ꓪꓴ-ꓢ ꓠꓬ ꓬꓲ. ꓔꓯ ꓙꓵꓻ ꓢꓴ ꓔꓯ ꓙꓲˍ ꓟ ꓬꓰ ꓖꓶˍ ꓟ

ꓣꓦꓮ ꓔꓯ ꓠꓻ ꓠ ꓔꓬ, ꓢꓴ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓦꓻ ꓢꓯꓼ ꓪ ꓣꓴ ꓓꓴ ꓠꓬ ꓣꓳ‐ꓟ 8ꓽ38 ꓥꓳ꓿ ꓢꓲꓽ ꓫꓬ ꓕꓳ ꓶ ꓝꓲꓸ ꓗꓪ ꓠꓬ  “ꓪꓴ‐ꓢ ꓔꓯ ꓠꓲ, ꓠꓵ ꓢꓴˍ ꓐꓰ ꓬꓲ ꓔꓶ ꓙꓱꓼ ꓔꓯ ꓛꓳ ꓢꓲ ꓘꓴ ꓔ ꓢꓴ ꓐꓴ ꓐꓱ ꓶ ꓠꓬ꓾ ꓪꓴ‐ꓢ ꓡꓰ ꓮ ꓫꓵꓽ ꓗꓪˍ ꓟꓲ ꓙꓲˍ ꓟ ꓒꓬꓱꓼ ꓡ ꓝꓲˍ ꓟ ꓣꓳ ꓢꓷ. ꓡꓳ꓿” ꓐꓰ ꓐꓯ ꓡꓳ꓿

ꓪꓴ‐ꓢ ꓔꓯ ꓠꓲ, ꓠꓵ ꓢꓴ꓾ ꓬꓲ. ꓔꓯ ꓦ ꓡꓱ ꓢꓴ꓾ ꓬꓲ. ꓐꓯ ꓘꓶꓽ ꓔꓯ ꓛꓳ ꓢꓴ ꓔꓯ ꓠꓬ ꓙꓲˍ ꓟ ꓡꓰꓽ ꓪꓴ‐ꓢ ꓖꓶꓽˍ ꓥꓳ ꓐꓰ ꓬꓲ. ꓚꓲ. ꓛꓬ ꓡꓰ ꓪꓵꓼ ꓘꓶꓽ ꓖꓶꓽ ꓔ ꓡꓳ꓿ ꓠꓵ ꓠꓲ, ꓐꓯ ꓟ ꓮ ꓫꓵꓽ ꓥ ꓡ? ꓠꓵ ꓠꓲ, ꓐꓯ ꓟ ꓠꓬ ꓣꓳꓽ ꓠꓲ, ꓠꓵ ꓢꓴ ꓔꓯ ꓙꓲˍ ꓟ ꓬꓰ ꓖꓶꓽˍ ꓟ꓾ ꓬꓲ. ꓐꓱ ꓶ ꓓꓵꓽ ꓙ ꓖꓶꓽˍ ꓟ ꓐꓰ ꓐꓯ ꓠ ꓗˍ ꓡꓳ꓿ ꓖꓳ ꓡꓱ ꓠꓬ ꓪꓴ‐ꓢ ꓔꓯ ꓣꓳ ꓠꓲ, ꓠꓵ ꓡꓳ ꓐꓰ ꓐꓯ ꓕꓯ ꓣꓳꓽ ꓠꓬ ꓪꓴ‐ꓢ ꓔꓯ ꓮ ꓫꓵꓽ ꓙꓲˍ ꓟ ꓬꓰ ꓖꓶꓽ ꓐ ꓡ ꓡ? ꓬꓲ. ꓠꓬ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓥꓳ꓿ ꓣꓳꓽ ꓠꓽ ꓮ ꓫꓵꓽ ꓕꓲꓽ ꓫꓵꓽ ꓬꓰ ꓖꓶꓽ ꓐ ꓡ  ꓡ?

