ꓪꓴꓽ_ ꓟ ꓬꓰ ꓠꓲꓹ ꓫꓵ ꓢꓴ ꓔꓯ ꓟꓸ ꓖꓶ_ ꓟ

ꓠꓬꓲ ꓠꓬꓲ ꓟꓸ ꓟꓲꓽ ꓥ ꓟ ꓟ-ꓘꓳ ꓕꓳ ꓶ 9ꓽ38-40 ꓗꓪ ꓢꓲ ꓒ ꓬꓰ-ꓢꓴ ꓬꓲꓸ ꓝꓲ ꓓꓴ ꓬꓳ-ꓦ ꓠꓬ ꓬꓲꓸ ꓪ ꓗꓪ ꓟ ꓟꓽ ꓥ ꓟ ꓡ ꓞꓳ ꓕꓲꓽ ꓣꓳ ꓢꓲ ꓒ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓠꓲꓽ ꓖꓼ ꓓꓳꓺ ꓔꓬꓹ ꓟ ꓔꓯ ꓗꓽ ꓕ ꓟ ꓣꓳꓽ ꓵ ꓪ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓳ-ꓦ ꓔꓯ ꓬꓲꓸ ꓔꓯ ꓕꓽ ꓗꓽ ꓔ ꓥꓪ ꓔꓯ ꓟꓽ ꓙꓲ ꓟ ꓬꓰ ꓢꓴ ꓠꓬ ꓥꓪ ꓟꓬꓱꓺ ꓗꓪ ꓐꓰ ꓠꓲꓽ ꓖꓼ ꓓꓳ ꓟꓽ ꓘꓴ ꓐꓯ ꓟ ꓣꓳꓽ ꓑꓹ ꓙ ꓡꓳ= ꓣꓳ ꓥˍ ꓟꓲ ꓬꓳ-ꓦ ꓡꓰ ꓐꓰ ꓓꓵꓽ ꓙ ꓗꓴꓸ ꓡꓳ= ꓣꓳ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓟꓽ ꓥ ꓢꓴ ꓕꓲꓽ ꓣꓳ ꓣꓳ ꓪꓴ-ꓢ ꓟꓸ ꓟꓲꓽ ꓚ ꓔꓬꓹ ꓕꓯ꓾ ꓥ ꓠꓬ ꓙꓲ ꓟ ꓬꓰ ꓔꓬ ꓕꓯ ꓡꓳꓸ ꓟꓽ ꓟꓵ ꓟꓵꓺ ꓐꓰ ꓟꓽ ꓒꓵꓽ ꓟꓽ ꓚꓬꓹ ꓬꓰ ꓗꓴꓸ ꓡꓳ ꓟꓽ ꓥ ꓡ? ꓬꓳ-ꓦ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓥꓪ ꓪꓴ-ꓢ ꓡꓰ ꓥꓳ ꓥꓪ ꓢꓲ ꓒ ꓡꓰ ꓥꓳ꓾ ꓠꓱꓸ ꓐꓯ ꓪꓴ-ꓢ ꓟꓽ ꓥ= ꓠꓱꓸ ꓐꓯꓼ ꓢꓴ ꓠꓬ ꓛꓬꓼ ꓟꓵꓽ ꓗꓪ ꓙꓰ ꓢꓴ ꓥꓳ ꓐꓰ ꓓꓵꓽ ꓙ ꓔꓬ ꓕꓯ ꓠꓬ ꓟꓽ ꓙꓳꓽ꓾ ꓐꓯ ꓟ ꓔꓯ ꓠꓬꓲ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶꓽ ꓡ ꓔꓬ ꓡꓳ= ꓮ ꓟ ꓥˍ ꓟꓲ꓾ ꓮ ꓡꓰ ꓘꓴ ꓜꓲꓼ ꓞꓳ ꓗꓪ ꓔꓬꓹ ꓢꓴ ꓥˍ ꓟꓲ꓾ ꓙꓲꓻ ꓟ ꓬꓰ ꓔꓬꓹ ꓕꓯ ꓣꓳꓽ ꓗ ꓛꓲ ꓠꓯˍ ꓡꓳ= ꓮ ꓡꓰ ꓘꓴ ꓜꓲꓼ ꓞꓳ ꓗꓪ ꓐꓰ ꓥˍ ꓟꓲ ꓪꓴ-ꓢ ꓟꓸ ꓟꓲꓽ ꓚꓺ ꓔꓬꓹ ꓕꓯ꓾ ꓥ ꓠꓬ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓠ ꓫꓬꓹ ꓒꓬꓽ ꓫꓬ ꓖꓶꓽ ꓔꓬꓹ ꓕꓯ ꓣꓳ ꓠꓲꓹ ꓒꓴ ꓠ ꓗˍ ꓡꓳ= ꓮ ꓟ ꓗꓪ ꓐꓰ ꓥˍ ꓟꓲ ꓪꓴ-ꓢ ꓟꓬꓱꓺ ꓓꓳꓽ ꓓꓳꓺ ꓡ ꓠꓬ ꓗ ꓛꓲ ꓓꓴ ꓥꓳ= ꓬꓰ-ꓢꓴ ꓠꓬ ꓞꓳ ꓫꓵꓽ ꓞꓳ ꓙꓰꓽ ꓐꓴ ꓐꓱ ꓶˍ ꓟꓲ ꓥꓳ= ꓮ ꓙꓵꓽ ꓟ ꓪꓴ-ꓢ ꓥꓳ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓓꓵꓽ ꓙ ꓠꓬꓲ ꓡꓯ=