ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓛꓳ ꓫꓱꓽ ꓢꓴ꓾ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓬꓰ ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓪꓴꓽ ꓓꓰ ꓡꓰ ꓢꓴ ꓥ ꓡꓳ

ꓟ‐ꓘꓳ 9ꓽ30‐37

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓙ ꓖꓴ ꓗꓪ꓾ ꓬꓲ ꓪ ꓠꓯꓸꓼ ꓗꓪ ꓮꓽ ꓟ ꓪꓴꓽ꓾ ꓮ ꓡꓲ ꓟ ꓪ ꓜꓲ ꓪꓽ ꓠꓬꓲˍ ꓟ ꓕꓲ ꓣꓳ ꓡꓰ ꓕꓲ ꓣꓳ ꓒꓱ. ꓡꓯ ꓘꓳ ꓔꓬ ꓡꓳ꓿ ꓖꓳ ꓟ ꓔꓯ ꓢꓲ ꓒ ꓬꓰ‐ꓢꓴ ꓢꓷ.ˍ ꓠꓬꓲ ꓬꓲ ꓪ ꓔꓯ ꓠꓺ ꓠꓬꓲ.ˍ ꓡꓳ꓿ “ꓠꓴ ꓪ ꓙꓻ ꓖꓴ ꓗꓪ ꓮ ꓫꓵꓽ ꓔꓯ ꓐꓯ ꓡꓯ ꓘꓳ ꓔꓬ ꓡ꓾” ꓐꓰ ꓠꓺ ꓠꓬꓲˍ ꓡꓳ꓿ ꓬꓲ ꓠꓬ ꓬꓲ ꓪ ꓠꓯꓸꓼ ꓗꓪ ꓮ ꓡꓲ ꓟ ꓪꓽ ꓜꓲ ꓪꓴꓽˍ ꓡ꓾ ꓮ ꓡꓲ ꓟ ꓪ ꓜꓲ ꓪꓽ ꓠꓬꓲˍ ꓡ꓾ ꓐꓰ ꓒꓱ. ꓡꓯ ꓘꓳ ꓔꓬ ꓟ ꓔꓯ ꓢꓷ.ˍ ꓠꓬꓲ꓾ ꓬꓲ ꓠꓬ ꓬꓲ ꓪ ꓗꓳ ꓡꓳ ꓗꓪ ꓤ ꓠꓱ ꓤ ꓕꓲ ꓣꓳ ꓧꓳꓽ ꓔꓯ, ꓡ ꓢꓲ ꓠꓬꓲ꓾ “ꓥꓪ ꓔꓱ, ꓔꓱ, ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ ꓤ ꓠꓱ ꓤ ꓕꓱ ꓕꓲ ꓣꓳ ꓡꓰ ꓐꓰ ꓛꓳ ꓫꓱꓽ ꓢꓴ꓾ ꓤ ꓠꓱ ꓤ ꓕꓱ ꓕꓲ ꓣꓳˍ ꓡꓰ ꓐꓰ ꓬꓰ ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓪꓴꓽ ꓓꓰ ꓡꓰ ꓟ ꓥꓳ” ꓐꓰ ꓬꓲ ꓪ ꓔꓯ ꓟ. ꓖꓶˍ ꓡꓳ꓿

ꓬꓲ ꓝꓲ ꓓꓴ ꓐꓴ ꓠꓬ ꓓꓵꓽ ꓙ ꓮʼ ꓡꓰˍ ꓡꓳ꓿ ꓬꓲ ꓪ ꓓꓵꓽ ꓙ ꓔ ꓟ ꓡꓰ ꓐꓰ꓾ ꓬꓲ ꓪ ꓢꓷ. ꓔ ꓟ ꓠꓬ ꓢꓯꓼ ꓙꓳ ꓪꓽ ꓠꓬꓲ ꓢꓴ ꓪ ꓜꓲ ꓟ. ꓟꓲꓽ ꓚꓺ ꓗꓴ. ꓢꓴ꓾ ꓪ ꓜꓲ ꓪꓽ ꓠꓬꓲ ꓢꓴ꓾ ꓪ ꓜꓲ ꓢꓯꓼ ꓙꓳ ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓪꓴꓽˍ ꓡꓳ ꓐꓰ ꓓꓵꓽ ꓙꓽ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ꓾ ꓤ ꓠꓱ ꓤ ꓡꓰ ꓐꓰ ꓗ, ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓪꓴꓽˍ ꓡꓳ ꓐꓯ ꓖꓶˍ ꓡꓳ꓿

