ꓣꓳ ꓔꓯ ꓛꓬ ꓡ ꓢꓴ ꓔꓯ ꓮ ꓟꓬ ꓧꓪꓹ ꓖꓼ ꓖꓶꓽ ꓠꓯꓹ ꓡ?

ꓠꓬꓲꓸ ꓠꓬꓲꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ-ꓕꓲ 18ꓽ21-35 ꓠꓬ ꓟꓽ ꓖꓼ ꓖꓶ ꓟ ꓚꓳ ꓑꓸ ꓟꓸ ꓟꓲꓽ ꓥ ꓡꓳ= ꓒꓲ-ꓕꓱ ꓡꓰ ꓢꓲ ꓒ ꓬꓰ-ꓢꓴ ꓔꓯ꓾ ꓬꓲ ꓔꓯ ꓛꓬ ꓡ ꓢꓴ ꓔꓯ ꓮ ꓟꓬ ꓧꓪꓹ ꓖꓼ ꓖꓶ ꓠꓯꓹ ꓡ ꓐꓰ ꓠꓺ ꓠꓬꓲˍ ꓟ ꓔꓯ ꓒꓳꓹ ꓟꓸ ꓖꓶˍ ꓕꓯ ꓢꓲ ꓒ ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓕꓱ ꓟ ꓔꓯ ꓣꓱꓽ ꓢꓲ ꓒꓳꓹ ꓖꓶ ꓗꓷ ꓟ ꓥ ꓡꓳ= ꓣꓳꓽ ꓠꓬ ꓢꓴ ꓔꓯ ꓖꓼ ꓖꓶˍ ꓟ ꓗꓪ ꓐꓰ ꓪꓴ-ꓢ ꓬꓲ ꓖꓼ ꓖꓶ ꓠꓲꓹ ꓔꓯ ꓢꓷꓸ ꓡꓰ ꓝꓲ ꓠꓹ ꓟ ꓐꓱ ꓶ꓾ ꓢꓲ ꓒ ꓬꓰ-ꓢꓴ ꓠꓬ ꓫꓵꓽ ꓧꓪꓹ ꓟ ꓫꓵꓽ ꓞꓲ ꓧꓪꓹ ꓖꓼ ꓖꓶ ꓠꓯꓹ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ= 

ꓚꓳ ꓑꓸ ꓠꓬ ꓪ ꓔꓲ ꓡꓰ ꓖꓼ ꓖꓶˍ ꓟ ꓑꓶꓸ ꓓꓴ ꓠꓲꓹ ꓟ ꓢꓻ ꓡꓰ ꓟ ꓟꓶˍ ꓥ ꓟꓲ꓾ ꓬꓲ ꓐꓵ ꓓꓹ ꓟ ꓒꓴ ꓮ ꓙꓵꓽ ꓐꓶ ꓟꓽ ꓛꓵ ꓗꓷ ꓡꓰ ꓥ ꓟꓲ꓾ ꓬꓲ ꓠꓽ ꓚꓳ ꓑꓸ ꓝꓮꓲ ꓕꓲ ꓣꓳ ꓔꓯ ꓖꓼ ꓖꓶ ꓠꓲꓹ ꓟꓽ ꓫꓵ= ꓬꓲ ꓔꓯ ꓐꓵꓻ ꓞꓹ ꓟ ꓒꓴ ꓟꓽ ꓝꓱꓹ ꓖꓶ ꓡ ꓕ ꓑꓳꓸ ꓚꓳ ꓑ ꓖꓳ ꓕꓲ ꓣꓳ ꓔꓯ ꓐꓱ ꓓꓴꓽ ꓗꓪ ꓐꓱ ꓗꓷˍ ꓡꓳ= ꓖꓳ ꓟ ꓔꓯ ꓪ ꓔꓲꓸ ꓑ ꓙ ꓡꓰ ꓕꓯ ꓠꓲꓹ ꓟ ꓮ ꓘꓶꓸ ꓦꓶ ꓢꓲ ꓬꓲ ꓐꓵꓻ ꓞꓹ ꓟ ꓐꓶꓻ ꓟꓽ ꓖꓴ ꓡꓰ ꓕ ꓑꓳꓸ ꓟꓸ ꓙꓽ ꓢꓴ ꓔꓯ ꓡꓯꓼ ꓙꓱ ꓗꓷˍ ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ=

ꓣꓳ ꓠꓬ ꓧꓶꓸ ꓕꓯ ꓖꓼ ꓖꓶˍ ꓟ ꓟꓶ ꓢꓲ ꓣꓳ ꓥˍ ꓟꓲ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓖꓼ ꓖꓶ ꓠꓹ ꓟ ꓔꓯ ꓔꓯꓺ ꓥꓳꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓖꓼ ꓖꓶ ꓠꓹ ꓟ ꓠꓽ ꓚꓵ ꓚꓵ ꓟꓽ ꓢꓻ= ꓖꓼ ꓖꓶˍ ꓟ ꓠꓬ ꓟꓬ ꓕꓲ ꓞꓶꓹˍ ꓗꓪ ꓡꓰꓽ ꓥꓪ ꓖꓼ ꓖꓶˍ ꓥꓳ꓾ ꓐꓯ ꓗꓷ ꓗ ꓠꓯꓸ ꓞꓼ ꓐꓰ꓾ ꓣꓳ ꓔꓯ ꓟꓽ ꓛꓬ ꓡ ꓕꓯ ꓟ ꓡꓰ ꓬꓲ ꓫꓵꓼ ꓒꓬꓱꓼ ꓡꓰˍ ꓟ ꓟꓽ ꓥ= ꓕꓲ ꓖ ꓕꓲ ꓧꓪꓹ ꓣꓳ ꓠꓬ ꓖꓼ ꓖꓶ ꓗꓷ ꓥ ꓟꓲ ꓝꓮꓲ ꓕꓲ ꓧꓪꓹ ꓣꓳ ꓔꓯ ꓛꓬ ꓡ ꓟ ꓔꓯ ꓔꓳꓹ ꓜꓳꓽ ꓡˍ ꓟ ꓦꓬꓼ ꓠꓬꓲˍ ꓟꓲ ꓙꓳˍ ꓥꓳ=

