ꓪꓴꓽˍ ꓟ ꓬꓰ ꓠꓲꓹ ꓫꓵ ꓢꓴ ꓔꓯ ꓟꓸ ꓖꓶˍ ꓟ

ꓠꓲ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠ: ꓠꓬꓲ: ꓠꓬꓲ ꓗꓪ ꓣꓳ ꓑ ꓙ ꓪˍ ꓟ ꓶ ꓓꓳ ꓫꓱꓹ ꓓꓳ ꓟ. ꓟꓲ: ꓠꓬ ꓡꓴ-ꓘ=9:51-56 ꓥ ꓡꓳ= ꓟ. ꓟꓲ: ꓘꓴ: ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓘꓹ ꓗꓪ ꓬꓲ ꓝꓲ ꓓꓴ ꓐꓴ ꓔꓯ ꓧꓶ. ꓕꓯ ꓙꓰ ꓝꓲˍ ꓟ ꓟ. ꓟꓲ: ꓥ ꓡꓳ=

ꓕꓲ ꓧꓪꓹ ꓙꓳˍ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓠꓹ ꓟ ꓬꓰˍ ꓕꓯ ꓘꓹ ꓕꓲ ꓟ ꓗꓪ ꓗꓳ. ꓙꓰ ꓠꓹ ꓟ ꓬꓲ ꓙꓵꓹ ꓛꓲ ꓡꓹ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓟ ꓑꓶ. ꓓꓴ ꓢ-ꓟ-ꓡꓲ ꓘꓹ ꓗꓪ ꓔꓬ ꓢꓴ ꓐꓴ ꓠꓬ ꓬꓲ ꓪ ꓔꓯ ꓟ: ꓗꓳ. ꓙꓰ ꓝꓲ= 

ꓖꓳ ꓕꓯ ꓬꓳ-ꓦ ꓐꓰ ꓬ-ꓗꓴ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ꓾ ꓢꓲꓺ ꓒ:ꓳ꓾ ꓠꓴ ꓥꓪ ꓠꓴ: ꓔꓯ ꓟꓲ: ꓗꓪ ꓗꓪ ꓐꓰ ꓮ. ꓔꓳ ꓘꓴ ꓞꓰ ꓡ ꓢꓲ ꓬꓲ ꓪ ꓔꓯ ꓐꓬ ꓢꓰꓼ ꓖꓶ ꓠꓯꓹ ꓡ꓾ ꓐꓰ ꓓꓰ:ˍ ꓟ ꓟ. ꓟꓲ: ꓥ ꓡꓳ= ꓖꓳ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓔꓲ. ꓒꓳꓹ ꓢꓲ ꓕꓱ ꓡꓰ ꓕ: ꓬꓰ ꓐꓰ ꓐꓯ ꓟ ꓥ ꓡꓳ=

ꓠꓬꓲ. ꓠꓬꓲ ꓟ. ꓟꓲ: ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡꓹ ꓟ ꓠꓬ꓾ ꓣꓳ ꓟꓲ ꓠꓯ ꓞꓳ ꓤ ꓠꓬ ꓠꓲꓹ ꓟ ꓫꓵꓺ ꓟ: ꓘꓴ= ꓣꓳ ꓟꓲ ꓠꓯ ꓞꓳ ꓤ ꓠꓬ ꓠꓲꓹ ꓟ ꓠꓬꓱˍ ꓡꓳ= ꓟꓲ ꓠꓯ ꓞꓳ ꓤ ꓠꓬ ꓠꓲꓹ ꓡꓶ: ꓟ: ꓐꓲ ꓡ ꓕꓯ ꓢꓴ ꓔꓯ ꓒꓬꓹ ꓦ ꓗꓷ ꓠꓲꓹ ꓫꓵˍ ꓡꓳ= ꓗ. ꓦ ꓗꓷ ꓠꓲꓹ ꓫꓵˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓟ. ꓟꓲ: ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓔꓲ. ꓒꓳꓹ ꓟ ꓡꓰ ꓐꓰ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ: ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓫꓱ: ꓔꓬ ꓕꓯ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓲ ꓠꓯ ꓗꓪ ꓢꓯ. ꓔꓬ ꓕꓯ ꓚꓲ ꓛꓬ ꓠꓲꓹ ꓡꓶ: ꓐꓲ ꓠ ꓔ ꓟ ꓟ: ꓥ ꓥ꓾ ꓮ ꓫꓵ: ꓑꓶ. ꓓꓴ ꓥ ꓟ ꓔꓯ ꓓꓵ: ꓙ ꓠꓬꓲ ꓠꓹ ꓟ ꓬꓮꓳ. ꓚꓲˍ ꓡꓳ꓾ ꓐꓯ ꓟ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓟ ꓥ ꓡꓳ=

ꓮ ꓠꓱ ꓕꓯ ꓟ. ꓟꓲ: ꓕꓲ ꓟ ꓙꓳˍ ꓡꓳ= ꓟ. ꓟꓲ: ꓠꓬ ꓕꓱ ꓡꓰ ꓥꓳ= ꓕꓲ ꓧꓪꓹ ꓙꓳˍ ꓕꓯ ꓞꓳ ꓤ ꓕꓲ ꓣꓳ ꓠꓬ ꓟꓴ: ꓗꓪ ꓗꓪ ꓛꓲꓺ ꓬꓰˍ ꓡꓳ= ꓟꓴ: ꓗꓪ ꓗꓪ ꓙꓰ ꓢꓲ ꓐꓹ ꓐ ꓪꓴ-ꓢ ꓐꓰ ꓔꓬ ꓡꓳ= ꓖꓳ ꓕꓯ ꓬꓲ ꓠꓬ ꓟꓲꓺ ꓠꓯ ꓔꓯ ꓡꓳ. ꓠꓬꓲ ꓢꓲ ꓡ ꓞꓳ ꓮ ꓫꓵ ꓬꓰ ꓔꓬ ꓟ ꓬꓲ ꓟꓳˍ ꓡꓳ= 

ꓕꓲ ꓧꓪꓹ ꓙꓳˍ ꓠꓬ ꓞꓳ ꓘꓴ: ꓕꓲ ꓣꓳ ꓠꓬ ꓞꓳ ꓐꓳ ꓦꓲꓻ ꓗꓪ ꓟ ꓚꓬ ꓢꓲ. ꓔꓯ ꓘꓴ:ˍ ꓡꓳ= ꓞꓳ ꓫ ꓦꓲ ꓗꓪˍ ꓟꓲ ꓘꓴ:ˍ ꓡꓳ= ꓖꓳ ꓡꓰ ꓘꓴ: ꓢꓲ ꓟ. ꓒ ꓣꓱ: ꓔꓬ ꓡꓳ=

ꓖꓳ ꓟ ꓔꓯ ꓟꓳ ꓡꓰ ꓕꓯ ꓬꓲ ꓠꓬ ꓪꓴ-ꓢ ꓔꓯ ꓕꓱ ꓡꓱ ꓐꓯ ꓡꓳ= ꓐꓹ ꓐ ꓪꓴ-ꓢꓺꓳ꓾ ꓬꓲ ꓠꓬ ꓮ ꓘꓶ. ꓥꓶˍ ꓟ ꓑꓶ. ꓓꓴ ꓬꓲ ꓔꓯ ꓞꓳꓹ ꓢꓰꓼ ꓗꓷ ꓠꓯꓹ ꓡꓳ=

ꓥꓪ ꓠꓬ ꓠꓴ ꓥ ꓕꓯ ꓠ: ꓮ ꓙꓵ: ꓔꓯ ꓢꓰꓼ ꓗꓷꓳ꓾ ꓐꓰ ꓐꓯ ꓕꓯ ꓪꓴ-ꓢ ꓡꓰ ꓮ ꓐꓲ ꓤ:ꓳ꓾ ꓥꓪ ꓓꓵ: ꓙ ꓚꓱꓹ ꓠꓬ ꓠꓴ ꓐꓰ ꓟ: ꓫꓱ. ꓡꓯ ꓘꓳ= ꓥꓪ ꓠꓬ ꓕꓲ ꓞꓲꓼ ꓕꓲ ꓑ ꓠꓵ ꓠꓲꓹ ꓥ ꓡꓳ= 

