ꓥꓪ ꓮ ꓫꓵꓽ ꓟꓶˍ ꓡ?

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ ꓠꓬꓲ. ꓠꓬꓲ ꓠꓬ ꓢꓲꓽ ꓫꓬ, ꓟ ꓕꓲꓽ ꓠꓽ ꓘꓴ ꓗꓪ ꓠꓽ ꓠꓬꓲꓽ ꓠꓬꓲ ꓗꓪ ꓛꓲ ꓡꓺꓳ꓿ ꓝꓮꓲ. ꓕꓲꓽ ꓠꓽ ꓗꓪ ꓠꓬ ꓢꓯ. ꓬꓲꓼ ꓡ ꓑꓮꓲꓽ ꓛꓲ ꓡꓺꓳ꓿  ꓖꓳ ꓡꓱ ꓠꓬꓲ ꓣꓳꓽ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓐꓰ ꓕꓲꓽ ꓪ ꓫ ꓙꓵ ꓜꓲꓽ ꓠꓬꓲ꓾ ꓜꓽ ꓓꓴ ꓚꓲ. ꓠꓬꓲ ꓬꓰ ꓔꓬ, ꓟ ꓠꓬ ꓠꓬꓲ. ꓠꓬꓲ ꓢꓲꓽ ꓫꓬ, ꓟ ꓠꓽ ꓠꓬꓲꓽ ꓠꓬꓲ ꓗꓪ ꓛꓲ ꓡꓺꓳ꓿

ꓢꓲꓽ ꓫꓬ, ꓟ ꓕꓲꓽ ꓠꓽ ꓐꓯ, ꓟ ꓠꓬ ꓢꓯ. ꓬꓲꓼ ꓡˍ ꓟ ꓑꓮꓲꓽ ꓟꓽ ꓛꓲ ꓡ ꓢꓰꓽ ꓕꓲꓽ ꓠꓽ ꓔꓯ ꓐꓯˍ ꓡꓳ꓿ ꓣꓳꓽ ꓐꓱ ꓶ ꓮ ꓘꓶ. ꓬꓳ ꓚꓵˍ ꓟ  ꓕꓲꓽ ꓠꓽˍ ꓟꓲ ꓥꓳ꓿ ꓡ ꓠ, ꓟ ꓠꓽ ꓥꓪꓽ ꓠꓬꓲ ꓓꓽ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓕꓯꓼ ꓢꓰꓼ ꓗꓷˍ ꓟ꓾ ꓢꓲ ꓒ ꓬꓰ‐ꓢꓴ ꓫꓵˍ ꓟ ꓔꓯ ꓣꓳꓽ ꓬꓰˍ ꓟ ꓥꓳ꓿ ꓮ ꓙꓵꓽ ꓢꓴ ꓙꓽ ꓖꓶꓽ ꓓꓴ ꓬꓰ ꓡꓯ꓿

ꓠꓬꓲ. ꓠꓬꓲ ꓢꓲ ꓫꓬ, ꓕꓳ ꓶ (ꓬꓳ‐ꓦ 13ꓽ21‐33꓾ 36‐38) ꓗꓪ ꓬꓴ‐ꓓ ꓒ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓪꓴꓽ ꓜˍ ꓟ  ꓟ. ꓟꓲꓽ ꓔꓯ ꓣꓳꓽ ꓑ ꓙꓽˍ ꓡꓳ꓿ ꓬꓴ‐ꓓ ꓒ ꓠꓬ ꓬꓲ. ꓢꓲ ꓒ ꓬꓰ‐ꓢꓴ ꓔꓯ ꓪꓴꓽ ꓜ ꓗꓷ ꓟ ꓣꓳꓽ ꓑ ꓙꓽˍ ꓡꓳ꓿

“ꓥꓪ ꓠꓴ ꓔꓯ ꓕꓱ ꓟ ꓖꓶꓽˍ ꓠꓬ ꓠꓴ ꓪ ꓗꓪ ꓕꓯ ꓮ ꓫꓵꓽ ꓖꓶꓽ ꓡ?” ꓐꓰ ꓬꓴ‐ꓓ ꓒ ꓡꓰ ꓔꓲꓺ ꓒ ꓪꓴ. ꓓꓴ ꓣꓱꓽ ꓢꓴ ꓐꓴ ꓔꓯ ꓓꓰꓽˍ ꓟ ꓡꓰ ꓐꓰ ꓟꓲꓺ ꓠꓯꓺ ꓕꓱ ꓟ ꓗꓪ ꓠꓬ “ꓠꓴ ꓥꓪ ꓔꓯ ꓮ ꓫꓵꓽ ꓖꓶꓽ ꓡ? ꓐꓰ ꓐꓯ ꓟ ꓗꓪ ꓐꓰ ꓐꓬꓺ ꓡꓰ ꓠ, ꓟ ꓪꓴ. ꓔꓴˍ ꓟ ꓥꓳ꓿ “ꓥꓪ ꓮ ꓫꓵꓽ ꓟꓶ ꓡ? ꓐꓰ ꓓꓵꓽ ꓙˍ ꓟ ꓓꓵꓽ ꓙ ꓚꓱ, ꓗꓪ ꓐꓰ ꓞꓳ ꓤ ꓠꓬ ꓐꓬꓺ ꓡꓰ ꓡꓳ꓿

