ꓪꓴ-ꓢ ꓙꓽ ꓜꓲꓼ ꓠꓲꓹ ꓢꓷ ꓠꓲꓹ ꓗꓪ ꓐꓰ ꓟꓬꓱꓽ ꓬꓰ ꓠꓯˍ ꓟ

ꓘꓴ ꓜꓲ ꓞꓳ ꓟꓶꓽ ꓘꓳꓼ 32 ꓠꓽ

 

ꓙꓽ ꓗꓴꓸ ꓠꓲꓹ ꓕꓳꓽ ꓶꓽ 6ꓽ 12- 16

ꓙꓽ ꓗꓴꓸ ꓠꓲꓹ ꓠꓬ ꓐꓬꓱꓽ ꓡꓱꓼ ꓡꓱꓼ ꓗꓹ ꓢꓲ ꓧꓳꓽ ꓬꓰ ꓟꓽ ꓓ= ꓖꓳ ꓟ ꓔꓯ ꓟꓷ ꓢꓲꓼ ꓠꓬ ꓮ ꓘꓶ ꓧꓪ ꓢꓻ ꓡꓳ= ꓧꓪ ꓢꓴ ꓐꓴˍ ꓟꓲ ꓧꓪ ꓟꓶ ꓡꓰˍ ꓡꓳ= ꓙꓽ ꓗꓴꓸ ꓠꓲ ꓠꓬ ꓚꓲ ꓛꓬ ꓔꓯ ꓟꓷ ꓢꓲꓼ ꓢꓲ ꓧꓪ ꓢꓴ ꓮꓸ ꓟꓲ ꓧꓪ ꓟꓶ ꓠꓹ ꓟ ꓞꓽ ꓞꓽ ꓟꓳꓸ ꓖꓶ ꓔꓬˍ ꓡꓳ= ꓟꓲ ꓙꓬ ꓙꓲꓺ ꓡ ꓟ ꓔꓯ ꓩꓴ ꓠꓬ ꓢꓴˍ ꓟꓲ꓾ ꓬꓲ ꓟꓽ ꓪꓴꓽ ꓧꓶ ꓡꓰ ꓠꓹ ꓟ ꓬꓲ ꓐꓱ ꓗ ꓘꓶꓽ ꓓꓴꓽ ꓗꓪ ꓔꓬ ꓟ ꓔꓯ ꓚꓵ ꓚꓵ ꓡꓳꓸ ꓟꓳˍ ꓥꓳ= ꓙꓽ ꓗꓴꓸ ꓠꓲꓹ ꓔꓯ ꓓꓵꓽ ꓙꓽ ꓧꓪꓸ ꓔꓬ ꓢꓴ ꓠꓽ ꓬꓲ ꓜꓶꓻ ꓐꓰ ꓓꓵꓽ ꓙꓽ ꓔꓰ ꓡꓰ ꓢꓴ ꓥ ꓢꓲ꓾ ꓒ ꓐꓲ ꓐꓰ ꓪꓴꓽ ꓡ ꓟꓴ ꓡˍ ꓥꓳ= ꓖꓳ ꓟ ꓔꓯ ꓓꓵꓽ ꓙꓽ ꓧꓪꓸ ꓛꓲ ꓡꓳꓸ ꓔꓬ ꓢꓴˍ ꓟꓲ꓾ ꓬꓲ ꓓꓵꓽ ꓙꓽ ꓫꓸ ꓟ ꓗꓪ ꓐꓰ ꓮꓸ ꓟꓲꓸ ꓟꓲꓸ ꓗꓳꓸ ꓙꓰˍ ꓥꓳ= ꓙꓽ ꓗꓴꓸ ꓠꓲꓹ ꓠꓬ ꓘꓳ ꓣꓴ ꓒꓵꓽ ꓢꓴ ꓔꓯ ꓧꓪ ꓚꓳ ꓔꓬ ꓡꓳ= ꓠꓲꓹ ꓙꓽ ꓟꓬ ꓗꓳˍ ꓟ ꓠꓲꓹ ꓟ ꓡꓰ ꓙ ꓖꓴ ꓙ ꓐꓽ ꓗꓪ ꓬꓲ ꓔꓯ ꓟꓳꓸ ꓖꓶꓽ ꓔꓬ ꓡꓳ= ꓠꓲꓹ ꓫꓸ ꓟꓬ ꓫꓸ ꓙ ꓢꓲ ꓜꓲꓻ ꓡˍ ꓥꓳ=

1 ꓕꓯ-ꓢ-ꓡꓳ-ꓠꓲ-ꓬ 4ꓽ 13- 18

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓥꓳ ꓡꓳꓸ ꓓꓴ ꓟꓽ ꓙꓳ ꓢꓴ ꓠꓲꓹ ꓟ ꓫꓸ ꓟ ꓡꓰ ꓐꓰ ꓠꓲꓹ ꓟ ꓫꓸ ꓟꓽ ꓛꓵ ꓠꓹ ꓟ꓾ ꓫꓵꓻ ꓢꓴ ꓔꓯꓸ ꓟꓳꓸ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ꓮ ꓡꓲꓳ ꓐꓯ ꓠꓬ ꓬꓰ-ꓢꓴ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓟ ꓔꓯ ꓣꓳꓽ ꓙꓵˍ ꓠꓬꓲ꓾ ꓬꓰ-ꓢꓴ ꓠꓯꓸꓼ ꓗꓪ ꓫꓵꓻ ꓢꓴ ꓔꓯˍ ꓟꓲ꓾ ꓪꓴ-ꓢ ꓡꓰ ꓬꓰ-ꓢꓴˍ ꓐꓰ ꓕꓲ ꓛꓳꓺꓼ ꓧꓳꓽ ꓡ ꓥꓳ꓿ꓥꓪ ꓠꓴꓽ ꓠꓬ ꓢꓲ ꓒꓽ ꓐꓯ ꓘꓶ ꓕꓲ ꓘꓶ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓢꓲ ꓒꓽ ꓡ ꓗꓪ ꓛꓲ ꓢꓯꓸ ꓔꓬ ꓢꓴ ꓣꓳꓽ ꓠꓬ꓾ ꓮ ꓡꓲ ꓗꓹˍ ꓟꓲ ꓫꓵꓻ ꓢꓴ ꓐꓴ ꓟꓲꓽ ꓕꓯꓽ ꓢꓲ ꓗꓪ ꓟꓽ ꓗꓷ ꓡꓰ꓿ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓬꓲ ꓚꓲ ꓛꓬ ꓘꓴꓻ ꓢꓲ ꓕꓵꓼ ꓪꓽ ꓖꓶ ꓢꓲ ꓠꓬꓲ꓾ ꓟꓴꓽ ꓗꓪ ꓝꓲ ꓓꓴ ꓓꓽ ꓟ ꓘꓴꓻ ꓠꓬꓲ꓾ ꓪꓴ-ꓢ ꓬꓲ ꓐꓽ ꓡ ꓟꓶ ꓠꓬꓲ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓥꓳ꓿ ꓖꓳ ꓡꓱ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓫꓵꓻ ꓢꓴ ꓧꓶꓸ ꓕꓯ ꓢꓯꓸ ꓬꓲꓼ ꓡ ꓥꓳ꓿ꓖꓳ ꓕꓯ ꓢꓯꓸ ꓔꓬ ꓢꓰꓽ ꓢꓴ ꓣꓳꓽ ꓠꓬ ꓬꓲ ꓪꓽˍ ꓐꓰ ꓕꓲ ꓛꓳꓺꓼ ꓟꓵꓽ ꓪꓴ ꓗꓪ ꓢꓲ ꓒꓽˍ ꓐꓰ ꓜꓲꓻ ꓡꓯꓽ ꓘꓳ ꓠꓹ ꓟ꓾ ꓟꓴ ꓗꓴꓸ ꓗꓪ ꓛꓵꓽ ꓓꓯ ꓙꓰˍ ꓥꓳ꓿ ꓖꓳ ꓡꓱ ꓢꓲ ꓣꓳꓽ ꓠꓬ ꓮ ꓕꓯˍ ꓟꓲ ꓢꓲ ꓒꓽˍ ꓐꓰ ꓕꓲ ꓪꓺꓼ ꓔꓬ ꓥꓳ꓿ꓖꓳ ꓡꓱ ꓠꓬꓲ ꓠꓴ ꓪꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓐꓯ ꓘꓶ ꓕꓱ ꓟ ꓡꓰ ꓠꓲꓹ ꓟ ꓗꓴꓺ ꓖꓶ ꓡꓯꓽ ꓘꓳ꓿

