ꓥꓪ ꓑ ꓙꓽˍ ꓟ ꓕꓱ ꓟꓬ ꓫꓵꓽ ꓬꓰ ꓔꓬ ꓢꓴ ꓠꓬ ꓮꓽ ꓟ ꓥ ꓡ?

ꓡꓴ-ꓘ 9ꓽ7-9

ꓠꓲꓹ ꓠꓵˍ ꓟꓲ ꓬꓲ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ ꓖꓶ ꓡ ꓔꓬ ꓟ ꓠꓬ ꓣꓳ ꓪꓴ-ꓢ ꓦ ꓡꓱ ꓢꓴ ꓐꓴ ꓠꓬ ꓮ ꓡꓰ ꓐꓰ ꓞꓳ ꓙꓳ ꓢꓯꓸ ꓔꓬ ꓪ ꓠꓹ ꓟ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲꓺ ꓒ ꓬꓰ-ꓢꓴ ꓠꓽ ꓮ ꓟ ꓥ ꓡ꓾ ꓢꓲꓺ ꓒ ꓬꓰ-ꓢꓴ ꓠꓬ ꓮ ꓡꓰ ꓫꓵꓽ ꓕꓲ ꓣꓳ ꓥ ꓡ꓾ ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓮ ꓡꓰ ꓐꓰ ꓘꓳꓹ ꓣꓴ ꓔꓬ ꓡ꓾ ꓐꓯ ꓟ ꓔꓯ ꓣꓳ ꓚꓲꓸ ꓛꓬ ꓥˍ ꓟꓲ ꓢꓷꓸ ꓠꓹ ꓟ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓵ ꓠꓬꓲˍ ꓕꓯ ꓠꓽ ꓩꓴ-ꓡꓲ ꓪ ꓔꓲ ꓐꓰ ꓐꓯ ꓟ Herod Antipas ꓠꓬ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓔꓯ ꓪꓴꓸ ꓓꓵ ꓓꓶ ꓗꓷ ꓢꓴ ꓥ ꓡꓳ= ꓪ ꓔꓲ ꓠꓬ ꓬꓳ-ꓦ ꓔꓯ ꓮ ꓫꓵꓽ ꓪꓴꓸ ꓠꓬꓲ ꓪꓴꓸ ꓓꓵ ꓓꓶ ꓗꓷˍ ꓡ ꓐꓯ ꓠꓬ ꓬꓳ-ꓦ ꓠꓬ ꓬꓲ ꓔꓯ ꓕꓱ ꓡꓱ ꓐꓯ ꓗꓷ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓓꓱ ꓔꓲꓹ ꓒ ꓬꓳ-ꓦ ꓡꓰ ꓩꓴ-ꓡꓲ ꓪ ꓔꓲ ꓔꓯ ꓠꓴ ꓠꓽ ꓪꓴ-ꓢ ꓔꓯ ꓛꓬ ꓗꓷꓳ= ꓪꓴ-ꓢ ꓟꓽ ꓠꓲꓹ ꓒꓴ ꓟ ꓬꓰ ꓗꓷꓳ= ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓠꓴ ꓠꓬꓲ ꓤ ꓤ ꓟꓶ ꓔꓯ ꓦꓴ ꓔꓯꓹ ꓙꓰ ꓢꓲ ꓫ ꓗꓷ ꓟ ꓪꓴꓸ ꓠꓬꓲ ꓥ ꓡꓳ꓾ ꓐꓰ ꓬꓳ-ꓦ ꓡꓰ ꓐꓯ ꓕꓯ ꓪ ꓔꓲ ꓩꓴ-ꓡꓲ ꓠꓬ ꓠꓲꓹ ꓟ ꓦꓶ ꓢꓲ ꓬꓲ ꓔꓯ ꓪꓴꓸ ꓓꓵ ꓓꓶ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓟ ꓥ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓠꓬ ꓮ ꓫꓵꓽ ꓑꓶꓸ ꓓꓴ ꓪꓴꓸ ꓓꓵ ꓓꓶˍ ꓟ ꓟꓶ ꓗꓷ ꓡ ꓐꓯ ꓠꓬ꓾ ꓬꓲ ꓠꓽ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓬꓲ ꓞꓳ ꓙꓳ ꓢꓯꓸ ꓔꓬ ꓟ ꓪꓴꓸ ꓠꓬꓲ ꓬꓲ ꓔꓯ ꓩꓴ-ꓡꓲ ꓪ ꓔꓲ ꓡꓰ ꓢꓰꓼ ꓗꓷ ꓟ ꓥ ꓡꓳ=