ꓥ ꓡꓳ꓿ ꓣꓳꓽ ꓪꓴ‐ꓢ ꓔꓯ ꓠꓲ, ꓠꓵ ꓕꓯ ꓪꓴ‐ꓢ ꓠꓲ, ꓡꓶ ꓛꓳˍ ꓟ ꓗꓪ ꓐꓰ ꓪꓴ‐ꓢ ꓔꓯ ꓗ, ꓛꓲ ꓡꓰ ꓝꓲ ꓐ ꓡ ꓡꓳ꓿ ꓪꓴ‐ꓢ ꓠꓬ ꓣꓳ ꓬꓲ. ꓐꓯ ꓘꓶꓼ ꓠ ꓠ ꓕꓯ ꓗ, ꓛꓲꓽˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ? ꓣꓳꓽ ꓠꓬ ꓪꓴ‐ꓢ ꓔꓯ ꓠꓲ, ꓠꓵ ꓢꓲ ꓬꓲ. ꓐꓯ ꓘꓶꓽ ꓛꓳˍ ꓕꓯ ꓠꓬ ꓣꓳꓽ ꓚꓬꓴꓸ ꓟꓶˍ ꓟ ꓥꓳ꓿ ꓣꓳꓽ ꓚꓬꓴꓸ ꓟꓶˍ ꓟ ꓑꓶ. ꓓꓴ ꓪꓴ‐ꓢ ꓠꓬ ꓠꓲ, ꓘꓪꓽ ꓫꓵˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ. ꓡꓰ ꓞꓳ ꓤ ꓔꓯ ꓚꓰꓼ ꓔ ꓟ ꓠꓬ ꓮ ꓙꓵꓽ ꓢꓴ ꓚꓬꓴꓸ ꓟꓶ ꓠ, ꓟ ꓥꓳ꓿

ꓖꓳ ꓡꓱ ꓠꓬꓲ ꓣꓳꓽ ꓪꓴ‐ꓢ ꓔꓯ ꓠꓲ, ꓠꓵ ꓔꓬ ꓡ? ꓣꓳꓽ ꓠꓲ, ꓠꓵ ꓟ ꓡꓰ ꓐꓰ ꓣꓳꓽ ꓛꓳ ꓙꓳˍ ꓟ ꓗꓪ ꓟꓳ. ꓖꓶꓽ ꓔꓬ, ꓡ? ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ꓿

ꓕꓲ ꓖ ꓕꓲꓽ ꓧꓪ, ꓣꓳꓽ ꓠꓬ ꓪꓴ‐ꓢ ꓔꓯ ꓠꓲ, ꓠꓵ ꓥˍ ꓟꓲ ꓣꓳ ꓠꓬ ꓫ ꓙꓵ ꓟꓷꓼ ꓙꓵ ꓓꓴ꓾ ꓠꓲ, ꓫ ꓟꓬꓺ ꓫ ꓓꓴ ꓔꓳ, ꓜꓳꓽˍ ꓟ ꓔꓯ ꓣꓳ ꓢꓷ.ˍ ꓡꓳ꓿ ꓖꓳ ꓡꓱ ꓟ ꓦꓬꓼ ꓠꓬꓲ ꓗꓪ ꓠꓬꓲ. ꓠꓬꓲ ꓟ. ꓟꓲꓽ ꓝꓲ. ꓠꓬ ꓮ ꓡꓰ ꓐꓰ ꓗꓷ ꓡꓰ ꓥꓳ ꓪ꓿ ꓟ. ꓟꓲꓽ ꓗꓪ ꓣꓳꓽ ꓠꓬ ꓪꓴ‐ꓢ ꓔꓯ ꓠꓲ, ꓠꓵ ꓕꓯ ꓬꓲ. ꓠꓬ ꓙꓲˍ ꓟ ꓬꓰ ꓖꓶꓽˍ ꓡꓳ ꓐꓰ ꓐꓯ ꓔ ꓡꓳ=

ꓣꓳꓽ ꓢꓷ. ꓠ, ꓟ  ꓠꓬ ꓣꓳꓽ ꓔꓳ, ꓜꓳꓽ ꓔꓬ, ꓟ ꓠꓲ, ꓫ ꓟꓬ ꓫ ꓓꓴ꓾ ꓪꓴ‐ꓢ ꓠꓬ ꓣꓳꓽ ꓔꓯ ꓡꓳ ꓒꓰ, ꓗꓷ ꓟ ꓫꓱ. ꓫꓱ. ꓡꓰꓽ ꓓꓹ ꓥˍ ꓟꓲ ꓣꓳꓽ ꓔꓳ, ꓜꓳꓽ ꓔꓬ, ꓟ ꓠꓲ, ꓫ ꓓꓴ ꓖꓳ ꓟ ꓗꓪ ꓥˍ ꓟꓲ ꓬꓲ. ꓬꓲ ꓢꓲ ꓙꓳˍ ꓡꓳ ꓐꓯ ꓟ ꓔꓯ ꓣꓳꓽ ꓢꓷ. ꓠꓯꓹ ꓟ ꓥꓳ꓿

ꓪꓴ‐ꓢ ꓠꓬ ꓬꓲ. ꓔꓯ ꓙꓵꓻ ꓢꓴ꓾ ꓬꓲ. ꓔꓯ ꓠꓲ, ꓠꓵ ꓢꓴ ꓮ ꓟ ꓔꓯˍ ꓟꓲ ꓙꓲˍ ꓟ ꓬꓰ ꓖꓶꓽˍ ꓟ ꓥ ꓡꓳ꓿