ꓦꓻ ꓟꓲ ꓢꓲ ꓒꓽ ꓐꓰ ꓟꓬꓱꓽ ꓬꓰ ꓢꓴ ꓐꓴ

27 ꓫꓵꓽ ꓠꓽ ꓠꓽ ꓦꓬꓼ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓝꓲꓸ

 

ꓬꓲ-ꓢ-ꓬ ꓕꓳꓽ ꓶ 5: 1- 7

ꓥꓪ ꓠꓲꓹ ꓠꓵ ꓔ ꓢꓴ ꓔꓯ ꓚꓺ_ ꓟ꓾ ꓬꓲ ꓛꓱꓼ ꓡꓱ ꓐꓱꓺ ꓔꓯ ꓖꓴ_ ꓟ꓾ ꓥꓪ ꓮ ꓓꓲ ꓠꓲꓹ ꓠꓵ ꓔ ꓢꓴ ꓐꓱ ꓶ ꓟꓴ ꓖꓪꓽ ꓕꓲ ꓚꓱꓹ ꓥꓪ ꓖꓪꓺ_ ꓐꓯ_ ꓡꓳ꓿ ꓥꓪ ꓮ ꓓꓲ ꓠꓲꓹ ꓠꓵ ꓔ ꓢꓴ ꓠꓬ ꓮ ꓘꓶ ꓞꓶꓻ_ ꓟ ꓪꓽ ꓑꓬꓹ ꓗꓪ ꓛꓱꓼ ꓡꓱ ꓐꓱ ꓕꓲ ꓐꓱ ꓙꓳ_ ꓡꓳ꓿ ꓬꓲ ꓡꓰ ꓛꓱꓼ ꓡꓱ ꓐꓱ ꓖꓳ ꓟ ꓘꓪ ꓢꓲ꓾ ꓖꓳ ꓗꓪ ꓙꓳ_ ꓟ ꓡꓳꓺ ꓞꓲꓹ ꓖꓳꓺ ꓦ ꓗꓷ ꓢꓲ ꓠꓬꓲ꓾ ꓮ ꓓꓲ ꓙꓲ_ ꓟ ꓛꓱꓼ ꓡꓱ ꓚ ꓡꓰ ꓐꓱ ꓖꓳ ꓟ ꓠꓯꓸꓼ ꓗꓪ ꓔꓶꓺ_ ꓡꓳ꓿ ꓐꓱ ꓗꓳ ꓡꓳ ꓗꓪ ꓡꓳꓸ ꓜꓳ ꓦꓲ ꓕꓲ ꓦꓲ ꓫꓬ ꓢꓲ꓾ ꓦꓲ ꓖꓳ ꓟ ꓠꓯꓸꓼ ꓗꓪ ꓛꓱꓼ ꓡꓱ ꓢꓶ ꓠꓬꓲꓸ ꓖꓴ ꓕꓲ ꓟ ꓫꓬ_ ꓡꓳ꓿ ꓖꓳ ꓡꓱ ꓠꓬ ꓛꓱꓼ ꓡꓱ ꓢꓶ ꓓꓱꓼ ꓡ_ ꓟ ꓔꓯ ꓬꓲ ꓥꓳ ꓡꓳꓸ ꓔꓬ_ ꓡꓳ꓿ ꓖꓳ ꓡꓱ ꓥ_ ꓟꓲ ꓛꓱꓼ ꓡꓱ ꓗꓳꓸ ꓢꓶ ꓓꓱ ꓡ_ ꓡꓳ꓿ ꓮ ꓟꓶ ꓠꓽ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ_ ꓐꓰ꓾ ꓬꓴ-ꓔ ꓟꓵꓽ ꓗꓪ ꓔꓬ ꓢꓴ ꓞꓳ ꓑ ꓤ ꓐꓴꓳ꓾ ꓥꓪ ꓠꓴ ꓪ ꓔꓯ ꓓꓰꓽ_ ꓠꓬꓲ꓾ ꓥꓪ_ ꓐꓰ ꓥꓪ ꓛꓱꓼ ꓡꓱ ꓚ ꓠꓬꓲ ꓗꓴ ꓚꓸꓼ ꓗꓪ ꓐꓯ ꓟꓴ ꓘꓶꓽ ꓖꓶ ꓡꓯ꓿ ꓥꓪ ꓛꓱꓼ ꓡꓱ ꓐꓱ ꓗꓪ ꓥꓪ ꓟꓽ ꓬꓰ ꓗꓷ ꓟ꓾ ꓠꓱ ꓐꓯꓼ ꓬꓰ ꓓꓴ ꓙꓳ_ ꓢꓰꓽ ꓡꓺꓽ꓿ ꓛꓱꓼ ꓡꓱ ꓢꓶ ꓓꓱ ꓡ_ ꓟ ꓔꓯ ꓥꓪ ꓥꓳ ꓡꓳꓸ ꓔꓬ_ ꓕꓯ꓾ ꓮ ꓫꓵ ꓑꓶ ꓓꓴ ꓛꓱꓼ ꓡꓱ ꓗꓳꓸ ꓢꓶ ꓓꓱꓼ ꓡ_ ꓡꓳꓺꓽ꓿ ꓮ ꓟꓶ ꓥꓪ ꓛꓱꓼ ꓡꓱ ꓐꓱ ꓔꓯ ꓥꓪ ꓮ ꓡꓲ ꓬꓰ_ ꓥꓳ꓾ ꓐꓰ ꓥꓪ ꓠꓴ ꓪ ꓔꓯ ꓐꓯ ꓟꓸ ꓖꓶ ꓠꓬꓲ꓿ ꓖꓳ ꓗꓪ ꓚꓱ ꓔ_ ꓟ ꓐꓱ ꓚꓱꓺ ꓜꓲꓻ ꓔꓯ ꓥꓪ ꓣꓴ ꓦ ꓗꓷ ꓢꓲ ꓐꓱ ꓔꓯ ꓙꓱꓽ ꓤ ꓜ ꓖꓴ ꓡꓰ ꓝꓲ_ ꓥꓳ꓿ ꓚꓳ ꓡꓳ ꓡꓳ ꓗꓪ ꓚꓱ ꓔ_ ꓟ ꓐꓱ ꓚꓱ ꓥꓪ ꓒꓬꓹ ꓗꓷ ꓠꓬ꓾ ꓙꓱꓽ ꓤ ꓕꓳꓼ ꓖꓴ ꓗꓷ ꓡꓰ_ ꓥꓳ꓿ ꓖꓳ ꓡꓱ ꓢꓲ ꓥꓪ ꓐꓱ ꓔꓯ ꓥꓪ ꓡꓰ ꓙꓬ ꓓꓷꓼ ꓓꓷ ꓐꓰ ꓛꓹ ꓦ_ ꓥꓳ꓿ ꓬꓲ ꓗꓸ_ ꓟꓲ ꓟꓽ ꓫꓬꓹ ꓡꓲꓸ ꓖꓶ꓾ ꓟꓲ ꓠꓯ_ ꓟꓲ ꓟꓽ ꓘꓪ ꓒꓳꓹ꓿ ꓛꓴꓽ ꓜꓲꓻ_ ꓐꓰ ꓛꓴꓽ ꓟꓳꓼ ꓠꓽ ꓣꓱ ꓡ_ ꓥꓳ꓿ ꓐꓱ ꓗꓪ ꓟꓶ ꓦ ꓟꓽ ꓦ ꓡ ꓠꓹ ꓟ꓾ ꓟꓴ ꓗꓴꓸ ꓔꓯ ꓥꓪ ꓡꓰ ꓕꓵꓼ ꓪ ꓖꓶ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪ ꓬꓲ ꓛꓱꓼ ꓡꓱ ꓐꓱꓺ ꓠꓬ ꓬꓲ-ꓢꓷ-ꓡꓰ ꓕꓲ ꓦꓲ ꓟ ꓥ ꓡꓳ꓿ ꓬꓴ-ꓔ ꓡ ꓞꓳ ꓐꓴ ꓠꓬ ꓬꓲ ꓗꓹ ꓛꓲ_ ꓟ ꓡꓲꓸ ꓤ ꓥ ꓡꓳ꓿ ꓬꓲ ꓠꓬ ꓔꓱꓹ ꓜꓳꓽ_ ꓟ ꓔꓯ ꓥꓳ ꓡꓳꓸ ꓔꓬ_ ꓟꓲ꓾ ꓠꓬꓲ ꓠꓹ꓾ ꓫꓵꓽ ꓬꓲꓻ ꓝꓲ_ ꓟ ꓙꓳ_ ꓡꓳ꓿ ꓙꓲ ꓫꓬ_ ꓟ ꓬꓰ_ ꓟ ꓔꓯ ꓥꓳ ꓡꓳꓸ_ ꓟꓲ꓾ ꓠꓬꓲ ꓠꓹ꓾ ꓘꓴ ꓔꓴ ꓡ_ ꓟ ꓢꓯꓼ ꓑ ꓙ_ ꓡꓳ꓿