ꓖꓳ ꓟ ꓕꓲ ꓡꓰꓹꓼ ꓠꓬꓲꓸ ꓠꓬꓲ ꓣꓳꓽ ꓔꓯ꓾ ꓟꓬꓽ ꓠꓬꓲ ꓣꓳ ꓪꓴ-ꓢ ꓦ ꓡꓱ ꓢꓴ ꓔꓯ ꓥˍ ꓟꓲ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓣꓳ ꓥˍ ꓟꓲ ꓪꓴ-ꓢ ꓐꓯ ꓘꓶꓽ ꓕꓲ ꓡꓰꓹꓼ ꓞꓳ ꓙꓳ ꓢꓯꓸ ꓔꓬ ꓡ ꓐꓰ ꓓꓵꓽ ꓙ ꓠꓬꓲ ꓡꓯ= ꓖꓳ ꓓꓱꓽ ꓔꓲꓹ ꓒ ꓬꓳ-ꓦˍ ꓡꓰ ꓐꓰ ꓙꓲꓻ ꓔꓱꓹ ꓟ ꓣꓳ ꓐꓯ ꓔꓬ ꓡ= ꓪꓴ-ꓢ ꓐꓯ ꓘꓶꓽ ꓐꓰ ꓕꓲ ꓡꓰꓹꓼ ꓣꓳ ꓢꓯꓸ ꓔꓬ ꓡ= ꓣꓳ ꓮ ꓡꓰ ꓐꓰ ꓢꓯꓸ ꓔꓬ ꓪ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓓꓴ ꓣꓳ ꓬꓰ ꓠ ꓗꓹ ꓡꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= 

ꓝꓮꓲ ꓕꓲ ꓫꓵꓽ ꓠꓬ ꓩꓴ-ꓡꓲ ꓪ ꓔꓲ ꓡꓰ ꓬꓲ ꓓꓳꓽ ꓑ ꓙˍ ꓡꓳ= ꓓꓵꓽ ꓙ ꓮ ꓡꓰ ꓓꓴ ꓬꓰ ꓢꓴ ꓕꓲ ꓣꓳ ꓓꓳꓻ ꓡꓺꓳ꓾ ꓐꓰ ꓬꓲ ꓕꓰ ꓡꓰ ꓑ ꓙꓽˍ ꓡꓳ= ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓠꓽ ꓓꓵꓽ ꓙ ꓮ ꓡꓰ ꓓꓴ ꓟꓬꓱꓽ ꓐꓬꓱꓽ ꓘꓶꓽ ꓬꓰ ꓟꓸ ꓖꓶ ꓔꓬ ꓟ ꓑꓶꓸ ꓓꓴ ꓕꓰ ꓡꓰ ꓬꓲ ꓓꓳꓽ ꓑ ꓙꓽˍ ꓟ ꓥ ꓡꓳ= ꓬꓲ ꓔꓯ ꓠꓬ ꓕꓱ ꓡꓱ ꓐꓯ ꓡꓳ= ꓳ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓠꓬ ꓝꓮꓲ ꓕꓲ ꓧꓪꓹ ꓢꓯꓸ ꓬꓲꓼ ꓡꓺꓳ= ꓠꓱꓸ ꓐꓯ ꓢꓴ ꓕꓲ ꓐꓱ ꓠꓬ ꓕꓱ ꓡꓱ ꓐꓯ ꓡꓳ= ꓬꓲ-ꓡꓲ-ꓬ ꓝꓮꓲ ꓕꓲ ꓧꓪꓹ ꓟꓳꓸ ꓖꓶ ꓡˍ ꓟ ꓥ ꓡꓳ꓾ ꓐꓰ ꓐꓯ ꓢꓴ ꓙꓳˍ ꓡꓳ= ꓠꓱꓸ ꓐꓯ ꓢꓴ ꓠꓬ ꓮ ꓠꓱ ꓕꓯ ꓟꓷꓽ ꓠꓷꓹ ꓝꓸ ꓒ ꓕꓲ ꓣꓳ ꓣꓳ ꓣꓳꓽ ꓔꓯ ꓟꓳꓸ ꓖꓶ ꓡˍ ꓡꓳ꓾ ꓐꓰ ꓐꓯ ꓢꓴˍ ꓟꓲ ꓙꓳˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓯ ꓔꓬ ꓟ ꓮꓽ ꓟ ꓥ ꓡ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓐꓯ ꓔꓬ ꓟ ꓥ ꓡꓳ= ꓬꓲ ꓪ ꓠꓲꓹ ꓟ ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓓꓵꓽ ꓙ ꓮ ꓡꓰ ꓓꓴ ꓬꓰ ꓟꓸ ꓖꓶ ꓢꓴ ꓕꓲ ꓣꓳˍ ꓡꓰ ꓐꓰ ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓟꓳˍ ꓡꓳ= 

