ꓪꓴ-ꓢ ꓐꓯ ꓘꓶꓽ ꓔꓯ ꓛꓳ ꓢꓴ ꓠꓬ ꓢꓯꓼ ꓟꓬ ꓟꓶ ꓥꓳ

26 ꓫꓵꓽ ꓠꓽ ꓠꓽ-ꓦꓬꓼ-ꓠꓬꓲ ꓢꓲ-ꓫꓬ ꓕꓳꓽ ꓶꓽ ꓝꓲꓸ

ꓬꓲ-ꓫꓲ-ꓚꓰꓼ ꓕꓳꓽ ꓶ 18: 25- 28

  ꓖꓳ ꓡꓱ ꓥ_ ꓟꓲ ꓠꓴ ꓪ ꓡꓰ꓾ ꓢꓲ ꓒ ꓬꓲ ꓚꓱꓹ ꓠꓬ ꓟꓽ ꓜꓳ ꓟꓽ ꓔꓱꓹ꓾ ꓐꓰ ꓐꓯ_ ꓡꓳ꓿ ꓬꓲ-ꓢꓷ-ꓡꓰ ꓕꓲ ꓦꓲ ꓢꓴꓳ꓾ ꓮ ꓟꓶ ꓠ ꓠꓹ꓾ ꓥꓪ ꓚꓱꓹ ꓠꓬ ꓟꓽ ꓔꓱꓹ ꓡꓺꓽ꓿ ꓟꓽ ꓔꓱꓹ ꓟ ꓠꓬ ꓠꓴ ꓪ ꓚꓱꓹ ꓟꓽ ꓥ ꓡꓺꓽ꓿ ꓙꓲ ꓫꓬ_ ꓟ ꓞꓳ ꓤ ꓕꓲ ꓣꓳ ꓠꓬ ꓬꓲ ꓙꓲ ꓫꓬ_ ꓟ ꓗꓪ ꓐꓰ ꓒꓳꓹ ꓙꓰ ꓢꓲ꓾ ꓟꓽ ꓙꓲ ꓟꓽ ꓜꓳ ꓟ ꓬꓰ ꓙꓰ_ ꓕꓯ ꓠꓽ꓾ ꓬꓲ ꓠꓽ ꓖꓳ ꓟ ꓑꓶ ꓓꓴ ꓫꓵꓻ_ ꓥꓳ꓿ ꓟꓽ ꓙꓲ ꓟꓽ ꓜꓳ ꓟ ꓬꓰ ꓗꓷ_ ꓟ ꓑꓶ ꓓꓴ ꓬꓲ ꓫꓵꓻ_ ꓥꓳ꓿ ꓖꓳ ꓡꓱ ꓥ_ ꓟꓲ ꓞꓳ ꓥꓶ ꓠꓬ ꓬꓲ ꓬꓰ ꓗꓷ ꓟ ꓥꓶ_ ꓟ ꓗꓪ ꓐꓰ ꓒꓳꓹ ꓬꓲꓼ ꓡ ꓢꓲ꓾ ꓔꓱ_ ꓟ_ ꓐꓰ ꓙꓵꓽ ꓗ ꓔꓯ ꓛꓳ_ ꓕꓯ ꓠꓽ꓾ ꓬꓲ ꓠꓽ ꓬꓲ ꓢꓯꓼ ꓟꓬ ꓔꓯ ꓚꓬꓴ ꓟꓶ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓓꓵ ꓙ ꓠꓬꓲ ꓢꓲ꓾ ꓬꓲ ꓬꓰ ꓗꓷ_ ꓟ ꓛꓬꓻ ꓖꓴ ꓥꓳ ꓖꓴ ꓮ ꓙꓵ ꓗꓪ ꓐꓰ ꓧꓹ ꓙꓰ_ ꓟ ꓑꓶ ꓓꓴ꓾ ꓬꓲ ꓠꓬ ꓚꓵ ꓚꓵ ꓢꓯꓸ ꓔꓬ ꓪ_ ꓥꓳ꓿ ꓬꓲ ꓠꓽ ꓟꓽ ꓫꓵꓻꓳ꓿

ꓒꓲ-ꓡꓲ-ꓒꓲ 2ꓽ 1-11

