ꓪꓰꓺ ꓤꓽ ꓔꓯ ꓘꓳꓹ ꓣꓴ ꓠꓹ ꓟ ꓐꓰ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓡꓳꓹ ꓠ ꓟ (Homily)

Saturday, July 16, 2022

ꓘꓴ ꓜꓲꓼ ꓞꓳ ꓟꓵꓽ ꓘꓳꓼ 16 ꓫꓵꓽ ꓠꓽ

ꓬꓲ ꓚꓰꓺ ꓬꓲ ꓪꓴꓸ 18ꓽ 1-10

ꓖꓳ ꓗ ꓠꓯ ꓟꓳꓼ ꓡꓳ ꓞꓻ ꓝꓲ ꓗꓪ ꓮ-ꓐ-ꓡ-ꓦ ꓠꓬ ꓟꓶ ꓔꓶꓸ ꓦꓲ ꓗ ꓘꓶ ꓓꓴꓽ ꓗꓪ ꓠꓬꓲꓸ ꓠꓸ ꓔꓬ ꓕꓯ꓾ ꓬꓰ-ꓧꓳ-ꓧꓪ ꓡꓰ ꓟꓯ-ꓟꓷ ꓗꓪ ꓟ ꓒꓯꓼ ꓐꓬꓼ ꓗꓪ ꓮ-ꓐ-ꓡ-ꓦ ꓔꓯ ꓟꓳꓸ ꓖꓶ ꓡˍ ꓡꓳ꓿ ꓮ-ꓐ-ꓡ-ꓦ ꓔꓺ ꓥ ꓐꓰ ꓡꓳꓸ ꓠꓬꓲ ꓠꓬ꓾ ꓠꓬꓲ ꓠꓹ꓾ ꓬꓲ ꓒ ꓕꓲꓸꓼ ꓗꓪ ꓡ ꓞꓳ ꓢ ꓣꓳ ꓦꓰꓼ ꓞˍ ꓡꓳ꓿ ꓬꓲ ꓪ ꓔꓯ ꓟꓳ ꓗꓷ ꓕꓯ꓾ ꓬꓲ ꓠꓬ ꓬꓲ ꓪ ꓔꓯ ꓞꓵꓺ ꓬꓰ ꓠꓹ ꓟ ꓟꓶ ꓔꓶꓸ ꓦꓲ ꓗ ꓘꓶ ꓓꓴꓽ ꓗꓪ ꓐꓰ ꓔꓷꓹ ꓙꓰ ꓢꓲ꓾ ꓟꓲ ꓛꓬ ꓗꓪ ꓟꓳꓼ ꓔˍ ꓡꓳ꓿ ꓬꓲ ꓪ ꓔꓯ꓾ ꓥꓪ ꓢꓲ ꓒꓽꓳ꓾ ꓥꓪ ꓠꓬ ꓠꓴ ꓒꓬꓱꓽ ꓕꓯ ꓗꓪ ꓣꓱ ꓛꓰ ꓟꓶˍ ꓐꓭ ꓠꓬ꓾ ꓠꓴ ꓚꓳ ꓑ ꓔꓯ ꓐꓰ ꓕꓽ ꓗꓳꓸ ꓙꓰ꓾ ꓐꓰ ꓠꓴ ꓔꓯ ꓓꓰꓽˍ ꓡꓳ꓿ ꓬꓲ ꓙꓬ ꓮ ꓔꓯꓸꓼ ꓔꓯꓹ ꓡ ꓝꓲ ꓢꓲ꓾ ꓠꓴ ꓛꓲ ꓒꓯ ꓞꓲꓽ ꓢꓲ ꓠꓬꓲ꓾ ꓢꓲꓹ ꓜꓲ ꓠꓯꓸ ꓘꓪ ꓗꓪ ꓪꓴꓽ ꓧꓶ ꓠꓽ ꓡꓯ꓿ ꓠꓴ ꓪ ꓔꓯ ꓢꓰꓺ ꓡꓰ ꓝꓲ ꓠꓹ ꓟ ꓥꓪ ꓠꓬ ꓫꓪ ꓒꓵꓼ ꓮ ꓔꓲꓸ ꓤ ꓔꓯꓹ ꓖꓶ ꓡˍ ꓥꓳ꓿ ꓖꓳ ꓗ ꓠꓯ ꓠꓴ ꓪ ꓙꓰ ꓛꓵˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓬ ꓠꓴ ꓚꓳ ꓑ ꓥꓪ ꓔꓯ ꓡˍ ꓡꓳ꓾ ꓐꓯˍ ꓡꓳ꓿ ꓬꓲ ꓪ ꓡꓰ꓾ ꓠꓴ ꓐꓯˍ ꓟˍ ꓡꓰ ꓐꓰ ꓬꓰ ꓛꓵˍ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓢꓲ ꓮ-ꓐ-ꓡ-ꓦ ꓠꓬ ꓠꓲꓹ ꓞ ꓟꓶ ꓔꓶꓸ ꓦꓲ ꓠꓯꓸꓼ ꓗꓪ ꓢ-ꓣ ꓔꓯ ꓙꓰ ꓢꓲ꓾ ꓬꓲ ꓔꓯ꓾ ꓠꓴ ꓮ ꓟꓲꓸ ꓟꓲꓸ ꓫꓪ ꓧꓶꓽ ꓢ ꓢꓲ-ꓬ ꓣꓴ ꓢꓲ ꓑꓵꓹ ꓢꓲ ꓠꓬꓲ ꓫꓪ ꓒꓵꓼ ꓫꓬꓹ꓾ ꓐꓯˍ ꓡꓳ꓿ ꓮ-ꓐ-ꓡ-ꓦ ꓠꓬ ꓙꓱꓽ ꓤ ꓜꓴ ꓗꓪ ꓔꓷꓹ ꓙꓰ ꓢꓲ꓾ ꓡꓯꓸˍ ꓟ ꓐꓰ ꓙꓲˍ ꓟ ꓮ ꓠꓬꓲꓽ ꓤ ꓕꓲ ꓘꓹ ꓖꓳꓻ ꓔꓯꓹ ꓡ ꓢꓲ ꓠꓬꓲ꓾ ꓚꓳ ꓑ ꓕꓲ ꓣꓳ ꓔꓯ ꓡꓯꓼ ꓙꓱ ꓗꓷ ꓠꓬ ꓬꓲ ꓡꓰ ꓠꓲꓹ ꓞ ꓙꓽ ꓖꓶˍ ꓡꓳ꓿ ꓮ ꓚꓵꓹ ꓞꓶˍ ꓐꓰ ꓮ ꓚꓵꓹ ꓬꓲꓻˍ ꓐꓰ ꓙ ꓖꓶ ꓔˍ ꓟ ꓮ ꓠꓬꓲ ꓧꓪꓽ ꓔꓯ ꓬꓲ ꓔꓯꓹ ꓡ ꓢꓲ꓾ ꓬꓲ ꓪ ꓟꓲ ꓙꓬ ꓗꓪ ꓲꓹ ꓖꓶˍ ꓡꓳ꓿ ꓬꓲ ꓪ ꓜ ꓜ ꓔꓬˍ ꓕꓯ ꓬꓲ ꓠꓬ ꓢꓲꓹ ꓜꓲ ꓠꓯꓸ ꓘꓪ ꓬꓲ ꓪ ꓒ ꓕꓲꓸꓼ ꓗꓪ ꓦꓰꓼ ꓞˍ ꓡꓳ꓿ꓬꓲ ꓪ ꓡꓰ ꓬꓲ ꓔꓯ꓾ ꓠꓴ ꓤ ꓟꓶ ꓢ-ꓣ ꓠꓬ ꓮ ꓡꓲ ꓗꓪ ꓔꓬˍ ꓡꓳꓺꓽ꓾ ꓐꓯˍ ꓡꓳ꓿ ꓬꓲ ꓡꓰ꓾ ꓟꓶ ꓔꓶꓸ ꓦꓲ ꓠꓯꓸꓼ ꓗꓪ ꓔꓬˍ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ꓾ ꓠꓯꓸ ꓦꓯ ꓕꓱ ꓕꓲ ꓝꓲ ꓗꓪ ꓥꓪ ꓕꓱ ꓗꓪ ꓠꓴ ꓔꓯ ꓚꓱꓹ ꓬꓲꓼ ꓡˍ ꓥꓳ꓿ ꓠꓴ ꓤ ꓟꓶ ꓠꓬ ꓤꓽ ꓕꓲ ꓣꓳ ꓦꓵꓻ ꓡˍ ꓥꓳ꓾ ꓐꓯˍ ꓡꓳ꓿ ꓢ-ꓣ ꓠꓬ ꓖꓳ ꓕꓲ ꓣꓳ ꓗ ꓠꓯ ꓢꓲ ꓗꓪ꓾ ꓟꓶ ꓔꓶꓸ ꓦꓲ ꓗ ꓘꓶ ꓓꓴꓽ ꓗꓪ ꓬꓲ ꓐꓯ ꓘꓶ ꓔꓯ ꓑ ꓙˍ ꓡꓳ꓿

