ꓪꓴ-ꓢ ꓠꓬ ꓬꓲꓸ ꓢꓲ ꓫꓬ ꓟ ꓦꓔꓯ ꓮ ꓟ ꓔꓯˍ ꓟꓲ ꓖꓶꓽ ꓟ

ꓠꓬꓲ. ꓠꓬꓲ 26 ꓠꓽ ꓢꓲ ꓒ ꓦꓬꓼ ꓠꓬꓲ ꓗꓪ ꓣꓳꓽ ꓵ ꓠ ꓔ ꓟ ꓟ. ꓟꓲꓽ ꓠꓬ꓾ ꓟ. ꓟꓲꓽ ꓬꓲꓽ ꓪꓴ. ꓕꓲꓽ ꓔꓳꓽ ꓟ
ꓑ‐ꓫꓬ‐ꓵ ꓕꓳ ꓶ 11ꓽ25‐29꓾ ꓟ. ꓟꓲꓽ ꓠꓬꓲꓽ ꓙꓰꓽ ꓟ ꓠꓬ ꓬ‐ꓗꓴ ꓕꓳ ꓶ 5ꓽ1‐6 ꓐꓰ ꓶꓼ ꓓꓳꓽ ꓫꓱ ꓓꓳꓽ ꓕꓳ ꓶ ꓠꓬ
ꓟ‐ꓘꓳ ꓕꓳ ꓶ 9ꓽ38‐43꓾ 45꓾ 47‐48 ꓗꓪ ꓛꓲ ꓥ ꓡꓳ꓿
ꓟ. ꓟꓲꓽ ꓬꓲ. ꓪꓴ. ꓕꓲꓽ ꓔꓳ ꓗꓪ ꓪꓴ‐ꓢ ꓠꓬ ꓟꓳ‐ꓫꓲ ꓐꓰ ꓫ ꓕꓱ ꓡꓯ ꓘꓳˍ ꓡꓳ꓿ ꓝꓮꓲ꓾ ꓬꓲ. ꓠꓬ ꓬꓲ. ꓢꓲꓽ
ꓫꓬ ꓟ ꓦ ꓔꓯ ꓟꓳ ꓫꓲ ꓡꓰ ꓢꓲꓺ ꓔ ꓟ ꓞꓳ ꓪꓴꓽ ꓞꓳ ꓔꓲ (70) ꓣꓳꓽ ꓔꓯ ꓖꓶꓽ ꓡꓳ꓿ ꓖꓳ ꓕꓯ ꓬꓲ. ꓪ ꓐꓴ ꓠꓬ ꓢꓲ ꓫꓬ
ꓟ ꓦ ꓡꓰ ꓐꓲꓺ ꓡꓰ ꓢꓲ꓾ ꓟꓷ ꓠꓷ ꓝ ꓪꓴ. ꓔꓴ. ꓡꓳ꓿ ꓖꓳ ꓡꓱ ꓥˍ ꓟꓲ ꓬꓲ ꓪ (70) ꓣꓳ ꓗꓪ ꓟꓽ ꓐ, ꓟ ꓞꓳ ꓡꓱ ꓤ
ꓠꓬꓲꓽ ꓣꓳ ꓥˍ ꓟꓲ ꓢꓲꓽ ꓫꓬ ꓟ ꓦ ꓗꓪ ꓐꓰ ꓟꓷ ꓠꓷ ꓝ ꓔꓬ ꓡꓳ꓿ ꓖꓳ ꓟ ꓔꓯ ꓬꓲ. ꓪ ꓟꓳˍ ꓠꓬ ꓟꓬꓺ ꓔꓳ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓟꓳ‐ꓫꓲ ꓔꓯ ꓪꓽ ꓗꓳ ꓖꓶꓽ ꓡꓳ꓿ ꓟꓳ‐ꓫꓲ ꓡꓰ ꓬꓲ. ꓪ ꓔꓯ ꓪꓴ‐ꓢ ꓦ ꓖꓶꓽ ꓟ ꓑꓶ. ꓓꓴ
ꓠꓴ ꓟꓬꓺ ꓔꓳꓺ ꓡ? ꓐꓰ ꓒꓳ ꓖꓶꓽˍ ꓡꓳ꓿
ꓶ ꓓꓳꓽ ꓫꓱ, ꓓꓳꓽ ꓗꓪ ꓥˍ ꓟꓲ ꓬꓳ‐ꓦ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓙꓰ ꓢꓲ꓾ ꓢꓲ ꓒ ꓳ ꓠꓴ ꓟꓬꓱ ꓗꓪ ꓐꓰ
ꓠꓲꓽ ꓖꓼ ꓔꓬ ꓫꓵꓽ ꓡ ꓞꓳ ꓕꓲꓽ ꓣꓳ ꓔꓯ ꓥꓪ ꓠꓴ ꓟꓳˍ ꓡꓳ꓿ ꓬꓲ. ꓠꓬ ꓥꓪ ꓣꓳꓽ ꓜꓴ ꓗꓪ ꓟꓽ ꓥ ꓟ ꓑꓶ. ꓓꓴ ꓬꓲ.