ꓒꓲ-ꓡꓲ-ꓒꓲ 4ꓽ 6-9

ꓮꓸ ꓫꓵ ꓗꓪˍ ꓟꓲ ꓟꓽ ꓙꓽ ꓫꓸ ꓫꓸ꓾ ꓪꓽ ꓘꓴˍ ꓟ ꓐꓰ꓾ ꓶꓼ ꓓꓰꓽˍ ꓟ ꓐꓰ꓾ ꓫꓸ ꓟꓳˍ ꓟ ꓡꓰ ꓠꓴ ꓪꓽ ꓓꓰꓽˍ ꓟ ꓪꓴ-ꓢ ꓔꓯ ꓢꓷꓸ ꓡꓰ ꓝꓲ꓿ꓖꓳ ꓡꓱ ꓢꓲ ꓙꓽ ꓜꓲꓼˍ ꓟ ꓥ ꓕ ꓑꓳꓸ ꓕꓯ ꓢꓲ ꓘꓳꓻ ꓙꓰˍ ꓟ ꓪꓴ-ꓢ ꓬꓲ ꓢꓲ ꓡꓲ ꓟ ꓠꓬ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ꓾ ꓠꓴ ꓪꓽ ꓠꓲꓹ ꓟ ꓐꓰ ꓠꓴ ꓪꓽ ꓓꓵꓽ ꓙˍ ꓟ ꓔꓯ ꓔꓺ ꓙ ꓡꓳꓸ ꓙˍ ꓥꓳ꓿ꓝꓮꓲ ꓕꓲ ꓘꓶ ꓠꓬ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓔꓱꓹˍ ꓟ ꓮꓸ ꓫꓵ ꓥ ꓟꓲ꓾ ꓒꓵꓽ ꓠꓯꓹ ꓟ ꓮꓸ ꓫꓵ ꓥ ꓟꓲ꓾ ꓜꓳꓽ ꓓꓰꓺ ꓟ ꓮꓸ ꓫꓵ ꓥ ꓟꓲ꓾ ꓢꓲꓽ ꓫꓬꓻ ꓟ ꓮꓸ ꓫꓵ ꓥ ꓟꓲ꓾ ꓘꓳꓻ ꓣꓴ ꓓꓻ ꓟ ꓮꓸ ꓫꓵ ꓥ ꓟꓲ꓾ ꓙꓲꓻˍ ꓟ ꓟꓬꓱ ꓓꓳꓽ ꓙꓳˍ ꓟ ꓮꓸ ꓫꓵ ꓥ ꓟꓲ꓾ ꓙꓲꓻ ꓓꓰ ꓡꓰ ꓟ ꓐꓰ ꓫꓱꓸ ꓖꓶ ꓒꓵꓽˍ ꓟ ꓮꓸ ꓫꓵ ꓙꓳˍ ꓠꓬ꓾ ꓕꓱ ꓡꓱ ꓡꓳ ꓫꓵꓽ ꓔꓯ ꓓꓵꓽ ꓙꓽ ꓔ꓿ꓥꓪ ꓗꓪ ꓐꓰ ꓠꓴ ꓪꓽ ꓢꓳ ꓟꓶ ꓟ ꓐꓰ꓾ ꓘꓳꓻ ꓣꓴ ꓟꓶ ꓟ ꓐꓰ꓾ ꓑ ꓙꓽ ꓗꓷ ꓟ ꓐꓰ ꓡꓳꓸ ꓟꓳꓻ ꓗꓷ ꓟ ꓕꓱ ꓟꓬ ꓫꓵꓽ ꓠꓴ ꓪꓽˍ ꓟꓲ ꓬꓰ꓿ ꓖꓳ ꓡꓱ ꓠꓬ ꓢꓲ ꓡꓲ ꓟ ꓖꓶ ꓢꓴ ꓪꓴ-ꓢ ꓠꓽ ꓠꓴ ꓪꓽˍ ꓐꓰ ꓕꓲ ꓪꓺꓼ ꓔꓬ ꓥꓳ꓿