ꓢꓲ ꓒ ꓬꓰ‐ꓢꓴ ꓔꓯꓺ ꓥꓳꓽ ꓗꓪ ꓐꓰ ꓐꓯ ꓟꓳ. ꓖꓶꓽˍ ꓟ ꓗꓪ ꓤꓽ ꓠꓬꓲ ꓣꓳ ꓔꓯꓺ ꓥꓳꓽ ꓗꓪ ꓤ ꓣꓳ ꓠꓬ “ꓥꓪ ꓟꓶ ꓜꓲꓼ ꓙꓳˍ ꓟ ꓡꓯꓼ ꓪ ꓥꓪ ꓔꓯ ꓖꓶꓽ ꓡꓯ” ꓐꓰ ꓐꓯ ꓢꓲ ꓤꓽ ꓣꓳ ꓠꓬ ꓶ ꓤ ꓗꓪ ꓙꓰ ꓢꓲ ꓬꓲ. ꓤꓶꓻ ꓔꓯ ꓐꓬꓺ ꓡꓰ ꓠ, ꓟ ꓪꓴ. ꓔꓴ ꓟ ꓣꓳꓽ ꓢꓷ. ꓡꓳ꓿

ꓖꓳ ꓡꓱ ꓠꓬꓲ ꓟꓲꓺ ꓠꓯ ꓕꓱ ꓟ ꓗꓪ ꓠꓬ꓾ ꓥꓪ ꓮ ꓫꓵꓽ ꓖꓶꓽ ꓠꓯ, ꓡ ꓐꓰ ꓟꓽ ꓓꓵꓽ ꓙ ꓙ ꓐꓰ ꓥꓪ ꓮ ꓫꓵꓽ ꓟꓶ ꓠꓯ ꓡ? ꓥꓪ ꓕꓱ ꓡꓱ ꓬꓰ ꓗꓷ ꓠꓬ ꓥꓪ ꓔꓯ ꓮ ꓟꓽ ꓮ ꓫꓵꓽ ꓖꓶꓽˍ ꓡ? ꓐꓰ ꓓꓵꓽ ꓙ ꓢꓴ ꓟꓬꓽ ꓡˍ ꓕꓯ ꓞꓳ ꓤ ꓠꓬ ꓐꓬꓺ ꓡꓰ ꓡꓳ꓿

ꓠꓬꓲ. ꓠꓬꓲ ꓬꓴ‐ꓓ ꓒ ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ ꓬꓲ. ꓖꓼ ꓛꓳ ꓔꓬ,  ꓟ ꓠꓬ ꓕꓲꓽ ꓫꓵꓽ ꓫꓵꓽ ꓟꓶ, ꓠ, ꓟ ꓡꓰ ꓥꓳ꓿ ꓕꓲꓽ ꓫꓵꓽ ꓫꓵꓽ ꓟꓽ ꓟꓶ ꓗꓷ ꓡꓰ ꓕꓯ ꓬꓲ. ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓡꓰ ꓪꓴꓽ ꓜ ꓔꓴ ꓡ ꓡꓳ꓿

ꓬꓲ. ꓤ ꓠꓬꓲ ꓤ ꓐꓴ‐ꓳ ꓠꓬꓲ. ꓠꓬꓲ ꓣꓳꓽ ꓓꓵꓽ ꓙ ꓓꓴ ꓠꓬ ꓣꓳꓽ ꓦꓲꓻ ꓗꓪ꓾ ꓣꓳꓽ ꓔꓬ, ꓟ ꓘꓴ ꓜꓲꓼ ꓞꓳ ꓗꓪ꓾ ꓣꓳꓽ ꓐꓰ ꓗꓴ. ꓜꓲꓼ ꓙꓳˍ ꓟ ꓘꓴ ꓗꓪ꓾ ꓥꓪ ꓮ ꓫꓵꓽ ꓟꓶ ꓡ ꓐꓰ ꓓꓵꓽ ꓙ ꓔꓬ, ꓢꓴ ꓟꓬˍ ꓠꓬ꓾ ꓜꓴ ꓖꓳ ꓟ ꓠꓬ ꓐꓬꓺ ꓡꓰ ꓥꓳ꓿

ꓖꓳ ꓡꓱ ꓠꓬꓲ ꓣꓳꓽˍ ꓠꓬ ꓣꓳꓽ ꓮ ꓫꓵꓽ ꓟꓶ ꓡ? ꓐꓯˍ ꓟ ꓢꓶ. ꓟꓽ ꓛꓲ ꓣꓳꓽ ꓮ ꓫꓵꓽ ꓖꓶꓽ ꓐ ꓡ ꓡ? ꓐꓯ ꓟ ꓔꓯ ꓟꓬꓽ ꓠꓬꓲ ꓓꓵꓽ ꓙ ꓡꓯ꓿ ꓣꓴ, ꓟ ꓢꓶ. ꓟꓽ ꓛꓲ ꓖꓶꓽ ꓟ ꓠꓬ ꓶ ꓙꓳ ꓫꓱ, ꓙꓳ ꓡꓳ ꓐꓰ ꓢꓲ ꓫꓬ, ꓕꓳ ꓶ ꓗꓪ ꓐꓯ ꓔ ꓟ ꓡꓰ ꓐꓰ ꓖꓶꓽ ꓢꓴ ꓬꓰ ꓡꓯ꓿