ꓣꓳ Childlike ꓐꓰ ꓐꓯˍ ꓟ ꓤ ꓠꓱ ꓤ ꓠꓬ ꓮ ꓡꓲ ꓐꓰ ꓗ, ꓡ꓿ ꓮ ꓫꓵꓽ ꓪꓴ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓢꓳ ꓓꓴ ꓐꓯ ꓟꓳ. ꓖꓶˍ ꓡ꓿ ꓣꓳ ꓤ ꓠꓱ ꓤ ꓐꓴ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓪꓴ. ꓕꓲꓽ ꓟ ꓠꓬ꓾ ꓤ ꓠꓱ ꓤ ꓐꓴ ꓠꓬ ꓬꓲ ꓪ ꓮꓽ ꓐ ꓮ ꓟ ꓔꓯ ꓕꓲ ꓠꓲ, ꓟ ꓡꓱꓸꓼ ꓕꓲ ꓙꓽ ꓠꓲ, ꓡꓱꓸꓼ ꓙꓵꓻˍ ꓟ ꓥ ꓡꓳ꓿ ꓮ ꓫꓵꓽ ꓗꓪˍ ꓟꓲ ꓮꓽ ꓐ ꓮ ꓟ ꓔꓯ ꓬꓲ ꓚꓱ, ꓙꓳˍ ꓡꓳ ꓐꓰ ꓬꓲ ꓪ ꓙꓵꓻˍ ꓡꓳ꓿ ꓮ ꓫꓵꓽ ꓠꓲ, ꓫ ꓟꓬ ꓫ ꓓꓴ ꓔꓳ, ꓜꓳꓽ ꓡ ꓥ ꓟꓲ꓾ ꓬꓰ ꓟꓽ ꓗꓴ. ꓟ ꓟꓽ ꓢꓷ. ꓟ ꓔꓳ, ꓜꓳꓽ ꓡˍ ꓥ ꓟꓲ꓾ ꓬꓲ ꓕꓯꓽ ꓢꓲ ꓪꓴꓽˍ ꓟ ꓔꓳ, ꓜꓳꓽ ꓡ ꓥ ꓟꓲ꓾ ꓬꓲ ꓮ ꓐ ꓮ ꓟ ꓠꓬ ꓬꓲ ꓐꓱ ꓶ ꓬꓰ ꓖꓶ ꓡˍ ꓡꓳ ꓐꓰ ꓬꓲ ꓙꓵꓻˍ ꓡꓳ꓿

ꓖꓳ ꓡꓱ ꓠꓬꓲ ꓠꓲ, ꓫ. ꓟꓬ ꓫ ꓓꓴ ꓙꓳˍ ꓕꓯ꓾ ꓙꓳꓺ ꓓꓴ ꓛꓱꓽ ꓓꓴ ꓙꓳ ꓡˍ ꓕꓯ ꓬꓲ ꓠꓬ ꓮꓽ ꓐ ꓮ ꓟ ꓳ ꓟꓶꓽ ꓗꓪ ꓓꓵꓽ ꓙꓰˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ ꓮ ꓫꓵꓽ ꓕꓲ ꓙꓰꓽ ꓞ, ꓕꓯ ꓥ ꓟꓲ ꓮ ꓐ ꓮ ꓟ ꓔꓯ ꓓꓰꓽˍ ꓡꓳ꓿ ꓬꓲ ꓮꓽ ꓐ ꓮ ꓟ ꓬꓲ ꓔꓯ ꓠꓲ, ꓠꓵˍ ꓟ ꓬꓲ ꓢꓷ.ˍ ꓟ ꓑꓶ. ꓓꓴ ꓠꓲ, ꓪꓴꓽ ꓪꓴꓽ ꓡꓰꓽ ꓔꓬ ꓢꓲ ꓠꓬꓲ ꓮ ꓕꓯ ꓥ ꓟꓲ ꓗ, ꓛꓲꓽ ꓛꓲꓽ ꓡꓰ ꓬꓲ ꓔꓬ ꓡꓳ꓿ ꓕꓱ ꓡꓱ ꓫꓵꓽ ꓬꓲ ꓧꓪ ꓕꓲ ꓞꓲꓼ ꓬꓲ ꓪ ꓔꓯ ꓙꓳˍ ꓡꓳ꓿

