ꓪꓴ‐ꓢ ꓔꓯ ꓡꓰꓽ ꓦ ꓡꓱ

ꓠꓬꓲ. ꓠꓬꓲ ꓐꓱ ꓶ ꓓꓵꓽ ꓙ ꓓꓴ ꓠꓬ ꓥꓳꓽ ꓙꓱ ꓕꓳ ꓶ 3ꓽ 5‐6 ꓥꓳ꓿

“ꓠꓴ ꓠꓬ ꓕꓲ ꓠꓲ, ꓟ ꓡꓱ.ꓼ ꓪꓴ‐ꓢ ꓔꓯ ꓦ ꓡꓱ꓿ ꓠꓴ ꓚꓲ ꓛꓬ ꓢꓷ. ꓠꓲ, ꓔꓯ ꓪꓽ ꓪꓴꓽ ꓕꓽ ꓘꓳ,꓿ ꓠꓴ ꓬꓰˍ ꓟ ꓮ ꓙꓵꓽ ꓗꓪ ꓪꓴ‐ꓢ ꓔꓯ ꓢꓲ ꓒ ꓣꓷꓠ.꓿ ꓖꓳ ꓡꓱ ꓠꓬ ꓬꓲ ꓡꓰ ꓠꓴ ꓔꓯ ꓙ ꓖꓴ ꓧꓳꓽ ꓟꓳ. ꓖꓶ ꓡˍ ꓥꓳ꓿”

ꓢꓲ ꓫꓬ ꓕꓳ ꓶ ꓗꓪ ꓕꓲꓽ ꓠꓲ, ꓟ ꓡꓱ. ꓪꓴ‐ꓢ ꓔꓯ ꓦ ꓡꓱ ꓠ, ꓟ ꓐꓱ ꓶ  ꓐꓯ ꓔ ꓡꓳ꓿ ꓮ ꓫꓵꓽ ꓑꓶ. ꓓꓴ ꓕꓲꓽ ꓠꓲ, ꓟ ꓡꓱ. ꓐꓰ ꓐꓯ ꓡ? ꓣꓳꓽ ꓠꓬ ꓪꓴ‐ꓢ ꓔꓯ ꓕꓲꓽ ꓠꓲ, ꓟ ꓡꓱ.ꓼ ꓦ ꓡꓱ ꓠ, ꓟ ꓢꓯꓼ ꓐꓽ ꓗꓴ. ꓡꓳ꓿ ꓣꓳꓽ ꓠꓬ ꓣꓳꓽ ꓢꓯꓼ ꓪ ꓙꓳˍ ꓟ꓾ ꓢꓷ. ꓠꓲ, ꓙꓳˍ ꓟ ꓗꓪ ꓐꓰ ꓧꓶ. ꓕꓯ ꓢꓯꓼ ꓕꓵꓼˍ ꓡꓳ꓿

ꓔꓯꓺ ꓥꓳꓽ ꓐꓯ ꓠꓬ ꓣꓳꓽ ꓠꓬ ꓟꓲꓽ ꓕꓯ ꓢꓲ ꓟ ꓐꓱ ꓶ ꓒꓴ ꓫꓵꓺ ꓮ ꓟꓬ ꓧꓪꓺ ꓔ ꓕꓯ꓾ ꓜꓽ ꓓꓴ ꓓꓳ ꓓꓴ ꓮ ꓟꓬ ꓧꓪꓺ ꓔ ꓕꓯ ꓠꓲ, ꓟ ꓢꓲ ꓡꓰ ꓡꓰ ꓐꓰ ꓪꓴ‐ꓢ ꓔꓯ ꓦ ꓡꓱˍ ꓡꓳ꓿ ꓪꓴ‐ꓢ ꓔꓯ ꓪꓽ ꓘꓴˍ ꓡꓳ꓿ ꓟꓲ ꓠꓯ ꓖꓴꓽ ꓙꓴ ꓧꓶ. ꓕꓯ ꓧꓪ ꓔ ꓢꓲ ꓡꓰ ꓪꓴ‐ꓢ ꓔꓯ ꓙꓵ ꓠ, ꓟ ꓬꓰ ꓗꓴ. ꓡꓳ꓿ ꓖꓳ ꓡꓱ ꓕꓽ ꓬꓰ ꓠ, ꓟ ꓪꓴ‐ꓢ ꓠꓬ ꓠꓬꓲ. ꓠꓬꓲ ꓣꓳꓽ ꓔꓯ ꓢꓯꓼ ꓪ ꓖꓶꓽ ꓡ ꓔꓬ, ꓡꓳ꓿

