲ ꓟ ꓐꓯ ꓗ. ꓡꓯ ꓘꓳ,ˍ ꓟ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓮ ꓟꓬ, ꓓꓳ ꓡˍ ꓡꓳ꓿

ꓕꓱ ꓟ ꓔꓯ ꓮ ꓡꓲ ꓐꓰ ꓬꓲ ꓚꓱ, ꓧꓪ ꓠ, ꓟ ꓢ. ꓠꓯ ꓠꓽ‐ꓦꓬꓼ‐ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓬꓲ ꓚꓱ, ꓖꓶ ꓔ ꓡꓳ꓿ ꓟ‐ꓘꓳ 9ꓽ31‐43,45,47‐48 ꓗꓪ ꓣꓳ ꓵꓻ ꓠꓬꓲˍ ꓕꓯ꓾ ꓬꓳ‐ꓦ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓕꓰ ꓡꓰ ꓪꓽ ꓗꓳˍ ꓡꓳ꓿ ꓣꓳ ꓗꓪ ꓐꓰ ꓟꓽ ꓥ ꓟ ꓡ ꓞꓳ ꓕꓲ ꓣꓳ ꓠꓴ ꓟꓬꓱ ꓗꓪ ꓐꓰ ꓠꓲꓽ ꓖꓼ ꓓꓳ ꓔꓬ ꓡꓳ꓿ ꓬꓲ ꓔꓯ ꓕꓽ ꓬꓰ ꓠ, ꓟ ꓐꓱ ꓶ ꓥꓪ ꓠꓴꓽ ꓬꓲ ꓔꓯ ꓕꓼ ꓗꓷꓳ꓾ ꓐꓰ ꓐꓯ ꓖꓶˍ ꓡꓳ꓿

ꓢꓲ ꓒ ꓬꓰ‐ꓢꓴ ꓡꓰ ꓬꓳ‐ꓦ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓬꓲ ꓔꓯ ꓕꓽ ꓗꓽ꓾ ꓮ ꓡꓲꓳ ꓐꓯ ꓠꓬ ꓥꓪ ꓟꓬꓱ ꓗꓪ ꓐꓰ ꓙꓲꓻˍ ꓟ ꓬꓰ ꓢꓴ ꓠꓬ ꓥꓪ ꓔꓯ ꓟꓽ ꓙꓲꓻ ꓟ ꓐꓯ ꓟꓽ ꓐ ꓡ꓾ ꓐꓰ ꓒꓳ, ꓖꓶˍ ꓡꓳ꓿ ꓬꓳ‐ꓦ ꓠꓬ ꓬꓲ ꓪ ꓗꓪ ꓟ ꓟꓽ ꓥ ꓟ ꓑꓶ. ꓓꓴ꓾ ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓟꓬꓱꓽ ꓬꓰ ꓔꓬ ꓟ꓾ ꓙꓲꓻˍ ꓟ ꓬꓰ ꓔꓬ ꓟ ꓔꓯ ꓗꓽ ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓡꓰ꓾ ꓬꓲ ꓔꓯ ꓕꓽ ꓗꓽ ꓥꓪ ꓟꓬꓱ ꓗꓪ ꓐꓰ ꓙꓲꓻˍ ꓟ ꓬꓰˍ ꓟ ꓑꓶ. ꓓꓴ ꓥꓪ ꓔꓯ ꓟꓽ ꓙꓲꓻ ꓟ ꓐꓯ ꓟꓽ ꓐ ꓡ꓿ ꓥꓪ ꓟꓬꓱ ꓔꓯ ꓣꓱꓽ ꓢꓲ ꓙꓲꓻˍ ꓟ ꓬꓰ ꓢꓴ ꓔꓯ ꓕꓽ ꓗꓽ꓾ ꓐꓰ ꓐꓯ ꓖꓶˍ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓟ ꓠꓬ ꓠꓬꓲ. ꓠꓬꓲ ꓣꓳ ꓗꓳ ꓡꓳ ꓗꓪ ꓕꓲ ꓖ ꓕꓲ ꓧꓶ. ꓓꓳ ꓡ ꓗꓴ.ˍ ꓟ ꓫꓵꓽ ꓪꓴ ꓔꓯ ꓬꓲ ꓚꓱ, ꓕꓲ ꓚꓱ, ꓖꓶˍ ꓟ ꓥ ꓡꓳ꓿ ꓣꓳ ꓔꓯ ꓟꓽ ꓪꓽ꓾ ꓣꓳ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓟ ꓟꓽ ꓥ ꓟ ꓑꓶ. ꓓꓴ ꓠꓱ. ꓐꓯ ꓢꓴ ꓕꓲ ꓣꓳ ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓙꓲꓻˍ ꓟ ꓬꓰ ꓔꓬ ꓕꓯ꓾ ꓟ. ꓟꓲꓽ ꓚꓺ ꓔꓬ ꓕꓯ꓾ ꓪꓴ‐ꓢ ꓟꓬꓱ ꓓꓳꓽ ꓓꓳ ꓔꓬ ꓕꓯ ꓣꓳ ꓠꓬ ꓗ, ꓛꓲꓽ ꓠꓯ, ꓡꓳ ꓟꓽ ꓥ ꓡ꓿ ꓮ ꓡꓲꓳ ꓐꓯ ꓠꓬ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓐꓯˍ ꓟ ꓡꓰ꓾ ꓢꓲ ꓒ ꓬꓰ‐ꓢꓴ ꓑꓶ. ꓓꓴ ꓙꓲꓻˍ ꓟ ꓬꓰ ꓔꓬ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓼ ꓙꓲꓻ ꓟ ꓐꓯ ꓟꓽ ꓐ ꓡ ꓐꓰ ꓐꓯ ꓟ ꓡꓰ ꓐꓰ꓾ ꓠꓬꓲ. ꓠꓬꓲ ꓣꓳ ꓓꓵꓽ ꓙꓽ ꓠ ꓔ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓬꓽ ꓠꓬꓲ ꓐꓷ, ꓠꓬꓲ ꓪꓴ‐ꓢ ꓔꓯ ꓙꓵꓻ ꓢꓴ ꓠꓯꓸꓼ ꓘꓴꓽ ꓗꓪ꓾ ꓘꓴ ꓜꓲꓼ ꓞꓳ ꓠꓯꓸꓼ ꓘꓴꓽ ꓗꓪ ꓟꓽ ꓥ ꓟ ꓑꓶ. ꓓꓴ꓾ ꓣꓳ ꓐꓰ ꓕꓲ ꓡꓰ, ꓟꓽ ꓥ ꓟ ꓑꓶ. ꓓꓴ ꓐꓯ ꓗ. ꓟ ꓟꓽ ꓬꓰ ꓠ, ꓟ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿

ꓝꓮꓲ ꓢꓲ ꓒ ꓬꓰ‐ꓢꓴ ꓡꓰ ꓡꓯꓼ ꓫꓵ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓬꓲ ꓒꓬꓱꓽ ꓟꓬ ꓔꓯ ꓡꓳ. ꓢꓲ ꓠꓬꓲ ꓬꓲꓻ ꓙꓬ ꓕꓲ ꓗꓶ. ꓖꓶˍ ꓥꓳ ꓐꓯ ꓠꓬ ꓖꓳ ꓟ ꓬꓲ ꓒꓵꓽ ꓮ ꓡꓲ ꓥˍ ꓟꓲ ꓟꓶˍ ꓥꓳ ꓐꓰ꓾ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓟꓬꓱ ꓠꓯꓸꓼ ꓗꓪ ꓛꓳ ꓫꓱꓽˍ ꓟ꓾ ꓢꓲ ꓒ ꓬꓰ‐ꓢꓴ ꓟꓬꓱ ꓠꓯꓸꓼ ꓗꓪ ꓣꓱꓽ ꓬꓰˍ ꓟ ꓮ ꓙꓵꓽ ꓠꓬ ꓬꓲ ꓖꓳꓽ ꓟꓽ ꓗꓷ ꓡꓰ꓾ ꓐꓯ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓬꓲꓻ ꓙꓬ ꓕꓲ ꓗꓶ. ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓖꓶ ꓓꓳ ꓡˍ ꓠꓬ꓾ ꓖꓳ ꓟ ꓥˍ ꓟꓲ ꓮꓽ ꓔꓳ ꓟꓽ ꓗꓷ ꓡꓰ꓿

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓟꓬꓱꓽ ꓬꓰ ꓠ, ꓟ ꓕꓽ ꓙꓽ ꓫ.꓿ ꓢꓲ ꓒ ꓬꓰ‐ꓢꓴ ꓐꓱ ꓶ ꓬꓲ ꓟꓬꓱꓽ ꓬꓰ ꓠ, ꓟ ꓕꓽ ꓙꓳꓺ꓿ ꓮ ꓡꓲꓳ ꓐꓯ ꓠꓬ ꓬꓲ ꓟꓬꓱ ꓗꓪ ꓐꓰ ꓬꓰˍ ꓟ ꓟꓬꓱꓽ ꓮ ꓙꓵꓽ ꓠꓬ ꓮꓽ ꓔꓳ ꓟꓽ ꓗꓷ ꓡꓰ ꓐꓰ꓾ ꓢꓲ ꓒ ꓬꓰ‐ꓢꓴ ꓪꓵꓼ ꓘꓶ ꓖꓶ ꓔ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓴꓻ ꓥꓪ ꓬꓲ ꓟꓬꓱꓽ ꓬꓰˍ ꓐꓰ ꓐꓯ ꓕꓯ ꓪꓴ‐ꓢ ꓟ. ꓟꓲꓽ ꓢꓳ ꓢꓲ ꓠꓬꓲ ꓕꓲ ꓘ, ꓡꓰ ꓕꓲ ꓘ, ꓗꓪ ꓙꓰ ꓢꓲ ꓟ. ꓟꓲꓽ ꓚꓺ ꓐꓰ ꓐꓯˍ ꓟ ꓟꓽ ꓥ꓿ ꓠꓴ ꓘꓴ ꓔ ꓟꓶˍ ꓟ ꓠꓴ ꓦꓲꓻ ꓘꓴꓽ ꓗꓪ ꓜꓳꓽ ꓜꓳꓽ ꓠꓬꓲ ꓡꓳ. ꓗꓪꓼ ꓫꓵꓼˍ ꓥꓳ ꓐꓯ ꓠꓬ ꓠꓴ ꓠꓬ꓾ ꓬꓰ‐ꓢꓴ ꓟꓬꓱ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳ ꓔꓬ ꓟ ꓥ ꓡꓳ꓿ ꓣꓳꓽ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓒꓬꓱꓼ ꓡ ꓗꓷ ꓗ ꓠꓯ. ꓢꓲ ꓒ ꓬꓰ‐ꓢꓴ ꓞꓳ ꓙꓳˍ ꓟ ꓢꓲ ꓒ ꓬꓰ‐ꓢꓴ ꓠꓲ, ꓟ ꓣꓳ ꓠꓯꓸꓼ  ꓗꓪ ꓙꓳ ꓠꓯ, ꓟ ꓬꓳ. ꓚꓰꓽˍ ꓡꓳ꓿