ꓡ ꓞꓳ ꓕꓲ ꓣꓳ ꓫꓵꓻ ꓗꓪ ꓛꓲ ꓥꓶˍ ꓟ ꓬꓰ ꓔꓬ ꓥ ꓟꓲ ꓟ: ꓫꓵꓻ ꓕꓲ ꓑꓹ ꓗꓪ ꓓꓵ: ꓙ ꓒꓳꓹ ꓬꓲꓼ ꓡꓹ ꓠꓬ ꓥꓪ ꓬꓲ ꓔꓯ ꓘꓳꓹ ꓣꓴˍ ꓡꓳ꓾ ꓐꓯ ꓟ ꓟ  ꓟꓲ: ꓕꓲ ꓔꓳ. ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓪꓴ-ꓢ ꓠꓬ ꓕꓲ ꓞꓲꓼ ꓕꓲ ꓑ ꓠꓵ ꓠꓲꓹ ꓥ ꓡꓳ= ꓠꓵ ꓠꓲꓹ ꓖꓳ ꓟ ꓠꓬ ꓮ ꓕꓯ ꓟꓲ ꓣꓳ ꓞꓳ ꓤ ꓠꓵ ꓠꓲꓹ ꓔꓯ ꓟ: ꓫꓱ. ꓮ ꓕꓯˍ ꓟꓲ ꓟ: ꓓꓴ: ꓡꓰ= ꓮ ꓕꓯ ꓟꓲ ꓖꓴ ꓡꓰ ꓟ: ꓗꓴ.= ꓠꓵ ꓠꓲꓹ ꓖꓳ ꓟ ꓠꓬ ꓮ ꓫꓵꓺ ꓛꓲ ꓥ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓰ ꓐꓯ ꓔ ꓡꓳ= ꓟꓴ: ꓗꓪ ꓗꓪ ꓟ ꓐꓹ ꓐ ꓐꓲ ꓜꓲꓼˍ ꓟ ꓡꓰ ꓠꓴ ꓪ ꓥˍ ꓟꓲ ꓐꓲ ꓜꓲꓼ= ꓠꓴ ꓪ ꓔꓯ ꓟꓳ ꓢꓴ ꓠꓬ ꓐꓹ ꓐ ꓔꓯ ꓓꓳ ꓟꓴꓹ ꓡꓹ ꓥꓳ꓾ ꓐꓰ ꓑ ꓙ ꓠꓬꓲˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓟ. ꓟꓲ: ꓗꓪ ꓐꓰ ꓣꓳ ꓔꓯ ꓟꓳ. ꓖꓶ ꓡꓹ ꓟ ꓠꓬ꓾ ꓕꓲ: ꓠꓬ ꓐꓹ ꓐ ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓟ ꓫꓵ ꓖꓶˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓢꓴ ꓔꓯ ꓠꓲꓹ ꓟ ꓫꓵ ꓖꓶ ꓠ ꓗꓹ ꓡꓳ= ꓣꓳ ꓠꓬ ꓝꓴꓲ ꓥ. ꓗꓷˍ ꓟꓲ ꓝꓮꓲ ꓕꓲ ꓧꓪꓹ ꓝꓴꓲ. ꓟ: ꓠ: ꓟ: ꓠ: ꓬꓰ ꓪ ꓡꓰˍ ꓟ ꓙꓳˍ ꓡꓳ= ꓕꓱ ꓟˍ ꓡꓰ ꓐꓰ ꓐꓹ ꓐ ꓪꓴ-ꓢ ꓔꓯ ꓥꓪ ꓟ: ꓬꓰꓳ= ꓥꓪ ꓔꓯ ꓖ: ꓖꓶ ꓡꓯ ꓐꓯ ꓢꓲ ꓝꓴꓲ ꓔꓯ ꓝꓮꓲ ꓕꓲ ꓧꓪꓹ ꓬꓰ ꓪ ꓡꓰ ꓟ ꓙꓳˍ ꓡꓳ= ꓖꓳ ꓡꓱ ꓥ ꓟꓲ ꓐꓹ ꓐ ꓪꓴ-ꓢ ꓠꓬ ꓮ ꓟꓶ ꓗꓪ ꓛꓲ ꓣꓳ ꓔꓯ ꓢꓯ. ꓔꓬ ꓪˍ ꓟ ꓣꓱ: ꓛꓰ: ꓖꓶˍ ꓟ ꓑꓶ. ꓓꓴ ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓠꓵ ꓠꓲꓹ꓾ ꓕꓲ ꓞꓲ ꓕꓲ ꓑ ꓠꓲꓹ ꓟ ꓫꓵˍ ꓡꓳ ꓐꓯ ꓟ ꓣꓳ ꓢꓷ. ꓪ ꓓꓹ ꓡꓳ=