ꓣꓳꓽ ꓕꓲꓽ ꓙ ꓠꓲ, ꓡꓱ.ꓼ꓾ ꓕꓲꓽ ꓢꓯꓼ ꓡꓱ.ꓼ ꓪꓴ‐ꓢ ꓔꓯ ꓦ ꓡꓱ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓠ, ꓗˍ ꓡꓳ꓿ ꓣꓳ ꓬꓰ ꓙꓲ ꓙꓳˍ ꓟ ꓧꓶ. ꓕꓯ ꓬꓰ ꓗꓷ ꓢꓲ ꓡꓰ ꓪꓴ‐ꓢ ꓔꓯ ꓦ ꓡꓱˍ ꓟ ꓟꓽ ꓥ ꓥ ꓐꓰ ꓮ ꓫꓵꓽ ꓥˍ ꓟꓲ ꓟꓽ ꓬꓰ ꓧꓶ. ꓕꓯ ꓪꓴ‐ꓢ ꓔꓯ ꓦ ꓡꓱ ꓠ, ꓟ ꓣꓳ ꓬꓰ ꓠ ꓗˍ ꓡꓳ꓿

“ꓠꓴ ꓚꓲ ꓛꓬ ꓢꓷ. ꓠꓲ, ꓔꓯ ꓪꓽ ꓪꓴꓽ ꓕꓽ ꓘꓳ,” ꓐꓰ ꓐꓯ ꓔ ꓟ ꓡꓰ ꓐꓰ ꓣꓳꓽ ꓠꓬ ꓣꓳꓽ ꓢꓷ. ꓟ ꓣꓳꓽ ꓗꓴ.ˍ ꓟ ꓔꓯ ꓟꓽ ꓘꓪꓼ ꓘꓪꓼ ꓐꓰ ꓙ ꓣꓳˍ ꓟ ꓡꓰ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓙ ꓫꓱ: ꓠ ꓗˍ ꓡꓳ꓿ ꓣꓳꓽ ꓮ ꓡꓰ ꓘꓶ. ꓛꓲ ꓓ ꓥˍ ꓟꓲ ꓥꓳꓽ ꓡꓰ ꓗꓴ. ꓡꓳ꓿ ꓮ ꓡꓰ ꓘꓶ. ꓛꓲ ꓢꓯꓼ ꓙꓳ ꓥˍ ꓟꓲ ꓢꓯꓼ ꓐꓽ ꓡꓰ ꓗꓴ.ˍ ꓡꓳ꓿ ꓮ ꓡꓰ ꓘꓶ. ꓛꓲ ꓐꓳ. ꓥˍ ꓟꓲ ꓫ ꓡꓰ ꓗꓴ. ꓡꓳ꓿ ꓣꓳꓽ ꓔꓯ ꓙꓳˍ ꓟ ꓮ ꓙꓵꓽ ꓠꓬ ꓮ ꓫꓵˍ ꓟꓲ ꓟꓽ ꓕꓶ ꓞ꓿

ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓣꓳꓽ ꓛꓳ ꓫꓱ ꓙꓰˍ ꓟ ꓮ ꓙꓵꓽ ꓪꓴ‐ꓢ ꓔꓯ ꓡꓰ ꓔꓲꓺ ꓡꓴ ꓡꓯ꓿ ꓪꓴ‐ꓢ ꓔꓯ ꓡꓰ ꓦ ꓡꓱ ꓡꓯ꓿