ꓪꓴ-ꓢ ꓐꓯ ꓘꓶꓽ ꓐꓰ ꓞꓳ ꓤ ꓡꓲꓽ ꓒꓰꓼ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙ ꓪˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓡꓯꓽ ꓒꓯꓹ ꓟꓽ ꓞꓲꓽ ꓞꓲꓽ ꓜ ꓜꓽ ꓔꓬ ꓟ ꓔꓯ ꓒ-ꓡꓲ-ꓢꓷ ꓐꓴ ꓟꓳˍ ꓕꓯ ꓬꓲ ꓪ ꓔꓯ ꓐꓯ ꓗꓸ ꓟ꓾ ꓬꓲ ꓪ ꓔꓯ ꓟꓽ ꓜꓳꓽ ꓜꓳꓽ ꓐꓯ ꓟ ꓔꓯ ꓣꓳ ꓑ ꓙˍ ꓡꓳ= ꓕꓱ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓒꓳꓹ ꓖꓶˍ ꓟ ꓟꓸ ꓟꓲꓽ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓠꓴ ꓪ ꓠꓬ ꓞꓳ ꓤ ꓡꓰ ꓔꓶ ꓔ ꓟ ꓙꓵꓽ ꓗ ꓡꓲꓽ ꓒꓰꓼ ꓔꓯˍ ꓡꓰꓽ ꓛꓳˍ ꓡꓳ= ꓪꓴ-ꓢ ꓠꓲꓹ ꓫꓵˍ ꓟ ꓾ ꓪꓴ-ꓢ ꓡꓰ ꓠꓲꓹ ꓡꓶꓽ ꓙꓳˍ ꓟ ꓔꓯ ꓠꓴ ꓪ ꓟꓽ ꓢꓷꓸ= ꓠꓴ ꓪ ꓠꓬ ꓪꓴ-ꓢ ꓙꓵꓽ ꓗ ꓮ ꓔꓲꓸ ꓤ ꓟ ꓔꓯ ꓠꓴ ꓪ ꓙꓵꓽ ꓗ ꓮ ꓟꓬꓹ ꓧꓳꓽ ꓢꓲ ꓫꓬꓹ ꓗꓷˍ ꓡꓳ꓾ ꓐꓰ ꓬꓲ ꓒꓳꓹ ꓖꓶˍ ꓡꓳ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓔꓯ ꓣꓳ ꓵ ꓠꓬꓲˍ ꓕꓯ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓬꓲ ꓶꓼ ꓓꓳ ꓫꓱꓹ ꓓꓳ ꓮ ꓫꓵꓽ ꓥ ꓐꓯ ꓠꓬ꓾ ꓣꓳ ꓠꓬ ꓟꓲ ꓠꓯ ꓗꓪ ꓒꓬꓱꓽ ꓟꓳ ꓡˍ ꓕꓯ ꓣꓳ ꓮ ꓫꓵꓽ ꓫꓵꓽ ꓥ ꓟꓲ꓾ ꓣꓳ ꓮ ꓡꓲ ꓗꓪ ꓐꓰ ꓡˍ ꓟ ꓟꓸ ꓟꓲꓽ ꓞꓳ ꓤ ꓮ ꓙꓵꓽ ꓔꓯ ꓙꓳˍ ꓟ ꓥ ꓡꓳ= ꓔꓯ ꓥꓳꓽ ꓐꓯ ꓪˍ ꓠꓬ ꓡꓲ-ꓢꓴ ꓐꓯ ꓠꓬ ꓡꓲ-ꓢꓴ ꓫꓵꓽ꓾ ꓮ-ꓒꓴꓸ ꓠꓬ ꓮ-ꓒꓴꓸ ꓫꓵꓽ꓾ꓗꓸ-ꓡ ꓐꓯ ꓠꓬ ꓗꓸ-ꓡ ꓫꓵꓽ ꓙꓳˍ ꓟ ꓡꓰ ꓐꓰ ꓚꓲꓸ ꓛꓬ ꓒꓬꓱꓽ ꓟꓳ ꓡˍ ꓟ ꓗꓪ ꓡꓲꓽ ꓒꓰꓼ ꓐꓰ ꓗꓸ ꓚꓵ ꓙꓳˍ ꓡꓳ= ꓕꓱ ꓟ ꓠꓬ ꓙꓲˍ ꓟ ꓥ ꓡ꓾ ꓟꓽ ꓙꓲꓻ ꓟ ꓥ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓠ ꓔ ꓡꓳ= ꓣꓳ ꓔꓯ ꓪꓴ-ꓢ ꓔꓬ ꓗꓪ ꓙꓰ ꓐ ꓡ ꓠꓹ ꓟ꓾ ꓥ ꓠꓬ꓾ ꓪꓴ-ꓢ ꓐꓰ ꓗꓴꓸ ꓙꓲꓽ ꓙꓳ ꓠꓹ ꓟ ꓙꓻ ꓖꓴ ꓗꓪ ꓗꓽ ꓔ ꓕꓯ ꓠꓽ ꓕꓱ ꓟ ꓠꓽ ꓟꓽ ꓙꓲꓻ ꓡ= ꓕꓱ ꓟ ꓡꓰꓽ ꓟꓽ ꓞꓲ ꓣꓳ ꓡꓲꓽ ꓒꓰꓼ ꓘꓴꓽ ꓗꓪ ꓙꓲˍ ꓟ ꓔꓯ ꓣꓴ ꓢꓲ ꓟꓽ ꓙꓲꓻ ꓟ ꓔꓯ ꓠꓬ ꓡꓳꓺ ꓦ ꓗꓷ ꓠ ꓔ ꓡꓳ ꓟꓽ ꓥ ꓡ?

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓒ-ꓡꓲ-ꓢꓷ ꓐꓴ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓬꓲ ꓪ ꓙꓵꓽ ꓗ ꓬꓰ ꓗꓷ ꓢꓲ ꓠꓬꓲ ꓪꓴ-ꓢ ꓡꓰ ꓟꓽ ꓟꓸ ꓔ ꓟ꓾ ꓟꓽ ꓜꓳꓽ ꓟꓽ ꓔꓱꓹ ꓟ ꓬꓲ ꓪ ꓬꓰˍ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓡꓰ ꓟꓽ ꓠꓲꓹ ꓒꓴ ꓟ ꓥ ꓡꓳ= ꓣꓳ ꓥˍ ꓟꓲ ꓟꓲ ꓠꓯ ꓗꓪ ꓞꓳ ꓙꓳ ꓔꓬ ꓕꓯ꓾ ꓢꓯꓸ ꓔꓬ ꓕꓯ ꓪꓴ-ꓢ ꓠꓲꓹ ꓫꓵˍ ꓟ ꓐꓰ ꓟꓲ ꓠꓯ ꓠꓲꓹ ꓫꓵˍ ꓟ꓾ ꓥ ꓠꓬ꓾ ꓡꓲꓽ ꓒꓰꓼ ꓠꓲꓹ ꓫꓵˍ ꓟ ꓔꓯ ꓛꓳꓻ ꓔꓬ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓠ ꓗˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓪꓴ-ꓢ ꓠꓬ ꓬꓲ ꓠꓯꓸ ꓘꓪ ꓗꓪ ꓟ ꓡꓰꓽ ꓡꓳꓸ ꓢꓲ꓾ ꓞꓳ ꓤ ꓠꓬ ꓬꓲ ꓕꓯꓽ ꓢꓲ ꓟ ꓔꓯ ꓡꓳꓸˍ ꓡꓳ꓾ ꓐꓯ ꓟ ꓣꓳ ꓑ ꓙ ꓪˍ ꓡꓳ=

