ꓪꓴ-ꓢ ꓠꓬ ꓬꓲ ꓑ ꓫꓬ ꓐꓴ ꓐꓰ ꓘꓶ ꓫꓵꓽ ꓫꓵꓼ ꓬꓰˍ ꓟ

ꓣꓳ ꓠꓬ ꓕꓲ ꓠꓽ ꓡꓰ ꓕꓲ ꓠꓽ ꓮ ꓡꓰ ꓐꓰ ꓛꓳ ꓫꓱꓽ ꓠꓹ ꓟ ꓪꓴ-ꓢ ꓠꓬ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ= ꓪꓴ-ꓢ ꓐꓰ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓽ ꓟꓳ ꓕꓲ ꓖꓺꓼ ꓡꓰꓽ ꓥꓳ= ꓪꓴ-ꓢ ꓠꓬ ꓟꓳꓸ ꓟꓲꓽ ꓗꓪ ꓐꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓔꓯ ꓟꓸ ꓖꓶ ꓑꓱ ꓖꓶ ꓡ ꓔꓬ ꓡꓳ= ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓡꓳ=ꓥꓪꓽ ꓠꓽ ꓕꓲ ꓠꓽ ꓠꓽ-ꓦꓬꓼ-ꓠꓬꓲ ꓛꓲ ꓡ ꓕꓯ ꓪꓴ-ꓢ ꓡꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓟ ꓠꓬ꓾ ꓪꓴ-ꓢ ꓠꓬ ꓣꓳ ꓐꓰ ꓘꓶꓽ ꓫꓵ ꓫꓵꓼ ꓕꓲ ꓟ ꓫꓬꓹ ꓔꓶˍ ꓥꓳ꓾ ꓐꓰ ꓢꓲꓽ ꓫꓬ ꓕꓳ ꓶ ꓬꓲ ꓪꓴꓸ ꓕꓲ ꓕꓱ ꓥ ꓟ ꓬꓰ-ꓡꓲ-ꓟꓲ ꓕꓳ ꓶ ꓗꓪ ꓐꓯ ꓔ ꓡꓳ= ꓘꓶ ꓫꓵꓽ ꓫꓵꓼ ꓕꓱ ꓟ ꓠꓬ ꓘꓶ ꓫꓵ ꓡꓵ ꓔꓯ ꓟꓽ ꓫꓱꓸ=

ꓮ ꓠꓱ ꓕꓯ ꓬꓲ-ꓙꓲ ꓟꓵꓽ ꓗꓪ ꓪꓴ-ꓢ ꓡꓰ ꓬꓲ-ꓢꓓ-ꓡꓰ ꓡ ꓞꓳ ꓐꓴ ꓔꓯ ꓖꓶ ꓗꓷ ꓟ ꓘꓶ ꓫꓵ ꓡꓵ ꓔꓯ ꓟꓽ ꓫꓱꓸ= ꓬꓲ ꓪ ꓠꓬ ꓬꓲ-ꓙꓲ ꓟꓵꓽ ꓗꓪ ꓔꓬ ꓕꓯ ꓪꓴ-ꓢ ꓐꓰ ꓘꓶ ꓫꓵ ꓡꓵ ꓕꓲ ꓟ ꓫꓬꓹ ꓔꓶˍ ꓕꓯ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓪꓴ-ꓢ ꓬꓲ ꓘꓶ ꓫꓵ ꓔꓯ ꓟꓽ ꓖꓼ ꓛꓳ꓾ ꓟꓽ ꓠ ꓡꓳꓸ ꓐꓰ ꓬꓰ ꓕꓯ ꓪꓴ-ꓢ ꓠꓬ ꓠꓲꓹ ꓟ ꓦꓶ ꓢꓲ ꓬꓲ ꓪ ꓔꓯ ꓟꓸ ꓙꓽ ꓗꓷꓳ=

ꓖꓳ ꓡꓱ ꓥ ꓟꓲ ꓮ ꓟꓶ ꓘꓶꓽ ꓫꓵꓽ ꓫꓵꓼ ꓕꓱ ꓟ ꓗꓪ ꓠꓬ ꓾ ꓥꓪ ꓠꓬ ꓕꓳꓽ ꓶ ꓕꓯ ꓢꓲ ꓗꓪ ꓟꓽ ꓐꓳ ꓠꓴ ꓪ ꓠꓲꓹ ꓟ ꓘꓴꓽ ꓗꓪ ꓡꓰꓽ ꓐꓳˍ ꓥꓳ= ꓠꓴ ꓪ ꓠꓲꓹ ꓟ ꓠꓯꓸꓼ ꓗꓪ ꓥꓪ ꓓꓵ ꓡˍ ꓥꓳ꓾ ꓠꓴ ꓪ ꓠꓲꓹ ꓟ ꓐꓰ ꓙ ꓡꓯ ꓘꓳˍ ꓥꓳ= ꓥꓪ ꓠꓬ ꓠꓴ ꓪ ꓪꓴ-ꓢ ꓒꓬꓱꓼ ꓡˍ ꓥꓳ= ꓠꓴ ꓪ ꓥˍ ꓟꓲ ꓥꓪ ꓡ ꓞꓳ ꓒꓬꓱꓼ ꓡˍ ꓥꓳ ꓐꓰ꓾ ꓐꓯ ꓟ ꓔꓯ ꓣꓳ ꓑ ꓙˍ ꓡꓳ=

ꓥ ꓡꓳ= ꓮ ꓠꓱ ꓡꓳꓸ ꓡ ꓟ ꓦꓬꓼ ꓠꓬꓲ ꓗꓪ ꓪꓴ-ꓢ ꓐꓰ ꓙ ꓡꓯ ꓘꓳ ꓖꓶ ꓙ ꓢꓴ ꓠꓬ ꓟꓷꓽ ꓠꓷꓹ ꓝ ꓢꓴ ꓐꓴ ꓡꓰꓽ ꓥ ꓡꓳ=