ꓔꓯ ꓕꓽ ꓬꓰ ꓠ, ꓟ ꓥꓪ ꓠꓴ ꓗꓽ ꓕ ꓔꓲ. ꓳ꓾ ꓐꓰ ꓐꓯ ꓖꓶꓽ ꓡꓳ꓿ ꓖꓳ ꓕꓯ ꓬꓰ‐ꓢꓴ ꓡꓰ ꓬꓲ. ꓔꓯ ꓕꓽ ꓗꓽ ꓔ꓾ ꓮ ꓡꓰꓳ ꓐꓯ
ꓠꓬ ꓥꓪ ꓔꓯ ꓟꓽ ꓙꓲ ꓫꓵꓽ ꓐꓯ ꓢꓴ ꓮ ꓟ ꓥˍ ꓟꓲ ꓓꓵꓽ ꓙ ꓮ ꓓꓴ ꓟꓬꓱꓽ ꓬꓰ ꓟ ꓘꓴ ꓣꓳꓽ ꓔꓯ ꓟꓽ ꓒꓳ ꓔꓳ ꓢꓴ ꓠꓬ
ꓣꓳ ꓔꓯ ꓟ ꓥꓳ ꓐꓰ ꓒꓳ ꓖꓶꓽˍ ꓡꓳ꓿
ꓠꓬꓲ. ꓠꓬꓲ. ꓟ. ꓟꓲꓽ ꓗꓪ ꓐꓰ ꓣꓳꓽ ꓔꓯ ꓟ. ꓖꓶꓽ ꓡˍ ꓟ ꓠꓬ ꓣꓳꓽ ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ ꓖꓼ ꓢꓴ ꓥ
ꓡꓳ꓿ ꓖꓳ ꓡꓱ ꓥˍ ꓟꓲ ꓣꓳꓽ ꓠꓬ ꓠꓬꓲ ꓠꓬꓲ ꓟ. ꓟꓲꓽ ꓓꓵˍ ꓟ ꓡꓰ ꓣꓳꓽ ꓐꓰ ꓟꓽ ꓫꓱ ꓡꓯ ꓘꓳ ꓢꓴ ꓔꓯ ꓟꓳ ꓟꓽ ꓟꓵꓽ
ꓐꓰ ꓬꓰ ꓗꓴ. ꓡꓳ꓿ ꓥ ꓠꓬ ꓟꓬꓺ ꓔꓳ ꓗꓴ. ꓡꓳ꓿ ꓐ, ꓐ ꓪꓴ‐ꓢ ꓠꓬ ꓬꓲ. ꓢꓲꓽ ꓫꓬ ꓟ ꓦ ꓔꓯ ꓠꓬ ꓬꓲ. ꓡ ꓞꓳ ꓔꓯ ꓡꓰ
ꓟꓽ ꓞꓲ ꓠꓱ. ꓐꓯ ꓢꓴ ꓬꓲ. ꓔꓯ ꓟꓽ ꓢꓷ. ꓢꓴ ꓔꓯˍ ꓟꓲ ꓬꓲ. ꓖꓶꓽ ꓗꓴ. ꓡꓳ꓿
ꓢꓲ ꓫꓬ ꓟ ꓦ ꓬꓲ. ꓢꓲꓽ ꓠꓬ ꓣꓳꓽ ꓢꓷ. ꓟ ꓡꓰ ꓐꓰ꓾ ꓠꓲ, ꓟ ꓫꓵꓺˍ ꓟ꓾ ꓠꓵ, ꓠꓲ ꓙꓳ ꓟ꓾ ꓠꓲ, ꓙ ꓟꓬꓺ
ꓗꓳ.ˍ ꓟ꓾ ꓢꓴ ꓔꓯ ꓟꓽ ꓙꓲ ꓟ ꓟꓽ ꓐꓯ ꓟ꓾ ꓙꓲ ꓟ ꓡꓰ ꓬꓰ ꓗꓴ. ꓟ ꓠꓬ꓾ ꓢꓲꓽ ꓫꓬ ꓟ ꓦ ꓬꓲ. ꓢꓲꓽ ꓥ ꓡꓳ꓿ ꓡ ꓞꓳ ꓕꓲꓽ
