ꓪꓴ-ꓢ ꓗꓴꓷꓼ ꓠꓬ ꓠꓴ ꓪ ꓗꓳ ꓡꓳ ꓗꓪ ꓓꓹ ꓡꓳ꓾

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓒ-ꓡꓲ-ꓢꓷ ꓐꓴ ꓡꓰ ꓢꓲꓺ ꓒ ꓬꓰ-ꓢꓴ ꓔꓯ ꓟꓴ ꓗꓪ ꓗꓷꓴꓼ ꓠꓬ ꓮ ꓡꓰ ꓕꓯ ꓛꓲꓺ ꓡ ꓢꓲ ꓠꓬ ꓮ ꓡꓲ ꓗꓪ ꓓꓹ ꓡ꓾ ꓐꓰ ꓠ ꓠꓬꓲˍ ꓟ ꓐꓯ ꓘꓶꓽ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓒꓳꓹ ꓖꓶˍ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓠꓬ ꓖꓳ ꓗꓪ ꓓꓹ ꓡꓳ꓾ ꓕꓱ ꓗꓪ ꓓꓹ ꓡꓳ ꓐꓰ ꓐꓯ ꓟꓽ ꓠ= ꓟꓴꓽ ꓗꓪ ꓗꓴꓷꓼ ꓮ ꓕꓯ ꓛꓲꓺ ꓡ ꓟ ꓔꓯˍ ꓟꓲ ꓠꓴ ꓪ ꓢꓷꓸ ꓟꓽ ꓓ= ꓥꓪ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ ꓟꓴꓽ ꓗꓪ ꓗꓴꓷꓼ ꓠꓬ ꓠꓴ ꓪ ꓗꓳ ꓡꓳ ꓗꓪ ꓓꓹ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓠꓲꓹ ꓠꓵˍ ꓟꓲ ꓬꓲ ꓤ ꓠꓬꓲ ꓤ ꓐꓴꓳ꓾ ꓟꓴꓽ ꓗꓪ ꓗꓴꓷꓼ ꓐꓯ ꓟ ꓠꓬ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓓꓹ ꓡꓳ ꓐꓰ ꓕꓲ ꓐꓱ ꓟ ꓓꓵꓽ ꓙˍ ꓡꓳ= ꓕꓲ ꓐꓱ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ ꓠꓱꓸ ꓐꓯꓼ ꓕꓲ ꓛꓱꓽ ꓗꓪ ꓓꓹ ꓡꓳ= ꓥ ꓠꓬ ꓖꓳ ꓗꓪ ꓓꓹ ꓡꓳ꓾ ꓕꓱ ꓗꓪ ꓓꓹ ꓡꓳ꓾ ꓐꓰ ꓐꓯ ꓢꓴ ꓙꓳˍ ꓡꓳ= ꓕꓲ ꓐꓱ ꓠꓬ ꓟꓴꓽ ꓗꓪ ꓗꓴꓷꓼ ꓠꓶꓽ ꓡ ꓔꓬꓳ꓾ ꓐꓰ ꓐꓯ ꓢꓲ ꓟꓸ ꓟꓲꓽ ꓚꓺ ꓔꓬ ꓢꓴˍ ꓟꓲ ꓙꓳˍ ꓡꓳ=

