ꓤꓹ ꓠꓬꓲꓹ ꓟ ꓗꓪ ꓐꓰ ꓧꓪꓸ ꓡꓰ ꓠꓹ ꓟ ꓐꓰ ꓪꓴ-ꓢ ꓖꓶ ꓬꓲꓽ ꓶꓽ ꓓꓰˍ ꓟ (Homily)

ꓜ ꓚꓲꓸ ꓚꓲꓸ ꓙꓵꓹ ꓠꓯꓸꓼ ꓗꓪ 2 ꓫꓵꓽ ꓠꓽ

ꓙꓵꓽ ꓗ ꓐꓯ ꓟꓸ ꓕꓳꓽ ꓶ 26: 4-10

ꓖꓳ ꓕꓯ ꓔꓲ ꓒ ꓠꓬ ꓠꓴ ꓡꓯ ꓒꓯ ꓗꓪ ꓐꓰ ꓘꓹ ꓔꓴ ꓖꓳ ꓟ ꓣꓴ ꓢꓲ꓾ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓬꓲ ꓔꓲ ꓖꓴ ꓟꓲꓽ ꓕꓯ ꓗꓪ ꓗꓶ ꓔ ꓠ ꓗ_ ꓡꓳ꓿ ꓖꓳ ꓡꓱ ꓢꓲ ꓠꓴ ꓠꓬ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓟꓲ ꓙꓬ ꓗꓪ ꓕꓱ ꓡꓱ ꓐꓯ ꓒꓳꓹ ꓖꓶ ꓠ ꓗ_ ꓡꓳ꓾ ꓥꓪ ꓒꓵꓽ ꓒ ꓠꓬ ꓟꓶꓽ ꓬꓰ_ ꓐꓰ ꓗꓹ ꓟ ꓫꓲ-ꓡꓲ-ꓬ ꓢꓴ ꓕꓲ ꓣꓳ ꓥ ꓢꓲ꓾ ꓬꓲ ꓠꓬ ꓬꓲ-ꓙꓲ ꓟꓵꓽ ꓗꓪ ꓬꓯꓼ ꓙꓰ ꓢꓲ ꓠꓬꓲ꓾ ꓖꓳ ꓗꓪ ꓮ ꓟꓬꓹ ꓣꓳ ꓟꓽ ꓥ ꓟ_ ꓐꓰ ꓞꓳ ꓬꓯꓼ ꓟꓴ ꓔꓬ_ ꓡꓳ꓿ ꓖꓳ ꓡꓱ ꓢꓲ ꓖꓳ ꓗꓪ ꓔꓬ_ ꓠꓬ꓾ ꓬꓲ ꓠꓽ ꓬꓲ ꓜꓴ ꓬꓲ ꓟꓯꓼ ꓢꓯꓼ ꓙꓳ ꓪ ꓠꓬꓲ_ ꓟ ꓞꓳ ꓫꓵ ꓓꓽ ꓟ ꓒꓬꓱꓼ ꓡ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ-ꓙꓲ ꓡ ꓞꓳ ꓡꓰ ꓥꓪ ꓠꓴ ꓔꓯ ꓥꓶ_ ꓟ ꓬꓰ ꓖꓶ ꓢꓲ꓾ ꓥꓪ ꓠꓴ ꓔꓯ ꓘꓶ ꓙꓵꓻ ꓢꓲ ꓠꓬꓲ꓾ ꓡꓲꓽ_ ꓟ ꓚꓳ ꓑ ꓟꓬꓱꓽ ꓥꓪ ꓠꓴ ꓔꓯ ꓚꓰꓹ ꓖꓶ ꓡ_ ꓡꓳ꓿ꓖꓳ ꓕꓯ ꓥꓪ ꓠꓴ ꓠꓬ ꓥꓪ ꓠꓴ ꓒꓵꓽ ꓒ ꓐꓴ ꓬꓲ ꓪ ꓬꓰ-ꓧꓳ-ꓧꓪ ꓪꓴ-ꓢ ꓔꓯ ꓪ ꓘꓴ ꓢꓲ꓾ ꓬꓰ-ꓧꓳ-ꓧꓪ ꓠꓬ ꓥꓪ ꓠꓴꓽ ꓪ ꓘꓴ_ ꓟ ꓢꓯꓼ ꓔꓯ ꓠ ꓠꓹ_ ꓡꓳ꓿ ꓥꓪ ꓠꓴ ꓫ ꓙꓵ ꓟꓶ_ ꓟ_ ꓐꓰ꓾ ꓥꓪ ꓠꓴ ꓫꓸ ꓟꓬꓱꓽ_ ꓐꓰ꓾ ꓥꓪ ꓠꓴ ꓔꓯ ꓠꓬꓲꓸ ꓤꓲ_ ꓟ ꓔꓯ ꓬꓲ ꓟꓳ_ ꓡꓳ꓿ ꓬꓲ ꓠꓬ ꓢꓯꓼ ꓙꓳ ꓪꓽ ꓠꓬꓲ_ ꓟ ꓡꓯ ꓒꓯ_ ꓐꓰ ꓛꓱ ꓓꓳ ꓡ_ ꓟ ꓡꓯ ꓪꓵ ꓡꓰ꓾ ꓝꓮꓲ ꓠꓬ ꓙꓳꓺ ꓛꓱꓽ ꓓꓴ ꓓꓽ ꓟ_ ꓐꓰ꓾ ꓢꓷ ꓡꓰ ꓓꓴ_ ꓐꓰ꓾ ꓓꓵ ꓙ ꓟꓶ ꓓꓴ ꓡꓰ ꓥꓪ ꓠꓴ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓧꓳꓽ ꓓꓳ ꓡ_ ꓡꓳ꓿ ꓬꓲ ꓠꓬ ꓟꓵꓽ ꓕꓱ ꓟ ꓗꓪ ꓥꓪ ꓠꓴ ꓔꓯ ꓧꓳꓽ ꓓꓵ ꓡꓰ ꓢꓲ꓾ ꓮ ꓚꓵꓹ_ ꓐꓰ ꓐꓬꓽ ꓬꓲꓻ ꓔꓬ_ ꓟ ꓟꓵꓽ ꓕꓱ ꓟ ꓥꓪ ꓠꓴ ꓔꓯ ꓖꓶ ꓡ_ ꓡꓳ꓿ ꓬꓰ-ꓧꓳ-ꓧꓪꓳ꓾ ꓠꓴ ꓡꓰ ꓥꓪ ꓔꓯ ꓖꓶ ꓡ_ ꓟ ꓟꓵꓽ ꓗꓪ ꓐꓰ ꓬꓲ ꓪꓴꓸ ꓓꓱꓼ ꓡ ꓟꓲꓺ ꓡ_ ꓟ ꓕꓲ ꓐꓱ꓾ ꓮ ꓟꓶ ꓠꓴ ꓔꓯ ꓔꓯꓹ ꓖꓶ ꓡ_ ꓡꓳ꓾ ꓐꓰ ꓐꓯ ꓗꓷ ꓠꓬ꓾ ꓘꓹ ꓔꓴ ꓖꓳ ꓟ ꓠꓬ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓟꓲ ꓙꓬ ꓗꓪ ꓗꓶ ꓔ ꓢꓲ꓾ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓒꓬꓱ ꓕꓯ ꓗꓪ ꓪꓴꓸ ꓓꓵ ꓕꓱꓼ ꓠ ꓗ_ ꓡꓳ꓿