ꓝꓮꓲ ꓤ ꓠꓱ ꓤ ꓐꓴ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓪ ꓔꓯ ꓪꓽ ꓛꓴꓽ ꓚꓱ,ˍ ꓐꓯ ꓟ ꓟꓽ ꓙꓳ꓿ ꓬꓲ ꓪ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓣꓱꓽ ꓡꓯ ꓘꓳ꓾ ꓐꓯ ꓡꓯ ꓘꓳ ꓟ ꓙꓳˍ ꓥ ꓟꓲ ꓕꓲ ꓑ, ꓤ ꓡꓰꓽ ꓡꓯꓼ ꓒꓶ ꓪꓳ ꓔ ꓢꓲ ꓠꓬꓲ ꓗ, ꓛꓲꓽ ꓛꓲꓽ ꓡꓰꓽ ꓙꓰ ꓔꓬ ꓟ ꓔꓯ ꓡꓰꓽ ꓟꓳꓻ ꓠꓬꓲˍ ꓡꓳ꓿ ꓬꓲ ꓪ ꓔꓯ ꓚꓲ. ꓔ ꓢꓲ ꓠꓬꓲ ꓠꓲ, ꓟ ꓠꓯꓸꓼ ꓗꓪ ꓫ ꓔ ꓢꓲ꓾ ꓮ ꓡꓲ ꓕꓲ ꓚꓱ, ꓮ ꓡꓲ ꓕꓲ ꓔꓳ. ꓗꓪ ꓬꓲ ꓔꓯ ꓓꓶꓽ ꓠꓯ, ꓥ ꓾ ꓬꓲ ꓔꓯ ꓔꓲ. ꓠꓯ, ꓥ ꓬꓲ ꓪ ꓓꓵꓽ ꓙꓽ ꓟꓽ ꓗꓴ.꓿ ꓖꓳ ꓡꓱ ꓠꓬꓲ ꓬꓲ ꓪ ꓔꓯ ꓪꓽ ꓛꓴꓽ ꓚꓱ,ˍ ꓐꓯ ꓟ ꓟꓽ ꓙꓳ꓿ ꓔꓽ ꓧꓳꓽ ꓧꓳꓽ ꓡꓰꓽ ꓬꓲ ꓛꓳꓽ ꓒꓯ, ꓐꓰ ꓕꓲ ꓛꓳˍ ꓙꓰ ꓔꓬ ꓡꓳ꓿

ꓝꓮꓲ ꓬꓲ ꓪ ꓔꓯ ꓞꓳ ꓫꓵꓽ ꓘꓶˍ ꓟ꓾ ꓒꓳ, ꓦ ꓡꓱ ꓚꓱ, ꓘꓶˍ ꓟ ꓟꓽ ꓙꓳ꓿ ꓮ ꓡꓲ ꓫꓵꓽ ꓥˍ ꓟꓲ ꓕꓲ ꓡꓰ, ꓗꓽ ꓠꓯ, ꓢꓲ ꓠꓬꓲ ꓔꓬ ꓡꓳ꓿ ꓠꓴ ꓠꓬ ꓧꓪꓽ ꓠꓯ.ˍ ꓟ ꓑꓶ. ꓓꓴ꓾ ꓠꓴ ꓠꓬ ꓥꓪ ꓠꓴꓽ ꓐꓰ ꓬꓲ ꓒꓳ, ꓘꓴ ꓜꓲꓼ ꓞꓳ ꓟꓽ ꓫꓱ. ꓡꓯ ꓘꓳ ꓟ ꓑꓶ. ꓓꓴ ꓕꓱ ꓗꓪ ꓕꓽ ꓡꓯ ꓐꓰ ꓬꓲ ꓪ ꓟꓽ ꓐꓯꓻ꓿ ꓖꓳ ꓡꓱ ꓠꓬꓲ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓒꓳ, ꓡꓶ. ꓠ, ꓟ ꓬꓳ. ꓚꓰꓽˍ ꓡꓳ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓖꓶˍ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓥˍ ꓟꓲ ꓪꓴ‐ꓢ ꓔꓯ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓙꓵꓻ ꓠ, ꓟ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓟ. ꓖꓶ ꓠꓲ, ꓫꓵˍ ꓡꓳ꓿ ꓤ ꓠꓱ ꓤ ꓡꓰ ꓬꓲ ꓮꓽ ꓐ ꓮ ꓟ ꓔꓯ ꓙꓵꓻˍ ꓟ ꓡꓰ꓾ ꓣꓳ ꓥˍ ꓟꓲ ꓣꓳ ꓔꓳ, ꓜꓳꓽˍ ꓟ ꓫ ꓙꓵ ꓓꓴ꓾ ꓣꓳ ꓟꓽ ꓢꓷ. ꓟꓽ ꓗꓴ. ꓟ ꓫꓵꓽ ꓪꓴ ꓔꓯ ꓪꓴ‐ꓢ ꓡꓰ ꓬꓰ ꓖꓶˍ ꓥꓳ꓾ ꓪꓴ‐ꓢ ꓡꓰ ꓫꓬ, ꓖꓶˍ ꓥꓳ ꓐꓰ ꓙꓵꓻ ꓢꓲ ꓠꓬꓲ ꓬꓲ ꓔꓯ ꓠꓲ, ꓪꓴꓽ ꓪꓴꓽ ꓡꓰ ꓡꓯꓼ ꓙꓱ ꓖꓶ ꓢꓲ ꓠꓬꓲ ꓞꓳ ꓙꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓣꓳ ꓔꓳ, ꓜꓳꓽ ꓔꓬ ꓟ ꓠꓬ ꓣꓳ ꓕꓯꓽ ꓢꓲ ꓗꓪ ꓪꓴꓽˍ ꓡꓳ꓿ ꓣꓳꓽ ꓕꓯꓽ ꓢꓲ ꓗꓪ ꓢꓯꓼ ꓪ ꓙꓳˍ ꓡꓳ꓿ ꓣꓳ ꓕꓯꓽ ꓢꓲ ꓗꓪ ꓗꓴ.ˍ ꓡꓳ꓾ ꓢꓷ.ˍ ꓡꓳ꓿