ꓖꓳ ꓡꓱ ꓥˍ ꓟꓲ ꓪꓴ-ꓢ ꓔꓬ ꓟ ꓗꓪ ꓟꓴꓽ ꓗꓪ ꓗꓴꓷꓼ ꓓꓹ ꓡꓳ꓾ ꓐꓯ ꓟ ꓣꓳ ꓢꓷꓸ ꓠ ꓗꓹ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓟꓽ ꓔꓬ ꓟ ꓟꓴꓽ ꓗꓪ ꓗꓴꓷꓼ ꓟꓽ ꓙꓳ= ꓟꓴꓽ ꓗꓪ ꓗꓴꓷꓼ ꓠꓬ ꓪꓴ-ꓢ ꓔꓬ ꓟ꓾ ꓪꓴ-ꓢ ꓟꓬꓱ ꓓꓳꓽ꓾ ꓪꓴ-ꓢ ꓬꓲ ꓐꓬꓱꓼ ꓡꓱꓼ  ꓡꓱꓼ ꓡꓬꓸ ꓔꓬ ꓟ ꓗꓴꓷꓼ ꓔꓯ ꓐꓯ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓡꓳ= ꓟꓴꓽ ꓗꓪ ꓗꓴꓷꓼ ꓠꓬ ꓠꓴ ꓪ ꓗꓳ ꓡꓳ ꓗꓪ ꓓꓹ ꓡꓳ꓾ ꓐꓰ ꓐꓯ ꓟ ꓠꓬ ꓪꓴ-ꓢ ꓠꓬ ꓠꓴ ꓪ ꓗꓳ ꓡꓳ ꓗꓪ ꓔꓬ ꓡꓳ꓾ ꓐꓯ ꓟ ꓔꓯ ꓐꓯ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓴ ꓪ ꓗꓳ ꓡꓳ ꓗꓪ ꓪꓴ-ꓢ ꓔꓬ ꓠꓬ ꓖꓳ ꓗꓪ ꓠꓬ ꓟꓴꓽ ꓗꓪ ꓗꓴꓷꓼ ꓥ ꓡꓳ= ꓪꓴ-ꓢ ꓮ ꓡꓰ ꓗꓪ ꓔꓬ ꓠꓬ ꓖꓳ ꓗꓪ ꓟꓴꓽ ꓗꓪ ꓗꓴꓷꓼ ꓓꓹ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓗꓪ ꓠꓬ ꓪꓴ-ꓢ ꓔꓬ ꓟꓽ ꓔꓬ ꓐꓯ ꓟ ꓔꓯ ꓣꓳ ꓮ ꓡꓰ ꓢꓷꓸ ꓓꓹ ꓡ ꓐꓯ ꓠꓬ ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓡꓳ ꓐꓯ ꓟ ꓔꓯ ꓣꓳ ꓢꓷꓸ ꓢꓲ ꓠꓬꓲ꓾ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓣꓳ ꓗꓳ ꓡꓳ ꓗꓪ ꓣꓳ ꓦꓲ ꓘꓴꓽ ꓠꓯꓸꓼ ꓗꓪ ꓠꓵꓻ ꓠꓲꓹ ꓢꓲꓺ ꓡꓲˍ ꓟ ꓟꓽ ꓙꓳ ꓥꓳ ꓐꓯ ꓠꓬ ꓠꓴ ꓪ ꓦꓲ ꓘꓴꓽ ꓠꓯꓸꓼ ꓗꓪ ꓪꓴ-ꓢ ꓟꓲ ꓟꓽ ꓔꓬ ꓟ ꓥ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ? ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓟ ꓪꓴꓸ ꓠꓬꓲ ꓠꓴ ꓪ ꓠꓲꓹ ꓟ ꓠꓯꓸꓼ ꓗꓪ ꓠꓵꓻ ꓠꓲꓹ ꓙꓳˍ ꓠꓬ꓾ ꓪꓴ-ꓢˍ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓔꓬ ꓡ ꓢꓲ ꓠꓴ ꓪ ꓠꓲꓹ ꓟ ꓠꓯꓸꓼ ꓗꓪ ꓟꓴꓽ ꓗꓪ ꓗꓴꓷꓼ ꓓꓹ ꓟ ꓥ ꓡꓳ=

ꓟꓴ ꓗꓪ ꓗꓴꓷꓼ ꓮ ꓡꓰ ꓗꓪ ꓓꓹ ꓟ ꓣꓳ ꓢꓷꓸ ꓟꓽ ꓓ= ꓖꓳ ꓡꓱ ꓥˍ ꓟꓲ ꓟꓴꓽ ꓗꓪ ꓗꓴꓷꓼ ꓠꓬ ꓪꓴ-ꓢ ꓮ ꓡꓰ ꓗꓪ ꓔꓬ ꓠꓬ ꓖꓳ ꓗꓪ ꓓꓹ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳꓽ ꓪꓴ-ꓢ ꓔꓯ ꓕꓶꓻ ꓕꓶꓻ ꓐꓰ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓕꓯ ꓠꓽ ꓮ ꓕꓯˍ ꓟꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓟꓴꓽ ꓗꓪ ꓗꓴꓷꓼ ꓓꓹ ꓟ ꓥ ꓡꓳ= ꓮ ꓡꓰ ꓙꓰ ꓛꓲꓺ ꓬꓰ ꓢꓲ ꓮ ꓫꓵꓽ ꓔꓳꓹ ꓜꓳꓽ ꓡˍ ꓟꓲ꓾ ꓫ ꓙꓵ ꓡˍ ꓟꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓔꓯ ꓘꓳꓹ ꓣꓴ ꓔ ꓥꓳ ꓐꓯ ꓠꓬ ꓖꓳ ꓗꓪ ꓟꓴꓽ ꓗꓪ ꓗꓴꓷꓼ ꓓꓹ ꓟ ꓥ ꓡꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓦ ꓢꓯꓼ ꓖꓶ ꓢꓲ ꓠꓬꓲ ꓐꓯ ꓟꓳꓸ ꓖꓶ ꓔꓬ ꓟ ꓥ ꓡꓳ=

Add new comment

1 + 1 =