ꓗꓳ-ꓡꓳ-ꓫꓵ 1ꓽ 24-28

ꓮ ꓟꓶ ꓥꓪ ꓠꓬ ꓠꓴ ꓪꓽ ꓐꓱ ꓶ ꓫꓸ ꓙꓵꓻ ꓟꓶˍ ꓠꓬꓲ ꓗꓹ ꓛꓲˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓖꓳ ꓓꓱꓽ ꓥ ꓟ ꓘꓴ ꓜꓲ ꓞꓳ ꓐꓱ ꓶ ꓥꓪ ꓫꓸ ꓙꓵꓻˍ ꓟ ꓟꓽ ꓡꓳꓼ ꓟ ꓔꓯ꓾ ꓥꓪ ꓧꓪꓽ ꓖꓳ ꓓꓱ ꓗꓪ ꓐꓲ ꓡ ꓝꓲ ꓟ ꓥ ꓡꓳ꓿ꓪꓴ-ꓢ ꓐꓯ ꓘꓶꓽ ꓮꓽ ꓙꓵ ꓡꓱS ꓟꓸ ꓪ ꓡꓰ ꓠꓹ ꓟ꓾ ꓠꓴ ꓪꓽ ꓐꓱ ꓶ ꓪꓴ-ꓢ ꓡꓰ ꓥꓪ ꓔꓯ ꓣꓱꓽ ꓙ ꓟꓬꓱꓽ ꓮ ꓡꓲ ꓡꓯꓼ ꓙꓱ ꓔ ꓠꓬ꓾ ꓘꓴ ꓜꓲ ꓞꓳ ꓔꓯ ꓖꓳ ꓡꓱ ꓣꓱꓽ ꓙ ꓢꓴ ꓬꓰ ꓝꓲˍ ꓟ ꓥ ꓡꓳ꓿ꓐꓯ ꓘꓶꓽ ꓕꓱ ꓟ ꓠꓬ ꓗꓳꓸ ꓗꓷ ꓟ ꓦꓬꓼ ꓠꓬꓲˍ ꓐꓰ ꓤꓶꓻ ꓗꓪ ꓠꓽ ꓚꓵ ꓔ ꓟ ꓚꓵ ꓘꓶꓽ ꓥ ꓢꓲ꓾ ꓮ ꓟꓶ ꓠꓽ ꓬꓲ ꓔꓯ ꓦ ꓡꓱ ꓢꓴ ꓐꓴ ꓔꓯ ꓟꓳꓸ ꓖꓶꓽ ꓗꓷꓳ꓿ꓐꓶꓽ ꓞꓳ ꓗꓳꓺ ꓡꓳ ꓗꓪ ꓚꓵ ꓘꓶꓽ ꓕꓱ ꓟ ꓬꓲ ꓟꓬꓱ ꓓꓳꓽ ꓮ ꓘꓶꓻ ꓛꓲ ꓐꓳ ꓞꓹ ꓟ꓾ ꓪꓴ-ꓢ ꓡꓰ ꓬꓲ ꓔꓯ ꓦ ꓡꓱ ꓢꓴ ꓐꓴ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓒꓴˍ ꓡꓳ꓿ ꓚꓵ ꓘꓶ ꓕꓱ ꓟ ꓠꓽ ꓙꓲ-ꓢꓴ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓟ ꓕꓱ ꓟ ꓥ ꓢꓲ꓾ ꓟꓬꓱ ꓓꓳꓽ ꓟꓶ ꓠꓹ ꓟ ꓥꓳ ꓡꓳꓸ ꓔ ꓓꓴ ꓥ ꓡꓳ꓿ꓥꓪ ꓠꓴꓽ ꓠꓬ ꓙꓲ-ꓢꓴ ꓬꓲ ꓙ ꓖꓴ ꓚ ꓟꓸ ꓖꓶˍ ꓕꓯ꓾ ꓪꓴ-ꓢ ꓡꓰ ꓖꓶ ꓡ ꓟ ꓙꓽ ꓗꓴꓸ ꓠꓲꓹ ꓮꓽ ꓙꓵ ꓣꓱꓽ ꓢꓲ꓾ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓘꓶꓸ ꓖꓶ ꓢꓲ ꓠꓬꓲ ꓟꓸ ꓖꓶˍ ꓡꓳ꓿ ꓥꓪ ꓠꓴꓽ ꓕꓱ ꓡꓱ ꓬꓰˍ ꓟ ꓠꓬ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓜꓳꓽ ꓓꓰ ꓡꓰ ꓢꓴ ꓒꓬꓱꓼ ꓡ ꓝꓲ ꓢꓲ꓾ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ ꓪ ꓠꓹ ꓟ ꓥ ꓡꓳ꓿