ꓩꓴ-ꓡꓲ ꓪ ꓔꓲ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓓꓵꓽ ꓙ ꓮ ꓡꓰ ꓓꓴ ꓟꓬꓱꓽ ꓬꓰ ꓟꓸ ꓖꓶ ꓢꓴ ꓕꓲ ꓣꓳˍ ꓡꓰ ꓐꓰ ꓡꓳꓸ ꓟꓳˍ ꓡꓳ= ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓽ ꓖꓳ ꓓꓱꓽ ꓔꓲꓹ ꓒ ꓬꓳ-ꓦˍ ꓡꓰ ꓐꓰ ꓓꓵꓽ ꓙ ꓮ ꓡꓰ ꓓꓴ ꓟꓬꓱꓽ ꓬꓰ ꓟꓸ ꓖꓴ ꓢꓴ ꓕꓲ ꓣꓳˍ ꓟꓽ ꓥ= ꓢꓲ ꓒ ꓬꓰ-ꓢꓴ ꓮꓽ ꓟ ꓥ ꓡ ꓐꓯ ꓠꓬ ꓣꓳ ꓔꓯ ꓝꓴꓲꓸ ꓗꓪ ꓐꓰ ꓚꓬꓴꓸ ꓢꓴ ꓢꓲꓺ ꓒ꓾ ꓣꓳ ꓔꓯ ꓝꓴꓲꓸ ꓗꓪ ꓡꓲꓹ ꓗꓷ ꓝꓲ ꓢꓴ꓾ ꓬꓲ ꓚꓲꓸ ꓛꓬ ꓖꓳ ꓓꓱꓽ ꓔꓯ ꓫꓵꓽ ꓚꓵꓸ ꓓꓳ ꓢꓲ ꓠꓬꓲ ꓖꓳ-ꓡ-ꓓꓳ-ꓕ ꓪ ꓚꓲ ꓗꓪ ꓢꓰꓼ ꓗꓷˍ ꓗꓪ ꓛꓲ ꓟꓶ ꓗꓷ ꓢꓲ ꓠꓬꓲ꓾ ꓣꓳ ꓔꓯ ꓚꓬꓴꓸ ꓖꓶ ꓡ ꓢꓴ ꓥ ꓡꓳ꓾ ꓐꓰ ꓢꓷꓸ ꓠ ꓗꓹ ꓟ ꓔꓯ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓮ ꓡꓰ ꓐꓰ ꓘꓳꓹ ꓣꓴ ꓔꓬ ꓡ= ꓮ ꓡꓰ ꓐꓰ ꓢꓷꓸ ꓔ ꓡ= ꓢꓲꓺ ꓒ ꓬꓰ-ꓢꓴ ꓠꓬ ꓮꓽ ꓟ ꓥ ꓡ꓾ ꓐꓰ ꓣꓳ ꓚꓲꓸ ꓛꓬ ꓠꓲꓹ ꓟ ꓠꓯꓸꓼ ꓗꓪˍ ꓟꓲ ꓣꓳ ꓓꓵꓽ ꓙ ꓠꓬꓲ ꓠ ꓔ ꓡꓳ= ꓕꓲ ꓖ ꓕꓲ ꓧꓪꓹ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓠꓽ ꓓꓵꓽ ꓙ ꓟꓶ ꓓꓴ ꓬꓰ ꓢꓴ꓾ ꓓꓵꓽ ꓙ ꓮ ꓡꓰ ꓓꓴ ꓬꓰ ꓟꓸ ꓖꓶ ꓢꓴ ꓕꓲ ꓣꓳˍ ꓡꓰ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙ ꓠꓬꓲ ꓗꓴꓸˍ ꓡꓳ= ꓖꓳ ꓡꓱ ꓥˍ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓽ ꓣꓳ ꓔꓯ ꓚꓬꓴꓸ ꓢꓴ ꓢꓲꓺ ꓒ ꓬꓰ-ꓢꓴ ꓥ ꓟ꓾ ꓣꓳ ꓔꓯ ꓠꓲꓹ ꓠꓵ ꓢꓲ ꓠꓬꓲ ꓬꓲ ꓚꓲꓸ ꓛꓬ ꓖꓳ ꓓꓱꓽˍ ꓟꓲ ꓢꓰꓼ ꓗꓷˍ ꓗꓪ ꓛꓲ ꓟꓶ ꓗꓷ ꓢꓲ ꓠꓬꓲ ꓣꓳ ꓔꓯ ꓚꓬꓴꓸ ꓢꓴ ꓢꓲꓺ ꓒ ꓬꓰ-ꓢꓴ ꓥ ꓡꓳ꓾ ꓐꓰ ꓢꓷꓸ ꓔ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓮ ꓙꓵꓽ ꓢꓴ ꓔꓯ ꓪꓴ-ꓢ ꓶꓼ ꓥꓳꓽ ꓙꓱꓽ ꓖꓶ ꓝꓲ=