ꓪꓴ-ꓢ ꓕꓵꓼ ꓪ ꓠꓬꓲꓽ ꓚꓱꓹ

ꓠꓬꓲꓸ ꓠꓬꓲ ꓐꓱ ꓶ ꓢꓲꓽ ꓫꓬ ꓕꓳ ꓶ ꓠꓬ ꓟ-ꓘꓳ 12ꓽ28-34 ꓥ ꓢꓲ ꓠꓬꓲ ꓓꓽ ꓪꓴꓸ ꓟ꓾ ꓬꓲ ꓪꓴꓸ ꓟ ꓙꓵꓽ ꓗ ꓚꓱꓹ ꓔꓯ ꓐꓯ ꓟꓸ ꓖꓶ ꓔ ꓡꓳ= ꓙꓵꓽ ꓗ ꓟꓸ ꓒ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ “ꓪꓴ-ꓢ ꓕꓵꓼ ꓪ ꓮ ꓙꓵꓽ ꓟ ꓗꓪ ꓓꓽ ꓪꓴꓸ ꓠꓬ ꓮ ꓡꓲ ꓕꓲ ꓚꓱꓹ ꓟ ꓥ ꓡ? ꓐꓰ ꓠꓺ ꓠꓬꓲˍ ꓕꓯ ꓬꓰ-ꓢꓴ ꓡꓰ “ꓠꓴ ꓠꓬ ꓕꓲ ꓠꓲꓹ ꓟ ꓡꓱꓸꓼ꓾ ꓕꓲ ꓶ ꓟꓬ ꓡꓱꓸꓼ꓾ ꓕꓲ ꓙꓽ ꓠꓲꓹ ꓡꓱꓸꓼ꓾ ꓕꓲ ꓢꓯꓼ ꓡꓱꓸꓼ ꓡꓰ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓲꓹ ꓠꓵ ꓠ ꓗꓹ ꓡꓳ= ꓠꓬꓲꓽ ꓚꓱꓹ ꓕꓲ ꓚꓱꓹ ꓟ ꓠꓬ ꓠꓴ ꓚꓲ ꓛꓬ ꓔꓯ ꓠꓲꓹ ꓠꓵˍ ꓟˍ ꓡꓰ ꓐꓰ꓾ ꓠꓶꓽ ꓛꓳ ꓕꓲ ꓛꓳꓽ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾” ꓐꓰ ꓒꓳꓹ ꓖꓶˍ ꓡꓳ= ꓕꓱ ꓙꓵꓽ ꓗ ꓠꓬꓲꓽ ꓟ ꓡꓱꓸꓼ ꓠꓬ ꓪꓴꓽ ꓓꓰ ꓡꓰˍ ꓟ ꓙꓵꓽ ꓗ ꓥ ꓡꓳ=

ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓪꓴ-ꓢ ꓡꓰ ꓖꓶꓽ ꓔ ꓟ ꓪꓴꓽ ꓓꓰ ꓡꓰ ꓟ ꓙꓵꓽ ꓗ ꓠꓬꓲꓽ ꓟ ꓔꓯ ꓟꓸ ꓖꓶ ꓔꓬ ꓟ ꓥ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓣꓳ ꓞꓳ ꓙꓳ ꓔꓬ ꓕꓯ ꓙꓵꓽ ꓗ ꓕꓱ ꓠꓬꓲꓽ ꓟ ꓔꓯ ꓛꓳ ꓠ ꓗꓹ ꓡꓳ=”ꓥꓪ ꓠꓴ ꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓠꓴ ꓪ ꓥˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵꓻ ꓡꓯ ꓘꓳ ꓠꓹ ꓟ ꓠꓴ ꓪ ꓠꓲꓹ ꓟ ꓔꓯ ꓒꓴ ꓔ” ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓵꓻ ꓠꓲꓹ ꓢꓴ ꓔꓯ ꓖꓶꓽˍ ꓕꓯ ꓚꓲꓸ ꓛꓬ ꓐꓱ ꓶˍ ꓡꓰꓽ ꓟꓽ ꓓꓵꓽ ꓙꓽ ꓠꓹ ꓟˍ ꓟꓲ ꓬꓳꓸ ꓚꓵˍ ꓟ ꓥ ꓡꓳ=

ꓖꓳ ꓡꓱ ꓢꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟˍ ꓡꓰ ꓐꓰ꓾ ꓣꓳ ꓠꓬ ꓙꓲˍ ꓟ ꓔꓯ ꓬꓰ ꓢꓲ꓾ ꓣꓳ ꓟꓬ ꓢꓶꓽ ꓔꓯ ꓒꓴ ꓔ ꓠꓹ ꓟ ꓥ ꓡꓳ= ꓣꓳ ꓐꓴ ꓠꓬ ꓧꓶꓸ ꓕꓯ ꓟ ꓢꓶꓸ ꓟꓽ ꓞꓲꓺ ꓮ ꓟꓶ ꓠꓬ ꓪꓴ-ꓢ ꓐꓰ ꓪ ꓜꓲ ꓠꓶꓽ ꓡꓰ ꓠꓹ ꓟ ꓢꓯꓼ ꓕꓵꓼ ꓠ ꓗꓹ ꓡꓳ= ꓝꓮꓲ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵ ꓠꓹ ꓟ ꓔꓯˍ ꓟꓲ ꓢꓯꓼ ꓕꓵꓼ ꓠ ꓗꓹ ꓡꓳ= ꓠꓶꓽ ꓛꓳ ꓕꓲ ꓛꓳꓽ ꓔꓯ ꓣꓳ ꓠꓲꓹ ꓠꓵˍ ꓡꓳ ꓐꓯ ꓟ ꓔꓯ  ꓮ ꓡꓲ ꓐꓰ ꓟꓳꓸ ꓖꓶ ꓠꓯꓹ ꓡ? ꓕꓱ ꓟ ꓠꓬ ꓬꓲ ꓪ ꓣꓱꓽ ꓞꓹ ꓔꓬ ꓕꓯ ꓙꓰ ꓢꓲ ꓬꓰ ꓙ ꓖꓶˍ ꓟ꓾ ꓟꓽ ꓓ ꓣꓱꓽ ꓞꓹ ꓔꓬ ꓢꓴ ꓔꓯ ꓬꓰ ꓙ ꓔꓳꓹ ꓙ ꓖꓶˍ ꓟ ꓕꓱ ꓟ ꓗꓪ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓣꓳ ꓠꓵꓻ ꓠꓲꓹ ꓟꓳꓸ ꓖꓶ ꓐ ꓡˍ ꓟ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓬꓲ ꓐꓬꓱꓼ ꓡꓱꓼ ꓡꓱꓼˍ ꓟ ꓐꓱ ꓶ ꓣꓳ ꓔꓯ ꓓꓻˍ ꓟ ꓣꓳ ꓠꓯꓸꓼ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓔꓲꓺ ꓖꓶ ꓔꓬ ꓟ ꓡꓰ ꓐꓰ ꓥꓳ= ꓕꓱ ꓟ ꓠꓬ ꓪꓴ-ꓢ ꓔꓯ ꓕꓲ ꓶ ꓟꓬ ꓡꓱꓸꓼ꓾ ꓕꓲ ꓙꓽ ꓠꓲꓹ ꓡꓱꓸꓼ ꓠꓲꓹ ꓠꓵˍ ꓟ ꓔꓯ ꓟꓳꓸ ꓖꓶˍ ꓟ ꓥ ꓡꓳ=