ꓠꓴ ꓪꓽ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓠꓬꓲ ꓢꓯꓼ ꓖꓶ ꓡꓯꓽ ꓘꓳ ꓓꓴˍ ꓐꓰ꓾ ꓠꓵ ꓠꓲꓹ ꓗꓪ ꓗꓴ ꓖꓶꓽ ꓡꓯꓽ ꓘꓳ ꓓꓴˍ ꓐꓰ꓾ ꓢꓲ-ꓫꓬ-ꓟ-ꓦ ꓗꓪ ꓙ ꓡꓯꓽ ꓘꓳˍ ꓟ ꓐꓰ ꓠꓲꓹ ꓟ ꓜꓲꓺˍ ꓟ ꓐꓰ꓾ ꓫꓱꓸ ꓤ ꓡꓯꓽ ꓘꓳˍ ꓟ ꓙꓳˍ ꓕꓯ ꓠꓽ꓾ ꓕꓲ ꓠꓲꓹ ꓕꓲ ꓪꓽ ꓬꓰ ꓢꓲ꓾ ꓠꓵ ꓠꓲꓹ ꓕꓲꓽ ꓡꓰꓹꓼ ꓙꓳ ꓢꓲ ꓠꓬꓲ꓾ ꓕꓲ ꓠꓲꓹ ꓕꓲ ꓦ ꓬꓰˍ ꓟ ꓗꓪ ꓐꓰ ꓥꓪ ꓗꓹ ꓛꓲ ꓠꓲꓹ ꓐꓲ ꓡ ꓝꓲ꓿ꓮꓸ ꓫꓵ ꓗꓪˍ ꓟꓲ ꓚꓲ ꓛꓬ ꓙꓲ ꓖꓴ ꓟꓶ ꓠꓹ ꓟ ꓡꓰ ꓗꓪꓺ ꓡꓯꓽ ꓘꓳˍ ꓟ ꓐꓰ ꓟꓬꓱ ꓓꓳꓽ ꓬꓲ ꓖꓳꓽ ꓧꓪˍ ꓟ ꓕꓽ ꓬꓰ꓿ ꓮꓽ ꓟ ꓥ ꓟꓲ ꓙ ꓣꓳꓽˍ ꓟ ꓠꓲꓹ ꓟ ꓡꓰ ꓚꓲ ꓛꓬ ꓕꓯꓽ ꓢꓲ ꓢꓴꓻ ꓔꓯ ꓪꓻ ꓜꓲꓻ ꓒꓵꓽˍ ꓟ ꓚꓬꓹ꓿ꓠꓴ ꓪꓽ ꓮꓽ ꓟ ꓥ ꓟꓲ ꓚꓲ ꓛꓬ ꓙꓲ ꓖꓴ ꓐꓱ ꓶˍ ꓡꓰ ꓕꓽ ꓓꓵꓽ ꓙ꓿ ꓢꓴ ꓐꓱ ꓶˍ ꓟꓲ ꓓꓵꓽ ꓙꓽ ꓙ꓿ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓓꓯꓹ ꓟ ꓠꓲꓹ ꓟ ꓕꓱ ꓟ ꓠꓬ ꓠꓴ ꓪꓽ ꓠꓯꓸꓼ ꓗꓪˍ ꓟꓲ ꓓꓯꓹ ꓝꓲ꓿ꓬꓲ ꓠꓬ ꓪꓴ-ꓢ ꓒꓬꓱꓽ ꓙꓳ ꓞꓹ ꓥ ꓟꓲ꓾ ꓪꓴ-ꓢˍ ꓐꓰ ꓔꓱꓺ ꓪꓴꓸꓼ ꓥ ꓟ ꓟꓬꓱ ꓓꓳꓽ ꓔꓯ ꓩꓴ ꓗꓷ ꓟꓽ ꓬꓯꓼ꓾ ꓐꓰ ꓟꓽ ꓓꓵꓽ ꓙꓽ ꓙ꓾ꓬꓲ ꓠꓬ ꓚꓲ ꓛꓬ ꓔꓯ ꓧꓳꓸ ꓩꓴ ꓗꓷ ꓢꓲ꓾ ꓚꓳ ꓑꓸ ꓒꓬꓱꓽ ꓣꓴ ꓢꓲ ꓠꓬꓲ ꓞꓳ ꓤ ꓒꓬꓱꓽ ꓶꓻ ꓡꓰꓳ꓿ꓬꓲ ꓠꓬ ꓞꓳ ꓤ ꓒꓬꓱꓽ ꓙꓳ ꓞꓹ ꓢꓲ꓾ ꓙ ꓣꓳ ꓢꓲ ꓠꓬꓲ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓵꓻˍ ꓗꓪ ꓛꓲ ꓒꓵꓽ ꓛꓳ ꓗꓷꓳ꓿ꓖꓳ ꓟ ꓑꓶ ꓓꓴ ꓪꓴ-ꓢ ꓡꓰ ꓬꓲ ꓔꓯ ꓮ ꓟꓴꓹ ꓟꓴ ꓓꓳꓹ ꓟꓴ ꓗꓷ ꓢꓲ꓾ ꓟꓬꓱ ꓥ ꓕ ꓑꓳꓸ ꓕꓯꓽ ꓢꓲ ꓪꓴꓽˍ ꓟ ꓟꓬꓱ ꓕꓲ ꓟ ꓖꓶꓽ ꓗꓷꓳ꓿ꓕꓱ ꓟ ꓗꓪ ꓐꓰ ꓟꓴꓽ ꓗꓪ ꓕꓯ ꓢꓲ ꓗꓪ ꓔꓬ ꓢꓴˍ ꓐꓰ꓾ ꓟꓲ ꓠꓯ ꓗꓪ ꓔꓬ ꓢꓴˍ ꓐꓰ꓾ ꓟꓲ ꓠꓯ ꓠꓯꓸ ꓘꓪ ꓔꓬ ꓢꓴ ꓮꓽ ꓙꓵ ꓠꓬ ꓬꓰ-ꓢꓴ ꓟꓬꓱ ꓑꓶꓸ ꓓꓴ ꓛꓲ ꓝꓲꓸ ꓖꓶ ꓢꓲ꓾ꓐꓹ ꓐ ꓪꓴ-ꓢ ꓔꓯ ꓟꓬꓱ ꓓꓳꓽ ꓟꓶ ꓝꓲ ꓠꓹ ꓟ꓾ ꓬꓰ-ꓢꓴ ꓙꓲ-ꓢꓴ ꓠꓬ ꓢꓲ ꓒꓽ ꓥꓳ꓾ ꓐꓰ ꓡꓺ ꓛꓱ ꓥ ꓕ ꓑꓳꓸ ꓣꓷꓠꓸ ꓠꓹ ꓟ ꓥ ꓡꓳ꓿

ꓶꓽ ꓓꓳꓽ ꓫꓱꓸ ꓓꓳ

ꓟ-ꓕꓲ 21ꓽ 28- 32

ꓠꓴ ꓪꓽ ꓮ ꓡꓲ ꓓꓵꓽ ꓙꓽˍ ꓡ? ꓡ ꓞꓳ ꓕꓲ ꓣꓳ ꓠꓬ ꓤ ꓠꓬꓲꓽ ꓫꓵꓸ ꓙꓳ ꓢꓲ꓾ ꓬꓲ ꓡꓰ ꓤ ꓪꓴꓽ ꓔꓯ꓾ ꓥꓪ ꓤꓽꓳ꓾ ꓠꓬꓲꓸ ꓠꓬꓲ ꓠꓴ ꓠꓬ ꓛꓱꓼ ꓡꓱ ꓐꓱ ꓗꓪ ꓟꓬꓱꓽ ꓬꓰ ꓙꓰ꓾ ꓐꓯ ꓖꓶˍ ꓡꓳ꓿ꓬꓲ ꓪꓴꓸ ꓕꓯ ꓬꓲ ꓠꓬ꓾ ꓥꓪ ꓟꓽ ꓙꓰ꓾ ꓐꓰ ꓐꓯ ꓗꓷˍ ꓟꓲ꓾ ꓗꓸ ꓠꓯꓸ ꓠꓬ ꓬꓲ ꓓꓵꓽ ꓙ ꓡꓰꓼ ꓡ ꓢꓲ ꓙꓰ ꓗꓷꓳ꓿ꓝꓮꓲ ꓠꓬꓲꓽ ꓣꓳ ꓕꓲ ꓣꓳ ꓟ ꓔꓯˍ ꓟꓲ ꓬꓲ ꓐꓹ ꓐꓽ ꓡꓰ ꓝꓲ ꓗꓷ ꓠꓬ꓾ ꓐꓹ ꓐꓽꓳ꓾ ꓥꓪ ꓙꓰˍ ꓥꓳ꓾ ꓐꓰ ꓐꓯˍ ꓟꓲ꓾ ꓬꓲ ꓠꓬ ꓟꓽ ꓙꓰ꓿ꓤ ꓕꓱ ꓠꓬꓲꓽ ꓫꓵꓸ ꓟ ꓬꓲ ꓐꓹ ꓐ ꓠꓲꓹ ꓡꓶꓽ ꓛꓳˍ ꓟ ꓮ ꓡꓲ ꓕꓲ ꓣꓳ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓠꓬ꓾ ꓬꓲ ꓪꓽ ꓡꓰ꓾ ꓬꓲ ꓪꓴꓸ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓝꓲꓸ ꓫ ꓢꓴˍ ꓐꓰ ꓖꓳꓻ ꓪꓴꓽ ꓟ ꓠꓽ꓾ ꓪꓴ-ꓢ ꓗꓴꓷꓼ ꓗꓪ ꓠꓴ ꓪꓽ ꓟꓲꓽ ꓕꓯꓽ ꓢꓲ ꓓꓵꓽ ꓡꓰ ꓟꓶˍ ꓥꓳ꓿ꓮ ꓡꓲꓳ ꓐꓯ ꓠꓬ ꓬꓳ-ꓦ ꓠꓬ ꓠꓴ ꓪꓽ ꓔꓯ ꓔꓱꓹ ꓜꓳꓽˍ ꓟ ꓙ ꓖꓴ ꓟꓸ ꓖꓶ ꓠꓹ ꓟ ꓡꓻˍ ꓟꓲ ꓠꓴ ꓪꓽ ꓠꓽ ꓬꓲ ꓔꓯ ꓟꓽ ꓙꓵ꓿ ꓖꓳ ꓡꓱ ꓥ ꓟꓲ ꓝꓲꓸ ꓫ ꓢꓴˍ ꓐꓰ ꓖꓳ ꓪꓴꓽ ꓟ ꓠꓽ ꓬꓲ ꓔꓯ ꓙꓵꓻˍ ꓡꓳ꓿ ꓖꓳ ꓟ ꓔꓯ ꓠꓴ ꓪꓽ ꓟꓳꓻ ꓗꓷˍ ꓟꓲ꓾ ꓬꓲ ꓔꓯ ꓙꓵꓻ ꓠꓹ ꓟ ꓠꓴ ꓪꓽ ꓟꓽ ꓓꓵꓽ ꓙ ꓒꓳꓹ ꓡꓰꓼ ꓡ꓿ꓔꓯ ꓥꓳꓽ ꓝꓮꓲ ꓕꓲ ꓟ ꓔꓯ ꓠꓴ ꓪꓽ ꓠ ꓠꓹ꓿ ꓦꓻ ꓟꓲ ꓢꓲ ꓒꓽ ꓕꓲ ꓣꓳ ꓠꓬ ꓛꓱꓼ ꓡꓱ ꓕꓲ ꓐꓱ ꓔꓶ ꓢꓲ꓾ ꓚꓳ ꓡꓳ ꓡꓳ ꓚꓱꓺ ꓢꓲ ꓠꓬꓲ꓾ ꓐꓱ ꓠꓯꓸꓼ ꓗꓪ ꓛꓱꓼ ꓡꓱꓼ ꓢꓶꓽ ꓠꓬꓲꓸ ꓖꓴ ꓚꓴꓸˍ ꓡꓳ꓿ ꓝꓮꓲ ꓡꓳꓸ ꓜꓳꓻ ꓦꓲˍ ꓟꓲ ꓕꓲ ꓦꓲ ꓫꓬꓹ ꓢꓲ꓾ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓑꓯꓹ ꓖꓶꓽ ꓗꓷ ꓠꓬ꓾ ꓠꓱꓸ ꓐꓯꓼ ꓕꓲ ꓟꓵꓽ ꓗꓪ ꓙꓰˍ ꓡꓳ꓿ꓛꓱꓼ ꓡꓱꓼ ꓢꓶ ꓧꓼ ꓝꓲꓸ ꓛꓲ ꓡ ꓠꓬ ꓬꓲ ꓚꓳ ꓑꓸ ꓐꓴ ꓔꓯ ꓬꓲ ꓟꓶ ꓙꓲꓽ ꓙꓳˍ ꓟ ꓣꓷꓽ ꓫ ꓔꓯꓹ ꓬꓲꓼ ꓡ ꓠꓹ ꓟ꓾ ꓟꓬꓱꓽ ꓬꓰ ꓢꓴ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ꓖꓳ ꓡꓱ ꓥ ꓟꓲ ꓛꓱꓼ ꓡꓱꓼ ꓐꓱ ꓑꓯꓹ ꓬꓰ ꓢꓴ ꓐꓴ ꓡꓰ ꓬꓲ ꓚꓳ ꓑꓸ ꓐꓴ ꓔꓯ ꓣꓴ ꓢꓲ꓾ ꓕꓲ ꓣꓳ ꓔꓯ ꓠꓬ ꓓꓶꓽ꓾ ꓕꓲ ꓣꓳ ꓔꓯ ꓢꓰꓼ꓾ ꓕꓲ ꓣꓳ ꓔꓯ ꓠꓬ Bꓸ ꓛꓲ ꓡꓰ ꓡꓳꓺˍ ꓡꓳ꓿ꓝꓮꓲ ꓕꓲ ꓧꓪꓹ ꓬꓲ ꓡꓰ ꓬꓲ ꓚꓳ ꓑꓸ ꓐꓴ ꓧꓶꓸ ꓕꓯˍ ꓟ ꓟꓬ ꓟꓽ ꓞꓲ ꓕꓲ ꓧꓳꓽ ꓔꓯ ꓝꓲ ꓩꓴ ꓗꓷˍ ꓟꓲ꓾ ꓬꓲ ꓪꓽ ꓠꓬ ꓧꓶꓸ ꓕꓯꓽˍ ꓟ ꓡꓰ ꓐꓰ ꓬꓲ ꓪꓽ ꓔꓯ ꓬꓰ ꓖꓶˍ ꓢꓰꓽ ꓡꓳ꓿ꓗꓸ ꓠꓯꓸ ꓠꓬ꓾ ꓥꓪ ꓮ ꓐꓲ ꓔꓯ ꓠꓽ ꓬꓲ ꓪꓽ ꓙꓳꓺ ꓒꓵꓽˍ ꓥꓳ꓾ ꓓꓵꓽ ꓙ ꓢꓲ꓾ ꓬꓲ ꓤ ꓔꓯ ꓬꓲ ꓪꓽ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ꓖꓳ ꓡꓱ ꓥ ꓟꓲ ꓛꓱꓼ ꓡꓱ ꓐꓱ ꓑꓯꓹ ꓬꓰ ꓢꓴ ꓐꓴ ꓡꓰ ꓬꓲ ꓤ ꓔꓯ ꓟꓳꓻ ꓗꓷ ꓕꓯ꓾ ꓕꓱ ꓟ ꓠꓬ ꓬꓲ ꓡꓯꓼ ꓪ ꓟꓶ ꓢꓴ ꓥꓳ꓾ ꓡꓯ꓾ ꓣꓳꓽ ꓬꓲ ꓔꓯ ꓢꓰꓼ ꓗꓷ ꓢꓲ꓾ ꓬꓲ ꓡꓯꓼ ꓪ ꓔꓯ ꓦꓴꓻ ꓓꓴ ꓬꓰ ꓡꓯ꓾ ꓐꓰ ꓖꓪ ꓙꓱ ꓡꓯꓽ ꓘꓳˍ ꓡꓳ꓿