ꓖꓳ ꓡꓱ ꓠꓬꓲ ꓣꓳꓽ ꓢꓲꓺ ꓒ ꓬꓰ-ꓢꓴ ꓗꓸ ꓠꓯꓸ ꓛꓳˍ ꓕꓯ ꓞꓳ ꓤ ꓡꓰ ꓫꓬꓹ ꓔꓶ ꓔ ꓟ꓾ ꓥ ꓠꓬ ꓞꓳ ꓤ ꓡꓰ ꓣꓱꓽ ꓬꓰˍ ꓟ ꓔꓯ ꓕꓯꓽ ꓢꓲꓽ ꓗꓪ ꓡꓰꓽ ꓟꓽ ꓡꓳꓸ ꓠꓬꓲ ꓠꓬꓲ ꓐꓰ꓾ ꓠꓲꓹ ꓟ ꓠꓯꓸꓼ ꓗꓪ ꓡꓳꓸ ꓢꓲ ꓞꓳ ꓙꓳˍ ꓕꓯ ꓠꓽ ꓪꓴ-ꓢ ꓠꓬ ꓣꓳ ꓔꓯ ꓶꓼ ꓤ ꓫꓱꓹ ꓤ ꓖꓶꓽ ꓡˍ ꓥꓳ= ꓖꓳ ꓡꓱ ꓠꓬꓲ ꓒꓵꓽ ꓓꓰꓺ ꓡꓰˍ ꓟ꓾ ꓪꓴ-ꓢ ꓡꓰ ꓟꓳꓸ ꓖꓶ ꓡˍ ꓟ꓾ ꓟꓲ ꓠꓯ ꓕꓱ ꓟ ꓗꓪ ꓬꓲꓸ ꓬꓲ ꓢꓲꓺ ꓙꓳ ꓓꓰꓺ ꓡꓰˍ ꓟ ꓟꓬꓱꓽ ꓠꓬ ꓠꓲꓹ ꓟ ꓠꓯꓸꓼ ꓗꓪ ꓠꓵ ꓠꓲꓹ ꓗꓪ ꓐꓰ ꓬꓰ ꓢꓲ꓾ ꓐꓹ ꓐ ꓪꓴ-ꓢ ꓔꓯ ꓕꓲ ꓠꓲꓹ ꓟ ꓡꓱꓸꓼ ꓠꓲꓹ ꓠꓵˍ ꓟ꓾ ꓚꓲ ꓛꓬ ꓚꓳ ꓡꓳ ꓗꓪ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓕꓲꓽ ꓠꓲꓹ ꓟ ꓡꓱꓸꓼ ꓠꓲꓹ ꓠꓵˍ ꓟ ꓗꓪ ꓐꓰ ꓬꓰˍ ꓕꓯꓽ ꓠꓽ ꓡꓲꓽ ꓒꓰꓼ ꓮ ꓙꓵꓽ ꓕꓯꓽ ꓢꓲ ꓪꓴꓽˍ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ=

ꓖꓳ ꓡꓱ ꓠꓬꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ꓾ ꓪꓴ-ꓢ ꓔꓯ ꓕꓲꓽ ꓠꓲꓹ ꓟ ꓡꓱꓸꓼ ꓕꓲ ꓙꓽ ꓠꓲꓹ ꓡꓱꓸꓼ ꓠꓲꓹ ꓠꓵ ꓢꓲ꓾ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓥˍ ꓟꓲ ꓠꓲꓹ ꓠꓵˍ ꓕꓯ ꓠꓬ ꓡꓲꓽ ꓒꓰꓼ ꓗꓹ ꓚꓵ ꓮ ꓙꓵꓽ ꓟ ꓕꓯꓽ ꓢꓲ ꓪꓴꓽˍ ꓡꓳ= ꓖꓳ ꓡꓱ ꓠꓬꓲ ꓕꓯꓽ ꓢꓲ ꓗꓪ ꓐꓰ ꓟꓽ ꓥ꓾ ꓠꓲꓹ ꓟ ꓔꓯ ꓡꓰꓽ ꓡꓳꓸ ꓢꓲ ꓚꓵꓺ ꓚꓵꓺ ꓐꓲꓻˍ ꓟ ꓔꓯ ꓡꓳꓸ ꓢꓲ ꓞꓳ ꓙꓳ ꓙꓰ ꓡꓯ=

Add new comment

3 + 4 =