ꓣꓳ ꓟ꓾ ꓢꓲꓽ ꓫꓬ ꓟꓽ ꓐꓲ ꓓ ꓡꓳ ꓐꓰ ꓐꓯ ꓢꓲ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓮ ꓟꓬ ꓬꓰ ꓔꓬ ꓥˍ ꓟꓲ ꓬꓲ. ꓠꓬ ꓠꓵ, ꓠꓲ ꓟꓽ
ꓙꓳ꓾ ꓢꓴ ꓔꓯ ꓟꓽ ꓙꓲ ꓟ ꓡꓰ ꓕꓱˍ ꓕꓯ ꓬꓲ. ꓢꓲꓽ ꓫꓬ ꓟ ꓦ ꓠꓬ ꓪꓴ‐ꓢ ꓗꓪ ꓐꓰ ꓡ ꓟ ꓟꓽ ꓥ꓿
ꓖꓳ ꓡꓱ ꓠꓬꓲ ꓪꓴ‐ꓢ ꓠꓬ ꓬꓲ. ꓠꓲ, ꓫꓵˍ ꓟ ꓔꓯ ꓬꓲ. ꓢꓲꓽ ꓫꓬ ꓟ ꓦ ꓔꓯ ꓖꓶꓽ ꓡꓳ꓿ ꓓꓵꓽ ꓙ ꓮ ꓓꓴ ꓟꓬꓱꓽ
ꓬꓰ ꓡꓳ꓿ ꓬꓲ. ꓬꓰ ꓠꓲ, ꓫꓵ ꓟ ꓟꓬꓱꓽ ꓔꓯ ꓞꓳ ꓒꓬꓱꓽ ꓟ ꓢꓲꓺ ꓒꓴ ꓒꓴ ꓠꓯꓺ ꓠꓯꓺ ꓟꓽ ꓡꓳ. ꓐꓳꓺ ꓐꓳꓺ ꓫ. ꓫ. ꓟꓽ
ꓡꓳ. ꓡꓳ. ꓐꓰ ꓬꓲ. ꓢꓲꓺ ꓢꓲ ꓣꓱꓽ ꓖꓴ ꓙꓳ ꓗꓪ ꓣꓱꓽ ꓡꓳ꓿ ꓣꓳꓽ ꓢꓲ ꓒ ꓬꓰ‐ꓢꓴ ꓗ ꓠꓯ ꓖꓼ ꓢꓴ ꓬꓰ‐ꓢꓴ ꓢꓲ ꓤ ꓐꓴ ꓠꓬ
ꓠꓱ. ꓐꓯ ꓢꓴ ꓣꓳꓽ ꓬꓰ ꓟꓽ ꓘꓴ ꓫꓵꓽ ꓬꓰ ꓔꓬ, ꓕꓯ꓾ ꓣꓳꓽ ꓬꓰ ꓟꓽ ꓑꓶ. ꓫꓵꓽ ꓬꓰ ꓔꓬ ꓕꓯ꓾ ꓣꓳꓽ ꓠꓬ ꓒꓬꓱꓼ ꓡ ꓟꓽ ꓓ
ꓳ ꓐꓰ ꓐꓯ ꓢꓲ ꓡꓳꓺ ꓗꓷ ꓔ ꓫꓵꓽ ꓕꓯ ꓠꓱ. ꓐꓯ ꓢꓴ ꓬꓰ ꓔꓬ ꓕꓯ ꓕꓽ ꓟꓬꓺ ꓔꓳ ꓠ ꓗˍ ꓡꓳ꓿
ꓡ ꓞꓳ ꓕꓲ ꓣꓳ ꓠꓬ ꓙꓲ ꓢꓴ ꓢꓲ ꓤˍ ꓟꓲ ꓟꓽ ꓥ꓾ ꓪꓴ‐ꓢ ꓔꓯˍ ꓟꓲ ꓟꓽ ꓢꓷ.꓾ ꓖꓳ ꓡꓱ ꓥˍ ꓟꓲ ꓬꓲ. ꓠꓬ ꓠꓵ,