ꓖꓳ ꓡꓱ ꓠꓬꓲ ꓣꓳ ꓬꓲ ꓔꓯ ꓔꓯꓺ ꓢꓳ ꓢꓲ ꓠꓬꓲ ꓣꓳ ꓔꓯ ꓢꓴ ꓡꓰ ꓐꓯ ꓡ ꓗ. ꓡꓹ ꓕꓯ ꓠꓲꓹ ꓟ ꓫꓵ ꓫꓵ ꓡꓰ: ꓬꓰ ꓠ ꓔ ꓟ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ=

ꓠꓬꓲ: ꓠꓬ ꓣꓳ ꓟꓲ ꓠꓯ ꓔꓱ ꓟ ꓗꓪ ꓞꓳ ꓙꓳ ꓢꓯ. ꓔꓬ ꓕꓯ ꓣꓳ ꓠꓲꓹ ꓡꓶ: ꓔꓯ ꓗ: ꓕ. ꓢꓴ꓾ ꓥ ꓠꓬ ꓣꓳ: ꓬꓰ ꓠ ꓔ ꓟ ꓟꓬꓱ: ꓔꓯ ꓟ: ꓬꓰ ꓪ ꓡꓰ ꓠ ꓛꓲ ꓗ: ꓕ ꓢꓴˍ ꓟꓲ ꓙꓳˍ ꓡꓳ= ꓖꓳ ꓟ ꓔꓯ ꓠꓴ ꓠꓬ ꓠꓬꓲ. ꓠꓬꓲ ꓬꓳ-ꓦ ꓐꓰ ꓬ-ꓗꓴ ꓐꓯ ꓟ ꓡꓰ ꓐꓰ ꓟꓴ: ꓗꓪ ꓗꓪ ꓐꓰ ꓮ ꓔꓳ. ꓣꓴ ꓞꓰ ꓗꓷ ꓢꓲ ꓬꓲ ꓪ ꓔꓯ ꓐꓬ ꓢꓰꓼ ꓗꓷ ꓠꓲꓹ ꓫꓵˍ ꓟ ꓠꓲꓹ ꓟˍ ꓟꓲ ꓙꓳ ꓡꓹ ꓥꓳ= ꓖꓳ ꓡꓱ ꓥ ꓟꓲ ꓖꓳ ꓡꓱ ꓠꓲꓹ ꓟ ꓓꓵ: ꓡ ꓠ ꓕ ꓬꓰ= ꓪꓴ-ꓢ ꓠꓲꓹ ꓟ ꓫꓵˍ ꓟ ꓡꓰ ꓐꓰ ꓣꓳ ꓥ ꓟꓲ ꓠꓲꓹ ꓟ ꓫꓵˍ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓣꓱ: ꓛꓰ: ꓖꓶ ꓡꓹ ꓥꓳ꓾ ꓐꓰ ꓠꓬꓲ. ꓠꓬꓲ ꓟ. ꓟꓲ: ꓗꓪ ꓐꓰ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ=