ꓪꓴ-ꓢ ꓔꓯ ꓡꓹ ꓠꓬ ꓧꓪꓸ ꓡꓰ_ ꓟ (ꓧꓳꓟꓲꓡꓬ)

4 ꓫꓵꓽ ꓠꓽ ꓟ ꓢꓲ-ꓒ ꓦꓬ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶꓽ ꓝꓲꓸ

ꓙꓵꓽ ꓗ ꓐꓯ ꓟꓸ ꓕꓳꓽ ꓶ 18: 15

ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓡꓰ ꓠꓴ ꓬꓲꓼ ꓠꓴ ꓠꓬꓲ ꓐꓴ ꓗꓳ ꓡꓳ ꓗꓪ ꓐꓰ꓾ ꓥꓪ_ ꓡꓰ ꓐꓰ ꓟꓷ ꓠꓷ ꓝ ꓢꓴ ꓕꓲ ꓣꓳ ꓔꓴ ꓡ ꓝꓲ_ ꓥꓳ꓿ ꓠꓴ ꓪ ꓠꓬ ꓬꓲ ꓔꓯ ꓠ ꓠꓹ ꓠ ꓗ_ ꓡꓳ꓿ ꓕꓱ ꓟ ꓠꓽ ꓧꓳ-ꓣ-ꓐꓷ ꓪ ꓚꓲ ꓗꓪ ꓜꓲ ꓓꓴ ꓜꓲꓼ ꓡ_ ꓟ ꓦꓬ ꓠꓬꓲ ꓖꓳ ꓕꓲ ꓠꓬꓲ ꓗꓪ ꓠꓴ ꓪ ꓡꓰ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓔꓯ ꓓꓰꓽ_ ꓟ ꓮ ꓙꓵ ꓔꓯ ꓛꓳ_ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓡꓰ꓾ ꓬꓰ-ꓧꓳ-ꓧꓪ ꓥꓪ ꓠꓴ ꓪꓴ-ꓢ ꓢꓯꓼ ꓔꓯ ꓝꓮꓲ ꓕꓽ ꓑ ꓙ ꓪ ꓝꓲ꓾ ꓥꓪ ꓠꓴ ꓟꓽ ꓫꓵꓻ ꓠꓹ ꓟ ꓮ ꓔꓳꓸ ꓓꓽ ꓟ ꓕꓱ ꓟ ꓔꓯ_ ꓟꓲ ꓥꓪ ꓠꓴ ꓝꓮꓲ ꓕꓽ ꓟꓳ ꓪ ꓡꓰ ꓝꓲ꓾ ꓐꓰ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓰ-ꓧꓳ-ꓧꓪ ꓡꓰ ꓥꓪ ꓔꓯ꓾ ꓬꓲ ꓪ ꓐꓯ_ ꓟ ꓠꓬ ꓜꓳꓽ_ ꓡꓳ꓿ ꓥꓪ ꓠꓬ ꓬꓲ ꓪ ꓐꓱ ꓶ ꓬꓲ ꓪ ꓬꓲꓼ ꓬꓲ ꓪ ꓠꓬꓲ ꓗꓳ ꓡꓳ ꓗꓪ ꓐꓰ꓾ ꓠꓴ_ ꓡꓰ ꓐꓰ ꓟꓷ ꓠꓷ ꓝ ꓢꓴ ꓕꓲ ꓣꓳ ꓔꓴ ꓡ ꓝꓲ_ ꓥꓳ꓿ ꓖꓳ ꓡꓱ ꓢꓲ ꓥꓪ ꓡꓰ ꓬꓲ ꓟꓷ ꓠꓷ ꓠꓯꓸꓼ ꓗꓪ ꓥꓪ ꓐꓯ ꓘꓶ ꓧꓳꓽ ꓖꓶ ꓢꓲ꓾ ꓥꓪ ꓡꓰ ꓬꓲ ꓔꓯ ꓖꓶ_ ꓟ ꓕꓵꓼ ꓪ ꓮ ꓙꓵ ꓠꓬ ꓬꓲ ꓡꓰ ꓬꓲ ꓪ ꓔꓯ ꓐꓯ ꓟꓸ ꓖꓶ_ ꓥꓳ꓿ ꓬꓲ ꓡꓰ ꓥꓪ ꓟꓬꓱꓺ ꓗꓪ ꓐꓰ ꓐꓯ ꓟꓸ ꓖꓶ_ ꓟ ꓐꓯ ꓘꓶ ꓔꓯ ꓮ ꓟ ꓟꓽ ꓠ ꓠꓹ ꓠꓬ꓾ ꓥꓪ ꓡꓰ ꓮ ꓟ ꓔꓯ ꓧꓪꓺ ꓡ_ ꓥꓳ꓿ ꓖꓳ ꓡꓱ ꓥ_ ꓟꓲ ꓟꓷ ꓠꓷ ꓝ ꓢꓴ ꓕꓲ ꓣꓳ ꓠꓬ ꓥꓪ ꓡꓰ ꓬꓲ ꓔꓯ ꓖꓶ ꓔ_ ꓟ ꓕꓵꓼ ꓪ ꓟꓽ ꓥ ꓟ꓾ ꓪꓴꓸ ꓙꓲꓽ ꓙꓲꓽ_ ꓡꓰ ꓥꓪ ꓟꓬꓱꓺ ꓗꓪ ꓐꓰ ꓐꓯ ꓘꓶ ꓟꓸ ꓖꓶ_ ꓠꓬ꓾ ꓥ ꓠꓬ ꓠꓱ ꓐꓯ ꓢꓲꓺ ꓟꓬꓱꓺ ꓗꓪ ꓐꓰ ꓚ ꓟꓸ ꓖꓶ_ ꓐꓭ ꓠꓬ꓾ ꓟꓷ ꓠꓷ ꓝ ꓢꓴ ꓖꓳ ꓕꓲ ꓣꓳ ꓠꓬ ꓫꓵꓻ ꓠ ꓗ_ ꓡꓳ꓾ ꓐꓰ ꓐꓯ_ ꓡꓳ꓿

1 ꓘꓳ-ꓡꓱ-ꓕꓴ 7ꓽ 32- 35

ꓥꓪ ꓠꓬ ꓠꓴ ꓪꓽ ꓔꓯ ꓓꓵ ꓙꓽ ꓪꓴꓽ ꓧꓶ ꓓꓴ ꓟꓽ ꓙꓳ ꓙꓳ ꓔꓬ ꓝꓲ ꓠꓲꓹ ꓫꓵ ꓡꓳ꓿ ꓤ ꓟꓶ ꓟꓽ ꓙꓳ ꓟ ꓞꓳ ꓑ ꓤ ꓠꓬ꓾ ꓢꓲ ꓒꓽ ꓔꓯ ꓮ ꓡꓲ ꓐꓰ ꓠꓲꓹ ꓒꓴ ꓡꓰ ꓝꓲ ꓠꓹ ꓟ꓾ ꓢꓲ ꓒꓽ ꓫꓵ ꓪꓴꓻ ꓔꓯ ꓠꓲꓹ ꓥꓳˍ ꓡꓳ꓿ 33 ꓤ ꓟꓶ ꓙꓳ ꓢꓴ ꓠꓽ꓾ ꓟꓲ ꓠꓯ ꓗꓪ ꓬꓲ ꓤ ꓟꓶ ꓔꓯ ꓮ ꓡꓲ ꓐꓰ ꓠꓲꓹ ꓒꓴ ꓡꓰ ꓝꓲ ꓠꓹ ꓟ ꓚꓱꓹ ꓗꓪ ꓠꓲꓹ ꓥꓳˍ ꓠꓬꓲ꓾ 34 ꓬꓲ ꓠꓲꓹ ꓟ ꓠꓬ ꓐꓱꓻ ꓞꓹ ꓟ ꓥ ꓡꓳ꓿ ꓦꓲꓻ ꓟꓽ ꓧꓪ ꓢꓰꓽ ꓟ ꓤ ꓟꓶ ꓡꓯꓸ ꓚꓵ ꓠꓬ꓾ ꓧꓪꓽ ꓖꓳ ꓓꓱ ꓗꓪˍ ꓟꓲ꓾ ꓦꓻ ꓗꓪˍ ꓟꓲ ꓢꓲ ꓚꓰꓸ ꓔ ꓢꓴ ꓬꓰ ꓠꓹ ꓟ ꓢꓲ ꓒꓽ ꓙ ꓖꓴ ꓔꓯ ꓠꓲꓹ ꓥꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓝꓱꓺ ꓔ ꓟ ꓤ ꓟꓶ ꓤ ꓠꓽ ꓟꓲ ꓠꓯ ꓗꓪ ꓬꓲ ꓤ ꓖꓴ ꓔꓯ ꓮ ꓡꓲ ꓐꓰ ꓠꓲꓹ ꓒꓴ ꓡꓰ ꓝꓲ ꓠꓹ ꓟ ꓚꓰꓹ ꓗꓪ ꓠꓲꓹ ꓥꓳˍ ꓡꓳ꓿ 35 ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓠꓴ ꓪꓽ ꓔꓯ ꓗꓽ ꓔ ꓠꓹ ꓟ ꓟꓽ ꓥ꓿ ꓠꓴ ꓪꓽ ꓙꓲ ꓖꓴ ꓐꓱ ꓶ ꓥ ꓢꓲ꓾ ꓠꓴ ꓪꓽ ꓠꓬ ꓮꓸ ꓫꓵ ꓘꓶꓻ ꓡꓶꓽ ꓓꓴ ꓟꓽ ꓙꓳ ꓙꓳ꓾ ꓔꓱꓹ ꓔꓱꓹꓼ ꓐꓰ ꓢꓲ ꓒꓽ ꓔꓯ ꓣꓱꓽ ꓙ ꓪ ꓠꓹ ꓟ ꓥ ꓡꓳ꓿