ꓟ-ꓕꓲ 25ꓽ 1- 13

ꓦꓬꓼ ꓠꓬꓲ ꓖꓳ ꓟ ꓗꓪ ꓟꓴꓽ ꓗꓪ ꓗꓴꓷꓼ ꓠꓬ꓾ ꓟꓬ ꓡꓴꓻ ꓔꓯꓹ ꓔ ꓢꓲ ꓟꓯꓸ ꓡꓯꓸ ꓒ ꓔꓯ ꓞꓵꓺ ꓙꓰˍ ꓟ ꓤ ꓟꓶ ꓡꓯꓸ ꓞꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ꓬꓲ ꓪꓽ ꓗꓪ ꓟ ꓥꓪꓽ ꓣꓳ ꓠꓬ ꓞꓳ ꓙꓲꓽ ꓥ ꓢꓲ꓾ ꓥꓪꓽ ꓣꓳ ꓠꓽ ꓞꓳ ꓕꓰꓻ ꓥ ꓡꓳ꓿ꓞꓳ ꓙꓲꓽ ꓐꓴ ꓠꓬ ꓟꓬ ꓡꓴ ꓔꓯꓹ ꓔ ꓥ ꓟꓲ ꓟꓬ ꓞꓶ ꓠꓽ ꓟꓽ ꓔꓯꓹ ꓔ꓿ꓞꓳ ꓕꓰꓻ ꓐꓴ ꓠꓽ ꓟꓬ ꓡꓴ ꓔꓯꓹ ꓔ ꓢꓲ꓾ ꓟꓬ ꓞꓶꓻˍ ꓟꓲ ꓐꓬꓻ ꓗꓪ ꓧꓳꓽ ꓔꓯꓹ ꓔ ꓡꓳ꓿ꓟꓯꓸ ꓡꓯꓸ ꓒ ꓡ ꓟꓬ ꓬꓰ ꓠꓬꓲ꓾ ꓬꓲ ꓪꓽ ꓮꓽ ꓙꓵ ꓬꓲꓼ ꓟꓶ ꓕꓳꓹ ꓢꓲ ꓬꓲꓼ ꓟꓶ ꓡꓰꓳ꓿ꓦꓬꓼ ꓔꓱ ꓫꓵꓺ ꓗꓪ ꓠꓬ꓾ ꓟꓯꓸ ꓡꓯꓸ ꓒ ꓛꓲ ꓡꓺꓳ꓾ ꓓꓳ ꓡ ꓢꓲ ꓬꓲ ꓔꓯ ꓞꓵ ꓬꓰ꓾ ꓐꓰ ꓘꓴꓻˍ ꓟ ꓢꓯꓼ ꓙꓳˍ ꓡꓳ꓿ꓖꓳ ꓕꓯ ꓤ ꓟꓶ ꓡꓯꓸ ꓮꓽ ꓙꓵ ꓔꓴ ꓢꓲ ꓟꓬ ꓡꓴ ꓚ ꓞꓶꓽˍ ꓡꓳ꓿ꓞꓳ ꓙꓲꓽ ꓠꓬ ꓞꓳ ꓕꓰꓻ ꓐꓴ ꓔꓯ꓾ ꓠꓴ ꓪꓽ ꓟꓬ ꓞꓶꓻ ꓥꓪ ꓠꓴꓽ ꓔꓯ ꓮ ꓔꓲꓸ ꓤ ꓐꓱꓻ ꓖꓶ ꓡꓯ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓟꓬ ꓡꓴ ꓠꓽ ꓫꓵꓻˍ ꓐꓰ ꓗꓹ ꓡꓳ꓾ ꓐꓯˍ ꓡꓳ꓿ꓞꓳ ꓕꓰꓻ ꓡꓰ ꓒꓳꓹ ꓖꓶ ꓢꓲ꓾ ꓟꓽ ꓓ꓾ ꓮꓽ ꓧꓪꓹ ꓠꓴ ꓪꓽˍ ꓐꓰ ꓥꓪ ꓠꓴꓽ ꓐꓱ ꓶ ꓣꓱꓽ ꓟꓽ ꓡꓳꓼˍ ꓟꓽ ꓢꓷ꓿ ꓠꓴ ꓪꓽ ꓣꓱꓽ ꓓꓴ ꓠꓬ ꓟꓬ ꓞꓶꓻ ꓪꓴꓽ ꓢꓴ ꓔꓯ ꓪꓴꓻ ꓬꓰ ꓟꓴꓽ꓾ ꓐꓯ ꓖꓶˍ ꓡꓳ꓿ꓬꓲ ꓪꓽ ꓪꓴꓻ ꓙꓰ ꓕꓯ ꓟꓯꓸ ꓡꓯꓸ ꓒꓽ ꓛꓲ ꓡ ꓗꓷꓳ꓿ ꓙꓽ ꓖꓶ ꓔ ꓢꓴ ꓠꓬ꓾ ꓬꓲˍ ꓐꓰ ꓕꓲ ꓛꓳꓺꓼ ꓤ ꓟꓶꓻ ꓝꓱꓺˍ ꓟ ꓑꓮꓲ ꓗꓪ ꓓꓵꓽ ꓙꓰ ꓢꓲ ꓗ ꓘꓶꓽ ꓚꓵꓸ ꓗꓷꓳ꓿ꓤ ꓟꓶꓽ ꓡꓯꓸ ꓖꓳ ꓥꓪꓽ ꓣꓳ ꓠꓬ꓾ ꓗꓸ ꓠꓯꓸ ꓢꓲ ꓡ ꓢꓲ꓾ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓔꓯ ꓗ ꓘꓶꓽ ꓒꓴ ꓖꓶ ꓡꓯ꓾ ꓐꓯˍ ꓡꓳ꓿ꓖꓳ ꓡꓱ ꓥ ꓟꓲ ꓬꓲ ꓡꓰ꓾ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓔꓯ ꓥꓪ ꓟꓽ ꓢꓷ꓾ ꓐꓰ ꓒꓳꓹ ꓖꓶˍ ꓡꓳ꓿ꓖꓳ ꓡꓱ ꓠꓬꓲ ꓧꓪꓸ ꓛꓲ ꓔꓬ꓾ ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓡꓻˍ ꓟ ꓬꓲ ꓦꓬꓼ ꓠꓬꓲˍ ꓟꓲ꓾ ꓬꓲ ꓙꓵꓹˍ ꓟꓲ ꓠꓴ ꓪꓽ ꓟꓽ ꓢꓷ꓿

Add new comment

3 + 4 =