ꓡꓴ-ꓘ 10ꓽ 38-42

ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓘꓹ ꓕꓲ ꓘꓹ ꓗꓪ ꓫꓱꓽ ꓛꓲ ꓬꓰˍ ꓡꓳ꓿ ꓖꓳ ꓗꓪ꓾ ꓟ-ꓕ ꓟꓬꓱ ꓔ ꓟ ꓤ ꓟꓶ ꓤ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ ꓬꓲ ꓦꓲ ꓗꓪ ꓘꓳꓻ ꓣꓴˍ ꓡꓳ꓿ꓟ-ꓕ ꓬꓲ ꓠꓬꓲ ꓟ꓾ ꓟ-ꓡꓲ꓾ ꓟꓬꓱ ꓔ ꓢꓴ ꓕꓲ ꓣꓳ ꓠꓬ ꓬꓰ-ꓢꓴ ꓟꓲꓽ ꓙꓬ ꓢꓲ ꓗꓪ ꓠꓬꓲꓸ ꓠꓸ ꓢꓲ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓡꓳ꓿ꓖꓳ ꓡꓱ ꓥ ꓟꓲ ꓟ-ꓕ ꓠꓽ ꓟꓬꓱꓽ ꓟꓬꓽˍ ꓟ ꓗꓪ ꓐꓰ ꓠꓲꓹ ꓟ ꓢꓴꓺ ꓔꓴ ꓡ ꓠꓬꓲ ꓬꓰ-ꓢꓴ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓬꓲ ꓟ ꓠꓬ ꓥꓪ ꓕꓲ ꓣꓳ ꓔꓯˍ ꓡꓰ ꓣꓱꓽ ꓙ ꓟꓬꓱꓽ ꓣꓱꓽ ꓔꓬ ꓝꓲˍ ꓟ꓾ ꓠꓴꓻ ꓥꓪ ꓔꓯ ꓟꓽ ꓫꓱꓸ ꓤˍ ꓡ? ꓬꓲ ꓥꓪ ꓔꓯ ꓬꓰ ꓙ ꓡ ꓠꓹ ꓟ ꓐꓯ ꓖꓶ꓾ ꓐꓯˍ ꓡꓳ꓿ꓢꓲ ꓒꓽ ꓠꓽ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓟ-ꓕꓺꓳ꓾ ꓟ-ꓕꓺꓳ꓾ ꓠꓴ ꓠꓬ ꓟꓬꓱꓽ ꓮꓽ ꓟꓬꓹ ꓫꓵꓽ ꓟ ꓪꓴꓸ ꓠꓬꓲ ꓙꓽ ꓫꓸ ꓔꓬ ꓐꓷ꓿ꓖꓳ ꓡꓱ ꓥ ꓟꓲ ꓟꓽ ꓙꓳ ꓟꓽ ꓓ ꓟ ꓠꓽ ꓕꓲ ꓫꓵꓽˍ ꓡꓰ ꓙꓳˍ ꓡꓳ꓿ ꓟ-ꓡꓲ ꓠꓬ ꓟꓬꓽ ꓠꓬꓲ ꓙꓲˍ ꓟ ꓖꓳ ꓕꓲ ꓐꓱꓻ ꓔꓯ ꓢꓲ ꓣꓴ ꓗꓷ ꓠꓬꓲ꓾ ꓬꓲ ꓔꓯˍ ꓐꓰ ꓣꓴ ꓔꓯꓹ ꓙꓰ ꓟꓽ ꓓ꓾ ꓐꓯ ꓖꓶˍ ꓡꓳ꓿