ꓟ-ꓘꓳ 1ꓽ 21- 28

ꓖꓳ ꓗꓸ ꓠꓯꓸ ꓬꓲ ꓪꓽ ꓘ-ꓒꓱ-ꓠꓴ ꓗꓪ ꓛꓲ ꓬꓰˍ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓜꓲꓼ ꓦꓲ ꓗꓪ ꓓꓵꓽ ꓡꓰ ꓢꓲ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 22 ꓬꓲ ꓟꓸ ꓖꓶˍ ꓟ ꓠꓬ ꓙꓵꓽ ꓗ ꓟꓸ ꓒ ꓐꓴ ꓡꓰ ꓟꓸ ꓖꓶˍ ꓟ ꓡꓰ ꓐꓰ ꓟꓽ ꓥ ꓥ꓾ ꓙꓵꓽ ꓪ ꓙꓳ ꓙꓳˍ ꓡꓰꓽ ꓟꓸ ꓖꓶˍ ꓠꓬꓲ ꓬꓲ ꓪꓽ ꓓꓵꓽ ꓙ ꓟꓶꓻˍ ꓡꓳ꓿ 23 ꓖꓳ ꓕꓯ ꓬꓲ ꓪꓽ ꓜꓲꓼ ꓦꓲ ꓗꓪ ꓟꓽ ꓫꓬ ꓠꓲꓽ ꓓꓯꓹ ꓟ ꓡꓽ ꓞꓳ ꓕꓲ ꓣꓳ ꓔꓬ ꓢꓲ꓾ ꓘꓴꓻ ꓔꓴ ꓡ ꓢꓲ ꓠꓬꓲ꓾ 24 ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓥꓪ ꓠꓴꓽ ꓠꓬ ꓠꓴˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓠꓴ ꓠꓬ ꓥꓪ ꓠꓴꓽ ꓔꓯ ꓟꓶꓽ ꓡꓰ ꓝꓲˍ ꓐꓰ ꓡꓻ ꓟ ꓥ ꓡ? ꓠꓴ ꓮꓽ ꓟ ꓥ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓪꓴ-ꓢ ꓬꓲ ꓢꓲ ꓚꓲꓸ ꓔ ꓟ ꓖꓳ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ 25 ꓬꓰ-ꓢꓴ ꓡꓰ ꓬꓲ ꓔꓯ ꓕꓼ ꓢꓲ꓾ ꓕꓽ ꓪꓳꓹ꓾ ꓬꓲ ꓗꓪ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ 26 ꓖꓳ ꓡꓱ ꓠꓬ ꓟꓽ ꓫꓬ ꓠꓲꓽ ꓡꓰ ꓡꓽ ꓞꓳ ꓖꓳ ꓟ ꓔꓯ ꓚꓵꓹ ꓡ ꓝꓲ ꓢꓲ꓾ ꓢꓯꓼ ꓓꓽ ꓟ ꓘꓴꓻ ꓠꓬꓲ ꓐꓰ ꓬꓲ ꓗꓪ ꓐꓰ ꓓꓳ ꓙꓰꓳ꓿ 27 ꓖꓳ ꓕꓯ ꓖꓳ ꓗꓪ ꓔꓬ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓡꓰ ꓢꓲ꓾ ꓕꓱ ꓟ ꓮꓸ ꓫꓵ ꓥ ꓡ? ꓙꓵꓽ ꓪ ꓙꓳˍ ꓟ ꓟꓸ ꓟꓲꓽ ꓫꓵꓼ ꓕꓲꓽ ꓫꓵꓽ ꓥ ꓐꓷ꓿ ꓠꓲꓽ ꓔꓯˍ ꓟꓲ ꓬꓲ ꓙꓵꓽ ꓪ ꓗꓪ ꓐꓰ ꓝꓲˍ ꓕꓯ ꓬꓲ ꓪꓽ ꓒꓵꓽ ꓛꓳˍ ꓐꓷ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 28 ꓬꓲ ꓓꓳꓽ ꓕꓱ ꓟ ꓠꓬ ꓖ-ꓡꓲ-ꓡꓲ ꓕꓲ ꓟꓵꓽ ꓡꓱꓸꓼ ꓗꓪ ꓞꓼ ꓐꓰ ꓚ ꓒꓬꓱ ꓙꓰˍ ꓡꓳ꓿

Add new comment

4 + 4 =