ꓖꓳ ꓡꓱ ꓠꓬꓲ ꓕꓱ ꓡꓱ ꓣꓳ ꓔꓳ, ꓜꓳꓽˍ ꓟ ꓚꓱ,꓾ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓮ ꓙꓵꓽ ꓪꓴ‐ꓢ ꓔꓯ ꓡꓯꓼ ꓙꓱ ꓗꓷ꓿ ꓖꓳ ꓡꓱ ꓢꓲ ꓠꓬꓲ ꓗ, ꓛꓲꓽ ꓛꓲꓽ ꓡꓰꓽ ꓠꓲ, ꓪꓴꓽ ꓪꓴꓽ ꓡꓰ ꓞꓳ ꓙꓳ ꓙꓰ꓿

ꓝꓮꓲ ꓤ ꓠꓱ ꓤ ꓔꓯ ꓫꓱ.ˍ ꓟ ꓣꓳ ꓥˍ ꓟꓲ ꓪꓽ ꓚꓱ, ꓠ, ꓟ ꓕꓽ ꓓꓵꓽ ꓙꓽ꓿ ꓣꓳ ꓔꓯ ꓢꓴ ꓡꓰ ꓛꓬꓻ ꓡ ꓕꓯ꓾ ꓣꓳ ꓔꓯ ꓢꓴ ꓡꓰ ꓥꓳꓽ ꓡ ꓕꓯ ꓠꓬ ꓣꓳ ꓠꓲ, ꓟ ꓠꓯꓸꓼ ꓗꓪ ꓖꓽ ꓖꓶ ꓠ, ꓟ ꓪꓴ‐ꓢ ꓣꓳ ꓔꓯ ꓠꓲ, ꓡꓶꓽ ꓙꓳˍ ꓡꓳ꓿ ꓤ ꓠꓱ ꓤˍ ꓡꓰ ꓐꓰ ꓖꓽ ꓖꓶ ꓠꓲ, ꓙꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓖꓽ ꓖꓶˍ ꓕꓯ ꓡꓰꓽ ꓟꓴꓽ ꓗꓪ ꓗꓪ ꓟ ꓣꓳꓽ ꓐ, ꓐ ꓠꓬ ꓣꓳ ꓝꓴꓲ. ꓔꓯ ꓖꓽ ꓖꓶ ꓡˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓔ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓤ ꓠꓱ ꓤ ꓡꓰ ꓐꓰ ꓛꓳ ꓫꓱꓽ ꓠ, ꓟ ꓠꓬ ꓕꓲ ꓖ ꓕꓲ ꓧꓪ, ꓠꓬ ꓟꓽ ꓢꓻ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓬ ꓢꓲꓽ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓬꓰ ꓐ ꓡˍ ꓡꓳ꓿ ꓗ, ꓛꓲꓽ ꓛꓲꓽ ꓡꓰꓽ ꓐꓽ ꓧꓷꓼ ꓧꓷꓼ ꓡꓰꓽ ꓔꓬ ꓢꓲ ꓠꓬꓲ꓾ ꓣꓳ ꓔꓳ, ꓜꓳꓽ ꓠ ꓔ ꓟ ꓫ ꓙꓵ ꓓꓴ ꓔꓯ ꓔꓳ, ꓜꓳꓽ ꓢꓲ ꓠꓬꓲ ꓢꓯꓼ ꓪ ꓙꓳ ꓙꓳ ꓡꓰꓽ ꓢꓯꓼ ꓕꓵꓼ ꓙꓰ ꓡꓯ꓿ ꓤ ꓠꓱ ꓤˍ ꓡꓰ ꓐꓰ ꓒꓳ, ꓡꓶ. ꓙꓰ ꓢꓲ ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓪꓴꓽˍ ꓟ ꓒꓬꓱꓼ ꓡ ꓝꓲ ꓡꓯ꓿