ꓣꓳ-ꓟ 10ꓽ 8-13

ꓐꓯ ꓘꓶ ꓠꓬ ꓠꓴ ꓒꓺ ꓕꓲ ꓗꓪ ꓓꓻˍ ꓢꓲ꓾ ꓠꓴ ꓟꓷꓽ ꓠꓷꓹˍ ꓐꓰ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓓꓯꓹ ꓡꓳ꓾ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓥꓪ ꓠꓴꓽ ꓚ ꓟꓸ ꓖꓶˍ ꓟ ꓙꓵꓻ ꓠꓲꓹ ꓟꓸ ꓟꓲ ꓥ ꓢꓲ꓾ꓠꓴ ꓪꓽ ꓟꓷꓽ ꓠꓷꓹ ꓡꓰ꓾ ꓬꓰ-ꓢꓴ ꓠꓽ ꓢꓲ ꓒꓽ ꓥꓳ꓾ ꓐꓰ ꓣꓷꓠꓸ ꓢꓲ ꓠꓬꓲ꓾ ꓠꓲꓹ ꓟ ꓗꓪ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲꓳ꓾ ꓐꓰ ꓙꓵꓻˍ ꓕꓯ ꓠꓽ꓾ ꓠꓴ ꓢꓯꓼ ꓟꓬ ꓟꓶˍ ꓥꓳ꓾ ꓐꓯˍ ꓟ ꓥ ꓡꓳ꓿ꓮ ꓡꓲꓳ ꓐꓯ ꓠꓬ ꓠꓲꓹ ꓟ ꓡꓰ ꓙꓵꓻˍ ꓠꓬꓲ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓲ꓾ ꓟꓷꓽ ꓠꓷꓹ ꓡꓰ ꓣꓷꓠꓸˍ ꓟ ꓗꓪ ꓐꓰ ꓢꓯꓼ ꓟꓬ ꓝꓸ ꓟꓶˍ ꓟ ꓥ ꓡꓳ꓿ꓮ ꓡꓲꓳ ꓐꓯˍ ꓠꓬ ꓕꓳ ꓶ ꓗꓪ꓾ ꓮ ꓟ ꓥ ꓟꓲ ꓬꓲ ꓔꓯ ꓙꓵꓻˍ ꓠꓬ ꓟꓽ ꓫ ꓔꓳ ꓡꓰ꓾ ꓐꓯ ꓔ ꓡꓳ꓿ꓮ ꓡꓲꓳ ꓐꓯˍ ꓠꓬ ꓬꓴ-ꓔ ꓡ ꓞꓳˍ ꓐꓰ ꓦꓲ-ꓡꓲ ꓡ ꓞꓳ ꓒꓯꓽ ꓦꓰꓽ ꓓꓴ ꓟꓽ ꓙꓳ꓿ ꓮꓽ ꓙꓵ ꓢꓴ ꓢꓲ ꓒꓽ ꓠꓬ ꓕꓲ ꓣꓳˍ ꓡꓰꓽ ꓥ ꓢꓲ꓾ ꓬꓲ ꓔꓯ ꓶꓼ ꓓꓰꓽ ꓢꓴ ꓥ ꓕ ꓑꓳꓸ ꓐꓱ ꓶ ꓣꓱꓽ ꓛꓰ ꓐꓳ ꓞꓹ ꓢꓴ ꓠꓬ ꓬꓲ ꓥ ꓠꓬꓲ꓾ꓢꓲ ꓒꓽ ꓟꓬꓱ ꓗꓪ ꓐꓰ ꓘꓴꓻ ꓓꓰꓽ ꓢꓴ ꓥ ꓕ ꓑꓳꓸ ꓠꓽ ꓢꓯꓼ ꓟꓬ ꓝꓸ ꓟꓶˍ ꓥꓳ꓿

ꓡꓴ-ꓘ 4ꓽ 1- 13

ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓐꓲ ꓞꓹ ꓢꓲ꓾ ꓬꓳ-ꓔ ꓬꓲꓽ ꓟ ꓗꓪ ꓐꓰ ꓬꓲꓼ ꓡ ꓗꓸ ꓠꓯ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ ꓡꓲ ꓛꓲ ꓗꓪ ꓡꓲ ꓞꓲ ꓠꓬꓲ ꓧꓳꓽ ꓔꓬ ꓕꓯ꓾ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓫꓵꓽ ꓠꓬꓲˍ ꓡꓳ꓿ ꓬꓰ-ꓢꓴ ꓠꓬ ꓟꓽ ꓜꓽ ꓟꓽ ꓓꓳꓻ ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲ ꓔꓬ ꓗꓷ ꓠꓬ ꓦꓰ ꓟꓷꓼˍ ꓡꓳ꓿ꓖꓳ ꓕꓯ ꓠꓲꓽ ꓪ ꓔꓲꓸ ꓡꓰ ꓬꓰ-ꓢꓴ ꓔꓯ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ꓾ Bꓸ ꓛꓲ ꓕꓱ ꓕꓲ ꓘꓴꓸ ꓔꓯ ꓑ ꓑ ꓒꓬꓱꓼ ꓡ ꓠꓹ ꓟ ꓕꓵꓼ ꓪꓽ ꓖꓶ ꓟꓴꓽ꓾ ꓐꓯˍ ꓡꓳ꓿ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶꓽ ꓢꓲ꓾ ꓞꓳ ꓤꓽ ꓠꓬ ꓜꓽ ꓓꓴ ꓗꓪ ꓐꓰˍ ꓡꓰꓽ ꓢꓯꓸ ꓔꓬ ꓟ ꓟꓽ ꓥ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓟꓴˍ ꓟ ꓕꓲ ꓖ ꓗꓪ ꓧꓳꓽ ꓓꓯ ꓙꓰ ꓢꓲ꓾ ꓟꓵꓽ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓮꓽ ꓙꓵ ꓡꓱꓸꓼ ꓬꓲ ꓔꓯ ꓕꓲ ꓑꓹ ꓤ ꓖꓴ ꓟꓸ ꓖꓶ ꓢꓲ ꓠꓬꓲ꓾ꓙꓵꓽ ꓪˍ ꓐꓰ ꓟꓬꓱꓺ ꓓꓳꓽ ꓕꓱ ꓟ ꓮꓽ ꓙꓵ ꓥꓪ ꓡꓰ ꓠꓴ ꓔꓯ ꓖꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓥꓪ ꓔꓯ ꓡꓯꓼ ꓙꓱ ꓖꓶꓽ ꓔ ꓟ ꓥ ꓠꓬꓲ꓾ ꓥꓪ ꓮꓽ ꓟ ꓔꓯ ꓖꓶ ꓠꓲꓹ ꓫꓵˍ ꓟꓲ ꓖꓶ ꓓꓻˍ ꓟ ꓥ ꓡꓳ꓿ꓖꓳ ꓡꓱ ꓠꓬꓲ ꓠꓴ ꓥꓪ ꓔꓯ ꓪꓴꓸ ꓓꓵ ꓕꓱꓼˍ ꓠꓬ꓾ ꓕꓱ ꓟ ꓮꓽ ꓙꓵ ꓠꓴ ꓔꓯꓸ ꓟ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓠꓬ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓬꓲ ꓔꓯˍ ꓡꓰꓽ ꓣꓱꓽ ꓙ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓧꓳꓽ ꓙꓰ ꓢꓲ꓾ ꓢꓲꓽ ꓫꓬ ꓦꓲ ꓟꓴ ꓓꓰꓺˍ ꓟ ꓕꓲ ꓔꓳꓸ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ ꓕꓱ ꓗꓪ ꓐꓰ ꓔꓷꓹ ꓬꓯꓼ ꓙꓰ꓿ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓲ ꓒꓽ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓐꓱ ꓶ ꓕꓵꓼ ꓪꓽ ꓖꓶ ꓢꓲ꓾ ꓠꓴ ꓔꓯ ꓔ ꓙ ꓝꓲˍ ꓥꓳ꓿ꓝꓮꓲ꓾ ꓠꓴ ꓛꓲ ꓒꓯꓹ ꓠꓬ Bꓸ ꓛꓲ ꓗꓪ ꓟꓽ ꓕꓯꓼ ꓡꓰ ꓠꓹ ꓟ ꓬꓲ ꓪꓽ ꓡꓯꓼ ꓒꓯꓹ ꓡꓰ ꓠꓴ ꓔꓯ ꓓꓽ ꓔꓸ ꓖꓶˍ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯˍ ꓡꓳ꓿ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓴ ꓫꓵꓽ ꓠꓬꓲ ꓟꓽ ꓓ꓾ ꓐꓰ ꓕꓳ ꓶ ꓗꓪ ꓓꓯꓹ ꓡꓳ꓾ ꓐꓯ ꓖꓶˍ ꓡꓳ꓿ꓠꓲꓽ ꓪ ꓔꓲꓸ ꓬꓲ ꓫꓵꓽ ꓠꓬꓲ ꓖꓴ ꓡꓰ ꓠꓬ꓾ ꓬꓰ-ꓢꓴ ꓔꓯꓸˍ ꓐꓰ ꓕꓲ ꓝꓲꓸ ꓤ ꓧꓹ ꓙꓰˍ ꓡꓳ꓿