ꓡ ꓞꓳ ꓕꓲ ꓣꓳˍ ꓡꓰꓽ ꓣꓳ ꓔꓯ ꓟꓽ ꓠꓽ ꓠꓽ ꓛꓬ ꓡ ꓕꓯ ꓣꓳ ꓠꓬ ꓮ ꓡꓲ ꓓꓵꓽ ꓙ ꓟꓶˍ ꓡ? ꓮ ꓡꓲ ꓒꓳꓹ ꓖꓶˍ ꓡ? ꓖꓳ ꓟ ꓑꓶꓸ ꓓꓴ ꓣꓳ ꓠꓬ ꓠꓲꓹ ꓟ ꓦꓶ ꓡ ꓢꓲ꓾ ꓬꓲ ꓔꓯ ꓚꓱꓹ ꓡꓲꓸ ꓖꓶˍ ꓡꓳ ꓟꓽ ꓥ ꓡ? ꓖꓳ ꓟ ꓪꓴꓸ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ "ꓫꓵꓽ ꓧꓪꓹ ꓡꓰꓽ ꓟꓽ ꓥ꓾ ꓫꓵꓽ ꓧꓪꓹ ꓟ ꓫꓵꓽ ꓞꓲ ꓧꓪꓹ" ꓐꓰ ꓐꓯ ꓟ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴ ꓐꓰ ꓠꓶꓽ ꓛꓳ ꓕꓲ ꓛꓳ ꓔꓯ ꓣꓳ ꓖꓼ ꓖꓶ ꓗꓷ ꓕꓯ ꓣꓳ ꓠꓬ ꓠꓲꓹ ꓟ ꓦꓶˍ ꓟ꓾ ꓠꓲꓹ ꓜꓳˍ ꓟ꓾ ꓠꓲꓹ ꓟ ꓠꓻˍ ꓟ ꓗꓪ ꓐꓰ ꓩꓴ ꓗꓷˍ ꓟ ꓟꓶˍ ꓥꓳ= ꓢꓴ ꓔꓯ ꓖꓼ ꓖꓶˍ ꓟ ꓠꓬ꓾ ꓟꓽ ꓖꓼ ꓖꓶ ꓟ꓾ ꓚꓱꓹ ꓡꓲꓸ ꓖꓶˍ ꓟ ꓢꓶꓸ ꓟꓽ ꓞꓲꓺ ꓠꓲꓹ ꓟ ꓡꓳꓻ ꓡꓰˍ ꓡꓳ= ꓢꓴ ꓔꓯ ꓖꓼ ꓖꓶ ꓟꓽ ꓐ ꓡ ꓠꓬꓲ ꓣꓳ ꓔꓯ ꓛꓬ ꓡ ꓟ ꓑꓶꓸ ꓓꓴ ꓖꓳ ꓕꓲ ꓣꓳ ꓔꓯ ꓚꓱꓹ ꓡꓲꓸ ꓖꓶˍ ꓟ ꓠꓬ ꓣꓳ ꓚꓲꓸ ꓛꓬ ꓔꓯ ꓣꓳ ꓐꓱ ꓓꓴꓽ ꓗꓪ ꓐꓱ ꓗꓷ ꓟ ꓐꓰ ꓕꓲ ꓡꓰꓹ ꓗꓹ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓢꓴ ꓔꓯ ꓥ ꓟꓲ ꓪ ꓜꓲ ꓠꓲꓹ ꓟ ꓫꓸ ꓡꓰ ꓝꓲˍ ꓡꓳ=

ꓣꓳ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓘꓶꓻ ꓙꓵ ꓢꓴ ꓐꓴ ꓐꓰ ꓛꓴꓽ ꓙꓳ ꓢꓴ ꓐꓴ ꓔꓯ ꓝꓴꓲꓸ ꓟꓽ ꓖꓶꓽ ꓖꓶꓽ꓾ ꓬꓲ ꓚꓲꓸ ꓛꓬ ꓡꓰꓽ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓫꓵꓻ ꓠꓹ ꓟ ꓔꓯ ꓢꓲꓺ ꓗꓷꓳ= ꓖꓼ ꓖꓶˍ ꓟ ꓠꓬ ꓛꓬ ꓗꓷ ꓢꓴ ꓐꓰ ꓖꓼ ꓖꓶ ꓢꓴ ꓔꓯ ꓠꓲꓹ ꓟ ꓢꓲ ꓡꓲ ꓡꓰ ꓝꓲˍ ꓡꓳ= ꓗꓹ ꓛꓲꓽ ꓡꓰ ꓝꓲˍ ꓡꓳ= ꓕꓱ ꓟ ꓠꓬ ꓙꓲ-ꓢꓴ ꓢꓲ ꓤ ꓐꓴ ꓚꓱꓹ ꓥ ꓡꓳ= ꓙꓲ-ꓢꓴ ꓢꓲ ꓤ ꓐꓴ ꓛꓳ ꓫꓱꓽ ꓠꓯꓹ ꓟ ꓗ ꓫꓵ ꓥ ꓡꓳ=