ꓟ- ꓕꓲ 21ꓽ 33-43

ꓔꓯ ꓥꓳꓽ ꓝꓮꓲ ꓕꓲ ꓟ ꓔꓯ ꓠꓴ ꓪꓽ ꓠ ꓠꓹ꓿ ꓦꓻ ꓟꓲ ꓢꓲ ꓒꓽ ꓕꓲ ꓣꓳ ꓠꓬ ꓛꓱꓼ ꓡꓱ ꓕꓲ ꓐꓱ ꓔꓶ ꓢꓲ꓾ ꓚꓳ ꓡꓳ ꓡꓳ ꓚꓱꓺ ꓢꓲ ꓠꓬꓲ꓾ ꓐꓱ ꓠꓯꓸꓼ ꓗꓪ ꓛꓱꓼ ꓡꓱꓼ ꓢꓶꓽ ꓠꓬꓲꓸ ꓖꓴ ꓚꓴꓸˍ ꓡꓳ꓿ ꓝꓮꓲ ꓡꓳꓸ ꓜꓳꓻ ꓦꓲˍ ꓟꓲ ꓕꓲ ꓦꓲ ꓫꓬꓹ ꓢꓲ꓾ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓑꓯꓹ ꓖꓶꓽ ꓗꓷ ꓠꓬ꓾ ꓠꓱꓸ ꓐꓯꓼ ꓕꓲ ꓟꓵꓽ ꓗꓪ ꓙꓰˍ ꓡꓳ꓿ꓛꓱꓼ ꓡꓱꓼ ꓢꓶ ꓧꓼ ꓝꓲꓸ ꓛꓲ ꓡ ꓠꓬ ꓬꓲ ꓚꓳ ꓑꓸ ꓐꓴ ꓔꓯ ꓬꓲ ꓟꓶ ꓙꓲꓽ ꓙꓳˍ ꓟ ꓣꓷꓽ ꓫ ꓔꓯꓹ ꓬꓲꓼ ꓡ ꓠꓹ ꓟ꓾ ꓟꓬꓱꓽ ꓬꓰ ꓢꓴ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ꓖꓳ ꓡꓱ ꓥ ꓟꓲ ꓛꓱꓼ ꓡꓱꓼ ꓐꓱ ꓑꓯꓹ ꓬꓰ ꓢꓴ ꓐꓴ ꓡꓰ ꓬꓲ ꓚꓳ ꓑꓸ ꓐꓴ ꓔꓯ ꓣꓴ ꓢꓲ꓾ ꓕꓲ ꓣꓳ ꓔꓯ ꓠꓬ ꓓꓶꓽ꓾ ꓕꓲ ꓣꓳ ꓔꓯ ꓢꓰꓼ꓾ ꓕꓲ ꓣꓳ ꓔꓯ ꓠꓬ Bꓸ ꓛꓲ ꓡꓰ ꓡꓳꓺˍ ꓡꓳ꓿ꓝꓮꓲ ꓕꓲ ꓧꓪꓹ ꓬꓲ ꓡꓰ ꓬꓲ ꓚꓳ ꓑꓸ ꓐꓴ ꓧꓶꓸ ꓕꓯˍ ꓟ ꓟꓬ ꓟꓽ ꓞꓲ ꓕꓲ ꓧꓳꓽ ꓔꓯ ꓝꓲ ꓩꓴ ꓗꓷˍ ꓟꓲ꓾ ꓬꓲ ꓪꓽ ꓠꓬ ꓧꓶꓸ ꓕꓯꓽˍ ꓟ ꓡꓰ ꓐꓰ ꓬꓲ ꓪꓽ ꓔꓯ ꓬꓰ ꓖꓶˍ ꓢꓰꓽ ꓡꓳ꓿ꓗꓸ ꓠꓯꓸ ꓠꓬ꓾ ꓥꓪ ꓮ ꓐꓲ ꓔꓯ ꓠꓽ ꓬꓲ ꓪꓽ ꓙꓳꓺ ꓒꓵꓽˍ ꓥꓳ꓾ ꓓꓵꓽ ꓙ ꓢꓲ꓾ ꓬꓲ ꓤ ꓔꓯ ꓬꓲ ꓪꓽ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ꓖꓳ ꓡꓱ ꓥ ꓟꓲ ꓛꓱꓼ ꓡꓱ ꓐꓱ ꓑꓯꓹ ꓬꓰ ꓢꓴ ꓐꓴ ꓡꓰ ꓬꓲ ꓤ ꓔꓯ ꓟꓳꓻ ꓗꓷ ꓕꓯ꓾ ꓕꓱ ꓟ ꓠꓬ ꓬꓲ ꓡꓯꓼ ꓪ ꓟꓶ ꓢꓴ ꓥꓳ꓾ ꓡꓯ꓾ ꓣꓳꓽ ꓬꓲ ꓔꓯ ꓢꓰꓼ ꓗꓷ ꓢꓲ꓾ ꓬꓲ ꓡꓯꓼ ꓪ ꓔꓯ ꓦꓴꓻ ꓓꓴ ꓬꓰ ꓡꓯ꓾ ꓐꓰ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ ꓣꓴ ꓢꓲ ꓐꓱꓻ ꓠꓱ ꓫꓱꓸ ꓟꓸꓼ ꓗꓪ ꓖꓼ ꓦ ꓗꓷ ꓢꓲ ꓢꓰꓼ ꓗꓷꓳ꓿ꓖꓳ ꓡꓱ ꓠꓬ ꓐꓱ ꓬꓲꓸ ꓢꓲ ꓒꓽ ꓡꓻ ꓕꓯ꓾ ꓬꓲ ꓡꓰ ꓦꓻ ꓟꓲ ꓑꓯꓹ ꓖꓶ ꓔ ꓢꓴ ꓐꓴ ꓔꓯ ꓮ ꓡꓲ ꓬꓰ ꓖꓶ ꓡ ꓥꓳ ꓪ?꓾ ꓐꓰ ꓠ ꓠꓬꓲˍ ꓕꓯ꓾ꓬꓲ ꓪꓽ ꓡꓰ ꓬꓲ ꓔꓯ꓾ ꓮ ꓡꓲ ꓥ ꓟꓲ ꓞꓳ ꓥꓶ ꓖꓳ ꓕꓲ ꓧꓳꓽ ꓟ ꓔꓯ ꓢꓰꓼ ꓗꓷ ꓢꓲ꓾ ꓛꓱꓼ ꓡꓱꓼ ꓐꓱ ꓠꓬ ꓬꓲ ꓝꓲꓸ ꓛꓲ ꓡ ꓕꓯ ꓬꓲ ꓔꓯ ꓢꓶꓹ ꓢꓶ ꓡꓯꓼ ꓙꓱ ꓖꓶ ꓡ ꓟ ꓠꓱꓸ ꓐꓯꓼ ꓕꓲ ꓧꓳꓽ ꓔꓯ ꓑꓯꓹ ꓖꓶˍ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓢꓲꓽ ꓫꓬ ꓕꓳ ꓶ ꓗꓪ꓾ ꓦꓲ ꓫꓬꓹ ꓢꓴ ꓡꓰ ꓡꓳ ꓗꓷ ꓟ Bꓸ ꓛꓲ ꓠꓬ꓾ ꓦꓲ ꓚꓰꓺ ꓬꓲ ꓡꓯꓼ ꓗꓪ ꓟ ꓡꓳ ꓓꓰ ꓓꓽ ꓟ ꓒꓬꓱꓼ ꓡꓺꓳ꓿ ꓕꓱ ꓟ ꓠꓬ ꓢꓲ ꓒꓽ ꓡꓰ ꓬꓰˍ ꓟ ꓥ ꓢꓲ꓾ ꓣꓳꓽ ꓡꓳꓸ ꓟꓳꓻ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓓꓴ ꓥꓳ꓾ ꓐꓰ ꓐꓳ ꓔ ꓟ ꓔꓯ ꓠꓴ ꓪꓽ ꓟꓽ ꓵ ꓠꓬꓲ ꓡ?ꓖꓳ ꓡꓱ ꓠꓬꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓪꓴ-ꓢ ꓗꓴꓷꓼ ꓠꓬ ꓠꓴ ꓪꓽ ꓔꓯˍ ꓐꓰ ꓣꓴꓻ ꓔꓯꓹ ꓙꓰ ꓢꓲ꓾ ꓬꓲ ꓢꓶꓽ ꓓꓱꓼˍ ꓟ ꓞꓳ ꓫꓵꓽ ꓔꓯ ꓖꓶꓽ ꓗꓷˍ ꓥꓳ꓿

Add new comment

2 + 18 =