ꓠꓲ ꓪꓴꓽ ꓢꓲ ꓞꓳ ꓫ. ꓔ ꓬꓰ ꓙ ꓔꓬˍ ꓠꓬ꓾ ꓥ ꓠꓬ ꓠ., ꓢꓴ ꓒꓬꓽ ꓢꓴ ꓔꓯ ꓠꓬꓲ ꓙ ꓡꓳ. ꓙ ꓔꓬ ꓕꓯ꓾ ꓣꓳꓽ ꓗ ꓛ ꓠ ꓗˍ
ꓡꓳ꓿ ꓕꓱ ꓟꓬ ꓙꓲˍ ꓫꓵꓽ ꓬꓰ ꓟ ꓡꓰ ꓟꓽ ꓛꓲ ꓠꓲꓽ ꓖꓼ ꓔꓬ ꓫꓵꓽ ꓟꓬꓱꓽ ꓬꓰ ꓔꓬˍ ꓕꓯ ꓟꓲ ꓣꓳꓽ ꓠꓬ ꓐꓯ ꓗ ꓟꓽ ꓓ ꓟ ꓔꓯ
ꓢꓷ. ꓠ ꓔ ꓡꓳ꓿
ꓣꓳꓽ ꓠꓲ, ꓟ ꓠꓯ.ꓼ ꓗꓪ ꓢꓷ. ꓔ ꓠ, ꓟ ꓠꓬ ꓮ ꓟ ꓥˍ ꓟꓲ ꓙꓲ ꓟ ꓬꓰˍ ꓕꓯ꓾ ꓧ. ꓟ ꓬꓰˍ ꓕꓯ꓾ ꓠꓱ. ꓐꓯ
ꓢꓴ ꓐꓱ ꓶ ꓓꓵꓽ ꓙ ꓕꓯ ꓕꓽ ꓟꓬꓺ ꓔꓳ ꓠ ꓗˍ ꓡꓳ꓿ ꓗ ꓛꓲꓽ ꓠ ꓗˍ ꓡꓳ꓿ ꓪꓴ‐ꓢ ꓬꓲ. ꓢꓲꓽ ꓫꓬ ꓟ ꓦ ꓠꓬ ꓙꓲˍ ꓟ ꓡꓰ ꓬꓰ
ꓟ ꓑꓶ. ꓓꓴ ꓮ ꓟꓽ ꓔꓯ ꓪꓴ‐ꓢ ꓢꓲꓽ ꓫꓬ ꓟꓽ ꓦ ꓬꓯꓼ ꓙꓰ ꓥˍ ꓟꓲ ꓙꓲˍ ꓫꓵꓽ ꓥꓳ ꓐꓰ ꓓꓵꓽ ꓙ ꓔ ꓠ ꓗˍ ꓡꓳ꓿

ꓖꓳ ꓡꓱ ꓠꓬꓲ ꓣꓳꓽ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿ ꓣꓳꓽ ꓬꓰ ꓠ, ꓔ ꓟ ꓠꓬ꓾ ꓪꓴ‐ꓢ ꓡꓰ ꓣꓳꓽ ꓔꓯ ꓟꓲꓺ ꓠꓯ
ꓗꓪ ꓢꓯꓼ ꓔꓬ ꓝꓲ. ꓕꓲꓽ ꓑ ꓗꓪ ꓬꓰ ꓜꓲꓼ ꓙꓳ ꓟ ꓟꓬꓱꓽ ꓡꓰ ꓬꓰ꓿ ꓢꓴ ꓔꓯ ꓕ ꓟꓬꓺ ꓔꓳ꓾ ꓕ ꓠꓲ ꓦꓯ.꓾ ꓖꓳ ꓡꓱ ꓬꓰ ꓠꓬ
ꓪꓴ‐ꓢ ꓣꓳ ꓔꓯ ꓶꓼ ꓤ ꓫꓱ, ꓤ ꓖꓶꓽ ꓡ ꓥꓳ꓿